ಉಚ್ಚಿಲ : ಮಾತೆರ್ನಲ ಕಣ್ಣ್ ಬೊಕ್ಕ ಮನಸ್ ನ್ ಒಯಿಪುನಂಚಿನ ಉಚ್ಚಿಲ ದ ಶ್ರೀ ಮಹಾಲಕ್ಷ್ಮಿ ದೇವಲ್ಯದ ಕಲೆಗಾರಿಕೆ, ವಿನ್ಯಾಸ ಬೊಕ್ಕ ಶಿಲ್ಪದ ಪೊರ್ಲುನು ಮನಸಾರೆ ಪುಗರಿಯೆರ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ, ಪದ್ಮವಿಭೂಷಣ ಡಾ. ಡಿ.ವೀರೇಂದ್ರ ಹೆಗ್ಗಡೆರ್.
ಉಚ್ಚಿಲ ದೇವಲ್ಯದ ಬ್ರಹ್ಮಕಲಶದ ದಿನ ಸನಿಯಾರ (ಏ.9) ಶ್ರೀ ಕ್ಷೇತ್ರಗ್ ಭೇಟಿ ಕೊರ್ದು ಬೊಕ್ಕ ನಡತಿನ ಧಾರ್ಮಿಕ ಸಭೆಟ್ ಆರ್ ಪಾತೆರ್ದ್ ಉಚ್ಚಿಲ ದೇವಸ್ಥಾನದ ಕಲೆ , ವಿನ್ಯಾಸನ್ ತೂದು, “ಶಿಲೆಯಲ್ಲವೀ ಗುಡಿ ಕಲೆಯ ಬಲೆಯು ..” ಪನ್ಪಿನ ಕನ್ನಡದ ಕವಿವಾಣಿದ ಲೆಕ್ಕ ದೇವಸ್ಥಾನದ ಕಲ್ಲ್ ದ ಕೆತ್ತನೆ, ದಾರು ಶಿಲ್ಪದ ಕಲಾಕುಸುರಿನ್ ತೂವನಗ ಬಾರಿ ಕುಷಿಯಾಪುಂಡು. ಉಚ್ಚಿಲ ದೇವಲ್ಯದ ಶಿಲ್ಪ ಸೌಂದರ್ಯ ಗ್ ಸರಿಸಾಟಿ ಆಪಿನ ದೇವಲ್ಯ ಕುಡೊಂಜಿ ಇಜ್ಜಿ ಪಂಡೆರ್.
ನಮ ಲಕ್ಷ್ಮಿ ದೇವಿನ್ ತಾಮರೆ ಪೂತ್ತ ಮಿತ್ತ್ ಅಂಚೆನೆ ಸರಸ್ವತಿ ದೇವಿನ್ ಬಂಡೆದ ಮಿತ್ತ್ ಕುಲ್ಲುದಿನ ತೂಪ.ಪಂಡ ಲಕ್ಷ್ಮಿ ಏಪಲ ಚಂಚಲ. ಮಹಾಲಕ್ಷ್ಮಿ ಕಡಲ್ ಡ್ ಉದಿತ್ ಬತ್ತಿನ ದೇವತೆ.ಪಂಡ ಮೊಗವೀರ ಸಮಾಜದ ಅಧಿದೇವತೆ. ಅಂಚಾದ್ ಮೊಗವೀರ ಸಮಾಜಗ್ ಲಕ್ಷ್ಮೀ ದೇವಿನ ಜೋಕುಲು ಪನ್ಪಿನ ಗೌರವ ಉಂಡು ಪಂಡೆರ್.
ಮೊಗವೀರೆರ್ ಕಡಲ್ ಗ್ ಕಸುಬುಗು ಪೋವನಗ ದೇವೆರೆನ್ ನೆನೆತ್ ದ್ ಪೋಪೆರ್. ದಾಯೆ ಪಂಡ ಅಕುಲು ತನ್ನ ಬದ್ ಕ್ ನ್ ಅತಂತ್ರ ಬೊಕ್ಕ ಅಪಾಯದ ಸ್ಥಿತಿಕ್ಕ್ ಒಡ್ಡುವೆರ್ಂದ್ ಡಾ. ಹೆಗ್ಗಡೆ ಪಂಡೆರ್.
ಬಪ್ಪನಾಡ್, ಕಟೀಲ್ ಇಂಚಿನ ಜಾತ್ರೆದಲೆಕ್ಕನೆ ಧರ್ಮಸ್ಥಳ ದ ಜಾತ್ರೆದ ಪೊರ್ತುಡುಲ ಮೊಗವೀರ ಸಮಾಜದಕುಲು ಕೊಡಿ ಏರ್ ನಗ, ಕೊಡಿ ಜಾನಗ ಏರಾಂಡಲ ಉಪ್ಪೊಡೆ. ಅಂಚಾದ್ ಧರ್ಮಸ್ಥಳಕ್ಕ್ ಲ ಮೊಗವೀರ ಬಂಧುಲೆಗ್ ಲ ಕೈತಲ್ದ ಸಂಬಂಧ ಉಂಡು. ದುಂಬುದ ಲೆಕ್ಕ ಈ ಸಮಾಜದಕುಲು ಬಡವೆರತ್ತ್. ಅಕ್ಲೆಗ್ ಇತ್ತೆ ಮಹಾಲಕ್ಷ್ಮಿ ಒಲಿದೆರ್. ಬಡಪತ್ತ್ ಪೋತುಂಡು. ಧರ್ಮಸ್ಥಳ ದ ಗ್ರಾಮಾಭಿವೃದ್ದಿ ಯೋಜನೆ, ಸ್ವಸಹಾಯ ಗುಂಪುಡು ಎಚ್ಚಿನ ಸಂಖ್ಯೆಡ್ ಮೊಗವೀರ ಪೊಂಜೋವುಲು ಉಲ್ಲೆರ್. ಬಡವೆರಾಂಡಲ ಮಲ್ಲೆಜ್ಜಿ. ಮಾತೆರೆಡಲ ಭಕ್ತಿ, ಪ್ರೀತಿ, ಶ್ರದ್ಧೆ ಬೊಕ್ಕ ಶುದ್ಧ, ನಿರ್ಮಲ ಮನಸ್ ಉಪ್ಪೊಡು. ಅಕ್ಲೆಗ್ ಮಹಾಲಕ್ಷ್ಮಿ ಒಲಿವೆರ್. ನನದ ಪೀಳಿಗೆಗ್ ಶಿಕ್ಷಣ ಕೊರ್ಲೆ, ಉಳಿತಾಯ, ಸ್ವಚ್ಚತೆದ ಪಾಠ ಅಂಚೆನೆ ಸಂಸ್ಕಾರ ಕಲ್ಪಾಲೆ. ಹೃದಯ ಮಂದಿರೊಡು ಲಕ್ಷ್ಮಿ ದೇವಿನ್ ಶಾಶ್ವತವಾದ್ ಸ್ಥಾಪನೆ ಮಲ್ಪುಲೆ ಪಂದ್ ಆರ್ ಪಂಡೆರ್.
ಪುತ್ತಿಗೆ ಮಠತ್ತ ಶ್ರೀ ಸುಗುಣೇಂದ್ರತೀರ್ಥ ಸ್ವಾಮಿಲು ಆಶೀರ್ವಚನ ಮಲ್ತ್ ದ್ , ಒಡಿಪು ಶ್ರೀ ಕೃಷ್ಣನ ಸನ್ನಿಧಿಗ್ ಲ ಉಚ್ಚಿಲ ಮಹಾಲಕ್ಷಿ ದೇವಸ್ಥಾನ ಗ್ ಲ ಸಂಬಂಧ ಉಂಡು ಪಂಡೆರ್. ಕೊಲ್ಲಾಪುರ ಕ್ಷೇತ್ರದಂಚೆನೆ ಉಚ್ಚಿಲ ಕ್ಷೇತ್ರದ ಮಲ್ಲ ಧಾರ್ಮಿಕ ಬೊಕ್ಕ ಪ್ರವಾಸಿ ತಾಣ ಆವಡ್ ಪಂಡೆರ್.ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ದ ಅನಂತ ಪದ್ಮನಾಭ ಅಸ್ರಣ್ಣೆರ್ ಆಶೀರ್ವಚನ ಮಲ್ತೆರ್.ದೇವಲ್ಯದ ಬ್ರಹ್ಮಕಲಶ ಪುಣ್ಯೋತ್ಸವ ಸಮಿತಿದ ಅಧ್ಯಕ್ಷೆರ್ ನಾಡೋಜ ಡಾ.ಜಿ.ಶಂಕರ್ ಲೇಸ್ ದ ಗುರ್ಕಾರ್ಮೆ ಒಯಿಸ್ ದೆರ್.ಮತ್ತರ್ಮೆಡ್ ಮಲ್ಲ ಬಿನ್ನೆರಾದ್ ಶಾಸಕೆರ್ ಲಾಲಾಜಿ ಮೆಂಡನ್, ಮಾಜಿ ಶಾಸಕೆರ್ ಪ್ರಮೋದ್ ಮಧ್ವರಾಜ್, ದಕ ಮೊಗವೀರ ಮಹಾಜನ ಸಂಘದ ಅಧ್ಯಕ್ಷೆರ್ ಜಯ ಸಿ.ಕೋಟ್ಯಾನ್ ಬೆಳ್ಳಂಪಳ್ಳಿ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಗುಂಡು ಬಿ.ಅಮೀನ್,ಕ್ಷೇತ್ರಾಡಳಿತ ಸಮಿತಿ ಅಧ್ಯಕ್ಷೆರ್ ವಾಸುದೇವ ಸಾಲ್ಯಾನ್, ಉದ್ಯಮಿಲಾಯಿನ ಭುವನೇಂದ್ರ ಕಿದಿಯೂರು, ಆನಂದ್ ಸಿ ಕುಂದರ್, ಸುಧಾಕರ ಹೆಗ್ಡೆ, ಅಪ್ಪಣ್ಣ ಹೆಗ್ಡೆ, ಗೌರಿ ಮರಾಠೆ ನಾಗ್ಪುರ ಇತ್ತೆರ್. ಅವೆರ್ದ್ ಬೊಕ್ಕ ತಂಜಾವೂರುದ ದಕ್ಷಿಣ ವಲಯ ಸಾಂಸ್ಕೃತಿಕ ಕೇಂದ್ರದ ಕಲಾವಿದೆರೆರ್ದ್ ಮಹಾಲಕ್ಷ್ಮಿ ಸಾಂಸ್ಕೃತಿಕ ಉತ್ಸವ ನಡತ್ಂಡ್.
