ತುಳು ಅಕಾಡೆಮಿಗ್ ಬೆಗೋಡೆ ಭೇಟಿ ಕೊರ್ಪೆ : ಪೊಸ ರಾಜ್ಯ ಸಚಿವ ವಿ. ಸುನಿಲ್ಕುಮಾರ್ ಭರವಸೆ
ಕುಡ್ಲ : ಕುಡ್ಲದ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಕಚೇರಿಗ್ ಆಯಿನಾತ್ ಬೇಗ ಭೇಟಿ ಕೊರ್ದು ತುಳು ಭಾಷೆ ಬೊಕ್ಕ ಸಂಸ್ಕೃತಿಗಾದ್ ನಡತೊಂದು ಉಪ್ಪುನ ಕಾರ್ಯಚಟುವಟಿಕೆನ್ ಗೇನೊಡು ದೀಯೊಂದು , ಜವಬ್ದಾರಿಯುತ ಸ್ಥಾನಮಾನವಾಯಿನ ನೆಲೆಟ್ಟ್ ಮಾಹಿತಿನ್ ಪಡೆದುಯೊಂದು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆನ್ ನನಾತ್ ಕಾರ್ಯ ಚಟುವಟಿಕೆದ ಮುಖೇನ ನಡಪಾಯರೇ ಕ್ರಮ ದೆತೊನುವೆ ಪಂದ್ ಕರ್ನಾಟಕ ಸರಕಾರದ ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರಾದ್ ಪೊಸತಾದ್ ಆಯ್ಕೆ ಆಯಿನ ಕಾರ್ಕಳದ ಶಾಸಕ ವಿ. ಸುನಿಲ್ಕುಮಾರ್ ಪಂಡೆರ್ .
ಮೇರ್ ಕಾರ್ಲಾದ ತಮ್ಮ ಕಚೇರಿ “ವಿಕಾಸ”ಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲಾಯಿನ ದಯಾನಂದ ಜಿ. ಕತ್ತಲ್ಸಾರ್ ಮೆರ್ನ ಮುತಾಲಿಕೆಡ್ ಸದಸ್ಯರ ನಿಯೋಗ ಭೇಟಿ ಕೊರಿನ ಪೊರ್ತುಡು ಪಾತೆರಿಯೆರ್ .
ಈ ಪೊರ್ತುಡು ಸಚಿವೆರೆನ್ ಬಾರಿ ಸರಳ ರೀತಿಡ್ ಅಕಾಡೆಮಿರ್ದ್ ಎದುಕೊಂದು ತುಳುನಾಡ್ದ ಸಿರಿತುಪ್ಪೆ ಬೊಕ್ಕ ತುಳು ಆಟಿದ ಇಸೇಸತೇದ ಬೂಕು ಕೊರ್ದು ಮಾನದಿಗೆ ಮಲ್ತೆರ್ .ಗುರ್ಕಾರ್ಲಾಯಿನ ದಯಾನಂದ ಜಿ. ಕತ್ತಲ್ಸಾರ್ ಪಾತೆರ್ದ್ , ತುಳುನಾಡ್ದ ಶಾಸಕೆರ್ ಕನ್ನಡ ಬೊಕ್ಕ ಸಂಸ್ಕೃತಿಕ ಸಚಿವೆರ್ನ ಮಾನದಿಗೆ ಪಡೆದಿತಿನ ತುಳುನಾಡ್ ಗ್ ಪೆರ್ಮೆದ ಇಚಾರ ಪಂದ್ ಪಂಡೆರ್.
ಈ ಪೊರ್ತುಡು ಅಕಾಡೆಮಿದ ಸದಸ್ಯೆರಾಯಿನ ನಿಟ್ಟೆ ಶಶಿಧರ ಶೆಟ್ಟಿ, ನರೇಂದ್ರ ಕೆರೆಕಾಡು, ಚೇತಕ್ ಪೂಜಾರಿ ಕುಡ್ಲ , ಸಂತೋಷ್ ಪೂಜಾರಿ ಕಾರ್ಲ ಪಾಲ್ ಪಡೆದಿತ್ತೆರ್.