ಸ್ವಯಂಸೇವಕೆರ್

ಮುಕ್ಕ ಕಡಲಬರಿಟ್ಟ್ ಸ್ವಚ್ಛತಾ ಅಭಿಯಾನ, 2 ಲೋಡು ಕಜವು ಪೆಜ್ಜಿಯೆರ್ ಸ್ವಯಂಸೇವಕೆರ್

ಮುಲ್ಕಿ : ಮಾರುತಿ ಸ್ಪೋರ್ಟ್ಸ್ ಕ್ಲಬ್ (ರಿ) ಮುಕ್ಕ ಅಂಚೆನೆ ಮುಕ್ಕ ಪ್ರೊಟೀನ್ಸ್ ಲಿಮಿಟೆಡ್ ಮುತಾಲಿಕೆಡ್ ಊರುದಕ್ಲೆನ ,ಕೈತಲ್ದ ಸಂಘ ಸಂಸ್ಥೆಲೆನ ಒಟ್ಟುಸೇರಿಗೆಡ್ ಫೆ. 27 ಐತಾರ ಕಾಂಡೆ ಮುಕ್ಕ ಬೀಚ್ ಡ್ ಸ್ವಚ್ಛತಾ ಶ್ರಮದಾನ ನಡತ್ಂಡ್.
ಭಾರಿ ಮಲ್ಲ ಸಂಖ್ಯೆಡ್ ಸೇರ್ದಿನ ಸ್ವಯಂಸೇವಕೆರ್ ಈ ಶ್ರಮದಾನೊಡು ಪಾಲ್ ಪಡೆದ್ ರಡ್ಡ್ ಲೋಡು ಮುಟ್ಟ ಕಜವು ಪೆಜಿದ್ ವಿಲೆವಾರಿ ಮಲ್ತೆರ್.
ಶ್ರಮದಾನ ಉದಿಪನ ಮಲ್ತ್ ದ್ ಪಾತೆರಿನ ಕಾರ್ಪೊರೇಟರ್ ಶೋಭಾ ರಾಜೇಶ್ ಮೇರ್, “ಪ್ರಧಾನಿ ಮೋದಿ ಮೇರ್ನ ಕನತ್ತಂಚ ದೇಶೊಡು ಸ್ವಚ್ಛತೆದ ವಿಚಾರೊಡು ಜನಕ್ಲೆಡ ಜಾಗೃತಿ ಪುಟ್ಟುದುಂಡು. ಇಂಚಿನ ಕಾರ್ಯಕ್ರಮ ಅಲ್ಪಲ್ಪ ನಿತ್ಯ ನಿರಂತರ ನಡತೊಂದು ಪ್ಪೊಡು ” ಪಂಡೆರ್.
ಕರಾವಳಿ ಸ್ಪೋರ್ಟ್ಸ್ ಕ್ಲಬ್ ಗೌರವಾಧ್ಯಕ್ಷೆರ್
ಉದಯ ಬಿ. ಸುವರ್ಣ ಪಾತೆರ್ದ್ “ಪರಿಸರೊನು ಸ್ವಚ್ಛ ಮಲ್ತ್ ದ್ ಪ್ರವಾಸಿಗೆರಿರೆಗ್ ತಿರ್ಗರೆ ಅವಕಾಶ ಮಲ್ತ್ ಕೊರ್ಪುನ ನಿಲೆಟ್ಟ್ ಮಾರುತಿ ಸ್ಪೋರ್ಟ್ಸ್ ಕ್ಲಬ್ ಬೊಕ್ಕ ಮುಕ್ಕ ಪ್ರೊಟೀನ್ಸ್ ಲಿ. ಮುಕ್ಕ ಬೀಚ್ ಕ್ಲೀನ್ ಅಭಿಯಾನ ಮಲ್ದ್ಂಡ್. ಮಾರುತಿ ಸ್ಪೋರ್ಟ್ಸ್ ಕ್ಲಬ್ ನೆರ್ದ್ ದುಂಬುಲ ಸಮಾಜೊಗು ಬೋಡಾಪಿನ ಬೇಲೆ ಮಲ್ತೊಂದು ಬೈದ್ಂಡ್. ಅಕ್ಲೆನ ಸೇವೆ ಇಂಚೆನೆ ನಡಪಡ್ ಪಂಡೆರ್.

ಮಲ್ಲ ಬಿನ್ನೆರಾದ್ ಕರ್ನಾಟಕ ರಾಜ್ಯ ಮಾಧ್ಯಮ ಅಕಾಡೆಮಿ ಸದಸ್ಯೆರ್, ಪತ್ರಕರ್ತೆರ್ ಜಗನ್ನಾಥ ಶೆಟ್ಟಿ ಬಾಳ, ಮಾರುತಿ ಸ್ಪೋರ್ಟ್ಸ್ ಕ್ಲಬ್ ಅಧ್ಯಕ್ಷೆರ್ ಕಿಶೋರ್ ಭಾಸ್ಕರ ಪುತ್ರನ್, ಉಪಾಧ್ಯಕ್ಷೆರ್ ಸತೀಶ್ ಕುಂದರ್, ಐದು ಪಟ್ಣ ಮೊಗವೀರ ಸಭಾದ ಸುರೇಶ್ ಕರ್ಕೇರ,
ದುರ್ಗಾ ಫ್ರೆಂಡ್ಸ್‌ ಮುಕ್ಕ ಅಧ್ಯಕ್ಷೆರ್ ಗಿರೀಶ್ ಸುವರ್ಣ, ಮಿತ್ರಪಟ್ಣ ಮೊಗವೀರ ಸಭಾ ಅಧ್ಯಕ್ಷೆರ್ ರವೀಂದ್ರ ಕರ್ಕೇರ, ಶಿವರಾಮ್ ಗುರಿಕಾರೆರ್, ನಂದಿನಿ ಕ್ರಿಕೆಟರ್ಸ್ ಅರಂದ್ ಅಧ್ಯಕ್ಷೆರ್ ಪುರುಷೋತ್ತಮ ದೇವಾಡಿಗ, ಮಿತ್ರಪಟ್ಣ ಯುವಕ ವೃಂದ ಅಧ್ಯಕ್ಷೆರ್ ಅರುಣ್ ಕುಮಾರ್, ಮಿತ್ರಪಟ್ಣ ಮೊಗವೀರ ಸಭಾದ ಪ್ರಧಾನ ಕಾರ್ಯದರ್ಶಿ ರಾಜೇಶ್ ಆರ್, ಮಿತ್ರಪಟ್ಣ ಮಹಿಳಾ ಸಭಾದ ಅಧ್ಯಕ್ಷೆ ಕವಿತಾ ಶರತ್, ಶ್ರೀರಾಮ್ ಫ್ರೆಂಡ್ಸ್ ಅಧ್ಯಕ್ಷೆರ್ ಸುನಿಲ್ ಸಾಲ್ಯಾನ್ ಅಂಚೆನೆ ಮುಕ್ಕ ಪ್ರೊಟೀನ್ಸ್ ಲಿ. ವ್ಯವಸ್ಥಾಪಕ ನಿರ್ದೇಶಕರಾಯಿನ ಮೊಹಮ್ಮದ್ ಆರಿಫ್, ಮುಹಮ್ಮದ್ ಆಸೀರ್ ಮೊಕುಲು ಮಾತ ಇತ್ತೆರ್.

ಜಗನ್ನಾಥ ಕೋಟ್ಯಾನ್ ಸಸಿಹಿತ್ಲು ಬಿನ್ನೆರೆನ್ ಸ್ವಾಗತ ಮಲ್ತೆರ್. ವಸಂತ ಸುವರ್ಣ ಲೇಸ್ ನಿರೂಪಣೆ ಮಲ್ತೆರ್.