ಫೆ.26 : ಕಾಪು ಶ್ರೀ ಪೊಸ ಮಾರಿಗುಡಿ ದೇವಸ್ಥಾನಗ್ ಪುದೆ ಸಮರ್ಪಣೆ
ಫೆ.28-ಮಾ.2 : ಸುರುತ್ತ ಪ್ರತಿಷ್ಠಾ ವರ್ಧಂತಿ, ಮೂಜಿ ದಿನತ್ತ “ಮಾತೃ ವೈಭವ ಉತ್ಸವ”
ಕಾಪು : ಶ್ರೀ ಪೊಸ ಮಾರಿಗುಡಿ ದೇವಸ್ಥಾನದ ಉಚ್ಚಂಗಿ ಸಹಿತ ಶ್ರೀ ಮಾರಿಯಮ್ಮ ದೇವಿನ ನಡೆಟ್ಟ್ ಫೆ. 28 ರ್ದು ಮಾ. 2 ಮುಟ್ಟ ನಡಪರೆ ಉಪ್ಪುನ ಕಾಪುದಪ್ಪೆನ ಪುನರ್ ಪ್ರತಿಷ್ಠಾ ಪ್ರಥಮ ವರ್ಧಂತಿ ಉತ್ಸವ ಅಂಚೆನೆ ಮಾತೃ ವೈಭವ ಕಾರ್ಯಕ್ರಮದ ಪೂರ್ವಭಾವಿಯಾದ್ ಫೆ. 26 ಕ್ಕ್ ಮಲ್ಲ ಮಟ್ಟ್ದ ಪುದೆ (ಹಸಿರುವಾಣಿ) ಹೊರೆಕಾಣಿಕೆ ಸಮರ್ಪಣಾ ಶೋಭಾಯಾತ್ರೆ ನಡಪರೆ ಉಂಡು.
ಮೂಜಿ ದಿನತ್ತ “ಮಾತೃವೈಭವ” ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದ ಹಿನ್ನೆಲೆಡ್ ಲಕ್ಷಾಂತರ ಭಕ್ತೆರ್ ಬರ್ಪಿನ ನಿರೀಕ್ಷೆ ಉಪ್ಪುನೆರ್ದಾವರ ಪ್ರತೀ ದಿನ ಮಧ್ಯಾಹ್ಹ ಬೊಕ್ಕ ರಾತ್ರಿ ನಿರಂತರ ಅನ್ನಸಂತರ್ಪಣೆ ನಡಪರೆ ಉಂಡು. ಅಯಿಕ್ ಪೂರಕವಾದ್ ಭಕ್ತೆರ್ ,ಸಾರ್ವಜನಿಕರು ಬೊಕ್ಕ ಸಂಘ ಸಂಸ್ಥೆಲೆನ ಮುಕೇನ ಹೊರೆಕಾಣಿಕೆ ಸಂಗ್ರಹ ಮಲ್ಪರೆ ಸಮಿತಿ ತೀರ್ಮಾನ ಮಲ್ದ್ಂಡ್. ಭಕ್ತೆರ್ ಸಂಗ್ರಹ ಮಲ್ತಿನ ಹೊರೆಕಾಣಿಕೆನ್ ಫೆ. 26 ಬಯ್ಯಡ್ 4 ಗಂಟೆಗ್ ಕಾಪು ಉಳಿಯಾರಗೋಳಿ ದಂಡತೀರ್ಥ ಮಠದ ಕೈತಲ್ರ್ದ್ ಮಲ್ಲ ಮಟ್ಟ್ದ ಶೋಭಾಯಾತ್ರೆ ಮುಕೇನ ಪೊಸ ಮಾರಿಗುಡಿ ದೇವಸ್ಥಾನಗ್ ಸಮರ್ಪಣೆ ಮಲ್ಪರೆ ಉಂಡು ಪಂದ್ ಅಭಿವೃದ್ಧಿ ಸಮಿತಿ ಬೊಕ್ಕ ಮಾತೃವೈಭವ ಸಮಿತಿದ ಅಧ್ಯಕ್ಷೆರ್ ರಾಜರ್ಷಿ ಕೆ. ವಾಸುದೇವ ಶೆಟ್ಟಿ, ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ನಡಿಕೆರೆ ರತ್ನಾಕರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ರವಿಕಿರಣ್, ಹೊರೆಕಾಣಿಕೆ ಸಮರ್ಪಣಾ ಸಮಿತಿದ ಅಧ್ಯಕ್ಷೆರ್ ಡಾ. ದೇವಿಪ್ರಸಾದ್ ಶೆಟ್ಟಿ ಬೆಳಪು ಜಂಟಿ ಪ್ರಕಟಣೆಡ್ ತೆರಿಪಾದೆರ್.
