Mangalore

ತುಲುಬಾಸೆ.

ತುಲುವ ದೊಂದಿ ಪೊತ್ತದೊರ ಬೆರಿತ ದೋಲು ಬೊಟ್ಟುಗ!
ದೊಂಡೆ ಉಡೆದ್ ಸೊರ ಬರಡ್ ಕೈಕ್ ಕೈನ್ ಪತ್ತುಗ !
ತುಲುವ ಜನೊತ ಅರಿಕೆ ಕೇನ್ ಲೆ !
ತುಲುಬಾಸೆನ್ ಎಂಕ್ಲು ಒರಿಪುವ !! ೧

ಸಾರಸಾರ ಒರ್ಸೊಲೆಡ್
ಜುಲು ಜುಲುಂದು ಪರತಿನ !
ಕನಿ ತೋಡು ತಾರ್ ಸೇರ್ದ್ ಕಡಲರಾಜೆ ನಲಿತಿನ !
ಪಚ್ಚೆ ಪಜಿರ ಪೈರ ಬುಲೆತ ಸಿರಿ ಸಿಂಗರ ನೆಗತಿನ !
ನಿಚ್ಚ ದುನಿಪಿ ತುಲುಬಾಸೆನ್ ತುಲುವೆರೆಂಕ್ಲು ಒರಿಪುವ! ತುಲುವ ಜನೊತ ಅರಿಕೆ ಕೇನ್ ಲೆ….. ತುಲುಬಾಸೆನ್ ಎಂಕ್ಲು ಒರಿಪುವ….. ೨

ಏರ್ ತಗ್ಗ್ ಮರ ನಿರೆಲ್ ಬೋರು ಗುಡ್ಡೆ ಕೋಡಿ ಕೊಲೆಂಜಿ !
ಪುನಿಟ್ ತಾರೆ ಬಾರೆ ಸಾಲ್ !
ಕೊಲಕೆ ಎನೆಲ್ ಬೊಟ್ಟು ಕಂಡ !
ಪುದ್ದರುನಸ್ ಪರ್ಬ ನೇಮ ಕಾಲ ಕರಿಪು ತಂಬಿಲ !
ಪುನ್ಯನಿಲೊತ ತುಲುಬಾಸೆನ್ ತುಲುವೆರೆಂಕ್ಲು ಒರಿಪುವ !
ತುಲುವ ಜನೊತ ಅರಿಕೆ ಕೇನ್ ಲೆ……. ತುಲುಬಾಸೆನ್ ಎಂಕ್ಲು ಒರಿಪುವ…… ೩

ದುಡಿ ಪಾಡ್ದನ ಚೆನ್ನು ನಲಿಕೆ ತೆಲಿಕೆ ದಿಂಜಿ ಕಂಬುಲ !
ನುಡಿ ತಾಸೆದ ಪಿಲಿ ನಲಿಕೆ ತುಲು ಮನ್ನ್ ದ ಕಮ್ಮೆನ !
ಆಟ ಕೂಟ ಟೊಂಕ ಜಿಬಿಲಿ ತುಲು ಗೊಬ್ಬುಲು ಕೇಂಡರ !
ಮನ್ನ ಸಿರಿತ ತುಲುಬಾಸೆನ್ ತುಲುವೆರೆಂಕ್ಲು ಒರಿಪುವ !
ತುಲುವ ಜನೊತ ಅರಿಕೆ ಕೇನ್ ಲೆ..‌.‌…..
ತುಲುಬಾಸೆನ್ ಎಂಕ್ಲು ಒರಿಪುವ ‌……‌೪*ಪಿರಿ ಮುಟ್ಟಲೆ ತರೆಕೇರದ್ ಸೊರ ದೆರ್ಪುಗ ಒಟ್ಟುಗೆ !

ನೆರಿ ಮುಂಡಸ ತರೆ ಪಟ್ಟೆಡ್ ಒರ ಸೇರ್ ಲೆ ಪಟ್ಟ್ ಗೆ !
ತುಲುವೆರುಡಲ ತಂಕೊದ್ಹಕ್ಕ್ ಒಂಜೆ ಸೊರೊಟು ತೋಜಗ !ಅಪ್ಪೆ ಬಾಸೆ ತುಲು ಬಾಸೆನ್ ತುಲುವೆರೆಂಕ್ಲು ಒರಿಪುವ !ತುಲುವ ಜನೊತ ಅರಿಕೆ ಕೇನ್ ಲೆ………

ತುಲುಬಾಸೆನ್ ಎಂಕ್ಲು ಒರಿಪುವ ……….೫

*✍🏻 ಸತೀಶ್ ಕಕ್ಕೆಪದವು
(ಅಕ್ಟೋಬರ್ 5 ತಾರೀಕ್ದ ತುಳು ಪೊಂರ್ಬಾಟೊಗಾದ್ ಅರ್ಪಣೆ)