ನನದ ತುಳುನಾಡ್ ಗ್ ಬೋಡು ಸತ್ಯಣ್ಣನ ನಾಯಕತ್ವ..!!
ಎಚ್ಚ ಆವೊಂದುಂಡು ಹಿಂದು ಪರ ಸಂಘಟನೆದ ಕಾರ್ಯಕರ್ತೆರೆನ ಈ ಘೋಷಣೆ
ಕುಡ್ಲ: ಸತ್ಯಜಿತ್ ಸುರತ್ಕಲ್ ಅಭಿಮಾನಿ ಬಳಗ ಬೊಕ್ಕ ಹಿಂದು ಪರ ಸಂಘಟನೆದ ಕಾರ್ಯಕರ್ತೆರ್‍ನ ಮನಸ್ಸ್‌ಡ್ ಪ್ರತಿ ದಿನ, ಪ್ರತಿ ಕ್ಷಣಲ ಧರ್ಮದ ಒರಿಪುಗಾದ್ ಪೊರ್ಂಬಾಟ ಮಲ್ತಿನ ಸತ್ಯಣ್ಣಗ್ ರಾಜಕೀಯ ಅವಕಾಶ ತಿಕ್ಕಿನೇ ಇಜ್ಜಿ. ರಾಜಕೀಯದ ಕಡೆಕ್ಕ್ ಮೋನೆ ಮಲ್ತ್ಂಡ ನಕಲಿ ನಾಯಕೆರ್‍ನ ಬಣ್ಣ ಬಯಲ್ ಆಪುಂಡು ಪನ್ಪಿನ ಕಾರಣಗೋ ಗೊತ್ತುಜಿ ಏರಾ ಅವಕಾಶನ್ ತಪ್ಪಾವುಲೆಕ್ಕ ಮಲ್ತೊಂದುಲ್ಲೆರ್ ಪನ್ಪಿನ ಪಾತೆರ ಕೇನೊಂದುಂಡು. ಆಂಡ ಇತ್ತೆ ಪೋಸ್ಟ್ ಕಾರ್ಡ್ ಬೊಕ್ಕ ನಮೋ ಕರುನಾಡು ಪನ್ಪಿನವೆನ್ ಎಚ್ಚಾದ್ ವೀಕ್ಷಣೆ ಮಲ್ತೊಂದುಪ್ಪುನ ಹಿಂದು ಪರ ಸಾಮಾಜಿಕ ಜಾಲತಾಣಡ್ ಕಟೀಲ್ ಬದಲ್ ಮಲ್ಪೊಡು, ಹ್ಯಾಶ್ ಟ್ಯಾಗ್ ಕ್ರಿಯೇಟ್ ಮಲ್ಪರೆ ಸುರು ಮಲ್ತ್‌ದಿತ್ತ್‌ದ್ ಉಂದೆತ್ತ ಬೆರಿಟ್ಟೆ ಇತ್ತೆ ತುಳುನಾಡ್ ದ ಹೃದಯ ಸಾಮ್ರಾಟ್ ಪಂದೇ ಪುಗರ್ತೆ ಪಡೆಯಿನ ಸತ್ಯಜಿತ್ ಸುರತ್ಕಲ್ ಮೆರೆಗ್ ದುಂಬುದ ಲೋಕಸಭಾ ಟಿಕೆಟ್ ಪನ್ಪಿನ ಘೋಷಣೆ ಕೇನೊಂದುಂಡು. ಪ್ರಧಾನಿ ಮೋದಿ ಕಾರ್ಯಕ್ರಮಟ್ ಈ ಪಾತೆರ ನನಾತ್ ಎಚ್ಚ ಆಪಿನ ಸಾಧ್ಯತೆ ಉಂಡು.
ಸಾಮಾಜಿಕ ಜಾಲತಾಣಡ್ ಪಸೆರೊಂದು ಇಪ್ಪುನ ಬದಲಾವಣೆದ ಕಾರಣಲು, ತುಳುನಾಡ್ ಗ್ ದಾಯೆ ಬೋಡು “ಸತ್ಯಜಿತ್ ಸುರತ್ಕಲ್”
ಸತ್ಯಣ್ಣ…!! ಈ ಪುದರ್ ತುಳುನಾಡ್‌ದ ಜನಕುಲು ಕೇನಂದಿನಕುಲು ಇಜ್ಜಿ. ತನ್ನ ಕಾರ್ಯರ್‍ದೆ ಮಾತ ಕಾರ್ಯಕರ್ತೆನ ನಂಬುಗೆದ ವ್ಯಕ್ತಿಯಾದ್ ಇನಿ ಉಂತುದೆರ್. ಅವ್ವೆತೊ ನ್ಯಾಯದ ಪರವಾದ್ ಪೊರ್ಂಬಾಟಲು, ನಿದ್ರೆ ಇಜ್ಜಂದೆ ಕಾರ್ಯಕರ್ತೆರೆನ ರಕ್ಷಣೆಗ್ ಉಂತುದಿನ ಉದಾಹರಣೆಲು ಕಣ್ಣ ದುಂಬುಡೇ ಉಂಡು. ಇತ್ತೆದ ತುಳುನಾಡ್ ದ ಕೆಲ ಸಮಸ್ಯೆಲೆಗ್ ಉತ್ತರ ಕೊರಿಯರೆ ಇತ್ತೆದ ಒವ್ವೆ ರಾಜಕೀಯ ನಾಯಕೆರ್ ದುಂಬು ಬರೊಂದಿಜ್ಜೆರ್.
ಸತ್ಯಣ್ಣಗ್ ರಾಜಕೀಯಡ್ ತುಳುನಾಡು ಒಂಜಿ ವೇದಿಕೆನ್ ನಿರ್ಮಾಣ ಮಲ್ತ್‌ದ್ ಕೊರೊಡು. ಇಜ್ಜಿಂಡ ದತ್ತು ದೆತೊಂದಿನ ಕೆಲ ನಾಯಕೆರೆಗ್ ತುಳುನಾಡ್‌ಡ್ ಬಿಲೆನೇ ಇಜ್ಜಂದಿಲೆಕ್ಕ ಆಪುಂಡು. ತುಳುನಾಡ್ ಡ್ ಸಂಘಟನೆ ರ್ದ್ ಒಂಜಿ ಪಕ್ಷ ಉಂತುದಿನವ್. ಪಕ್ಷ ರ್ದ್ ಅತ್ತ್..!!
ಸತ್ಯಜಿತ್ ಸುರತ್ಕಲ್ ಏಪಲ ಪ್ರಚಾರನ್ ಬಯಕ್ ದಿನಾರ್ ಅತ್ತ್. ಅರೆನ ಪೊರ್ಂಬಾಟ, ಧೈರ್ಯದ ಪಾತೆರ ಮಾತೆರ್‍ನಲ ಮನಸ್ಸ್ ನ್ ಗೆಂದ್‌ದ್ಂಡ್. ಕೋಡೆ ಮುರನಿ ಬತ್ತಿನ ಮಸ್ತ್ ನಾಯಕೆರ್ ಇನಿ ಪಕ್ಷಡ್ ಉನ್ನತ ತಾನೊನ್ ಪಡೆತ್ತೆರ್. ಆಂಡ ಸತ್ಯಜಿತ್ ಸುರತ್ಕಲ್ ಮೆರೆನ ಒಟ್ಟುಗ್ ಇತ್ತಿನಕುಲುಲ ಇನಿ ಸಂಸದೆರಾದ್, ಸಚಿವೆರಾದ್ ಗುರ್ತಿಸಾದೆರ್.
ತುಳುನಾಡ್ ದ ಒರಿಪುಗಾದ್ ದುಂಬುದ ವೋಟುಡು ಸತ್ಯಜಿತ್ ಸುರತ್ಕಲ್ ಮೆರೆಗ್ ಬೆಂಬಲ ಕೊರ್ಪಿನವ್ ಎಡ್ಡೆ. ಕೇಂದ್ರದ ಬಿಜೆಪಿ ಸರ್ಕಾರ ಹಿಂದು ಕಾರ್ಯಕರ್ತೆರೆನ ಬುಲಿಪುಗ್ ನನ ಆಂಡಲ ಸ್ಪಂದಿಸಾವೊಡು ಪನ್ಪಿನ ಪಾತೆರ ಮಾತ ಕಡೆರ್ದ್ ಲ ಕೇಂಡ್ ದ್ ಬರೊಂದುಂಡು.
