Times of kudla

ತುಳುನಾಡ ರಕ್ಷಣಾ ವೇದಿಕೆದ ಮುತಾಲಿಕೆಡ್ ನಡತ್ಂಡ್ ತುಳುನಾಡ ಸ್ವಾತಂತ್ರ್ಯ ದಿನಾಚರಣೆ

ಕುಡ್ಲ: ತುಳುನಾಡ ರಕ್ಷಣಾ ವೇದಿಕೆದ ಮುತಾಲಿಕೆಡ್ ಕರಿನ 12 ವರ್ಷೊದಿಂಚ ಬೇತೆ ಸಂಘ ಸಂಸ್ಥೆದೊಟ್ಟಿಗೆ ಸೇರೊಂದು ಎಪ್ರಿಲ್‌ 5 1837ನೇ ಇಸವಿಡ್ ತುಳುನಾಡ ಸ್ವಾತಂತ್ರ್ಯದ ದಿನ ಪನ್ಪುನ ನಿಲೆಟ್ಟ್ ಕುಡ್ಲದ ಬಾವುಟ ಗುಡ್ಡೆಡ್ ತುಳುನಾಡ ಕೊಡಿ ರಾಪಾದ್ ಲೇಸ್ ನ್ ಆಯೋಜನೆ ಮಲ್ತೊಂದು ಬರೊಂದು ಉಲ್ಲೆರ್.

ಅಂಚೆನೆ ಕರಿನ ನವೆಂಬರ್‌ 19 ಕ್ಕ್ ಸನ್ಯಾನ್ಯ ಮುಖ್ಯಮಂತ್ರಿ ಬಸವರಾಜ್‌ ಬೊಮ್ಮಾಯಿ ಮೇರ್ ಬತ್ತ್ ದ್ ತುಳುನಾಡ ಸ್ವಾತಂತ್ರ್ಯ ವೀರ ಕೆದಂಬಾಡಿ ರಾಮಯ್ಯ ಗೌಡ್ರೆನ ಕಂಚ್ ದ ಪ್ರತಿಮೆನ್ ಉದಿಪನ ಮಲ್ತೆರ್.

ತುಳುನಾಡ ಸ್ವಾತಂತ್ರ್ಯ ಹೋರಾಟಗಾರೆರೆನ ನೆಂಪುದ ಸ್ಮಾರಕದ ಕೈತಲ್ ಡ್ ತುಳುನಾಡ ಬಾವುಟನ್ ರಾಪಾಯೆರ್.

ಈ ನಿಲೆಟ್ಟ್ ಪ್ರತಿ ವರ್ಷೊದಂಚೆನೆ ಈ ವರ್ಷೊಲ ಕೊಡಿ ವಂದನೆ ಬೊಕ್ಕ ಪುಷ್ಪಾರ್ಚನೆ ಲೇಸ್ ನಡತ್ಂಡ್. ಕೊಡಿನ್ ದಯಾನಂದ ಜಿ. ಕತ್ತಾಲ್‌ ಸಾರ್‌ ಮೇರ್ ಏರಾಯೆರ್. ಬೊಕ್ಕ ಕೆದಂಬಾಡಿ ರಾಮಯ್ಯ ಗೌಡ್ರೆನ ಪ್ರತಿಮೆಗ್ ಪುಷ್ಪರ್ಚಾನೆನ್ ಕೆದಂಬಡಿ ರಾಮಯ್ಯ ಗೌಡೆರೆನ ಸ್ಮಾರಕ ಉಸ್ತುವಾರಿ ಸಮಿತಿಯೊಟ್ಟಿಗೆ ಸೇರ್ದ್ ಆಚರಣೆ ಮಲ್ತೆರ್. ಈ ಪೊರ್ತುಡು ಶ್ರೀ ನಿರ್ಮಾಲನಂದ ಸ್ವಾಮೀಜಿ, ಶ್ರೀ ಒಡಿಯೂರು ಸ್ವಾಮೀಜಿ ಬೊಕ್ಕ ಸುಮಾರ್ ಪ್ರಮುಖೆರ್ ಪ್ರತಿಮೆಗ್ ಪುಷ್ಪರ್ಚಾನೆ ಮಲ್ತೆರ್.

ಈ ಪೊರ್ತುಡು ತುಳುನಾಡು ರಕ್ಷಣಾ ವೇದಿಕೆದ ಅಧ್ಯಕ್ಷೆರ್ ಯೋಗೀಶ್‌ ಶೆಟ್ಟಿ ಜಪ್ಪು, ಜ್ಯೋತಿಕ ಜೈನ್, ಪ್ರಶಾಂತ್ ಭಟ್ ಕಡಬ, ಆಶಾ ಶೆಟ್ಟಿ ಅತ್ತಾವರ, ಕ್ಲಿಟಸ್ ಲೋಬೊ, ಯಶು ಪಕ್ಕಳ ತಲಪಾಡಿ ಫಾರೂಕ್ ಗೋಲ್ಡನ್, ಪ್ಯಾರಿ ಡಿ ಸೋಜಾ, ಶಾರದಾ ಶೆಟ್ಟಿ, ವೀಣಾ, ಸ್ಮಿತಾ ರೈ, ಮೋಹನ್ ಶೆಟ್ಟಿ ಪಾವೂರು, ಶಾನ್ ಡಿ ಸೋಜಾ, ಗೈಟನ್ ಡಿ, ಸೋಜಾಗಂಗಾಧರ್ ಅತ್ತಾವರ, ಬೊಕ್ಕ ಕೆದಂಬಾಡಿ ರಾಮಯ್ಯ ಉಸ್ತುವಾರಿ ಸಮಿತಿದ ಪ್ರಮುಖ ಅಧ್ಯಕ್ಷೆರ್ ಎಂ. ಬಿ. ಕಿರಣ್‌ ಬುಡ್ಲೆಗುತ್ತು, ಉಪಾಧ್ಯಕ್ಷೆರ್ ಪಿ. ಎಚ್‌. ಆನಂದ್‌ ನೆರಿಯ, ಪ್ರಧಾನ ಕಾರ್ಯದರ್ಶಿ ರಕ್ಷಿತ್‌ ಪುತ್ತಿಲ, ಪ್ರಧಾನ ಸಂಚಾಲಕೆರ್ ಭಾಸ್ಕರ್‌ ದೇವಸ್ಯ, ಕೋಶಾಧಿಕಾರಿ ಶಿವರಾಮಗೌಡ ನಿನ್ನಿಕಲ್‌, ಬೊಕ್ಕ ಸಂಘಟನಾ ಕಾರ್ಯದರ್ಶಿ ಅಕ್ಷಯ್‌ ಕುರುಂಜಿ ಇತ್ತೆರ್.

ಬಂಟೆರ್ ಸಂಘಟಿತೆರಾಂಡ ದೇಶನ್ ಆಳುವೆರ್ : ಒಡಿಯೂರು ಶ್ರೀ ಗುರುದೇವಾನಂದ ಸ್ವಾಮೀಜಿ

ಮುಲ್ಕಿ: ಬಂಟ ಸಮಾಜದಕುಲು ಸಂಘಟಿತೆರಾಂಡ ಅಕಲೆಗ್ ದೇಶನ್ ಆಳುನಾತ್ ಸಾಮರ್ಥ್ಯ ಉಂಡು. ಅಂಚಾದ್ ಬಂಟೆರ್ ಸಂಘಟಿತೆರಾವೊಡು ಪಂದ್ ಒಡಿಯೂರು ಸಂಸ್ಥಾನದ ಶ್ರೀ ಗುರುದೇವಾನಂದ ಸ್ವಾಮೀಜಿ ಪಂಡೆರ್.

ಆರ್ ಮುಲ್ಕಿ ರಾಜಮಾರ್ಗ 64ತ್ತ ಕನ್ಯಾನ ಸದಾಶಿವ ಶೆಟ್ಟಿ ಕಾಂಪ್ಲೆಕ್ಸ್ ದ ಕೈತಲ್ ಬುಧಾರ ಬಯ್ಯಗ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿ ಉದಿಪನ ಮಲ್ತ್ ದ್, ಆಶೀರ್ವಚನ ಕೊರಿಯೆರ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ಮುಲ್ಪ ಆಯಿನಾತ್ ಬೇಗ ಒಕ್ಕೂಟದ ಭವ್ಯ ಸಂಕೀರ್ಣ ನಿರ್ಮಾಣ ಆಪುಂಡು. ಅತ್ತಂದೆ ನನಾತ್ ಸಮಾಜ ಸೇವೆ ಮಲ್ಪುನ ಉದ್ದೇಶ ಉಂಡು ಪಂದ್ ಪಂಡೆರ್.

ಒಕ್ಕೂಟದ ಮಹಾನಿರ್ದೇಶಕೆರ್ ಪ್ರವೀಣ್ ಭೋಜ ಶೆಟ್ಟಿ ಪೊಸ ಆಡಳಿತ ಕಚೇರಿ ಉದಿಪನ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್.

ಬೊಕ್ಕ ಕರ್ನಾಟಕ ಸಹಕಾರ ಇಲಾಖೆದ ಮಹಾಮಲ್ಲ ಗೌರವ 2022ನೇ ಸಾಲ್ ದ ಸಹಕಾರ ರತ್ನ ಪ್ರಶಸ್ತಿ ಪಡೆದಿನ ಜಯಕರ ಶೆಟ್ಟಿ ಇಂದ್ರಾಳಿ ಬೊಕ್ಕ ಒಕ್ಕೂಟದ ಮಹಾನಿರ್ದೇಶಕೆರ್ ಪ್ರವೀಣ್ ಭೋಜ ಶೆಟ್ಟಿ ಮೆರೆನ್ ಮಾನಾದಿಗೆ ಮಲ್ತೆರ್.

ಅವೆರ್ದ್ ಬೊಕ್ಕ ಲೇಸ್ ಡ್ ರೋಗಿಲೆನ ವೈದ್ಯಕೀಯ ಚಿಕಿತ್ಸೆಗಾದ್, ಇಲ್ಲ್ ರಿಪೇರಿ, ಇಲ್ಲ್ ನಿರ್ಮಾಣ ಬೊಕ್ಕ ಪೊಣ್ಣು ಜೋಕುಲೆನ ಮದಿಮೆ ಇಂಚ ಒಟ್ಟು 20 ಲಕ್ಷ ರೂ.ದ ಚೆಕ್ ನ್ ಅರ್ಹ ಫಲಾನುಭವಿಲೆಗ್ ಕೊರಿಯೆರ್.

ಈ ಪೊರ್ತುಡು ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಕೆ. ಶೆಟ್ಟಿ ಬೊಂಬೈ, ಒಕ್ಕೂಟದ ಮಹಾ ನಿರ್ದೇಶಕೆರ್ ತೋನ್ಸೆ ಆನಂದ ಎಂ. ಶೆಟ್ಟಿ, ರಾಜೇಶ್ ಎನ್ ಶೆಟ್ಟಿ, ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಅಜಿತ್ ಕುಮಾರ್ ರೈ ಮಾಲಾಡಿ, ಇಂಟರ್ ನ್ಯಾಶನಲ್ ಬಂಟ್ಸ್ ವೆಲ್ ಫೇರ್ ಟ್ರಸ್ಟ್ ಅಧ್ಯಕ್ಷೆರ್ ಎ ಸದಾನಂದ ಶೆಟ್ಟಿ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ, ಒಕ್ಕೂಟದ ಕೋಶಾಧಿಕಾರಿ ಉಳ್ತೂರು ಮೋಹನದಾಸ ಶೆಟ್ಟಿ ಇತ್ತೆರ್.

ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ ಎದ್ಕೊನಿಯೆರ್. ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಪ್ರಾಸ್ತಾವಿಕ ಪಾತೆರಿಯೆರ್. ಪುರುಷೋತ್ತಮ ಭಂಡಾರಿ, ಡಾ. ಪ್ರಿಯಾ ಹರೀಶ್ ಬೊಕ್ಕ ಆರ್ ಜೆ ನಯನಾ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ನೆರ್ದ್ ದುಂಬು ಮೂಡುಶೆಡ್ಡೆ ಶ್ರೀದೇವಿ ಭಜನಾ ಮಂಡಳಿರ್ದ್ ಭಜನೆ ಲೇಸ್ ನಡತ್ಂಡ್.

ಕೆದಂಬಾಡಿ ರಾಮಯ್ಯ ಗೌಡ್ರೆನ ಹೋರಾಟ ಯುವಪೀಳಿಗೆಗ್ ಸೂರ್ತಿ

ಕುಡ್ಲ: ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಮುತಾಲಿಕೆಡ್ ನಡತಿನ ಅಮರಪಳ್ಯ ಹೋರಾಟದ ಇಸಯ ಪಠ್ಯಡ್ ಸೇರ್ಪಡೆ ಆದ್, ಯುವ ಪೀಳಿಗೆಗ್ ಪ್ರೇರಣೆ ಅವೆರೆ ಉಂಡು ಪಂದ್ ಶ್ರೀ ಆದಿಚುಂಚನಗಿರಿ ಮಹಾಸಂಸ್ಥಾನ ಮಠತ್ತ ಪೀಠಾಧ್ಯಕ್ಷೆರ್ ಡಾ‌. ಶ್ರೀ ನಿರ್ಮಲಾನಂದನಾಥ ಮಹಾಸ್ವಾಮೀಜಿ ಪಂಡೆರ್.

ಸ್ವಾತಂತ್ರ್ಯ ಹೋರಾಟಗಾರೆ ಕೆದಂಬಾಡಿ ರಾಮಯ್ಯ ಗೌಡ ಸ್ಮಾರಕ ಉಸ್ತುವಾರಿ ಸಮಿತಿ ಕುಡ್ಲದ ವತಿರ್ದ್ ನಗರಡ್ ಬುಧಾರ ನಡತಿನ ಅಮರ ಸುಳ್ಯ ಸ್ವಾತಂತ್ರ್ಯ ಸಂಗ್ರಾಮ ಸಂಸ್ಕರಣಾ ದಿನಾಚರಣೆ, ಸ್ವಾತಂತ್ರ್ಯ ಹೋರಾಟಗಾರೆ ಕೆದಂಬಾಡಿ ರಾಮಯ್ಯ ಗೌಡ ರಾಜ್ಯ ಶೌರ್ಯ ಪ್ರಶಸ್ತಿ ಪ್ರಧಾನ ಲೇಸ್ ಡ್ ಮೇರ್ ಆಶೀರ್ವಚನ ಕೊರಿಯೆರ್.

ಕೆದಂಬಾಡಿ ರಾಮಯ್ಯ ಗೌಡ ಬೊಕ್ಕ ಅರೆನ ಪುದರ್ ದ ಶೌರ್ಯ ಪ್ರಶಸ್ತಿ ಪಡೆಯಿನ ಏಕನಾಥ ಶೆಟ್ಟಿ ಮೇರ್ ಸಮಾಜಗಾದ್ ಬದುಕಿನ ಪುಣ್ಯಾತ್ಮೆರ್ ಪಂದ್ ಪಂಡೆರ್.

ಬೊಕ್ಕ ಆಶೀರ್ವಚನ ಕೊರ್ನ ಒಡಿಯೂರು ಸಂಸ್ಥಾನದ ಶ್ರೀ ಗುರುದೇವಾನಂದ ಸ್ವಾಮೀಜಿ ಪಾತೆರ್ದ್, ಅಮರ ಸುಳ್ಯ ಸ್ವಾತಂತ್ರ್ಯ ಸಂಗ್ರಾಮ ಬೊಕ್ಕ ಶೌರ್ಯ ಪ್ರಶಸ್ತಿ ಪ್ರದಾನ ರಾಷ್ಟ್ರ ಉಚ್ಚಯ ಆತ್ಂಡ್ ಪಂದ್ ಪಂಡೆರ್.

ಬೊಕ್ಕ ಕೆದಂಬಡಿ ರಾಮಯ್ಯ ಗೌಡ ರಾಜ್ಯ ಶೌರ್ಯ ಪ್ರಶಸ್ತಿನ್ ಭಾರತೀಯ ಭೂ ಸೇನೆದ ನಿವೃತ್ತ ಯೋಧೆ, 2016 ಟ್ಟ್ ನಿಗೂಢವಾದ್ ಕಣ್ಮರೆ ಆಯಿನ ಸುಬೇದಾರ್ ಏಕನಾಥ ಶೆಟ್ಟಿ ಮೆರೆನ ಬೊಡೆದಿ ಜಯಂತಿ ಶೆಟ್ಟಿ ಬೊಕ್ಕ ಜೋಕುಲು ಪ್ರಶಸ್ತಿ ಸ್ವೀಕಾರ ಮಲ್ತೆರ್.

ಶ್ರೀ ಆದಿಚುಂಚನಗಿರಿ ಕುಡ್ಲ ಶಾಖಾ ಮಠತ್ತ ಡಾ.ಶ್ರೀ ಧರ್ಮಪಾಲನಾಥ ಸ್ವಾಮೀಜಿ ಸಾನಿಧ್ಯ ಒಯಿಸೊಂದಿತ್ತೆರ್. ಸುಳ್ಯದ ಆಫ್ ಲಿಬರಲ್ ಎಜುಕೇಶನ್ ಅಧ್ಯಕ್ಷೆರ್ ಡಾ.ಕೆ ವಿ ಚಿದಾನಂದ ಲೇಸ್ ನ್ ಉದಿಪನ ಮಲ್ತೆರ್.

ಈ ಪೊರ್ತುಡು ಮುಸ್ಲಿಂ ಧರ್ಮಗುರು ಯು.ಕೆ ಅಬ್ದುಲ್ ಅಜೀಜ್ ದಾರಿಮಿ, ರಾಜ್ಯ ಮೀನುಗಾರಿಕೆ ಅಭಿವೃದ್ಧಿ ನಿಗಮದ ಅಧ್ಯಕ್ಷೆರ್ ಎ.ವಿ ತೀರ್ಥರಾಮ, ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಅಧ್ಯಕ್ಷೆರ್ ದಯಾನಂದ ಕತ್ತಲ್ ಸಾರ್, ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಅಜಿತ್ ಕುಮಾರ್ ರೈ ಮಾಲಾಡಿ, ದ.ಕ ಜಿಲ್ಲಾ ಮಾಜಿ ಸೈನಿಕೆರೆನ ಸಂಘದ ಅಧ್ಯಕ್ಷೆರ್ ಕರ್ನಲ್ ನಿಟ್ಟೆಗುತ್ತು ಶರತ್ ಭಂಡಾರಿ, ತುಳುನಾಡ ರಕ್ಷಣಾ ವೇದಿಕೆ ಅಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜೆಪ್ಪು ಇತ್ತೆರ್.

ಸ್ವಾತಂತ್ರ್ಯ ಹೋರಾಟಗಾರೆ ಕೆದಂಬಾಡಿ ರಾಮಯ್ಯ ಗೌಡ ಸ್ಮಾರಕ ಉಸ್ತುವಾರಿ ಸಮಿತಿದ ಅಧ್ಯಕ್ಷೆರ್ ಎಂ.ಬಿ ಕಿರಣ್ ಬುಡ್ಲೆಗುತ್ತು ಪ್ರಾಸ್ತಾವಿಕ ಪಾತೆರಿಯೆರ್. ಪ್ರಧಾನ ಸಂಚಾಲಕೆರ್ ಭಾಸ್ಕರ್ ದೇವಸ್ಯ ಎದ್ಕೊನಿಯೆರ್. ಪ್ರಧಾನ ಕಾರ್ಯದರ್ಶಿ ರಕ್ಷಿತ್ ಪುತ್ತಿಲ ಪ್ರಶಸ್ತಿ ಪತ್ರ ಓದಿಯೆರ್. ಕೋಶಾಧಿಕಾರಿ ಶಿವರಾಮ ಗೌಡ ನಿನ್ನಿಕಲ್ ಸೊಲ್ಮೆ ಸಂದಾಯೆರ್. ಈ ಪೊರ್ತುಡು ಉಪಾಧ್ಯಕ್ಷೆರ್ ಪಿ.ಎಚ್ ಆನಂದ್ ನೆರಿಯ, ಸಂಘಟನಾ ಕಾರ್ಯದರ್ಶಿ ಅಕ್ಷಯ್ ಕುರುಂಜಿ, ಚಂದ್ರ ಕೋಲ್ಚಾರ್, ಕುಶಾಲಪ್ಪ ಗೌಡ ಇತ್ತೆರ್. ಸುಶ್ಮಿತಾ ಕಡಪಳ ಲೇಸ್ ಸುಧಾರಿಕೆ ಮಲ್ತೆರ್.

ರಾಷ್ಟ್ರಪತಿ ದ್ರೌಪದಿ ಮುರ್ಮು ಆರೆರ್ದ್ ಪದ್ಮ ಭೂಷಣ ಪ್ರಶಸ್ತಿ ಸ್ವೀಕಾರ ಮಲ್ತಿನ ನಟಿ ರವೀನಾ ಟಂಡನ್

ಡೆಲ್ಲಿ: ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರ್ ಬಾಲಿವುಡ್‌ ನಟಿ ರವೀನಾ ಟಂಡನ್ ಮೆರೆಗ್ ಪದ್ಮಶ್ರೀ ಕೊರ್ದು ಮಾನಾದಿಗೆ ಮಲ್ತೆರ್.

ರಾಷ್ಟ್ರಪತಿ ಭವನಡ್ ಐತಾರ ನಡತಿನ ಪ್ರಧಾನ ಲೇಸ್ ಡ್ ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರ್ ಬೇತೆ ಬೇತೆ ಕ್ಷೇತ್ರದ ಸಾಧಕೆರೆಗ್ 2023ನೇ ಸಾಲ್ ದ ಪದ್ಮಶ್ರೀ, ಪದ್ಮ ವಿಭೂಷಣ ಬೊಕ್ಕ ಪದ್ಮಭೂಷಣ ಪ್ರಶಸ್ತಿಲೆನ್ ಪ್ರದಾನ ಮಲ್ತೆರ್.

ಕಲಾ ಕ್ಷೇತ್ರಗ್ ಕೊರ್ನ ಕೊಡುಗೆಗಾದ್ 50 ವರ್ಷೊದ ನಟಿಗ್ ಪ್ರಶಸ್ತಿ ಕೊರಿಯೆರ್. “ಎಂಕ್ ಮಸ್ತ್ ಗೌರವ ಉಂಡು. ಜನಕುಲೆನ ಮೋಕೆರ್ದ್ ಯಾನ್ ಇತ್ ವರ್ಷೊ ಮುಟ್ಟ ಉದ್ಯಮಡ್ ಉಲ್ಲೆ” ಪಂದ್ ರವೀನಾ ನೇರ್ದ್ ಪಂತೆರ್.

ಎ.11-12: ಕೋಟೆಬಾಗಿಲು ಶ್ರೀ ಮಹಾಮ್ಮಾಯಿ ದೇವಲ್ಯಡ್ ಮಾರಿಪೂಜೆ ಉಚ್ಚಯ

ಬೆದ್ರ: ಕೋಟೆಬಾಗಿಲು ಶ್ರೀ ಮಹಾಮ್ಮಾಯಿ ದೇವಲ್ಯಡ್ ಮಾರಿಪೂಜೆ ಉಚ್ಚಯ ಎ.11 ಬೊಕ್ಕ 12 ಕ್ಕ್ ನಡಪರೆ ಉಂಡು.

ಮಾರ್ನಾಡು ಅನಂತಪದ್ಮನಾಭ ಅಸ್ರಣ್ಣ ಮೆರೆನ ಮುತಾಲಿಕೆಡ್ ಈ ಲೇಸ್ ದ ವೈದಿಕ ವಿಧಿ ವಿಧಾನ ನಡಪರೆ ಉಂಡು.

ಎ.11 ಅಂಗಾರೆ ಬೊಲ್ಪುಗು ಕೋಟೆಬಾಗಿಲು ಶ್ರೀ ವೀರಮಾರುತಿ ದೇವಲ್ಯದ ಕೈತಲ್ ದ ಪಿರಾಕ್ ದ ಕಟ್ಟೆಡ್ ಶ್ರೀ ಮಹಾಮ್ಮಾಯಿ ಬೊಂಬೆ ಪ್ರತಿಷ್ಠೆ, ದರ್ಶನ, ನಡಪರೆ ಉಂಡು. ಶ್ರೀ ಮಹಾಮ್ಮಾಯಿ ದೇವಲ್ಯದ ಅಶ್ವತ್ಥ ಕಟ್ಟೆಡ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ, ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು. ಮಧ್ಯಾಹ್ನ ಅನ್ನಸಂತರ್ಪಣೆ ನಡಪರೆ ಉಂಡು. ರಾತ್ರೆ ದರ್ಶನ, ಬಿರುದಾವಳಿದೊಟ್ಟಿಗೆ ಬೊಂಬೆಗ್ ಶ್ರೀ ಸನ್ನಿಧಿಗ್ ಕನಯೆರೆ ಉಂಡು. ಬೊಕ್ಕ ರಾಶಿ ಪಾಡಿಯೆರೆ ಉಂಡು. ಬೊಕ್ಕ ಶ್ರೀ ದೇವಿ ಉಚ್ಚಂಗಿ ದರ್ಶನ, ಮಹಾಪೂಜೆ ಆದ್, ರಂಗಭೂಷಣ ಮಣಿಕೋಟೆಬಾಗಿಲು ಕಥೆ, ಸಂಭಾಷಣೆ, ನಿರ್ದೇಶನ, ಸಾರಥ್ಯದ, ಪಿಂಗಾರ ಕಲಾವಿದೆರ್ ಬೆದ್ರ ಅಭಿನಯದ ಭರಣಿ ಕೃತಿಕೆ ತುಳು ನಾಟಕ ನಡಪರೆ ಉಂಡು.

ಎ.12 ಬುಧಾರ ಬೊಲ್ಪುಗು ನಾರಂಪಾಡಿ ಗುತ್ತುಇಲ್ಲರ್ದ್ ಪಿಲಿಚಾಮುಂಡಿ ದೈವೊದ ಭಂಡಾರ ಬರಿಯೆರೆ ಉಂಡು. ಮಧ್ಯಾಹ್ನ ಶ್ರೀ ದೇವಿಗ್ ಮಹಾಪೂಜೆ, ಹಣ್ಣುಕಾಯಿ ನಡಪರೆ ಉಂಡು. ಬಯ್ಯಗ್ ಶ್ರೀ ಮೈಸಂದಾಯ ಬೊಕ್ಕ ಶ್ರೀ ಪಿಲಿಚಾಮುಂಡಿ ದೈವೊಲೆನ ಕೋಲ ನಡಪರೆ ಉಂಡು. ಬೊಕ್ಕ ದರ್ಶನದೊಟ್ಟಿಗೆ ಶ್ರೀ ಮಹಾಮ್ಮಾಯಿ ಬೊಂಬೆ ವಿಸರ್ಜನೆ ಅವೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕೋಟೆಬಾಗಿಲು ಶ್ರೀ ಮಹಾಮ್ಮಾಯಿ ಸೇವಾ ಸಮಿತಿದ ಅಧ್ಯಕ್ಷೆರ್ ರಾಜೇಶ್ ಕೋಟೆಗಾರ್, ಗೌರವಾಧ್ಯಕ್ಷೆರ್ ಯಂ. ಪುರುಷೋತ್ತಮ ಶೆಟ್ಟಿ, ಮೊಕ್ತೇಸರೆರ್ ಸೇಸಪ್ಪ ಹೆಗ್ಡೆ ನಾರಂಪಾಡಿಗುತ್ತು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕಲ್ಲಮುಂಡ್ಕೂರು ಮಿತ್ತಮಾಣಿಲ ಕೈಲಾಸ್ ಇಲ್ಲದ ಎದುರುಡ್ ಎ.19 ಬೊಕ್ಕ 23 ಕ್ಕ್ ಆಟ

ಕಲ್ಲಮುಂಡ್ಕೂರು ಮಿತ್ತಮಾಣಿಲ ಕೈಲಾಸ್ ಇಲ್ಲದ ಎದುರುಡ್ ಎ.19 ಬೊಕ್ಕ 23 ಕ್ಕ್ ಆಟ ನಡಪರೆ ಉಂಡು.

ಎ.19 ಬುಧಾರ ಬಯ್ಯಗ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ 9 ನೇ ವರ್ಷೊದ ಶ್ರೀ ದೇವಿ ಮಹಾತ್ಮೆ ಸೇವೆದ ಆಟ ನಡಪರೆ ಉಂಡು.

ಎ.23 ಐತಾರ ರಾತ್ರೆ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ 15ನೇ ವರ್ಷೊದ ಶ್ರೀ ಧರ್ಮಸ್ಥಳ ಕ್ಷೇತ್ರ ಮಹಾತ್ಮೆ ಸೇವೆದ ಆಟ ನಡಪರೆ ಉಂಡು.

ಅಂಚೆನೆ ಬಯ್ಯಗ್ ಚೌಕಿಪೂಜೆಡ್ ಸಂಪನ್ನ ಆವೆರೆ ಇಪ್ಪುನ ದೇವೆರೆನ ಪೂಜೆಡ್ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊನೊಡು. ಬೊಕ್ಕ ರಾತ್ರೆ ನಡಪುನ ಅನ್ನಸಂತರ್ಪಣೆನ್ ಸ್ವೀಕಾರ ಮಲ್ತ್ ದ್, ಆಟ ತೂದು, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶಾಂತ ಬೊಕ್ಕ ಎಂ.ಬಿ. ಕರ್ಕೇರ ಬೊಕ್ಕ ಜೋಕುಲು ನಿಖಿಶಾ ಟವರ್ಸ್ ನಿಡ್ಡೋಡಿ ಲೆಪ್ಪೋಲೆಡ್ ತೆರಿಪಾದೆರ್.

Children’s camp ” Bala Vikasa Shibira -2023 inaugurated by Shri Vishnumurthi Achar ಜೋಕುಲೆನ ಬೌದ್ಧಿಕ ವಿಕಸನಗ್ ಶಿಬಿರ ಪೂರಕ: ವಿಷ್ಣುಮೂರ್ತಿ ಆಚಾರ್

ಪೇರ್ ದಲೆಕ್ಕ ಬೊಲ್ದು ಬೊಕ್ಕ ಹೊಳಪುರ್ದ್ ಇಪ್ಪುನ ಜೋಕುಲೆನ ಮನಸ್ಸ್ ಗ್ ಸಾಣೆ ಪತ್ತ್ ದ್ ಸಂಸ್ಕಾರ ಕಲ್ಪದ್ ಕೊರ್ಪುನೆ ಮಲ್ಲ ಕರ್ತವ್ಯ ಆತ್ಂಡ್. ಈ ದಿಟ್ಟಿಡ್ ಈ ಶಿಬಿರ ಜೋಕುಲೆನ ಬೌದ್ಧಿಕ ಬುಲೆವಣಿಗೆಗ್ ಪೂರಕ ಆತ್ಂಡ್ ಪಂದ್ ವೇದ ವಿದ್ವಾಂಸೆರ್ ವೇ.ಮೂ ವಿಷ್ಣುಮೂರ್ತಿ ಆಚಾರ್ ಪಂಡೆರ್.

ಮೇರ್ ಪುನರೂರು ಪ್ರತಿಷ್ಠಾನ (ರಿ.) ಆಶ್ರಯಡ್ ಬೊಕ್ಕ ಜನ ವಿಕಾಸ ಸಮಿತಿ ಮುಲ್ಕಿ ಸಹಕಾರಡ್, ಜೋಕುಲೆನ ಬೌದ್ಧಿಕ ಬುಲೆವಣಿಗೆಗಾದ್ ಪುನರೂರು ಶ್ರೀ ವಿಶ್ವನಾಥ ದೇವಲ್ಯದ ಸಭಾಂಗಣಡ್ ಧರ್ಮಾಗು ಆಯೋಜನೆ ಮಲ್ತಿನ ಬಾಲ ವಿಕಾಸ ಶಿಬಿರ-2023 ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಈ ಲೇಸ್ ಗುರ್ಕಾರ್ಮೆನ್ ಪುನರೂರು ಪ್ರತಿಷ್ಠಾನದ ಗೌರವಾಧ್ಯಕ್ಷೆರ್, ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು ಒಯಿಸ್ ದಿತ್ತೆರ್.

ಈ ಲೇಸ್ ಗ್ ಕಟೀಲ್ ದ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಅರ್ಚಕೆರ್ ವೇ.ಮೂ ಲಕ್ಷ್ಮೀನಾರಾಯಣ ಆಸ್ರಣ್ಣ ಮೇರ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಚಾವಡಿಡ್ ಮಲ್ಲ ಬಿನ್ನೆರಾದ್ ಕುಡ್ಲದ ದ.ಕ.ಜಿಲ್ಲಾ ಧಾರ್ಮಿಕ ಪರಿಷತ್ ದ ಸದಸ್ಯೆರ್ ಕೊಡೆತ್ತೂರು ಭುವನಾಭಿರಾಮ ಉಡುಪ, ತೋಕೂರುದ ಎಂ.ಆರ್. ಪೂಂಜಾ, ಕೈಗಾರಿಕಾ ತರಬೇತಿ ಸಂಸ್ಥೆದ ತರಬೇತಿ ಅಧಿಕಾರಿ ಲಕ್ಷ್ಮೀಕಾಂತ, ಪುನರೂರು ಪ್ರತಿಷ್ಠಾನದ ಗೌರವಾಧ್ಯಕ್ಷೆರ್ ಎಚ್.ಕೆ. ಉಷಾರಾಣಿ, ಜನವಿಕಾಸ ಸಮಿತಿ ಮುಲ್ಕಿದ ಅಧ್ಯಕ್ಷೆರ್ ಶೋಭರಾವ್ ಬೊಕ್ಕ ಸರ್ವಸದಸ್ಯೆರ್ ಇತ್ತೆರ್.

ಪುನರೂರು ಪ್ರತಿಷ್ಠಾನದ ಅಧ್ಯಕ್ಷೆರ್ ದೇವಪ್ರಸಾದ್ ಪುನರೂರು ಪ್ರಾಸ್ತಾವಿಕವಾದ್ ಬಿನ್ನೆರೆನ್ ಎದ್ಕೊನಿಯೆರ್. ಜನವಿಕಾಸ ಸಮಿತಿ ಮುಲ್ಕಿದ ಪ್ರಧಾನ ಕಾರ್ಯದರ್ಶಿ ಜೀವನ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಹಿತಾ ಉಮೇಶ್ ಲೇಸ್ ದ ಸುಧಾರಿಕೆ ಮಲ್ತೆರ್.

” Swarna Bolpu” devotional song series on Sri Kalikamba Anjanaya temple , Kukkaje released ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ದೇವಲ್ಯದ ಭಕ್ತಿ ಸುಗಿಪು ಸ್ವರ್ಣ ಬೊಲ್ಪು ಬುಡುಗಡೆ

ವಿಟ್ಲದ ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ಕ್ಷೇತ್ರದ ಸ್ವರ್ಣ ಬೋಲ್ಪು ತುಳು ಭಕ್ತಿ ಸುಗಿಪುದ ಧ್ವನಿ ಸುರುಳಿನ್ ಕ್ಷೇತ್ರಡ್ ಧರ್ಮದರ್ಶಿಲು ಶ್ರೀಕೃಷ್ಣ ಗುರೂಜಿ ಶ್ರೀ ಕ್ಷೇತ್ರ ಕುಕ್ಕಾಜೆ ಮೇರ್ ಬುಡುಗಡೆ ಮಲ್ತ್ ದ್, ಆಶೀರ್ವಾದ ಮಲ್ತೆರ್.

ಈ ಪೊರ್ತುಡು ಸಾಹಿತಿ ಅನುರಾಧ ಪಳನೀರು, ಗಾಯಕೆರ್ ಯಾದವ ಕುಕ್ಕಾಜೆ, ರವಿಎಸ್ಎಂ ಕುಕ್ಕಾಜೆ, ದಯಾನಂದ ಅಮೀನ್ ಬಾಯಾರು ಇತ್ತೆರ್. ಈ ಭಕ್ತಿ ಸುಗಿಪುಗ್ ಅನುರಾಧ ಪಳನೀರು ಸಾಹಿತ್ಯ ಬರೆತೆರ್. ಬೊಕ್ಕ ಗಾಯಕೆರ್ ಯಾದವ ಕುಕ್ಕಾಜೆ ಮೆರೆಗ್ ಮಾನಾದಿಗೆ ಮಲ್ತೆರ್. ದಯಾ ಕ್ರಿಯೇಷನ್ ಮುಖೇನ ಬುಡುಗಡೆ ಆಯಿನ ಪದ್ಯಗ್ ಧರ್ಮದರ್ಶಿಲು ಶ್ರೀಕೃಷ್ಣ ಗುರೂಜಿ ಶ್ರೀ ಕ್ಷೇತ್ರ ಕುಕ್ಕಾಜೆ ಆಶೀರ್ವಾದ ಮಲ್ದೆರ್. ಸುದರ್ಶನ್ ತಾರಿದಳ ಛಾಯಾಗ್ರಹಣ ಬೊಕ್ಕ ಸಂಕಲನ ಮಲ್ದೆರ್. ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆದ ಈ ಭಕ್ತಿ ಸುಗಿಪು ದಯಾ ಕ್ರಿಯೇಷನ್ ಯೂ ಟ್ಯೂಬ್ ಡ್ ಬುಡುಗಡೆ ಆತ್ಂಡ್.

Four CRPF teams deployed in DK district ದಕ್ಷಿಣ ಕನ್ನಡ ಜಿಲ್ಲೆಗ್ ಬತ್ಂಡ್ ನಾಲ್ ಸಿಆರ್‌ಪಿಎಫ್ ತಂಡ

ಕುಡ್ಲ: ವಿಧಾನಸಭೆ ವೋಟುದ ಬಗೆಟ್ ದಕ್ಷಿಣ ಕನ್ನಡ ಜಿಲ್ಲಾ ಪೊಲೀಸ್‌ ಘಟಕದ ವ್ಯಾಪ್ತಿಡ್ ವೋಟುದ ಕರ್ತವ್ಯ ಮಲ್ಪರೆ ಸುರುತ್ತ ಹಂತಡ್ ನಾಲ್ ಸಿಆರ್‌ಪಿಎಫ್ ತಂಡಲು ಜಿಲ್ಲೆಗ್ ಬೈದ್ಂಡ್.

ಸುಳ್ಯ, ಬೊಲ್ತೇರ್, ಬಂಟ್ವಾಳ, ಪುತ್ತೂರ್ ಕ್ಷೇತ್ರಡ್ ತಲಾ ಒಂಜೊಂಜಿ ತುಕಡಿ ಕಾರ್ಯ ನಿರ್ವಹಿಸಾಯೆರೆ ಉಂಡು. ಒಂಜಿ ತುಕಡಿಡ್ ತಲಾ 100 ಜನ ಉಲ್ಲೆರ್.

Four CRPF teams deployed in DK district

Mangalore: For the forthcoming Vidhana Sabha elections four CRPF teams have been deployed to DK district to moniter during the election process.

The teams with a task force of 100 persons have been deployed to Sullia, Beltangady, Bantwal and Puttur taluks.

ಎ.11-12: ಸುರತ್ಕಲ್ ದ ಪುರಾತನ ಶ್ರೀ ಮಾರಿಯಮ್ಮ ದೇವಲ್ಯಡ್ ಮಾರಿಪೂಜೆ

ಸುರತ್ಕಲ್ ದ ಪುರಾತನ ಶ್ರೀ ಮಾರಿಯಮ್ಮ ದೇವಲ್ಯಡ್ ಮಾರಿಪೂಜೆ ಎ.11-12 ಮುಟ್ಟ ನಡಪರೆ ಉಂಡು.

ಎ.11 ಅಂಗಾರೆ ಬೊಲ್ಪುಗು ಸುರತ್ಕಲ್ ಪೇಂಟೆಡ್ ಶ್ರೀ ದೇವಿನ ಬಿಂಜ ಪ್ರತಿಷ್ಠೆ, ಪರಕೆ, ಕಾಣಿಕೆ ಸೇವೆ, ಮಧ್ಯಾಹ್ನ ತುಲಾಭಾರ ಸೇವೆ, ಮಹಾಪೂಜೆ, ಶ್ರೀ ದೇವಿ ದರ್ಶನ, ಮಡೆಸ್ತಾನ, ಪರಕೆ, ಕಾಣಿಕೆ, ಅನ್ನಸಂತರ್ಪಣೆ ನಡಪರೆ ಉಂಡು. ರಾತ್ರೆ ಸುರತ್ಕಲ್ ಪೇಂಟೆರ್ದ್ ತಾಲೀಮು ಪ್ರದರ್ಶನ, ಚೆಂಡೆ, ವಾದ್ಯಾ ಬ್ಯಾಂಡ್ ಡೋಲು ಘೋಷದೊಟ್ಟಿಗೆ ಬಿರುದಾವಳಿರ್ದ್ ಶ್ರೀ ದೇವಿನ ಬಿಂಬ ಶ್ರೀ ಕ್ಷೇತ್ರಗ್ ಬರ್ಪುಂಡು. ಬೊಕ್ಕ ರಾಶಿ ನೈವೇದ್ಯ ಬರ್ಪುಂಡು. ಅವೆರ್ದ್ ಬೊಕ್ಕ ಧೂಮಾವತಿ ಬಂಟ ದೈವೊಲೆನ ಭಂಡಾರ ಬತ್ತ್ ದ್, ಮಹಾಪೂಜೆ, ಶ್ರೀ ದೇವಿ ದರ್ಶನ, ಪರಕೆ, ಕಾಣಿಕೆ ನಡಪರೆ ಉಂಡು.

ಎ.12 ಬುಧಾರ ಬಯ್ಯಗ್ ಮಹಾಪೂಜೆ, ಶ್ರೀ ದೇವಿ ದರ್ಶನ ಪರಕೆ, ಕಾಣಿಕೆ, ಬಿರುದಾವಳಿರ್ದ್ ಶ್ರೀ ದೇವಿನ ಬಿಂಬ ವಾರಿಧಿವಾಸಗ್ ಪೊಪುಂಡು.

ಈ ಲೇಸ್ ಗ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಯಸ್ ಎ ಪಿ ಕೆ ಸಂಘ, ಬೊಂಬೈ ಬೊಕ್ಕ ಬೆಂಗ್ಲೂರ್ ಸಮಿತಿ, ಬೊಕ್ಕ ಕ್ಷೇತ್ರದ ಅಂಗಸಂಸ್ಥೆಲು, ಆಡಳಿತ ಸಮಿತಿ, ಏಳ್ ಗ್ರಾಮ, ಐನ್ ಪಟ್ಣ, ಐನ್ ಮಾಗಣೆ, ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.