ಬೆಂಗ್ಲೂರ್: ಬೆಳಗಾವಿ ಗಡಿ ವಿವಾದಗ್ ಸಂಬಂಧ ಪಟ್ಟಿನಂಚನೆ ಸಂದಾಯಿನ ಅರ್ಜಿದ ವಿಚಾರಣೆ ಎಲ್ಲೆ ಸುಪ್ರೀಂ ಕೋರ್ಟ್ ಡ್ ನಡಪರೆ ಉಂಡು.
ಈ ಬಗೆಟ್ ಬೆಳಗಾವಿಡ್ ಬಿಗಿ ಭದ್ರತಾ ವ್ಯವಸ್ಥೆ ಮಲ್ಪೆರೆ ಆತ್ಂಡ್. ಎಡಿಜಿಪಿ ಅಲೋಕ್ ಕುಮಾರ್ ಈ ಬಗೆಟ್ ಮಹಾರಾಷ್ಟ್ರದ ಗಡಿ ಜಿಲ್ಲೆದ ಪೊಲೀಸ್ ಅಧಿಕಾರಿಲೆನೊಟ್ಟಿಗೆ ಕಾನೂನು ಬೊಕ್ಕ ಸುವ್ಯವಸ್ಥೆ ಕಾಪಾಡುವ ದಿಟ್ಟಿಡ್ ನಿಕಟ ಸಹಕಾರದ ಬಗೆಟ್ ಸಮಾಲೋಚನೆ ನಡಪಾದೆರ್. ಅಂಚನೆ ಡೆಲ್ಲಿಡ್ ಇಪ್ಪುನ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಪೆರಿಯ ವಕೀಲೆರ್ ಮುಕುಲ್ ರೋಹ್ಟಗಿ ಮೆರೆನೊಟ್ಟಿಗೆ ಪಾತೆರ್ದೆರ್.
ಡೆಲ್ಲಿ: ಗುರ್ತ ಇಜ್ಜಂದಿನ ಒವ್ವೇ ಪೊಣ್ಣನ್ ಅತ್ತ್ಂಡ ಪೊಂಜೋವ್ ನ್ 14 ಸೆಕೆಂಡ್ ರ್ದ್ ಹೆಚ್ಚ ಪೊರ್ತು ಓಂಗುದ್ ತೂಂಡ, ಬೊರ್ಚಂದಿನ ರೀತಿಡ್ ಸನ್ನೆ ಮಲ್ತ್ಂಡ, ಪದ್ಯ ಪಂಡ ಐಪಿಸಿ ಸೆಕ್ಷನ್ದಡಿಟ್ ಅರೆಸ್ಟ್ ಮಲ್ಪೊಲಿ ಪಂದ್ ನ್ಯಾಷನಲ್ ಕ್ರೈಂ ಇನ್ವೆಷ್ಟಿಗೇಶನ್ ಬ್ಯೂರೋ (NCIB) ಪುದರ್ ದ ಸ್ವಯಂ ಸೇವಾ ಸಂಘಟನೆ ಪಂತ್ಂಡ್.
ಈ ಸ್ವಯಂ ಸೇವಾ ಸಂಘಟನೆದ ಲೋಗೋ ಪೊಲೀಸ್ ಇಲಾಖೆದ ಲೋಗೋದಲೆಕ್ಕನೇ ಉಂಡು. ಸಂಸ್ಥೆದ ಈ ಟ್ವೀಟ್ ಸಾಮಾಜಿಕ ಜಾಲತಾಣಡ್ ಭಾರೀ ಚರ್ಚೆ ಆವೊಂದು ಉಂಡು. ಅಂಚನೆ ಆಣ್ ಜೋವ್ ನಕ್ಲೆನ ಈ ವರ್ತನೆ ಭಾರತೀಯ ದಂಡ ಸಂಹಿತೆ ಸೆಕ್ಷನ್ 294 (A) ಬೊಕ್ಕ (B) ಪ್ರಕಾರ ಶಿಕ್ಷಾರ್ಹ ಅಪರಾಧ ಆಪುಂಡು. ಬರೆದ್ ಮೆಸೇಜ್ ಕಡಪಾವುನ ಅಪರಾಧಗ್ ಗರಿಷ್ಠ 3 ತಿಂಗೊಲ್ದ ಶಿಕ್ಷೆ ಕೊರೊಲಿ. ಆಯಿರ್ದ್ದಾವೆರ ಈ ಸೆಕ್ಷನ್ದಡಿಟ್ ಕೇಸ್ ದಾಖಲ್ ಮಲ್ಪೊಲಿ ಪಂದ್ ಎನ್ಜಿಒ ತೆರಿಪಾದ್ಂಡ್.
ಅಮೃತಸರ: ಪಂಜಾಬ್ ದ ಗಡಿ ಜಿಲ್ಲೆ ಅಮೃತಸರಟ್ ಪಾಕಿಸ್ತಾನದ ಕಡೆರ್ದ್ ರಾವೊಂದು ಬತ್ತಿನ ಡ್ರೋನ್ ನ್ ಗಡಿಟ್ ಕಾವಲ್ ಕಾತ್ತೊಂದು ಇಪ್ಪುನ ಗಡಿ ಭದ್ರತಾಪಡೆ ಯೋಧೆರ್ ನಾಶ ಮಲ್ದೆರ್.
ಇಂಚಿಪ್ಪ ದಿನಟ್ ಅಮಲ್ ಸೊತ್ತುಲೆನ್ ಕಂಡ್ ದ್ ಕೊನೊಂದು ಇತ್ತಿನ ಸಾಗಾಟಗಾರೆರ್ ಡ್ರೋನ್ ದ ಮುಖೇನ ಕೊನೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
ಲಂಡನ್: ಬ್ರಿಟನ್ ಡ್ ವಾರಡ್ ಐನ್ ದಿನತ ಬದಲಾದ್ ನಾಲ್ ದಿನ ಬೇಲೆ ಪನ್ಪುನ ಹೊಸ ನೀತಿ ಜಾರಿಗ್ ಬೈದ್ಂಡ್. ನೆಕ್ ಇತ್ತೆ ನೂದೆರ್ದ್ ಲ ಹೆಚ್ಚ ಕಂಪೆನಿಲು ಕೈ ತಾಂಗ್ ಕೊರ್ತುಂಡು.
ಮುಲ್ಪ ಇತ್ತೆ ವಾರಡ್ ನಾಲ್ ದಿನ ಬೇಲೆ ಮಲ್ತ್ಂಡಲ ತಿಂಗೊಲ್ದ ಸಂಬಳ ಕಟ್ ಮಲ್ತಿಜಿ. ಇಡೀ ತಿಂಗೊಲ್ದ ಸಂಬಳ ತಿಕ್ಕುಂಡು. ಈ ಸೌಲಭ್ಯ ಇತ್ತೆ ಸುಮಾರ್ 2600 ಸಿಬ್ಬಂದಿಗ್ ತಿಕೊಂದುಂಡು. ದುಂಬುದ ದಿನಟ್ ಉಂದು ನನಾತ್ ಹೆಚ್ಚಾಪುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಬೆದ್ರದ ಸ್ಫೂರ್ತಿ ಭಿನ್ನ ಸಾಮರ್ಥ್ಯದ ಜೋಕುಲೆನ ಶಾಲೆದ ಜೋಕುಲೆನ ನಿರ್ವಹಣೆಗ್ ತಿಂಗೊಲುಗು ಸುಮಾರ್ 2 ಲಕ್ಷ ರೂ. ಪನವುದ ಅವಶ್ಯಕತೆ ಉಂಡು ಪಂದ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ಗ್ ಬಿನ್ನಾಪು ಬತ್ತಿತ್ತ್ಂಡ್. ಆ ಬಿನ್ನಾಪುಗ್ ಕೆಬಿ ಕೊರಿನ ಈ ಕೂಟದ ವತಿರ್ದ್ ಗಣ್ಯೆರೆನ ಬೊಕ್ಕ ತಂಡದ ಪದಾಧಿಕಾರಿಲು, ಬೊಕ್ಕ ಸೇವಾ ಮಾಣಿಕ್ಯೆರೆನ ಎದುರುಡ್ 15,000 ರೂ.ದ ಚೆಕ್ ನ್ ಬೆದ್ರದ ತಾಲೂಕ್ ಪತ್ರಕರ್ತೆರೆನ ಕಚೇರಿಡ್ ಕೂಟದ ಪದುಕೆರ್ ಕೊರಿಯೆರ್.
ಅಂಚೆನೆ ಪಣಂಬೂರು ನಿವಾಸಿ ಸುಭಾಷ್ ಪೂಜಾರಿ ಮೆರೆನ ಬೊಡೆದಿ ನೆತ್ತೆರ್ ಕ್ಯಾನ್ಸರ್ ರ್ದ್ ಹುಷಾರ್ ಇಜ್ಜಂದೆ ಇತ್ತೆರ್. ಮೆರೆಗ್ bone myaro trance plant ಮುಖೇನ ಕಿಮೋಥೆರಪಿಗ್ 30 ಲಕ್ಷ ಪನವುದ ಅಗತ್ಯ ಇತ್ತ್ಂಡ್. ಮೇರ್ ಈ ಕೂಟಗ್ ಬಿನ್ನಾಪು ಮಲ್ತಿತ್ತೆರ್. ಮೆರೆಗ್ ಲ 15,000 ರೂ. ದ ಚೆಕ್ ನ್ ಉಂದುವೇ ಪೊರ್ತುಡು ಕೊರಿಯೆರ್. ಈ ಸೇವಾ ಕಾರ್ಯಗ್ ಪ್ರತ್ಯಕ್ಷ ಬೊಕ್ಕ ಪರೋಕ್ಷವಾದ್ ಸಹಕಾರ ಮಲ್ತಿನ ಮತೆರೆಗ್ಲಾ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ದಕುಲು ಸೊಲ್ಮೆ ಸಂದಾದೆರ್.
ಗೆಜ್ಜೆಗಿರಿಟ್ ಪೊಸತ್ತಾದ್ ಉದಿಪನ ಆಯಿನ ಗೆಜ್ಜೆಗಿರಿ ಯಕ್ಷಗಾನ ಮೇಳಗ್ ಸೌದಿ ಬಿಲ್ಲವಾಸ್ ವತಿರ್ದ್ ಒಟ್ಟು ಮಲ್ತಿನ ಒಂಜಿ ಲಕ್ಷದ ಪತ್ತ್ ಸಾರ ರೂ. ಪನವು ಸಕಾಯದ ಚೆಕ್ಕ್ ನ್ ಐತಾರದಾನಿ ಶ್ರೀ ಕ್ಷೇತಡ್ ಕೊರಿಯೆರ್.
ಸೌದಿ ಬಿಲ್ಲವ ಸಂಘದ ಮಾಜಿ ಪದಾಧಿಕಾರಿಲಾಯಿನ ರವಿ ಕುಮಾರ್ ಪುತ್ತೂರ್ ಬೊಕ್ಕ ಪ್ರಕಾಶ್ ಪೂಜಾರಿ ಕಟಪಾಡಿ ಮೊಕುಲು ಗೆಜ್ಜೆಗಿರಿ ಸಮಿತಿಗ್ ಚೆಕ್ ಕೊರಿಯೆರ್. ಈ ಪೊರ್ತುಡು ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಅಧ್ಯಕ್ಷೆರ್ ಪೀತಾಂಬರ ಹೆರಾಜೆ, ನಿಕಟಪೂರ್ವ ಅಧ್ಯಕ್ಷೆರ್ ಜಯಂತ್ ನಡುಬೈಲು ಬೊಕ್ಕ ಮಾತ ಗೌರವಾನ್ವಿತ ಪದಾಧಿಕಾರಿಲು ಇತ್ತೆರ್. ಬೊಕ್ಕ ಗೆಜ್ಜೆಗಿರಿ ಸಮಿತಿದ ಮಾತ ಪದಾಧಿಕಾರಿಲು ಸೌದಿ ಬಿಲ್ಲವ ಸಂಘದ ಎಡ್ಡೆ ಕಾರ್ಯಲೆನ್ ಮೆಚ್ಚಿಯೆರ್. ಬ್ರಹ್ಮಶ್ರೀ ನಾರಾಯಣ ಗುರುಕ್ಕುಲು ಸೌದಿಡ್ ಇಪ್ಪುನ ಮಾತ ಬಿಲ್ಲವ ಸಮುದಾಯದ ಕುಟುಂಬಗ್ ಆಯುರಾರೋಗ್ಯ ಸುಖ ಶಾಂತಿ ನೆಮ್ಮದಿ ಕೊರಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್. ಸೌದಿ ಬಿಲ್ಲವಾಸ್ ವತಿರ್ದ್ ನನಾತ್ ಎಡ್ಡೆ ಬೇಲೆಲು ನಡಪಡ್ ಪಂದ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ ಆಶೀರ್ವಾದ ಮಲ್ತೆರ್.
✍️ಸಂದೇಶ್ ಕರ್ಕೇರ
The Saudhi Billavas Association have collected a sum of rupees one lakh ten thousand and a cheque of the same amount was presented to the newly formed Gejjegiri Yakshagana Mela.
Former committee members of the Saudhi Billavas Association Ravi Kumar Puttur and Prakash Poojary Katpadi handed over the cheque in the presence of the president of Gejjegiri Jayant Nadubail and committee members who applauded the excellent work of Saudi Billavas Association and wished well for the Billavas and their families residing in Saudhi Arabia.
ಬಾಲಭವನ ಮಣ್ಣಗುಡ್ಡೆಡ್ ನ.25 ಕ್ ರೋಟರಿ ಕ್ಲಬ್ ಬೈಕಂಪಾಡಿ ಮುಕ್ಲೆನ ಗೇನಸಿರಿ ಮುಗಿತಲ ಲೇಸ್ ದ ಉದಿಪನ ನಡತ್ಂಡ್.
ಈ ಲೇಸ್ ನ್ ಉದಿಪನ ಮಲ್ತ್ ದ್, ರೋಟರಿ ಜಿಲ್ಲೆ 3181 ತ ರಾಜ್ಯಪಾಲೆರ್ ಪ್ರಕಾಶ್ ಕಾರಂತ್ ಪಾತೆರ್ದ್, ರಾಜ್ಯೊರ್ಮೆ ಪ್ರಾದೇಶಿಕ ಸಂಸ್ಕೃತಿ, ಬಾಸೆಲೆನ ಬುಲೆಚ್ಚಿಲ್ದ ಲೇಸ್ಲ್ ನಡಪೊಡ್, ತುಲುಕ್ ಎಡ್ಡೆ ಮಾನಾದಿಗೆ ತಿಕ್ಕ್ ದ್, ನಮ್ಮ ತುಲುವೆರೆನ್ ಗೌರವಿಸಾವುಲೆಕ ಆವೊಡು, ಅಂಚನೆ ತುಲುನಾಡ್ದ ಮಾತೆರ್ಲ ತುಲು ಲಿಪಿ ಕಲ್ತ್ದ್ ನನದ ಪೀಳಿಗೆಗೆ ತುಲು ಬಾಸೆ, ಸಂಸ್ಕೃತಿ ಒರಿಪಾವರೆ ಪುನೆವೊಡು ಪಂದ್ ಪಂಡೆರ್. ಬೊಕ್ಕ ಗೇನಸಿರಿ ಲೇಸ್ದ ಸಂಚಾಲಕೆರ್ ಶ್ರೀಕಾಂತ್ ಶೆಟ್ಟಿ ಬಾಳ ಪಾತೆರ್ದ್, ರೋಟರಿ ಜಿಲ್ಲಾ ಯೋಜನೆದ ಲೆಕ್ಕೊಡು ಈ ಲೇಸ್ನ್ ಮಲ್ತ್ದ್ ಆನ್ಲೈನ್ ಮುಕೇನ ತುಲು ಲಿಪಿ ಕಲ್ಪಾವುನ ಈ ಕಜ್ಜೊಡ್ 150 ರ್ದ್ ಜಾಸ್ತಿ ಜನಕುಲು ಕಲ್ತ್ದ್ ಉಂದೆತ ಪ್ರಯೋಜನ ಪಡೆತೆರ್. ಬೊಕ್ಕ ಪಿದಯಿ ಜಿಲ್ಲೆದ ಆಸಕ್ತೆರ್ಲಾ ಪಾಲ್ ಪಡೆಯಿನ ಕುಸಿ ಕೊರ್ತುಂಡು ಪಂದ್ ಪಂಡೆರ್. ಈ ಲೇಸ್ ಗ್ ರೋಟರಿ ಉಪರಾಜ್ಯಪಾಲೆರ್ ಬಾಲಕೃಷ್ಣ ಶೆಟ್ಟಿ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಪದುಕೆರ್ ನಾಗೇಶ್ ಕುಲಾಲ್ ಮಲ್ಲಬಿನ್ನೆರಾದ್ ಪಾಲ್ ಪಡೆದ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ತುಲು ಲಿಪಿ ಕಲ್ಪಾದಿಲು (ಶಿಕ್ಷಕೆರ್) ಆಯಿನ ಜಗದೀಶ ಗೌಡ ಕಲ್ಕಳ, ಕಿನ್ನು ಭಂಡಾರಿ ಒಡಿಪು, ಕುಶಾಲಾಕ್ಷಿ ಸೂರಿಂಜೆ, ಉಷಾ ಕೃಷ್ಣಾಪು ಮುಕ್ಲೆಗ್ ಮಾನಾದಿಗೆ ಮಲ್ತೆರ್. ಈ ಪೊರ್ತುಡು ರೋಟರ್ ಜಿಲ್ಲಾ ಸಾಕ್ಷರತ ಸಂಚಾಲಕೆರ್ ಪ್ರಸಾದ್ ಪ್ರಭು, ಗೇನಸಿರಿ ಲೇಸ್ದ ಕಾರ್ಯಂತೆರ್ ಗಂಗಾಧರ್ ಬಂಜನ್, ಕ್ಲಬ್ದ ಮಾತ ಪದುಕೆರ್ ಕುಟುಮ ಸಮೇತ ಪಾಲ್ ಪಡೆದಿತ್ತೆರ್. ಆಯಿರ್ದ್ ಬೊಕ್ಕ ತುಳುನಾಡ್ದ ಶೈಲಿದ ವನಸ್ದ ಅಟ್ಟನೆ ಇತ್ಂಡ್. ರೋಟರಿ ಕ್ಲಬ್ ಬೈಕಂಪಾಡಿ ಗುರ್ಕಾರೆ ಅಶೋಕ್ ಎನ್ ಸುರತ್ಕಲ್ ಗುರ್ಕಾರ್ಮೆದ ಮಣೆಟ್ ಇತ್ತೆರ್. ಸಾನ್ವಿ ಶೆಟ್ಟಿ ತುಲುನಾಡ್ದ ನಲಿಕೆದ ಮುಕೇನ ಮಾತೆರೆನ್ಲ ಎದ್ಕೊಂಡೆರ್. ಅರ್ಪಿತಾ ಶೆಟ್ಟಿ ಲೇಸ್ ಸುದಾರ್ತ್ ಕೊರ್ಯೆರ್. ದಿನೇಶ್ ಬಂಗೇರ ಸುಗಿತೆರ್. ಕಾರ್ಯಂತೆರ್ ಹರೀಶ್ ಬಿ ಶೆಟ್ಟಿ ಸೊಲ್ಮೆ ಸಂದೈತ ಮಲ್ತೆರ್.
ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಬಯಲಾಟ ಡಿ.8 ಗುರುವಾರದಾನಿ ರಾತ್ರೆ 8 ಗಂಟೆಗ್ ಪಾಲಡ್ಕ ಗ್ರಾಮದ ಕೇಪುಲ್ (ನ್ಯೂ ದರ್ಖಾಸ್) ಇಲ್ಲಲ್ ಪಾಡಿನ ರಂಗಮಂಟಪಡ್ ನಡಪರೆ ಉಂಡು.
ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಪ್ರಸಾದ ದೆತೊಂದು, ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕೇಪುಲ್ ಇಲ್ಲ್ ಪಾಲಡ್ಕದ ವಸಂತಿ ಬೊಕ್ಕ ದಿನೇಶ ಸಾಲ್ಯಾನ್, ಬೊಕ್ಕ ರಕ್ಷಿತಾ ಲೆಪ್ಪೋಲೆಡ್ ತೆರಿಪಾದೆರ್.
ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಬಯಲಾಟ ನ.27 ಐತಾರದಾನಿ ರಾತ್ರೆ 8 ಗಂಟೆಗ್ ಪಾಲಡ್ಕ ಗ್ರಾಮದ ಪೊಸಲಾಯಿ ಇಲ್ಲ್ ಬಾಕಿಮಾರ್ ಕಂಡಡ್ ಪಾಡಿನ ರಂಗಮಂಟಪಡ್ ನಡಪರೆ ಉಂಡು.
ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಪ್ರಸಾದ ದೆತೊಂದು, ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಪೊಸಲಾಯಿ ಇಲ್ಲ್ ಪಾಲಡ್ಕದ ಸುಶೀಲಾ ಪೂಜಾರಿ ಬೊಕ್ಕ ಜೋಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಬ್ರಹ್ಮ ಶ್ರೀ ನಾರಾಯಣ ಗುರು ಸೇವಾ ಸಂಘ (ರಿ)ಕಡಂದಲೆ-ಪಾಲಡ್ಕ ಮಹಿಳಾ ಘಟಕದ ಅಧ್ಯಕ್ಷೆರೆನ ಬೊಕ್ಕ ಉಪಾಧ್ಯಕ್ಷೆರೆನ, ಸದಸ್ಯರೆನ ಪದಾಧಿಕಾರಿಲೆನ ಪದಗ್ರಹಣ ಲೇಸ್ ಇಂಚೊಗು ಬಿಲ್ಲವ ಸಂಘದ ವಠಾರಡ್ ನಡತ್ಂಡ್.
ಅಧ್ಯಕ್ಷೆರಾದ್ ಸೌಮ್ಯ ಗಣೇಶ್ ಕೋಟ್ಯಾನ್, ಉಪಾಧ್ಯಕ್ಷೆರಾದ್ ಲೀಲಾ ಆನಂದ್, ಕಾರ್ಯದರ್ಶಿ ಆದ್, ಪೂಜಾ ಉದಯ್, ಜೊತೆ ಕಾರ್ಯದರ್ಶಿ ಯಾದ್ ಜ್ಯೋತಿ ಸೀತಾರಾಮ್, ಕೋಶಾಧಿಕಾರಿಯಾದ್ ಶರ್ಮಿಳಾ ಕೇಶವ್ ಆಯ್ಕೆ ಆತೆರ್. ಸಂಘದ ಉಪಾಧ್ಯೆಕ್ಷೆರ್ ಲೀಲಾಧರ್ ಪೂಜಾರಿ ದೀಪ ಅರ್ಲಾಯೆರ್. ಅಜಯ್ ಪ್ರಾರ್ತನೆ ಮಲ್ತೆರ್. ವಸಂತಿ ಜಗದೀಶ್ ನಿರೂಪಣೆನ್ ಮಲ್ತೆರ್. ಪದಾಧಿಕಾರಿಲೆನ ಪರಿಚಯನ್ ಪಾವನ ಸಂತೋಷ್ ತೆರಿಪಾಯೆರ್.
ಈ ಪೊರ್ತುಡು ಪದ್ಮನಾಭ ಅಮೀನ್ ಬೊಕ್ಕ ನಾರಾಯಣ ಪೂಜಾರಿ ಕೊರಂಗಲು, ಗೌರವ ಸಲಹೆಗಾರೆರ್ ಬಿಲ್ಲವ ಸಂಘ ಬೊಕ್ಕ ಜಗದೀಶ್ ಕಲ್ಲೋಟ್ಟು ಸದಸ್ಯೆರ್, ಬಿಲ್ಲವ ಸಂಘ ಭಜನಾ ಮಂಡಳಿದ ಅಧ್ಯಕ್ಷೆರ್ ಶಿವರಾಮ್ ಇತ್ತೆರ್.
