Kodikal

” ಸೆಲ್ಫಿ ಸ್ಪಾಟ್ ” ಆದ್ ಬದಲಾಯಿನ ಕಜವುದ ರಾಶಿ

ಕುಡ್ಲ, ಜುಲೈ :10: ಸ್ವಚ್ಛತೆ ಬಗ್ಗೆ ಪ್ರತಿಯೊರಿ ನಾಗರಿಕೆರೆಗ್ ತಿಳುವಳಿಕೆ ಉಪ್ಪೊಡು ಸಾರ್ವಜನಿಕ ಜಾಗೆಡ್ ಕೆಲವೆರ್ ದಿನಾಲ ಕಜವು ಪಾರ್ದ್ ಬ್ಲ್ಯಾಕ್ ಸ್ಪಾಟ್ ಆದ್ ಜಾಗೆನ್ ಗಲೀಜು ಮಲ್ತೊಂದು ಉಲ್ಲೆರ್ . ಅಂಚಿನ ಒಂಜಿ ಜಾಗೆನ್ ಸ್ವಚ್ಛ ಮಲ್ತ್ ಸಮಾಜಗ್ ಸುಂದರ ಸಂದೇಶ ಕೊರ್ಪಿನ ಪರಿಸರ ಸಂರಕ್ಷಣೆದ ವರ್ಣರಂಜಿತ ಚಿತ್ರ ಬುಡ್ಪಾದ್ ಸೆಲ್ಫಿ ಸ್ಪಾಟಾದ್ ಪರಿವರ್ತನೆ ಮಲ್ಪರೆ ಮ.ನ.ಪಾ ಸದಸ್ಯ ಕಿರಣ್ ಕುಮಾರ್ ನೊಟ್ಟುಗು ಕೈ ಜೋಡಾಯಿನ ಶ್ರೀ ನಾಗಬ್ರಹ್ಮ ತರುಣ ವೃಂದ(ರಿ.)ಕೋಡಿಕಲ್. ಬೊಕ್ಕ “pixncil” ಪನ್ಪಿನ ಖ್ಯಾತ ಕಲಾವಿದೆರ್ನ ಕೂಟ ಮಲ್ದಿನ ಈ ಪ್ರಯತ್ನ ನಿಜಕ್ಲಾ ಮೆಚ್ಚೋಡಾಯಿನವು ಪಂದ್ ಕುಡ್ಲ ಉತ್ತರ ಶಾಸಕ ಡಾ. ಭರತ್ ಶೆಟ್ಟಿ ಪಂಡೆರ್ .

ಮೇರ್ ಬಂಗ್ರಕೂಳೂರು ವಾರ್ಡ್ ಕೋಡಿಕಲ್ ಡ್ ಕಜವುದ ರಾಶಿ ಇತ್ತಿನ ಬ್ಲ್ಯಾಕ್ ಸ್ಪಾಟ್ ನ್ ಸ್ವಚ್ಛ ಮಲ್ತ್ “ಸೆಲ್ಫಿ ಸ್ಪಾಟ್” ಮಲ್ತಿನ ಜಾಗೆನ್ ಉದಿಪನ ಮಲ್ತ್ ಪಾತೆರಿಯೆರ್.

ಈ ಪೊರ್ತುಡು ಕುಡ್ಲ ಮಹಾನಗರ ಪಾಲಿಕೆದ ಮೇಯರ್ ಪ್ರೇಮಾನಂದ ಶೆಟ್ಟಿ, ಉಪ ಮೇಯರ್ ಸುಮಂಗಲ ರಾವ್, ಪಾಲಿಕೆ ಸದಸ್ಯೆರಾಯಿನ ಮನೋಜ್ ಕುಮಾರ್, ರಾಷ್ಟ್ರೀಯ ಸ್ವಯಂ ಸೇವಾ ಸಂಘದ ಮಹಾನಗರ ಕಾರ್ಯವಾಹ ಮನೋಹರ್ ಕೋಡಿಕಲ್, ಹಿರಿಯರಾದ ಗೋಪಾಲ್ ಕೋಟ್ಯಾನ್, ಹರೀಶ್ ಶೆಟ್ಟಿ, ಕಿರಣ್ ಜೋಗಿ ಪಾಲ್ ಪಡೆದಿತ್ತೆರ್.