ಪುಗರ್ತೆದ ಮರವಂತೆ ಬೀಚ್ ಡ್ ಲೈಟ್ ಕಂಬ ಇಜ್ಜಿ, ಬೋಡಾಯಿನ ವ್ಯವಸ್ಥೆ ಇಜ್ಜಿ: ತೊಂದರೆ ಆಂಡ ಕೇನುನಕುಲೇ ಇಜ್ಜಿ
ಮರವಂತೆ: ಪುಗರ್ತೆದ ಮರವಂತೆ ಬೀಚ್ ನ್ ತೂಯರೆ ದೇಶ ವಿದೇಶರ್ದ್ ಮಸ್ತ್ ಪ್ರವಾಸಿಗೆರ್ ಬರ್ಪೆರ್. ಆoಡ ಪ್ರವಾಸಿ ತಾಣದ ಅಭಿವೃದ್ದಿ ಸೇರಿನಂಚನೆ ಜನಕ್ಲೆನ ಸುರಕ್ಷತೆಗ್ ಒವ್ವೆ ರೀತಿದ ವ್ಯವಸ್ಥೆ ಆವಡ್ ಇಜ್ಜಿ.
ಒಂಜಿ ಕಡೆಟ್ಟ್ ಕಡಲ್ ನನೊಂಜಿ ಕಡೆಟ್ಟ್ ಸುದೆ. ಆಯಿತ್ತ ನಡುಟ್ಟ್ ಮಾರ್ಗ. ಮಾರ್ಗದ ಬರಿಟ್ಟೆ ಬರೊಂದಿಪ್ಪುನ ಕಡಲ್ ದ ಬಿರ್ಸ್ ದ ಸಿರೆಕ್ಕುಲು. ತ್ರಾಸಿ ಬೀಚ್ ರ್ದ್ ಮರವಂತೆ ಬೀಚ್ ಮುಟ್ಟ ಮಾರ್ಗಡ್ ಒವ್ವೇ ರೀತಿದ ಲೈಟ್ ಕಂಬ ಆವಡ್, ಹೈ ಮಾಸ್ಟ್ ತುಡರ್ ಆವಡ್ ನನಲ ಆತಿಜಿ. ಕತ್ತಲೆದ ಪೊರ್ತುಡ್ ಜನಕುಲೆಗ್ ಈ ಸಾದಿಡ್ ಪೋಯರೆ ಮಸ್ತ್ ಬಂಗ ಆವೊಂದುಂಡು.
ಬೀಚ್ ದ ಬರಿಟ್ಟ್ ಮಾರ್ಗದ ತುಡರ್ ಪಾಡೊಡ್ ಪಂದ್ ಆಲ್ಪದ ಜನಕುಲು ಕೆಂದೀತ್ತೆರ್. ಆಂಡ ಆಯಿತ್ತ ವ್ಯವಸ್ಥೆ ನನಲ ಆತಿಜಿ. ಬೀಚ್ ಗ್ ಬತ್ತಿನ ಜನಕುಲು ಒಲ್ಪ ಒಲ್ಪ ಗಾಡಿನ್ ಪಾರ್ಕಿಂಗ್ ಮಲ್ಪುವೆರ್. ಈ ಸ್ಥಿತಿ ಟ್ಟ್ ಮಲ್ಲ ಲಾರಿಲು, ಕಂಟೈ ನರ್ ಲು ಮಾರ್ಗಡ್ ಪೋಯರೆ ಬಂಗ ಅವೊಂದುಂಡು.
ತ್ರಾಸಿರ್ದ್ ಸುರು ಆದ್ ಮರವಂತೆ ಸಿಲ್ ಲ್ಯಾಂಡ್ ಮುಟ್ಟ ಬೀಚ್ ದ ಮಾರ್ಗದ ಬರಿಟ್ಟ್ ಗಾಡಿಡ್ ಪೋಪಿನಕ್ಲೆನ ಸುರಕ್ಷತೆದ ದೃಷ್ಟಿರ್ದ್ ಕರ್ಬದ ಸೇಫ್ ಗಾರ್ಡ್ ನ್ ಪಾಡ್ಂಡ ಗಾಡಿ ಅಜೆ ತತ್ತ್ಂಡ ಕಡಲ್ ಗ್ ಬೂರ್ ನೆನ್ ತಡೆಪೊಲಿ. ಉಂದೆರ್ದಾವರ ಜೀವ ಆಪಿನ ತೊಂದರೆ ನ್ ಲ ತಡೆಪೊಲಿ ಪನ್ಪಿನವ್ ಸಾರ್ವಜನಿಕೆರ್ನ ಅಭಿಪ್ರಾಯ.
