ಬಂಟ್ವಾಳಡ್ ತುಲು ಬರವು ಪುದರ್ ಪಲವೆ ಉದಿಪನ
ಇಸ್ವ ತುಲು ಬರವು ದಿನ ಆಯಿನ ಅಕ್ಟೋಬರ್ 10 ತಾರೀಕ್ಗ್ ಬಂಟ್ವಾಳ ತಾಲೂಕುದ ಭಂಡಾರಿಬೆಟ್ಟುಡ್ ಯುವಜನ ವ್ಯಾಯಾಮ ಶಾಲೆದ ಪುದರ್ ಪಲವೆನ್ ತುಲು ಲಿಪಿಟ್ ಪಾಡ್ಯೆರ್. ತುಲು ಲಿಪಿ ಕಲ್ಪಾದಿ ಬುಕ್ಕ ಜೈ ತುಲುನಾಡ್ (ರಿ.) ಸಂಘಟನೆದ ಒತ್ತು ಸಂಘಟನಾ ಕಾರ್ಯಂತೆರ್ ಆಯಿನ ಜಗದೀಶ ಗೌಡ ಕಲ್ಕಳ ಮೇರ್ ತುಲು ಬರವುದ ಪುದರ್ ಪಲವೆನ್ ಉದಿಪನ ಮಲ್ತೆರ್. ಅಂಚೆನೇ ತುಲು ಬರವು ದಿನೊತ ಇಸೇಸತೆ ಬುಕ್ಕ ಪುಂಡೂರು ವೆಂಕಟರಾಜ ಪುಣಿಂಚಿತ್ತಾಯ (ಪುವೆಂಪು) ಮೆರೆನ ಪುಟ್ಟು ಪರ್ಬೊನು ತುಲು ಬರವು ದಿನೊ ಆತ್ ಆಚರಿಪುನೆತ ಬಗ್ಗೆ ತೆರಿಪಾಯೆರ್. ಈ ಸಂದರ್ಭೊಡು ತುಲು ಬರವುನ್ ಪೊರ್ಲುಡ್ ಬರೆಯಿನ ಜಯ ಆರ್ಟ್ಸ್ದ ಜಯರಾಮ, ಯುವಜನ ವ್ಯಾಯಾಮ ಶಾಲೆ ಭಂಡಾರಿಬೆಟ್ಟು ಉಂದೆತ ಗುರ್ಕಾರ್ಲು ಹೆನ್ರಿ ಪಿರೇರಾ ಒತ್ತುಪಾಲ್ಡಿತ್ತೆರ್.
ತುಲುನಾಡ ಯುವಸೇನೆ ಬಂಟ್ವಾಳ ಮುಕ್ಲೆನ ಮುತಾಲಿಕೆಡ್ ಈ ಲೇಸ್ ನಡತ್ಂಡ್. ತುಲು ಲಿಪಿ ಕಲ್ಪಾದಿ ಪೃಥ್ವಿ ತುಲುವೆ ಲೇಸ್ನ್ ನಡಪಾದ್ ಕೊರ್ಯೆರ್. ಪುದರ್ ಪಲವೆ ಉದಿಪನ ಆಯಿಬೊಕ್ಕ ಜೈ ತುಲುನಾಡ್ (ರಿ.), ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬುಕ್ಕ ತುಲುನಾಡ ಯುವಸೇನೆ ಬಂಟ್ವಾಳ ಮುಕ್ಲೆನ ಒಟ್ಟು ಸೇರಿಗೆಡ್ ನಡತ್ನ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ತುಲು ಲಿಪಿ ಪರೀಕ್ಷೆ ನಡತ್ಂಡ್. ತುಲು ಲಿಪಿ ಕಲ್ಪಾದಿಲಾಯಿನ ಜಗದೀಶ ಗೌಡ ಕಲ್ಕಳ, ಪೂರ್ಣಿಮಾ ಬಂಟ್ವಾಳ ಬುಕ್ಕ ಪೃಥ್ವಿ ತುಲುವೆ ಪರೀಕ್ಷೆನ್ ನಡಪಾದ್ ಕೊರ್ಯೆರ್.