Times of kudla

ಬಿಎಂಟಿಸಿ ಬಸ್ ಗುದ್ದುದು ತೀರ್ ಪೋಯೆರ್ ಬೈಕ್ ರೈಡರ್

ಬೆಂಗ್ಲೂರ್: ರಾಜಬೂಡು ಬೆಂಗ್ಲೂರ್ ಡ್ ಬಿಎಂಟಿಸಿ ಬಸ್ ಗುದ್ದುದು ಬೈಕ್ ರೈಡರ್ ತೀರ್ ಪೋಯಿನ ಘಟನೆ ಪೀಣ್ಯಾದ 14ನೇ ಕ್ರಾಸ್ ದ ಕೈತಲ್ ನಡತ್ಂಡ್.

ತೀರ್ ಪೋಯಿನರ್ ದೀಪಕ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಬಸ್ ಡ್ರೈವರ್ ನ್ ಪೊಲೀಸೆರ್ ವಶಕ್ ಪಡೆತೆರ್.

ತುಳು ಬಾಸೆ ಬುಲೆಪಾಲೆ ಪನ್ಪಿ ನಿಲೆಟ್ಟ್ ಮದಿಮೆದ ತಮ್ಮನದಾನಿ ನಡತ್ಂಡ್ ಕಬಿ ಗೋಷ್ಠಿ

ಕಾಸ್ರೋಡು: ಮದಿಮೆದ ತಮ್ಮನದ ದಿನೊನು ವಿಶೇಷವಾಯಿನ ರೀತಿಡ್ ಅಟ್ಟಣೆ ಮಲ್ದಿತ್ತೆರ್ ಪೊಸ ಮದಿಮಾಯೆ ಬೊಕ್ಕ ಮದಿಮಾಲ್ !
ಜೈ ತುಲುನಾಡ್ (ರಿ.) ಸಂಘಟನೆದ ಕಾಸ್ರೋಡ್ ಎಗ್ಗೆದ ಪ್ರಧಾನ ಸಂಚಾಲಕೆರಾಯಿನ ಪ್ರವೀಶ್ ಕುಲಾಲ್ ಬೊಕ್ಕ ಕಾವ್ಯ ಮೊಕ್ಲೆನ ಮದಿಮೆದ ತಮ್ಮನೊದ ಲೇಸ್‌ಡ್ ‘ಡಿಜೆದ ಇಡೆಟ್ ಸಾಹಿತ್ಯದ ತುಲಿಪು, ಮದಿಮೆಡಾವಡ್ ಪೊಸ ದೇಕಿದ ಮದಿಪು’ ಪನ್ಪಿ ಇಸೇಸ ಕಬಿ ಗೋಷ್ಠಿನ್ ಅಟ್ಟನೆ ಮಲ್ದಿತ್ತೆರ್.

ತುಳು ಕಬಿಕುಲಾಯಿನ ಪ್ರವೀಶ್ ಕುಲಾಲ್, ಕುಶಲಾಕ್ಷಿ ವಿ ಕಣ್ವತೀರ್ಥ, ರಮೇಶ್ ಅಟ್ಟೆಗೋಳಿ, ನಿರ್ಮಲ ಸೇಸಪ್ಪ ಖಂಡಿಗೆ, ಸತೀಶ್ ಸಾಲಿಯಾನ್ ನೆಲ್ಲಿಕುಂಜೆ, ಆಶಾಲತಾ ಚೇವಾರ್, ಸೌಮ್ಯ ಅರ್ ಶೆಟ್ಟಿ ಮಂಜೇಶ್ವರ, ಶ್ರೀನಿವಾಸ ಆಳ್ವ ಕಳತ್ತೂರ್ ಕಬಿತೆಲೆನ್ ಓದಿಯೆರ್. ಕು. ದಿಶಾ ಬೊಕ್ಕ ಅರೆನ ಕೂಟದಕುಲು ಪೊರ್ಲುದ ತುಳು ಭಾವಗೀತೆನ್ ಪಂಡೆರ್. ಪೆರಿಯ ತುಳು ಕನ್ನಡ ಬರವುಗಾರೆ ಉಮೇಶ್ ಸಾಲಿಯಾನ್ ಶಿರಿಯಾ ಲೇಸ್‌ದ ಗುರ್ಕಾರ್ಮೆದ ಪಟ್ಟೊಡು ಕುಲ್ದಿತ್ತೆರ್. ಈ ಲೇಸ್‌ಡ್ ಅಮೆತ್ತೋಡು ಗ್ರಾಮೊದ ಮೂಲ್ಯೆರೆ ಗುರ್ಕಾರೆ ಈಶ್ವರ ಮೂಲ್ಯೆರ್, ಜೈ ತುಲುನಾಡ್ (ರಿ.) ಕಾಸ್ರೋಡ್ ಎಗ್ಗೆದ ಗುರ್ಕಾರೆ ಹರಿಕಾಂತ್ ಸಾಲ್ಯಾನ್ ಕಾಸ್ರೋಡ್, ಶ್ರೀ ಸ. ನಾ. ಪ್ರೌಢಶಾಲೆ, ಪೆರ್ಲದ ಕಲ್ಪಾದಿ ನಾರಾಯಣ ಪೂಜಾರಿ, ಜಗನ್ನಾಥ ಕುಲಾಲ್ ಪಾಲ್‌ಪಡೆಯೆರ್.

ಕಡಂದಲೆ ಶ್ರೀ ಗುರು ನಾರಾಯಣ ಭಜನಾ ಮಂಡಲಿಗ್ ಇನಾಮು

ಕಡಂದಲೆ: ಶ್ರೀ ಗುರು ನಾರಾಯಣ ಭಜನಾ ಮಂಡಲಿ ಕಡಂದಲೆ ಪೂಪಾಡಿಕಲ್ಲ್ ಮುಲ್ಪ ನಲಿಕೆ ಭಜನೆದ ಕೂಟ ಸುರು ಆದ್ 5 ವರ್ಷೊಡು ಬೇತೆ ಬೇತೆ ಧಾರ್ಮಿಕ ಕ್ಷೇತ್ರಡ್ ಜೋಕುಲೆನ ಕೂಟದೊಟ್ಟಿಗೆ, ಪೊಂಜೋವ್ ಲು, ಆಂಜೋವ್ ಲು, ಸೇರೊಂದು ಇತ್ತೆ ಜಿಲ್ಲೆಡೇ ಭಾರೀ ಮಲ್ಲ ಸಾಧನೆ ಮಲ್ತ್ ದ್, ಭಜನಾ ಮಂಡಲಿ ಸುರು ಮಲ್ತಿನ ಕೆಲವೇ ವರ್ಷೊಡ್ ನಲಿಕೆ ಭಜನೆಡ್ ಮೂಜಿನೇ ಇನಾಮು ಗೆಂದ್ ದ್, ಗುರುನಾರಾಯಣ ಸೇವಾ ಸಂಘ ಕಡಂದಲೆ ಪಾಲಡ್ಕಗ್ ಭಾರೀ ಮಲ್ಲ ಪೆರ್ಮೆನ್ ಕನತ್ ಕೊರ್ತುಂಡು.

ಉಂದೆತ ಮುತಾಲಿಕೆನ್ ಶಿವರಾಮ್ ಬರಿಯಡ್ಕ ಮೇರ್ ಒಯಿಸೊಂದಿತ್ತ್ ದ್, ಕೂಟೊನ್ ಯಶಸ್ವಿಯಾದ್ ದುಂಬು ಕೊನೊಂದುಲ್ಲೆರ್. ಈ ನಲಿಕೆ ಭಜನೆ ಜೋಕ್ಲೆಡ ರೋಗನಿರೋಧಕ ಶಕ್ತಿ, ಅಂಚನೆ ಏಕಾಗ್ರತೆ, ಬುದ್ಧಿಶಕ್ತಿ, ಹೆಚ್ಚ ಮಲ್ತ್ ದ್, ನರಮಾನಿನ ಆರೋಗ್ಯನ್ ಒರಿತೊಂದು ಬರ್ಪುನತ್ತಂದೇ ಜೀವನೊಡು ಸಂಸ್ಕಾರನ್ ಕಲ್ಪಾವುನ ಬೇಲೆ ಮಲ್ಪುನತ್ತಂದೆ ಎಲ್ಯ ಬಾಲೆರ್ದ್ ಮಲ್ಲ ಪರಬೆರ್ ಮುಟ್ಟಲ ಅಕ್ಲೆನ ಆರೋಗ್ಯನ್ ಗಟ್ಟಿಮುಟ್ಟಾದ್ ಒರಿತೊಂದು ಬರ್ಪುಂಡು ಪಂಡ್ ದ್ ಭಜನಾ ಮಂಡಲಿದ ಗುರ್ಕಾರ್ಲು ಆಯಿನ ಶಿವರಾಮ್ ಬರಿಯಡ್ಕ ಪತ್ರಿಕೆಗ್ ತೆರಿಪಾಯೆರ್. ಅಂಚನೆ ಈ ಭಜನಾ ಮಂಡಲಿಗ್ ಆಶೀರ್ವಾದ ಮಲ್ತ್ ದ್, ಸಂಘ ಸಂಸ್ಥೆಗ್ ಜೋಕುಲೆನ ಕಡಪುಡಿನ ಅಪ್ಪೆ ಅಮ್ಮೆಗ್ ಅಂಚನೆ ಬೆರಿತಾಂಗ್ ಕೊರಿನ ಊರುದ ಸಮಸ್ತ ಪತ್ತೆರೆಗ್ ಸೊಲ್ಮೆ ನ್ ಸಂದಾವೆ ಪಂದ್ ಪಂಡೆರ್.
✍️ಜಗದೀಶ್ ಪೂಜಾರಿ
ಬೆದ್ರ

ಬಂಟ್ವಾಳ ತಾಲೂಕ್ ಮಡಿವಾಳ ಸಮಾಜದ ಪೊಸ ಸಭಾಭವನಗ್ ಶಾಸಕೆರೆರ್ದ್ 25ಲಕ್ಷ ರೂ. ಅನುದಾನ

ಬಂಟ್ವಾಳ ತಾಲೂಕು ಮಡಿವಾಳರ ಸಮಾಜ ಸೇವಾ ಸಂಘ ಕಂದೂರು ಸಜಿಪ ನೆತ್ತ 31ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಡಿ.11ಕ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ನಡತ್ಂಡ್.

ಈ ಪೊರ್ತುಡು ಬಂಟ್ವಾಳ ತಾಲೂಕ್ ಮಡಿವಾಳ ಸಮಾಜದ ಪೊಸ ಸಭಾಭವನ ನಿರ್ಮಾಣಗ್ 25ಲಕ್ಷ ರೂ. ಅನುದಾನನ್ ಬಂಟ್ವಾಳ ತಾಲೂಕ್ ದ ಶಾಸಕೆರ್ ರಾಜೇಶ್ ನಾಯಕ್ ಕೊರಿಯೆರ್.

ರಾಜ್ಯ ನಾಯಕತ್ವ ಬದಲಾವಣೆದ ಬಗೆಟ್ ಇನಿ ಅಹ್ಮದಾಬಾದ್ ಡ್ ಚರ್ಚೆ?

ಬೆಂಗ್ಲೂರ್: ರಾಜ್ಯಡ್ ಮುಖ್ಯಮಂತ್ರಿಯಾದ್ ಬಸವರಾಜ್ ಬೊಮ್ಮಾಯಿ ಮೆರೆನ್ ದುಂಬರಿಸಾವೊಲಿಯ ಅತ್ತ್ ಬೇತೆ ಜನನ್ ಆಯ್ಕೆ ಮಲ್ಪೊಡಾ ಪನ್ಪಿನ ಬಗೆಟ್ ಇನಿ ಗುಜರಾತ್ ದ ರಾಜಬೂಡು ಅಹ್ಮದಾಬಾದ್ ಡ್ ಚರ್ಚೆ ನಡಪುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್.

ಮಾಜಿ ಮುಖ್ಯಮಂತ್ರಿ ಬಿ ಎಸ್ ಯಡಿಯೂರಪ್ಪ, ಮುಖ್ಯಮಂತ್ರಿ ಬೊಮ್ಮಾಯಿ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷೆರ್ ಜೆ ಪಿ ನಡ್ಡಾ, ಗೃಹ ಸಚಿವೆರ್ ಅಮಿತ್ ಶಾ, ಪ್ರಧಾನಿ ನರೇಂದ್ರ ಮೋದಿ ಇನಿ ಅಹ್ಮದಾಬಾದ್ ಡ್ ನಡಪರೆ ಇಪ್ಪುನ ಪ್ರಮಾಣ ವಚನ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಮಾತ ನಾಯಕೆರ್ ಒಂಜೇ ಕಡೆಟ್ ಸೇರುನ ಕಾರಣ ರಾಜ್ಯದ ನಾಯಕತ್ವದ ಬಗೆಟ್ ಚರ್ಚೆ ನಡಪರೆ ಉಂಡು ಪಂದ್ ತೆರಿದ್ ಬೈದ್ಂಡ್.

ನಾಯಿಲೆರ್ದ್ ಬಚಾವ್ ಆಯರೆ ಎಟಿಎಂಗ್ ಪೊಗ್ಗಿನ ಜಿಂಕೆ

ಗುಜರಾತ್‌: ಜಿಂಕೆಯೊಂಜಿ ಬೀದಿ ನಾಯಿಲೆರ್ದ್ ತಪ್ಪಾಯೆರೆ ಬೋಡಾದ್ ಎಟಿಎಂದ ಉಲಯಿ ಪೊಗ್ಗಿನ ಘಟನೆ ಗುಜರಾತ್‌ದ ಧಾರಿಡ್ ನಡತ್ಂಡ್.

ಬೊಕ್ಕ ಕೈತಲ್ ದಕುಲು ಅರಣ್ಯ ಇಲಾಖೆ ಸಿಬ್ಬಂದಿಗ್ ಪೋನ್ ಮಲ್ತ್ ದ್, ಜಿಂಕೆನ್ ರಕ್ಷಣೆ ಮಲ್ತ್ ದ್, ಸುರಕ್ಷಿತ ಪ್ರದೇಶಗ್ ಬುಡ್ತೆರ್. ಈ ವಿಡಿಯೋನು ಅಲ್ಪನೇ ಇತ್ತಿನ ಕೈತಲ್ ದಕುಲು ರೆಕಾರ್ಡ್ ಮಲ್ತೆರ್. ಈ‌ ವಿಡಿಯೋ ಇತ್ತೆ ವೈರಲ್ ಆವೊಂದು ಉಂಡು.

ಭಾರತದ 6ನೇ ವಂದೇ ಭಾರತ್‌ ರೈಲ್ ಉದಿಪನ ಮಲ್ತಿನ ಪ್ರಧಾನಿ ಮೋದಿ

ಛತ್ತೀಸಗಢ: ಪ್ರಧಾನಮಂತ್ರಿ ನರೇಂದ್ರ ಮೋದಿ ಮೇರ್ ಬಿಲಾಸ್ಪುರ್ (ಛತ್ತೀಸಗಢ) ನಾಗ್ಪುರ (ಮಹಾರಾಷ್ಟ್ರ) ಮಾರ್ಗದ ನಡುಟ್ ಭಾರತದ ಆಜಿನೇ ವಂದೇ ಭಾರತ್ ಎಕ್ಸೆಸ್ ರೈಲ್ ಗ್ ಉದಿಪನ ಮಲ್ತೆರ್.

ಈ ಪೊರ್ತುಡು ಮಹಾರಾಷ್ಟ್ರ ಸಿಎಂ ಏಕನಾಥ್ ಶಿಂಧೆ, ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಬೊಕ್ಕ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವೆರ್ ನಿತಿನ್ ಗಡ್ಕರಿ ಇತ್ತೆರ್. ವಂದೇ ಭಾರತ್‌ ಎಕ್ಸ್‌ಪುಸ್ ಗರಿಷ್ಟ 160 kmph ವೇಗಡ್ ಪೋಪುಂಡು ಬೊಕ್ಕ ನೆಟ್ ಎಡ್ಡೆ ಸೌಲಭ್ಯ ಉಂಡು. ಉಂದು ಪ್ರಯಾಣಿಕೆರೆಗ್ ಸಂಪೂರ್ಣವಾದ್ ಪೊಸ ಪ್ರಯಾಣದ ಅನುಭವನ್ ಕೊರ್ಪುಂಡು.

“ವೀರಕೇಸರಿ ಕಪ್ 2022” ಮುಕ್ತ ಫ್ಲಡ್ ಲೈಟ್ ಬೊಲ್ಪುದ ವಾಲಿಬಾಲ್ ಪಂತೊ

ಸುರತ್ಕಲ್: ಸಾಮಾಜಿಕ ಸಂಘಟನೆ ಆಯಿನ “ವೀರಕೇಸರಿ” ನೆತ್ತ ಮುತಾಲಿಕೆಡ್ ವೀರಕೇಸರಿ ಕಪ್-2022 ಹೊನಲು ಬೆಳಕಿನ ಮುಕ್ತ ವಾಲಿಬಾಲ್ ಕ್ರೀಡಾಕೂಟ ಸುರತ್ಕಲ್ ಸುಭಾಷಿತನಗರ ಬಂಟರ ಭವನದ ಕೈತಲ್ ದ ಮೈದಾನಡ್ ನಡತ್ಂಡ್.

ಕುಡ್ಲ ಉತ್ತರ ಕ್ಷೇತ್ರ ಶಾಸಕೆರ್ ಡಾ. ಭರತ್ ವೈ. ಶೆಟ್ಟಿ ಮೇರ್ ರಂಗ್ ರಂಗ್ ದ ಪುಗ್ಗೆ ರಾಪಾವುನ ಮುಖೇನ ಕ್ರೀಡಾಕೂಟದ ಉದಿಪನ ಮಲ್ತೆರ್. ಬೊಕ್ಕ ಮೇರ್ ಸಭೆನ್ ಉದ್ದೇಶಿಸದ್ ಪಾತೆರ್ದ್, “44 ವರ್ಷಲೆರ್ದ್ ಸಾಮಾಜಿಕ ಸೇವೆಡ್ ಇಪ್ಪುನ ವೀರಕೇಸರಿ ಸಂಘಟನೆ ಸಮಾಜಗ್ ಮಾದರಿ ಆತ್ಂಡ್. ಸ್ವಂತಗ್ ಚೂರು ಒರಿಪಾದ್, ಒರಿನೆನ್ ಸಮಾಜಗ್ ಕೊರ್ನ, ಸಂಘಟನೆದ ಪದಾಧಿಕಾರಿಲು, ಸದಸ್ಯೆರ್ ಒಂಜೇ ಮನಸ್ಥಿತಿರ್ದ್ ಬೆಂದೊಂದು ಇಪ್ಪುನವು ಮೆಚ್ಚೊಡಾಯಿನ ಕಾರ್ಯ ಪಂದ್ ಪಂಡೆರ್. ಬೊಕ್ಕ ಹಿರಿಯೆರೆನ ಮಾರ್ಗದರ್ಶನಡ್ ನನ ನನತ್ ಸಾಮಾಜಿಕ ಚಟುವಟಿಕೆಲೆಡ್ ಅಯೋಜನೆ ಮಲ್ತ್ ದ್, ಯಶಸ್ವಿಯಾದ್ ಮಲ್ಪಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್. ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಪಾತೆರ್ದ್, “ಸುರತ್ಕಲ್ ಭಾಗಡ್ ಕ್ರೀಡೆ, ಸಾಂಸ್ಕೃತಿಕ ರಂಗಡ್ ಸುಮಾರ್ ಲೇಸ್ ಲೆನ್ ಆಯೋಜನೆ ಮಲ್ಪುನ ಮುಖೇನ ವೀರಕೇಸರಿ ಸಂಘಟನೆ ಇಸೇಸವಾದ್, ಗುರುತಿಸಾದ್ಂಡ್. ಸಮಾಜಮುಖಿ ಕಾರ್ಯಲೆನ ಮುಖೇನ ನನಾತ್ ಎತ್ತರಗ್ ಏರಡ್ ಪಂದ್ ಪಂಡೆರ್. ವೇದಿಕೆಡ್ ವಾಲಿಬಾಲ್ ಕ್ರೀಡಾಪಟು ಸುರತ್ಕಲ್ ಠಾಣೆದ ಕ್ರೈಮ್ ಇನ್ ಸ್ಪೆಕ್ಟರ್ ಅರುಣ್ ಕುಮಾರ್ ಡಿ. ಮೆರೆನ್ ಬಿನ್ನೆರ್ ನಕುಲು ತಮ್ಮನ ಮಲ್ತೆರ್. ತಮ್ಮನ ಸ್ವೀಕಾರ ಮಲ್ತಿನ ಮೇರ್ ಪಾತೆರ್ದ್, “ರಾಜ್ಯಡ್ ಒಲ್ಪ ತೂಂಡಾಲ ಕರಾವಳಿ ಭಾಗದ ಕ್ರೀಡಾಪಟು ಸಾಧನೆ ಮಲ್ತೊಂದು ಉಲ್ಲೆರ್. ಉಂದು ಸಂತೊಸ್ ದ ಇಚಾರ. ಅಕ್ಲೆಗ್ ವೀರಕೇಸರಿ ಅಂಚಿನ ಸಾಮಾಜಿಕ ಸಂಘಟನೆಲು ಸಹಕಾರ ಕೊರೊಂದು ಬತ್ಂಡ, ನನ ಹೆಚ್ಚದ ಸಾಧನೆ ಮಲ್ಪೆರೆ ಸಾಧ್ಯ” ಪಂದ್ ಪಂಡೆರ್. ಈ ಪೊರ್ತುಡು ವೀರ ಕೇಸರಿ ಸಂಸ್ಥೆದ ಸಂಚಾಲಕೆರ್ ಮಹಾಬಲ ಪೂಜಾರಿ ಕಡಂಬೋಡಿ, ಮಂಜಯ್ಯ ಶೆಟ್ಟಿ ಗುಂಡಿಲ ಗುತ್ತು, ಸದಾಶಿವ ಮಹಾಗಣಪತಿ ದೇವಲ್ಯದ ಆಡಳಿತ ಮೊಕ್ತೇಸೆರ್ ಎಸ್. ಗಣಪತಿ ಮಯ್ಯ, ಖಂಡಿಗೆ ಬೀಡು ಆದಿತ್ಯ ಮುಕ್ಕಾಲ್ದಿ, ಚಿತ್ರ ನಿರ್ದೇಶಕೆರ್ ವಿಜಯಕುಮಾರ್ ಕೊಡಿಯಾಲ್ ಬೈಲ್, ನಿರ್ಮಾಪಕೆರ್ ರವಿ ರೈ ಕಳಸ, ರಾಜೇಶ್ ಕುಡ್ಲ, ಕಾಂತಾರ ಖ್ಯಾತಿದ ಶನಿಲ್ ಗುರು, ಸ್ವರಾಜ್ ಶೆಟ್ಟಿ, ಮಾರಿಯಮ್ಮ ದೇವಲ್ಯದ ಧರ್ಮದರ್ಶಿ ಅರುಣ್ ಪೈ, ಪಾಂಡುರಂಗ ವಿ. ಪ್ರಭು, ದೀಪಾ ಟ್ರೇಡರ್ಸ್ ಧಣಿ ರಮೇಶ್ ರಾವ್, ಸುರತ್ಕಲ್ ಠಾಣಾಧಿಕಾರಿ ಅರುಣ್ ಕುಮಾರ್, ಮಾಜಿ ಕಾರ್ಪೋರೇಟರ್ ಅಶೋಕ್ ಶೆಟ್ಟಿ, ಸುಭಾಷಿತ ನಗರ ರೆಸಿಡೆನ್ಸ್ ಅಶೋಸಿಯೇಷನ್ ಅಧ್ಯಕ್ಷೆರ್ ರಮೇಶ್ ಶೆಟ್ಟಿ, ವೀರ ಕೇಸರಿ ಸಂಸ್ಥೆದ ಅಧ್ಯಕ್ಷೆರ್ ಕೈಲಾಸ್ ಟಿ. ತಡಂಬೈಲ್, ಗೌರವಾಧ್ಯಕ್ಷೆರ್ ಸುಧಾಕರ ಸುರತ್ಕಲ್, ದೊಡ್ಡಕೊಪ್ಲ ಮೊಗವೀರ ಮಹಾಸಭಾ ಅಧ್ಯಕ್ಷೆರ್ ಯಶವಂತ ಕರ್ಕೇರ, ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಸುಧಾಕರ್ ಪಂಜಾ, ಕಾರ್ಪೋರೇಟರ್ ಶ್ವೇತಾ ಪೂಜಾರಿ, ಸರಿತಾ ಶಶಿಧರ್, ನಯನ ಕೋಟ್ಯಾನ್, ಪದಾಧಿಕಾರಿಲಾಯಿನ ಪದ್ಮನಾಭ ತಡಂಬೈಲ್, ಜಯಂತ ಶೆಟ್ಟಿ ಇತ್ತೆರ್.

ಮ್ಯಾಕ್ಸ್ ಕ್ರಿಯೇಷನ್ ಲಾಂಛನಡ್ “ಪ್ರೊಡಕ್ಷನ್ ನಂಬರ್ 1” ಪಿಕ್ಚರ್ ದ ಮೂರ್ತ

ಕುಡ್ಲ: ಮ್ಯಾಕ್ಸ್ ಕ್ರಿಯೇಷನ್ ಲಾಂಛನಡ್ “ಪ್ರೊಡಕ್ಷನ್ ನಂಬರ್ 1” ಪಿಕ್ಚರ್ ದ ಮೂರ್ತ ಲೇಸ್ ಹರೇಕಳ ಸಂಪಿಗೆದಡಿ ಅರ್ಧನಾರೀಶ್ವರ ದೇವಲ್ಯಡ್ ನಡತ್ಂಡ್.

ಹಿರಿಯ ರಂಗಕರ್ಮಿ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ಪಿಕ್ಚರ್ ಗ್ ಕ್ಲಾಫ್ ಮಲ್ದೆರ್. ಚಲನಚಿತ್ರ ನಿರ್ಮಾಪಕೆರ್ ಪ್ರಕಾಶ್ ಪಾಂಡೇಶ್ವರ್ ಕೆಮರಾ ಉದಿಪನ ಮಲ್ತೆರ್. ಬೊಕ್ಕ ಮಾಧ್ಯಮ ಗೋಷ್ಠಿಡ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ಮೇರ್ ಪಾತೆರ್ದ್, “ಸ್ವರಾಜ್ ಶೆಟ್ಟಿ ಎಡ್ಡೆ ಕಲಾವಿದೆ. ಸುರುತ ಸರ್ತಿ ಕಥೆ ಚಿತ್ರಕತೆ ನಿರ್ದೇಶನದ ಜಬದಾರಿದೊಟ್ಟಿಗೆ ಪೂರ್ಣ ಪ್ರಮಾಣಡ್ ನಾಯಕ ನಟೆರಾದ್ ಅಭಿನಯ ಮಲ್ತೊಂದು ಉಲ್ಲೆರ್. ಅರೆಗ್ ನಮ್ಮ ನಿಕಲೆನ ಎಡ್ಡೆಪ್ಪು ಇಪ್ಪಡ್ ಪಂದ್ ಪಂಡೆರ್.

ಬೊಕ್ಕ ಪ್ರಕಾಶ್ ಪಾಂಡೇಶ್ವರ್ ಮೇರ್ ಪಾತೆರ್ದ್, “ಸ್ವರಾಜ್ ಪನ್ಪುನ ಪ್ರತಿಭೆ ಪೂರ್ಣ ಪ್ರಮಾಣಡ್ ಈ ಪಿಕ್ಚರ್ ದ ಮುಖೇನ ಸಿನಿಪಯಣ ಸುರು ಮಲ್ದೆರ್ ಪಂದ್ ಅರೆಗ್ ಎಡ್ಡೆಪ್ಪು ಬಯಕಿಯೆರ್. ಪಿಕ್ಚರ್ ದ ನಿರ್ಮಾಪಕೆರ್ ಭಾಗ್ಯರಾಜ್ ಶೆಟ್ಟಿ ಪಾತೆರ್ದ್, “ಕನ್ನಡಿಗೆರ್ ಸಹಕಾರ ಕೊರೊಡು. ಪಿಕ್ಚರ್ ದ ಕಥೆ ಎಡ್ಡೆ ಆಯೆರೆ ತುಳುನಾಡ್ ದ ಸುಮಾರ್ ಕಲಾವಿದೆರ್ ಪಾಲ್ ಪಡೆಯೆರೆ ಉಲ್ಲೆರ್. ಪಿಕ್ಚರ್ ದ ನಿರ್ದೇಶಕೆರ್ ಅಂಚೆನೆ ನಾಯಕೆರ್ ನಟೆ ಸ್ವರಾಜ್ ಶೆಟ್ಟಿ ಮೇರ್, “ಪಿಕ್ಚರ್ ಗ್ ಪುದರ್ ನನ ದೀವೊಡಾತೆ. ಕಾಂತಾರ ಪಿಕ್ಚರ್ ದ ಗುರುವ ಪಾತ್ರದ ಮುಖೇನ ಕನ್ನಡಿಗೆರ್ ಎನನ್ ಗುರುತಿಸಾದೆರ್. ಪಿಕ್ಚರ್ ದ ಕಂಪ್ಲೀಟ್ ಫ್ಯಾಮಿಲಿ ಎಂಟರ್ ಟೈನರ್ ಆತ್ಂಡ್. ಚಿತ್ರಕಥೆ, ಸಂಭಾಷಣೆದೊಟ್ಟಿಗೆ ನಿರ್ದೇಶನದ ಜಬದಾರಿಲ ಎನ್ನ ಮಿತ್ತ್ ಉಂಡು. ಕನ್ನಡ ಚಿತ್ರಪ್ರೇಮಿಲು ಪ್ರೀತಿರ್ದ್ ಎಕ್ಲೆನ್ ಬುಲೆಪಾಲೆ ಪಂದ್ ಪಂಡೆರ್.
ನಟಿ ಶಿವಾನಿ ರೈ ಪಾತೆರ್ದ್, “ಉಂದು ಎನ್ನ ರಡ್ಡ್ ನೇ ಪಿಕ್ಚರ್ ಆತ್ಂಡ್. ಯಾನ್ ಮಸ್ತ್ ಇಷ್ಟಪಟ್ಟ್ ದ್ ಪಿಕ್ಚರ್ ದ ತಂಡಗ್ ಸೇರ್ದೆ. ಪಿಕ್ಚರ್ ದ ಕಥೆ ಮಸ್ತ್ ಎಡ್ಡೆ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ಪತ್ರಿಕಾಗೋಷ್ಠಿಡ್ ಹಿರಿಯ ರಂಗಕರ್ಮಿ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್, ನಾಯಕ ನಟೆ ಸ್ವರಾಜ್ ಶೆಟ್ಟಿ, ಪ್ರಕಾಶ್ ಪಾಂಡೇಶ್ವರ್, ನಾಯಕಿ ನಟಿ ಶಿವಾನಿ ರೈ, ನಿರ್ಮಾಪಕೆರ್ ಭಾಗ್ಯರಾಜ್ ಶೆಟ್ಟಿ, ಪ್ರವೀಣ್ ಶೆಟ್ಟಿ, ಸಂಕಲನಕಾರೆರ್ ಗಣೇಶ್ ನೀರ್ಚಾಲ್, ಕೆಮರಾ ಮ್ಯಾನ್ ರೂಪೇಶ್ ಷಾಜಿ, ಸಂಗೀತ ನಿರ್ದೇಶಕೆರ್ ವಿನೋದ್ ರಾಜ್ ಕೋಕಿಲ, ಕಲಾ ನಿರ್ದೇಶಕೆರ್ ರಾಜೇಶ್, ಸಹನಿರ್ದೇಶಕೆರ್ ಮಹಾನ್ ಶೆಟ್ಟಿ, ಕಾರ್ಯಕಾರಿ ನಿರ್ಮಾಪಕೆರ್ ರಾಜೇಶ್ ಕುಡ್ಲ, ರಕ್ಷಾ ರಾಜ್ ಶೆಟ್ಟಿ, ರಾಧಾಕೃಷ್ಣ, ಪ್ರತಿಮಾ ರೈ ಇತ್ತೆರ್. ಪಿಕ್ಚರ್ ಡ್ “ಕಾಂತಾರ” ಪಿಕ್ಚರ್ ದ ಸುಮಾರ್ ಕಲಾವಿದೆರ್ ಉಲ್ಲೆರ್. 20-25 ದಿನ ಕುಡ್ಲ ಸುತ್ತಮುತ್ತ ಶೂಟಿಂಗ್ ನಡಪುಂಡು. ನಾಯಕಿ ಶಿವಾನಿ ರೈ ಸುರುತ ಕನ್ನಡ ಪಿಕ್ಚರ್ “ಅಭಿರಾಮ ಚಂದ್ರ” ನನ ಬುಡುಗಡೆ ಆಯೆರೆ ಉಂಡು‌.

ಡಿ.13: ನಿಡ್ಲೆ ಗ್ರಾಮ ಸೇವಾ ಸಮಿತಿದ ಮುತಾಲಿಕೆಡ್ 2ನೇ ವರ್ಷದ ಶ್ರೀದೇವಿ ಲಲಿತೋಪಖ್ಯಾನ ಆಟ

ನಿಡ್ಲೆ ಗ್ರಾಮ ಸೇವಾ ಸಮಿತಿದ ಮುತಾಲಿಕೆಡ್ ಬೊಕ್ಕ ಊರುದಕ್ಲೆನ ಸಹಕಾರಡ್ ಡಿ.13 ಅಂಗಾರೆದಾನಿ ಸರಕಾರಿ ಪ್ರೌಢ ಶಾಲೆ ನಿಡ್ಲೆದ ಮೈದಾನಡ್ ಪಾಡಿನ ಭವ್ಯ ರಂಗಮಂಟಪಡ್ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ಟಿ ಸಾರಥ್ಯಡ್ 2ನೇ ವರ್ಷದ ಶ್ರೀದೇವಿ ಲಲಿತೋಪಖ್ಯಾನ ಆಟ ನಡಪರೆ ಉಂಡು.

ಈ ಆಟ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ನಾಗವೃಜ ಕ್ಷೇತ್ರ ಪಾವಂಜೆ, ಕುಡ್ಲ ಮೊಕುಲು ಬಯ್ಯಗ್ 6:30 ರ್ದ್ 12:30 ಮುಟ್ಟ ನಡಪಾದ್ ಕೊರಿಯೆರೆ ಉಲ್ಲೆರ್ ಪಂದ್ ನಿಡ್ಲೆ ಗ್ರಾಮ ಸೇವಾ ಸಮಿತಿ ಬೊಕ್ಕ ಊರುದಕುಲು ಲೆಪ್ಪೋಲೆಡ್ ತೆರಿಪಾದೆರ್.