ಸ್ವಾತಂತ್ರ್ಯ ದಿನತ್ತ ಅಮೃತ ಮಹೋಚ್ಚಯ; ಉಳ್ಳಾಲ ಜನಕ್ಲೆಗ್ ಶಾಸಕೆರ್ ಖಾದರ್ ಮೇರ್ನ ಕೊಡುಗೆ
ದೇಶಗ್ ಸ್ವಾತಂತ್ರ್ಯ ತಿಕ್ ದ್ ೭೫ನೇ ವರ್ಸದ ಗೌಜಿಡ್ ನಮ ಉಲ್ಲ. ಅಮೃತ ಉಚ್ಚಯದ ಗೌಜಿಡ್ ದೇಶದ ಜನಕುಲು ನೀಂದೊಂದು ಉಲ್ಲೆರ್. ಉಂದುವೇ ಪೊರ್ತುಡು ಕುಡ್ಲ ಕ್ಷೇತ್ರ (ಉಳ್ಳಾಲ) ದ ಜನಕುಲು ಬೇತೆ ಭಾಗದ ಜನಕುಲೆರ್ದ್ ಲ ಎಚ್ಚ ಗೌಜಿಡ್ ೭೫ನೇ ಸ್ವಾತಂತ್ರ್ಯ ದಿನಾಚರಣೆಡ್ ಉಲ್ಲೆರ್. ನೆಕ್ಕ್ ಪೂರ ಕಾರಣ ಕರ್ನಾಟಕ ರಾಜ್ಯದ ಒವ್ವೇ ಕ್ಷೇತ್ರಗ್ ಬರಂದಿನ ಅನುದಾನನ್ ಉಳ್ಳಾಲಗ್ ಕನಪಿನಲ್ಪ ಶಾಸಕೆರ್ ಯು.ಟಿ. ಖಾದರ್ ಯಶಸ್ವಿಯಾತೆರ್.
ಉಳ್ಳಾಲ ತಾಲೂಕು ಘೋಷಣೆನೇ ಅನಿರೀಕ್ಷಿತ ಆದಿತ್ತ್ಂಡ್. ಅವೆಟ್ ಲ ರಾಜ್ಯಡ್ ಎಚ್. ಡಿ ಕುಮಾರಸ್ವಾಮಿ ಮುಖ್ಯಮಂತ್ರಿ ಆತಿನಗ ಅರೆನ ಮುಖೇನನೇ ಉಳ್ಳಾಲ ತಾಲೂಕು ಘೋಷಣೆ ಆದಿತ್ತ್ ದ್, ಅಡ್ಯಾರ್-ಹರೇಕಳ ಕಿಂಡಿ ಅಣೆಕಟ್ಟು ಕಂ ಡ್ಯಾಂ ಮಂಜೂರ್ ಆದಿತ್ತ್ ದ್, ಕಾಂಗ್ರೆಸ್ ಸರ್ಕಾರ ಅವಧಿಡ್ ಮಂಜೂರು ಆದಿತ್ತಿನಾಂಡಲ ಬಿಜೆಪಿ ಸರ್ಕಾರ ಇತ್ತಿನಗ ಅನುಮೋದನೆ ಪಡೆದಿತ್ತ್ ದ್, ಖಾದರ್ ಮೇರ್ ಅಭಿವೃದ್ದಿ ಇಚಾರಡ್ ಏಪಲ ಪಿರ ಜಾರಿನಾರ್ ಅತ್ತ್ ಪನ್ಪಿನೆಕ್ಕ್ ಪ್ರತ್ಯಕ್ಷ ಸಾಕ್ಷಿಯಾತ್ಂಡ್.
ಕುಡ್ಲದ ತೊಕ್ಕೊಟ್ಟುಡು ಭಾರೀ ಮಲ್ಲ ಧ್ವಜಸ್ತಂಭ ನಿರ್ಮಾಣ ಮಲ್ಪಾದೆರ್. ಇನಿ ಮಾಮಲ್ಲ ರಾಷ್ಟ್ರ ಧ್ವಜಾರೋಹಣ ನಡತ್ಂಡ್. ತೊಕ್ಕೊಟ್ ದ ಓವರ್ ಬ್ರಿಡ್ಚ್ ಕೈತಲ್ ನಿರ್ಮಾಣ ಆಯಿನ ೧೧೦ ಅಡಿ ಎತ್ತರದ ಧ್ವಜ ಸ್ತಂಭಡ್ ಧ್ವಜಾರೋಹಣ ಮಲ್ತ್ ದ್ ಪಾತೆರಿನ ಶಾಸಕೆರ್ ಯು. ಟಿ. ಖಾದರ್, “ಈ ಧ್ವಜ ಶಾಶ್ವತವಾದ್ ಇಪ್ಪರೆ ಉಂಡು. ಈ ಧ್ವಜ ರಾಷ್ಟ್ರದ ಸಂಕೇತವಾದ್ ರಾವರೆ ಉಂಡು. ದುಂಬುದ ಪೀಳಿಗೆಗ್ ಮಾರ್ಗ ದರ್ಶನ ಸಂಕೇತ ಆಯರೆ ಉಂಡು. ನಮ ಅಭಿವೃದ್ದಿ ಮಲ್ಪುನೆಕ್ಕ್ ಎಚ್ಚ ಒತ್ತು ಕೊರೊಡ್. ನಮ್ಮ ಮನಸ್ ಡ್ ದ್ವೇಷನ್ ದೆತ್ತ್ ಪಾಡೊಡು. ಜಾತಿ, ಧರ್ಮ ಬುಡ್ದ್ ಒಟ್ಟುಗ್ ಬೇಲೆ ಮಲ್ಪೊಡು.
ಶೈಕ್ಷಣಿಕವಾದ್ ಕ್ಷೇತ್ರ ಬುಲೆದ್ಂಡ್. ಸರಿಯಾದ್ ಪರ್‍ಪಿನ ನೀರ್ ದ ವ್ಯವಸ್ಥೆ ಮುಲ್ಪ ಅವೊಡು. ಅಭಿವೃದ್ಧಿಗ್ ಪೇಂಟೆ, ಗ್ರಾಮ ಪಂಚಾಯತ್ ಒತ್ತು ಕೊರೊಡ್ ಪಂದ್ ಪಂಡೆರ್. ಕಾರ್ಯಕ್ರಮದ ಲೆಕ್ಕೊಡು ಉಳ್ಳಾಲರ್‍ದ್ ಓವರ್ ಬ್ರಿಡ್ಜ್ ಮುಟ್ಟ ಕಲ್ಪಾರ್ಥಿಲೆನ ಮೆರವಣಿಗೆ ನಡತ್ಂಡ್. ಈ ಲೇಸ್ ಡ್ ಎಡ್ಡೆ ರೀತಿಡ್ ಪ್ರದರ್ಶನ ಮಲ್ತಿನ ಕಲ್ಪಾರ್ಥಿಲೆಗ್ ಮಾನಾದಿಗೆ ಮಲ್ತೆರ್.
ಕಾರ್ಯಕ್ರಮಡ್ ನಗರ ಸಭೆ ಅದ್ಯಕ್ಷೆರ್ ಚಿತ್ರಕಲಾ, ಉಪಾಧ್ಯಕ್ಷೆರ್ ಅಯ್ಯೂಬ್ ಮಂಚಿಲ, ಪೌರಾಯುಕ್ತ ವಿದ್ಯಾ ಕಾಳೆ, ತಹಶೀಲ್ದಾರ್ ಗುರುಪ್ರಸಾದ್, ಗ್ರಾಮಕರಣಿಕ ಪ್ರಮೋದ್, ವಿಧಾನ ಪರಿಷತ್ ಸದಸ್ಯ ಬಿಎಂ ಫಾರೂಕ್, ಚಂದ್ರಹಾಸ್ ಪಂಡಿತ್ ಹೌಸ್, ಸಂತೋಷ್ ಬೋಳಿಯಾರ್, ಸತೀಶ್ ಕುಂಪಲ, ಬಾಜಿಲ್ ಡಿಸೋಜ, ಬೇತೆ ಬೇತೆ ಗ್ರಾಮ ಪಂಚಾಯತ್ ದ ಅಧ್ಯಕ್ಷೆರ್, ಸದಸ್ಯೆರ್, ಸಿಬ್ಬಂದಿಲು, ನಗರ ಸಭೆತ್ತ ಕೌನ್ಸಿಲರ್ ಲು, ಬೇತೆ ಬೇತೆ ಸಂಘಟನೆದ ಸದಸ್ಯೆರ್, ಇಲಾಖೆದ ಅಧಿಕಾರಿಲು, ಅಧ್ಯಾಪಕೆರ್ ಕೈತಲ್ ದ ಜನಕುಲು ಲೇಸ್ ಡ್ ಪಾಲ್ ಪಡೆದಿತ್ತೆರ್.
