ಲ

ಎ.2 ಕ್ಕ್ ಉಪ್ಪಿನಂಗಡಿಡ್ ವಿಜಯ ವಿಕ್ರಮ ಜೋಡು ಕರೆ ಕಂಬುಲ

ಪುತ್ತೂರು: ಉಪ್ಪಿನಂಗಡಿ ಕೂಟೇಲು ನೇತ್ರಾವತಿ ತುದೇತ ಫುಡೆಟ್ ನಡಪುನ , 36ನೇ ವರ್ಷದ ಹೊನಲು ಬೊಲ್ಪುದ ವಿಜಯ- ವಿಕ್ರಮ ಜೋಡುಕರೆ ಕಂಬಳ ಎ.2ಕ್ಕ್ ನಡಪರೆ ಉಂಡು . ಕಂಬುಲನ್ ಗೌಜಿಡ್ ನಡಪಾಯರೇ ಮಾತಾ ತಯಾರಿ ನಡತ್oಡ್ .ಸುಮಾರ್ 170ದಾತ್ ಜೋಡಿ ಎರುಕುಲು ಪಾಲ್ ಪಡೆಯುನ ನಿರೀಕ್ಷೆ ಉಂಡು ಪಂದ್ ಕಂಬುಲ ಸಮಿತಿದ ಗುರ್ಕಾರ್ಲಾಯಿನ ಅಶೋಕ್ ಕುಮಾರ್ ರೈ ಕೆ.ಎಸ್.ಕೋಡಿಂಬಾಡಿ ಪಂಡೆರ್.

ಗುರುವಾರ ಪುತ್ತೂರುಡು ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಆರ್ ಅವ್ವೆ ದಿನ ಕಾಂಡೆ ಉಪ್ಪಿನಂಗಡಿದ ಸಹಸ್ತ್ರಲಿಂಗೇಶ್ವರ ದೇವಲ್ಯೊಡು ಪ್ರಾರ್ಥನೆ ಮಲ್ತ್ , ಅಲ್ಪರ್ದ್ ಎರುಕ್ಲೆನ್ , ಐತ ಗುರ್ಕಾರ್ಲು ಸಹಿತ ಬ್ಯಾಂಡ್ ವಾಲಗ, ಗೊಂಬೆ ಕುಣಿತ ದೊಟ್ಟುಗು ಕಂಬುಲದ ಕರೆಕ್ ಬರಿಯೆರೆ ಉಂಡು . ಐರ್ದ್ ಬೊಕ್ಕ 9.32ಕ್ ಕಂಬುಲದ ಉದಿಪನ ನಡಪರೆ ಉಂಡು . ಉಪ್ಪಿನಂಗಡಿ ಸಹಸ್ರಲಿಂಗೇಶ್ವರ ದೇವಲ್ಯೊದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಕರುಣಾಕರ ಸುವರ್ಣ ಉದಿಪನ ಮಲ್ಪರೆ ಉಲ್ಲೆರ್.

ಬಯ್ಯಗ್ 6 ಗಂಟೆಗ್ ನಡಪುನ ಸಭಾ ಕಾರ್ಯಕ್ರಮಡ್ ಕೇಂದ್ರದ ಮಾಜಿ ಸಚಿವ ಡಿ.ವಿ. ಸದಾನಂದ ಗೌಡ ಗುರ್ಕಾರ್ಮೆ ವಹಿಸರೆ ಉಲ್ಲೆರ್ . ರಾಜ್ಯ ಪ್ರವಾಸೋದ್ಯಮ ಖಾತೆದ ಸಚಿವ ಆನಂದ ಸಿಂಗ್ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯರೇ ಉಲ್ಲೆರ್ . ಸಂಸದ ನಳಿನ್ ಕುಮಾರ್ ಕಟೀಲ್, ಶಾಸಕ ಸಂಜೀವ ಮಠಂದೂರು, ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಧ್ಯಕ್ಷ ಡಾ.ಎಂ.ಎನ್. ರಾಜೇಂದ್ರ ಕುಮಾರ್, ಮಾಜಿ ಸಚಿವೇರಾಯಿನ ಬಿ. ರಮಾನಾಥ ರೈ, ಜನಾರ್ಧನ ರೆಡ್ಡಿ, ಮಾಜಿ ಶಾಸಕಿ ಶಕುಂತಳಾ ಟಿ. ಶೆಟ್ಟಿ, ಮುಖ್ಯಮಂತ್ರಿಲೆನ ಇ-ಆಡಳಿತ ಸಲಹೆಗಾರೆರಾಯಿನ ಬೇಳೂರು ಸುದರ್ಶನ್, ವಿಧಾನಪರಿಷತ್ ಸದಸ್ಯ ಮಂಜುನಾಥ ಭಂಡಾರಿ ಪಾಲ್ ಪಡೆಯರೇ ಉಲ್ಲೆರ್.

ಗುಜರಾತ್‍ದ ಬರೋಡಾ ತುಳು ಸಂಘದ ಗುರ್ಕಾರ್ಲಾಯಿನ , ಮೂಜರೆ ಸಾರ ಜನಕ್ಲೆಗ್ ಬೇಲೆ ಕೊರಿನ ಸಮಾಜ ಸೇವಕ ಶಶಿಧರ ಶೆಟ್ರೆಗ್ ಮಾನದಿಗೆದ ಲೇಸ್ ನಡಪರೆ ಉಂಡು . ನಟ, ನಿರ್ದೇಶಕ ವೀರೇಂದ್ರ ಶೆಟ್ಟಿ, ಕುಸಲ್ದರಸೆ ನವೀನ್ ಡಿ. ಪಡೀಲ್, ನವರಸ ರಾಜೆ ಭೋಜರಾಜ ವಾಮಂಜೂರು, ನಟಿ ನಿರೀಕ್ಷಾ ಶೆಟ್ಟಿ ಪಾಲ್ ಪಡೆಯರೇ ಉಲ್ಲೆರ್.