ಪುತ್ತೂರ್: ಕಾಸ್ ದ ವಿಚಾರವಾದ್ ನಡತಿನ ಗಲಾಟೆ ಹೆಚ್ಚಾದ್, ಪರ್ತಿನ ಅಮಲ್ ಡ್ ಅಣ್ಣೆಯೊರಿ ಮೆಗ್ಯನ್ ಕೆರ್ನ ಘಟನೆ ಡಿ.1 ಗುರುವಾರ ಕೆಮ್ಮಿಂಜೆ ಗ್ರಾಮಡ್ ನಡತ್ಂಡ್.
ಕೆಮ್ಮಿಂಜೆಡ್ ಕಾರ್ಮಿಕೆರಾದ್ ಕೆಲಸ ಮಲ್ತೊಂದು ಇತ್ತಿನ ಅಣ್ಣೆ ಹಾವೇರಿ ಜಿಲ್ಲೆದ ಹೊಸೂರು ನಿವಾಸಿ ನಿಂಗನ ಗೌಡ ಮೆಗ್ಯೆ ಮಾದೇವಪ್ಪ ನ್ ಕೆರ್ದ್ ಬಲಿತ್ ದೆರ್. ಈ ಬಗೆಟ್ ಪುತ್ತೂರ್ ನಗರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಡೆಲ್ಲಿ: ಮಾರುತಿ ಸುಜುಕಿ ಇಂಡಿಯಾ ಕಂಪನಿ ಜನವರಿರ್ದ್ ತನ್ನ ಕಾರ್ ಲೆನ ಬಿಲೆನ್ ಹೆಚ್ಚ ಮಲ್ಪರೆ ಉಂಡು.
ಈ ಕಂಪನಿ ಏಪ್ರಿಲ್‌ಡ್ ಗಾಡಿಲೆನ ಬಿಲೆನ್ ಶೇ 1.3ದಾತ್ ಹೆಚ್ಚ ಮಲ್ದ್ ಇತ್ತ್ಂಡ್. ಗಾಡಿ ತಯಾರ್ ಮಲ್ಪುನೆತ್ತ ಕರ್ಚಿ ಹೆಚ್ಚಾಯಿನ ಕಾರಣ, ಗ್ರಾಹಕೆರೆಗ್ ಬಿಲೆ ಏರಿಕೆದ ಪುದೆನ್ ವರ್ಗಾವಣೆ ಮಲ್ಪುನೆ ಅನಿವಾರ್ಯ ಆತ್ಂಡ್ ಪಂದ್ ಕಂಪನಿ ತೆರಿಪಾದ್ಂಡ್. ಕಾರ್ ತಯಾರ್ ಮಲ್ಪರೆ ಅಗತ್ಯ ಇಪ್ಪುನ ಸರಕುಲೆನ ಬಿಲೆ ರಡ್ಡ್ ವರ್ಷದ ದುಂಬುಗ್ ತೂಂಡ ಇತ್ತೆ ಹೆಚ್ಚಾತ್ಂಡ್ ಪಂದ್ ಕಂಪನಿದ ಮಾರ್ಕೆಟ್‌ ಬೊಕ್ಕ ಮಾರಾಟ ವಿಭಾಗದ ಹಿರಿಯ ಕಾರ್ಯನಿರ್ವಾಹಕ ಅಧಿಕಾರಿ ಶಶಾಂಕ್ ಶ್ರೀವಾತ್ಸವ ಪಂಡೆರ್.
ಒಡಿಪು: ರಾಜ್ಯದ 25 ಬೇತೆ ಬೇತೆ ಜಾತಿಲೆನ ಮೀಸಲಾತಿ ಬಗೆಟ್ ಒಂಜಿ ತಿಂಗೊಲ್ದ ಉಲಯಿ ಸರ್ಕಾರಗ್ ವರದಿ ಸಂದಾಯೆರ್ ಉಂಡು ಪಂದ್ ಹಿಂದುಳಿದ ವರ್ಗಲೆನ ಆಯೋಗ ಅಧ್ಯಕ್ಷೆರ್ ಜಯಪ್ರಕಾಶ್‌ ಹೆಗ್ಡೆ ಪಂಡೆರ್.
ಒಡಿಪುಡ್ ಸುದ್ದಿಗೋಷ್ಠಿಡ್ ಮೇರ್ ಪಾತೆರ್ದ್, ಇತ್ತೆ 17 ಜಾತಿದ ವರದಿ ಮುದ್ರಣ ಮಲ್ದ್ಂಡ್. ನನ 8 ಜಾತಿದ ವರದಿ ಜಾರಿ ಆತ್ಂಡ್. ಅಂಚನೆ ಜಾತಿಯೇ ಇಜ್ಜಂದಿನ ಅನಾಥ ಜೋಕುಲೆಗ್ ಶಿಕ್ಷಣ, ಉದ್ಯೋಗಡ್ ಮೀಸಲಾತಿ ಕೊರೊಡು ಪಂದ್ ಶಿಫಾರಸು ಮಲ್ದ್ಂಡ್. ಅತ್ತಂದೆ ಕುಡುಬಿ ಜಾತಿದ ಬುಡಕಟ್ಟ್ ಗ್ ಸೇರ್ಸಾಯೆರೆ ಸರ್ಕಾರಗ್ ವರದಿ ಕೊರ್ಪ ಪಂದ್ ತೆರಿಪಾಯೆರ್.
ಡೆಲ್ಲಿ: ಸೆಪ್ಟೆಂಬರ್ 26 ಬೊಕ್ಕ ಅಕ್ಟೋಬರ್ 25ತ ನಡುಟ್ ಭಾರತಡ್ ಜೋಕುಲೆನ ಮಿತ್ತ್ ಲೈಂಗಿಕ ಶೋಷಣೆ ಉತ್ತೇಜನ ಮಲ್ಪುನ ಆರೋಪಡ್ 44,611 ಅಕೌಂಟ್ ಲೆನ್ ಟ್ವಿಟರ್ ನಿಷೇಧ ಮಲ್ದ್ಂಡ್.
ಆಗಸ್ಟ್ 26 ಬೊಕ್ಕ ಸೆಪ್ಟೆಂಬರ್ 25ತ ನಡುಟ್ ದುಂಬುದ ಕಾಲಡ್ ಕಂಪನಿ ಭಾರತಡ್ ಇಂಚಿನ 52,141 ಅಕೌಂಟ್ ಲೆನ್ ನಿಷೇಧ ಮಲ್ದ್ಂಡ್. ಎಲಾನ್ ಮಸ್ಕ್ ನ ಮುತಾಲಿಕೆಡ್ ಟ್ವಿಟರ್ ಈ ಕ್ರಮನ್ ದೆತೊಂದುಂಡು. ದೇಶಡ್ ತನ್ನ ವೇದಿಕೆಡ್ ಭಯೋತ್ಪಾದನೆನ್ ಉತ್ತೇಜನ ಮಲ್ಪುನ 4,014 ಅಕೌಂಟ್ ಲೆನ್ ದೆತ್ ಪಾಡ್ದ್ಂಡ್. 2021ತ ಪೊಸ ಐಟಿ ನಿಯಮಲೆಗ್ ಅನುಸಾರವಾದ್ ಟ್ವಿಟರ್ ತನ್ನ ಮಾಸಿಕ ವರದಿಡ್, ತನ್ನ ಕುಂದುಕೊರತೆ ಪರಿಹಾರ ಕಾರ್ಯವಿಧಾನಲೆನ ಮುಖೇನ ಅವ್ವೇ ಪೊರ್ತುಡು ದೇಶದ ಗಲಸುನಕ್ಲೆರ್ದ್ 582 ದೂರುಲೆನ್ ಸ್ವೀಕಾರ ಮಲ್ದ್ಂಡ್. ಬೊಕ್ಕ 20 ಯು ಆರ್ ಎಲ್ ಲೆನ ಮಿತ್ತ್ ಕ್ರಮ ದೆತೊಂದುಂಡು ಪಂದ್ ಪಂಡ್.
Twitter bans more than 44,000 accounts in India
Delhi: Between the period of September 16 to October 25th Twitter banned more than 44,000 accounts that promoted child sexual exploitation and other policy violation in India.
It had banned more than 52,000 accounts between August 26 and September 15th .
The micro blogging platform that is going through a tough churning under Elon Musk also banned 4000 accounts related to terrorism and such other idealogy in the country.
ಬೊಲ್ತೇರ್: ಬೊಲ್ತೇರ್ ತಾಲೂಕ್ ದ ಲಾಯಿಲ ಗ್ರಾಮದ ಗಂಪದಡ್ಡ ನಿವಾಸಿ ರಘುರಾಮ್ ಶೆಟ್ಟಿ (58) ಡಿ.2 ದಾನಿ ತಿಗಲೆ ಬೇನೆಡ್ ತೀರ್ ಪೋಯೆರ್.
ಡಿ.2ದಾನಿ ಮೇರ್ ಇಲ್ಲಲ್ ಬೂರಿನ ಪೊರ್ತುಡು ಆಸ್ಪತ್ರೆಗ್ ದಾಖಲ್ ಮಲ್ತೆರ್. ಆಂಡ ಡಾಕ್ಟರ್ ಮೇರ್ ತಿಗಲೆ ಬೇನೆ ಬತ್ತ್ ದ್ ತೀರ್ ಪೋತೆರ್ ಪಂದ್ ತೆರಿಪಾದೆರ್. ಕಲಾವಿದೆರಾಯಿನ ಮೇರ್ ಪಿಕ್ಚರ್, ಧಾರಾವಾಹಿ, ನಾಟಕಲೆಡ್ ನಟನೆ ಮಲ್ದೆರ್. ಅತ್ತಂದೆ ಕೃಷಿಕೆರ್ ಲ ಆದಿತ್ತೆರ್. ಮೆರೆಗ್ ಬೊಡೆದಿ ಬೊಕ್ಕ ಒರಿ ಮಗೆ ಉಲ್ಲೆರ್.
ಕುಡ್ಲ: ಕುಡ್ಲದ ಅಂತರ್‌ ರಾಷ್ಟ್ರೀಯ ವಿಮಾನ ನಿಲ್ದಾಣಡ್ ತಿಂಗೊಲ್ ಒಂಜೇಟ್ ಸುಮಾರ್ ನಾಲ್ ಲಕ್ಷ ರೂ. ಬಿಲೆತ ಬಂಗಾರ್ ನ್ ಅಧಿಕಾರಿಲು ವಶಕ್ ಪಡೆತೆರ್.
ನ.1ರ್ದ್ 30ಮುಟ್ಟ ಕಲ್ಪ ಸಾದಿಡ್ ಬಂಗಾರ್ ಕೊನೊಂದು ಇತ್ತಿನ ಕೇಸ್ ಡ್ 7,692 ಗ್ರಾಂ ತೂಕದ 24 ಕ್ಯಾರೆಟ್ ಪರಿಶುದ್ಧತೆದ 4,01,18,280 ರೂ. ಬಿಲೆತ ಬಂಗಾರ್ ನ್ ವಶಕ್ ದೆತೊನಿಯೆರೆ ಆಂಡ್ ಪಂದ್ ಪ್ರಕಟನೆ ತೆರಿಪಾದ್ಂಡ್. ಕೇಸ್ ದ ಬಗೆಟ್ ದುಬೈರ್ದ್ ಕುಡ್ಲಗ್ ಬತ್ತಿನ 10 ಜನನ್ ವಶಕ್ ದೆತ್ತೊಂದು ವಿಚಾರಣೆ ಮಲ್ಪರೆ ಆಂಡ್.
ತಮಿಳುನಾಡ್: ಪ್ರಾಯ ಆಯಿಲೆಕ್ಕನೇ ಆನ್ ಜೋವ್ ನಕ್ಲೆಡ ಕೆಬಿತ ಮಿತ್ತ್ ಕೂಜಲ್ ಬುಲೆಪುಂಡು. ಮುಲ್ಪಯೊರಿ ಮಸ್ತ್ ಉದ್ದದ ಕೆಬಿತ ಕೂಜಲ್ ಇಪ್ಪುನ ಮುಖೇನ ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ ಪಟ್ಟಿ ಸೇರ್ದೆರ್.
ಆಂಟನಿ ವಿಕ್ಟರ್ ಪನ್ಪುನ ಶಾಲೆದ ನಿವೃತ್ತ ಮುಖ್ಯ ಶಿಕ್ಷಕೆರೆಗ್ ಸುಮಾರ್ 18.1 ಸೆ.ಮೀ. (7.12 ಇಂಚಿ) ಉದ್ದದ ಕೆಬಿತ ಕೂಜಲ್ ಉಂಡು. ಈ ಮುಖೇನ 2007 ರ್ದ್ ವಿಶ್ವದ ಮಸ್ತ್ ಉದ್ದದ ಕೆಬಿತ ಕೂಜಲ್ ಇಪ್ಪುನ ವ್ಯಕ್ತಿ ಪನ್ಪುನ ವಿಶ್ವ ದಾಖಲೆ ಪಟ್ಟಿಡ್ ಉಲ್ಲೆರ್ ಪಂದ್ ವರದಿ ತೆರಿಪಾದ್ಂಡ್.
ಕಟೀಲ್: ಕಟೀಲ್ ಶ್ರೀ ದುರ್ಗಾ ಪರಮೇಶ್ವರಿ ದೇವಲ್ಯದ ಸಮೂಹ ಶಿಕ್ಷಣ ಸಂಸ್ಥೆಲೆನ ಮುತಾಲಿಕೆಡ್ “ಭ್ರಮರ-ಇಂಚರ” ನುಡಿಪರ್ಬ ಸುಕ್ರಾರ ಕಾಂಡೆ ಉದಿಪನ ನಡತ್ಂಡ್.
ಈ ಲೇಸ್ ದ ಉದಿಪನನ್ ಮುಲ್ಕಿ-ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಮಲ್ತ್ ದ್, ಎಡ್ಡೆಪ್ಪು ಬಯಕಿಯೆರ್.
✍️ಜಗದೀಶ್ ಪೂಜಾರಿ
ಬೆದ್ರ
ಮುಲ್ಕಿ: ಹಿಮಾಯತುಲ್ ಇಸ್ಲಾಂ ದಫ್ ಸಮಿತಿದ 2022-23 ನೇ ಸಾಲ್ ದ ಪೊಸ ಅಧ್ಯಕ್ಷೆರಾದ್ ಮುಲ್ಕಿ ನಗರಸಭೆ ಸದಸ್ಯೆರ್ ಜನಾಬ್ ಪುತ್ತು ಬಾವ ಕಾರ್ನಾಡ್ (ಹಸನಬ್ಬ) ಅವಿರರೋಧವಾದ್ ಆಯ್ಕೆ ಆಯೆರ್.
ಹಿಮಾಯತುಲ್ ಇಸ್ಲಾಂ ದಫ್ ಸಮಿತಿದ ಸಭೆ ಮುಲ್ಕಿ ಕೇಂದ್ರದ ಕಟ್ವಾಣಡ್ ಶಾಫಿ ಜುಮ್ಮಾ ಪಲ್ಲಿದ ಅಧ್ಯಕ್ಷೆರ್ ಲಿಯಾಕತ್ ಅಲಿ ಮೆರೆನ ಮುತಾಲಿಕೆಡ್ ನಡತ್ಂಡ್. ಪುತ್ತು ಬಾವ ಮುಲ್ಕಿ ನಗರ ಪಂಚಾಯತಿದ ಸದಸ್ಯೆರ್ ಬೊಕ್ಕ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಸದಸ್ಯೆರಾದ್ ಬೊಕ್ಕ ಮುಲ್ಕಿ ಕೇಂದ್ರ ಶಾಫಿ ಜುಮ್ಮಾ ಪಲ್ಲಿದ ಆಡಳಿತ ಮಂಡಳಿದ ಸದಸ್ಯೆರಾದ್ ಸೇವೆ ಸಂದಾವೊಂದು ಉಲ್ಲೆರ್.
2023ತ ವಾರ್ಷಿಕ ದಫ್ ರಾತೀಬ್ ಲೇಸ್ ಬರ್ಪಿನ ಫೆಬ್ರವರಿ 7ರ್ದ್ 11 ಮುಟ್ಟ ಕಾರ್ನಾಡ್ ಝಿಂದಾ ಮದರಸ ವಠಾರಡ್ ನಡಪರೆ ಉಂಡು ಪಂದ್ ಪ್ರಧಾನ ಕಾರ್ಯದರ್ಶಿ ಎಂ.ಕೆ ಹುಸೈನ್ ಮಾಧ್ಯಮ ಪ್ರಕಟಣೆಡ್ ತೆರಿಪಾದೆರ್.
ಸುರತ್ಕಲ್ ಟೋಲ್ ದೆತ್ ದ್, ಆಯಿತ ರೇಟ್ ನ್ ಪೆಜಮಾಡಿ ಟೋಲ್ ದೊಟ್ಟಿಗೆ ಸೇರ್ಸಾಯಿನವು ಅವೈಜ್ಞಾನಿಕ ಆತ್ಂಡ್. ನೇರ್ದಾವೆರ ಆಪುನ ಪರಿಣಾಮದ ಬಗೆಟ್ ಡಿ.1 ಕ್ ಶಾಸಕೆರ್ ರಘುಪತಿ ಭಟ್ ಮೇರ್ ಡೆಲ್ಲಿಡ್ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವೆರಾಯಿನ ನಿತಿನ್ ಗಡ್ಕರಿ ಮೆರೆಗ್ ಬಿನ್ನಾಪು ಸಂದಾದ್, ಸಮಸ್ಯೆಲೆನ ಬಗೆಟ್ ಪರಿಹಾರ ಮಲ್ಪೊಡು ಪಂದ್ ಕೇನೊಂಡೆರ್.
ಬಿನ್ನಾಪು ಸ್ವೀಕಾರ ಮಲ್ತಿನ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿಲೆನ ಸಚಿವೆರಾಯಿನ ನಿತಿನ್ ಗಡ್ಕರಿ ಮೇರ್ ಈ ವಿಷಯದ ಬಗೆಟ್ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ ಅಧಿಕಾರಿಲೆನೊಟ್ಟಿಗೆ ಡಿ. 5 ಕ್ ಸಭೆ ನಡಪಾವ ಪಂದ್ ತೆರಿಪಾಯೆರ್. ಒಡಿಪು- ಚಿಕ್ಕಮಗಳೂರು ಸಂಸದೆರ್, ಕೇಂದ್ರ ಕೃಷಿ ಬೊಕ್ಕ ರೈತರೆನ ಕಲ್ಯಾಣ ರಾಜ್ಯ ಸಚಿವೆರ್ ಶೋಭಾ ಕರಂದ್ಲಾಜೆ ಮೇರ್ ಗುಜರಾತ್ ಚುನಾವಣೆಡ್ ಇಪ್ಪುನೆರ್ದಾವೆರ ಆಯಿತ ಸೂಚನೆದಂಚನೆ ಡಿ. 30 ಕ್ ಶೋಭಾ ಕರಂದ್ಲಾಜೆ ಮೆರೆನ ಡೆಲ್ಲಿ ಕಚೇರಿ ಅಧಿಕಾರಿಲು ಬೊಕ್ಕ ಆಪ್ತ ಕಾರ್ಯದರ್ಶಿನೊಟ್ಟಿಗೆ ಈ ವಿಷಯದ ಬಗೆಟ್ ದುಂಬುದ ಕ್ರಮತ ಬಗ್ಗೆ ಚರ್ಚೆ ಮಲ್ತ್ ದ್, ಸುರುಕಾದ್, ಕೇಂದ್ರ ಸಚಿವೆರಾಯಿನ ನಿತಿನ್ ಗಡ್ಕರಿ ಮೆರೆನ ಕಚೇರಿ ಅಧಿಕಾರಿಲೆನ್ ಭೇಟಿ ಮಲ್ತ್ ದ್ ವಿಷಯ ಪ್ರಸ್ತಾಪ ಮಲ್ತ್ ದ್, ಅಕ್ಲೆಗ್ ಮನವರಿಕೆ ಮಲ್ಪರೆ ಆಂಡ್. ಬೊಕ್ಕ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ ಅಧಿಕಾರಿಲೆನ್ ಭೇಟಿಯಾದ್ ಸುರತ್ಕಲ್ ಟೋಲ್ ರೇಟ್ ನ್ ಪೆಜಮಾಡಿ ಟೋಲ್ ದೊಟ್ಟಿಗೆ ವಿಲೀನ ಮಲ್ಪುನೇರ್ದಾವೆರ ಕೈತಲ್ ದಕ್ಲೆರ್ದ್ ಅಪುನ ಸಮಸ್ಯೆಲೆನ ಬಗೆಟ್ ಮನವರಿಕೆ ಮಲ್ತ್ ದ್, ಈ ಬಗ್ಗೆ ಸೂಕ್ತ ಕ್ರಮ ದೆತೊನೊನ ಬಗ್ಗೆ ಚರ್ಚೆ ಮಲ್ಪೆರೆ ಆಂಡ್. ಸುರತ್ಕಲ್ ಟೋಲ್ ನ್ ದೆತ್ ದ್, ಆಯಿತ ರೇಟ್ ನ್ ಪೆಜಮಾಡಿ ಟೋಲ್ ದೊಟ್ಟಿಗೆ ಸೇರ್ಸಾಂಡ 2 ಟೋಲ್ ರೇಟ್ ನ್ ಒಂಜೇ ಟೋಲ್ ದ ಮಿತ್ತ್ ಪಾಡುಂಡ ಒಡಿಪು ಜಿಲ್ಲೆದ ಗಾಡಿ ಸವಾರೆರ್ ಹೆಚ್ಚ ರೇಟ್ ಕೊರೊಡಾಪುಂಡು. ಒಡಿಪುರ್ದ್ ಕುಡ್ಲ ವಿಮಾನ ನಿಲ್ದಾಣಗ್ ಪ್ರಯಾಣ ಮಲ್ಪುನ ಟ್ಯಾಕ್ಸಿ ಅತ್ತಂಡ ಗಾಡಿಲು ಮುಲ್ಕಿರ್ದ್ ಕಿನ್ನಿಗೋಳಿ ಮುಖೇನ ಪೋಪುನೆರ್ದಾವೆರ ಸುರತ್ಕಲ್ ಟೋಲ್ ರೇಟ್ ಕೊರ್ಪುನ ಅವಶ್ಯಕತೆ ಇಜ್ಜಂಡ್, ಆಂಡ ಇತ್ತೆ ಸುರತ್ಕಲ್ ಟೋಲ್ ರೇಟ್ ಪೆಜಮಾಡಿ ಟೋಲ್ ದೊಟ್ಟಿಗೆ ವಿಲೀನರ್ದ್ ಮೂಲ್ಕಿರ್ದ್ ಕಿನ್ನಿಗೋಳಿ ಮುಖೇನ ವಿಮಾನ ನಿಲ್ದಾಣಗ್ ಪ್ರಯಾಣ ಮಲ್ಪುನ ಟ್ಯಾಕ್ಸಿ ಸೇರ್ದ್ ಬೇತೆ ಗಾಡಿ ಸವಾರೆರ್ ಪೆಜಮಾಡಿ ಟೋಲ್ ಡ್ ಹೆಚ್ಚದ ರೇಟ್ ಕೊರೊಡಾಪುಂಡು. ಅತ್ತಂದೆ ಸುರತ್ಕಲ್ ಟೋಲ್ ಡ್ ಕೈತಲ್ ದ ವಾಣಿಜ್ಯ ಉದ್ದೇಶಗ್ ಗಲಸುನ ಗಾಡಿಲೆಗ್ ಶೇ 50 ದಾತ್ ರಿಯಾಯಿತಿ ಇತ್ಂಡ್. ನೆನ್ ಈ ಈ ಟೋಲ್ ಡ್ ವಿಲೀನ ಮಲ್ಪುನಗ ಆಯಿನ ತೂವಂದೆ ಇಪ್ಪುನ ಬಗೆಟ್ ಬಿನ್ನಾಪುನ್ ತೆರಿಪಾಯೆರ್. ನಿತಿನ್ ಗಡ್ಕರಿ ಮೇರ್ ಡಿ. 5 ಕ್ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ ಹಿರಿಯ ಅಧಿಕಾರಿಲೆನೊಟ್ಟಿಗೆ ನಡಪಾವುನ ಸಭೆಟ್ ಸೂಕ್ತ ನಿರ್ಧಾರ ದೆತೊನುನ ಮುಟ್ಟ ಟೋಲ್ ರೇಟ್ ಹೆಚ್ಚ ಮಲ್ಪಂದಿಲೆಕ್ಕ ಶಾಸಕೆರ್ ರಘುಪತಿ ಭಟ್ ಮೇರ್ ಜಿಲ್ಲಾಡಳಿತಡ ಬೆಚ್ಚ ಆಯೆರ್. ಕೇಂದ್ರ ಕೃಷಿ ಬೊಕ್ಕ ರೈತರೆನ ಕಲ್ಯಾಣ ರಾಜ್ಯ ಸಚಿವೆರ್ ಆಪ್ತ ಕಾರ್ಯದರ್ಶಿ ಸಾಕತ್ ಸಿಂಗ್ ರಾಣಾವತ್ (IFS), ಹೆಚ್ಚುವರಿ ಆಪ್ತ ಕಾರ್ಯದರ್ಶಿ ಮಂಜುನಾಥ್ ಗೌಡ ಬೊಕ್ಕ ಒಡಿಪು ಪೇಂಟೆದ ಬಿಜೆಪಿ ಅಧ್ಯಕ್ಷೆರಾಯಿನ ಮಹೇಶ್ ಠಾಕೂರ್ ಇತ್ತೆರ್.
