ಕುಡ್ಲ: ಪುರಭವನಗ್ ಪರ್ಯಾಯವಾದ್ ಕುಡೊಂಜಿ ಭವನ ಆಯರೆ ಉಂಡು; ಕೋಟ ಶ್ರೀನಿವಾಸ ಪೂಜಾರಿ
ಕುಡ್ಲ: ಉರ್ವಡ್ ಇಪ್ಪುನ ಜಿಲ್ಲಾ ಅಂಬೇಡ್ಕರ್ ಭವನನ್ ದುಂಬುದ ದಿನಟ್ ಪುರಭವನಗ್ ಪರ್ಯಾಯವಾದ್ ನನೊಂಜಿ ಭವನನ್ ರೂಪಿಸಾವುನ ದೃಷ್ಟಿರ್ದ್ 2 ಕೋಟಿ ರೂ. ವೆಚ್ಚಡ್ ಅಭಿವೃದ್ಧಿ ಮಲ್ಪರೆ ಉಂಡು ಪಂದ್ ಸಮಾಜ ಕಲ್ಯಾಣ ಇಲಾಖೆ ಬೊಕ್ಕ ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ ಪಂಡೆರ್.
ಉರ್ವಸ್ಟೋರ್ ಡ್ ಇಪ್ಪುನ ಅಂಬೇಡ್ಕರ್ ಭವನಗ್ ಅಂಗಾರೆ ಭೇಟಿ ಮಲ್ತ್ ದ್ ಪರಿಶೀಲನೆ ನಡಪಾದ್ ಆಯಿಬೊಕ್ಕ ಸುದ್ದಿಗಾರೆರ್ನೊಟ್ಟುಗ್ ಪಾತೆರಿಯೆರ್ .
ಅಂಬೇಡ್ಕರ್ ಭವನ ಉದಿಪನ ಆಯಿಬೊಕ್ಕ ಕೆಲವೊಂಜಿ ವ್ಯವಸ್ಥೆ ಬಾಕಿಯಿತ್ತಿನ ಕಾರಣ ಸಾರ್ವಜನಿಕೆರೆಗ್ ತಿಕ್ಕುಜಿ. ಉಂದೆನ್ ತೂದ್ ಮೇಯರ್, ಉಪಮೇಯರ್, ಪೆರಿಯ ಅಧಿಕಾರಿಲೆನ ಒಟ್ಟುಗ್ ಅಂಬೇಡ್ಕರ್ ಭವನ ಪರಿಶೀಲನೆ ಮಲ್ಪಿನ ಸಭೆ ನಡಪಾದ. ಅಂಬೇಡ್ಕರ್ ಭವನನ್ ಎಡ್ಡೆ ಮಲ್ತ್ ದ್, ಸಾರ್ವಜನಿಕ ಕಾರ್ಯಕ್ರಮಲೆಗ್ ಕೊರ್ಪಿನ ಉದ್ದೇಶರ್ದ್ ಯೋಜನೆ ದೀವೊಂದ. ವೇದಿಕೆಗ್ ಪರದೆ ವ್ಯವಸ್ಥೆ, ಲೈಟಿಂಗ್ ಬೊಕ್ಕ ಸೌಂಡ್ ಸಿಸ್ಟಂ, ಅಗ್ನಿಶಾಮಕ ವ್ಯವಸ್ಥೆ ದೊಟ್ಟುಗ್ ಬೇತೆ ಬೇಲೆಗ್ ಅಂದಾಜು 2 ಕೋ.ರೂ. ಯೋಜನಾ ವರದಿನ್ ಅಧಿಕಾರಿಲು ಮಲ್ತ್ ದೆರ್. ಉಂದೆಕ್ಕ್ ಮಹಾನಗರಪಾಲಿಕೆಡ್ ಪರಿಶಿಷ್ಟ ಜಾತಿ ಬೊಕ್ಕ ಪಂಗಡಗ್ ದೀತಿನ ಕಾಸ್ ಬೊಕ್ಕ ರಾಜ್ಯ ಸರಕಾರರ್ದ್ ಲ ಅನುದಾನ ತಿಕ್ಕರೆ ಉಂಡು ಪಂಡೆರ್.
ಬಾಬಾ ಸಾಹೇಬ್ ಅಂಬೇಡ್ಕರ್ ಪುದರ್ ಡ್ ಭಾರೀ ಪೊರ್ಲುದ ಚಾವಡಿ ಪೇಂಟೆಡ್ ಇತ್ತ್ ದ್, ಮಾತ ಸೌಕರ್ಯ ಉಂಡು. ಪೇಂಟೆದ ಪುರಭವನಗ್ ಪರ್ಯಾಯ ರೀತಿಡ್ ಈ ಭವನ ಆಯರೆ ಉಂಡು. ದುಂಬುದ 2 ತಿಂಗೊಳ್ದ ಉಲಾಯಿ ಈ ಬೇಲೆ ಮುಗಿದ್ ಸಾರ್ವಜನಿಕ ಕಾರ್ಯಕ್ರಮಗ್ ಚಾವಡಿ ಬುಡ್ದ್ ಕೊರ್ಪಿನ ಉದ್ದೇಶನ್ ಪಾಡ್ದ ಪಂಡೆರ್.
ಶೇ. 50 ರಿಯಾಯಿತಿ: ಅಂಬೇಡ್ಕರ್ ಭವನ ಬಾಡಿಗೆಗ್ ಸಂಬಂಧಪಟ್ಟಿಲೆಕ್ಕ ಮಹಾನಗರಪಾಲಿಕೆ ಇತ್ತೆ ಒಂಜಿ ನಿಯಮನ್ ಮಲ್ತ್ ದ್oಡ್. ಪುರಭವನ ಕಮ್ಮಿ ಬಿಲೆಟ್ ಜನಕ್ಲೆಗ್ ತಿಕ್ಕರೆ ಉಂಡು. ಪರಿಶಿಷ್ಟ ಜಾತಿ ಬೊಕ್ಕ ಪರಿಶಿಷ್ಟ ಪಂಗಡಗ್ ಶೇ.50 ದಾತ್ ರಿಯಾಯಿತಿಡ್ ತಿಕ್ಕರೆ ಉಂಡು. ದುಂಬುದ ದಿನಟ್ ಸರಕಾರಿ ಇಲಾಖೆದ ಕಾರ್ಯಕ್ರಮಲು ಮುಲ್ಪ ನಡಪಿಲೆಕ್ಕ ಚಿಂತನೆ ಮಲ್ತ್ ದೆರ್. ನಿರಂತರವಾದ್ ಸಾಂಸ್ಕೃತಿಕ ಕಾರ್ಯಕ್ರಮದ ಮುಖೇನ ನಾನಾತ್ ಪೊರ್ಲು ಮಲ್ಪಿನ ಬಗೆಟ್ ಚಿಂತನೆ ಮಲ್ತ್ ದೆರ್.
ಈ ಪೊರ್ತುಡು ಮೇಯರ್ ಪ್ರೇಮಾನಂದ ಶೆಟ್ಟಿ, ಉಪ ಮೇಯರ್ ಸುಮಂಗಲಾ ರಾವ್, ಮನಪಾ ಆಯುಕ್ತ ಅಕ್ಷಯ್ ಶ್ರೀಧರ್, ಸಮಾಜ ಕಲ್ಯಾಣ ಇಲಾಖೆ ಉಪನಿರ್ದೇಶಕ ಸಿದ್ಧಲಿಂಗೇಶ್ ಬೇವಿನಮತ್ತಿ, ಕಾರ್ಪೊರೇಟರ್ ಗಣೇಶ್ ಕುಲಾಲ್, ಇಂಜಿನಿಯರ್ ನರೇಶ್ ಶೆಣೈ, ಅಂಬೇಡ್ಕರ್ ಭವನ ವ್ಯವಸ್ಥಾಪನಾ ಸಮಿತಿ ಸದಸ್ಯ ವಿನಯ್ ನೇತ್ರ ದಡ್ಡಲ್ಕಾಡ್, ದಲಿತ ದೌರ್ಜನ್ಯ ವಿರೋಧಿ ಸಮಿತಿ ವಿಶ್ವನಾಥ್ ಚೆಂಡ್ತಿಮಾರ್ ಇತ್ತೆರ್.
