ಸ್ವಾತಂತ್ರ್ಯೋಚ್ಚಯದ ಅಮೃತ ಉಚ್ಚಯ ಆಚರಣೆಗ್ ತಯಾರ್ ಆವೊಂದು ಉಂಡು ಬೊಲ್ತೆರ್ ಆಡಳಿತ; ಶಾಸಕ ಹರೀಶ್ ಪೂಂಜ
ಬೊಲ್ತೆರ್ ; ಪೆರೆಯೇರ್ನ ತ್ಯಾಗ ಬಲಿದಾನದ ಫಲಶೃತಿಯಾದ್ ಪಡೆಯಿನ ಸ್ವಾತಂತ್ರ್ಯ ಅಮೃತ ಉಚ್ಚಯ ಪೊರ್ತುಡು ಆಚರಿಸಾವುನ ಅವಕಾಶ ತಿಕ್ಕಿನವು ನಮ್ಮ ಸೌಭಾಗ್ಯನೇ ಸರಿ. ಆ ನೆಲೆಟ್ಟ್ ಬೇತೆ ಬೇತೆ ಸರಕಾರಿ ಇಲಾಖೆ ಬೊಕ್ಕ ಸಹಭಾಗಿಲೆನ ಒಟ್ಟು ಸೇರಿಗೆಡ್ ವಿಶಿಷ್ಟ ರೀತಿಡ್ ಸ್ವಾತಂತ್ರ್ಯೋಚ್ಚಯದ ಅಮೃತದ ಉಚ್ಚಯ ಆಚರಣೆ ಮಲ್ಪರೆ ಬೊಲ್ತೆರ್ ಆಡಳಿತ ತಯಾರ್ ಆತುಂಡು ಪಂದ್ ರಾಷ್ಟ್ರೀಯ ಪರ್ಬದ ಆಚರಣಾ ಸಮಿತಿದ ಗುರ್ಕಾರ್ಲಾಯಿನ ಶಾಸಕ ಹರೀಶ್ ಪೂಂಜ ಪಂಡೆರ್ .ಲೇಸ್ ದ ನೆಲೆಟ್ಟ್ ಆ.10 ಕ್ಕ್ ಗುರುವಾಯನಕೆರೆ ನವಶಕ್ತಿ ಚಾವಡಿಡ್ ಲೆತ್ತಿನ ಪತ್ರಿಕಾಗೋಷ್ಠಿಡ್ ಆರ್ ಪಾತೆರಿಯೆರ್ .
ಸ್ವಾತಂತ್ರ್ಯದ ಅಮೃತ ಉಚ್ಚಯದ ವರ್ಷದಡಿ ದೇಶಡ್, ರಾಜ್ಯೊಡು ಕೆಲವು ಬಗೆತ ವೈವಿದ್ಯಮಯ ಬೇತೆ ಬೇತೆ ವಲಯದ ಬುಲೆಚ್ಚಿಲ್ಗಾದ್ ಕೆಲವು ಯೋಜನೆಲು ಜಾರಿಯಾದುಂಡು , ಸ್ವಾತಂತ್ರ್ಯದ ಅಮೃತ ಉಚ್ಚಯದ ಮುಗಿತಲಡ್ ಆಗಸ್ಟ್ 15 ಕ್ಕ್ ದೇಶೋಡು ನಡಪುಲಕ ಬೊಲ್ತೆರ್ಡ್ ಲಾ ನಡಪೆರೆ ಉಂಡು ಈ ಲೇಸ್ ಡ್ ಜನಮಾನಸಡ್ ಅವಿಸ್ಮರಣೀಯವಾದ್ ಒರಿಯುಲಕ ಮಲ್ಪರೆ
ತಾಲೂಕು ಆಡಳಿತದ ವತಿರ್ದ್ ಅರ್ಥಪೂರ್ಣವಾದ್ ಆಚರಣೆ ಮಲ್ಪರೆ ನಿರ್ಧಾರ ಮಲ್ದ .ವರ್ಷಂಪ್ರತಿ ನಡಪುಲಕ ಕಾಂಡೆ :9.00 ಗಂಟೆಗ್ ತಾಲೂಕು ಕಚೇರಿಡ್ ರಾಷ್ಟ್ರೀಯ ಪರ್ಬದ ಶಿಷ್ಟಾಚಾರದಲಕ ಧ್ವಜಾರೋಹಣ ಲೇಸ್ ಆದ್ ಐರ್ದ್ ಬೊಕ್ಕ ಸರ್ಕಾರಿ ಅಧಿಕಾರಿಲು , ಸಿಬ್ಬಂದಿಲು 750 ದ್ವಿ ಚಕ್ರ ವಾಹನದ ಜಾಥಾದ ಮುಖೇನ ಗುರುವಾಯನಕೆರೆದ ಕಿನ್ಯಮ್ಮ ಯಾನೆ ಗುಣವತಿ ಅಮ್ಮ ಚಾವಡಿಗ್ ಪೋದು ಸಭಾ ಲೇಸ್ ನಡಪೆರೆ ಉಂಡು.
ಖ್ಯಾತ ಚಿಂತಕೇರಾಯಿನ ಪ್ರಕಾಶ್ ಮಲ್ಪೆ ಮೇರ್ ದಿಕ್ಕೂಚಿ ಭಾಷಣ ಮಲ್ಪರೆ ಉಲ್ಲೆರ್ . ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ಸವಿ ನೆಂಪುಗಾದ್ ಬೇತೆ ಬೇತೆ ಇಲಾಖೆರ್ದ್ ಫಲಾನುಭವಿಲೆಗ್ ಸವಲತ್ತು, ಸಾಧನಾ ಸಲಕರಣೆ ಬೊಕ್ಕ ಸೌಲಭ್ಯ ಕೊರ್ಪ .
ಕಂದಾಯ ಇಲಾಖೆರ್ದ್ 750 ಜನಕ್ಲೆಗ್ 94ಸಿ ಹಕ್ಕುಪತ್ರ, ಪಿಂಚಣಿ ಯೋಜನೆಡ್ 750 ಜನಕ್ಲೆಗ್ ಸಂಧ್ಯಾ ಸುರಕ್ಷಾ, ವಿಧವಾ ವೇತನ, ಅಂಗವಿಕಲ ವೇತನ ನಿಧಿ ವಿತರಣೆ, ತಾಲೂಕು ಪಂಚಾಯತ್ ವತಿರ್ದ್ 75 ನಿವೇಶನ ರಹಿತೆರೆಗ್ ನಿವೇಶನ ಹಂಚಿಕೆ, 75 ಅಂಗನವಾಡಿಗ್ ಗ್ರಾಮ ಪಂಚಾಯತ್ ನಿಧಿರ್ದ್ ತೂಕದ ಯಂತ್ರ ಬೊಕ್ಕ ತಾಲೂಕು ಮಟ್ಟದ ಚೆಸ್ ಪಂಥಡ್ ಗೆಂದಿನಕ್ಲೆಗ್ ಇನಾಮು ಪಟ್ಟುನ ಲೇಸ್ ನಡಪೆರೆ ಉಂಡು. ಪಶುಸಂಗೋಪನೆ ಇಲಾಖೆರ್ದ್ ಪುಣ್ಯಕೋಟಿ ಯೋಜನೆಗ್ ಚಾಲನೆ, ಪೆತ್ತ ದ ಕಿದೆಕ್ 75 ಮ್ಯಾಟ್ ವಿತರಣೆ, 75 ಜಾನುವಾರುಲೆಗ್ ವಿಮಾ ಸೌಲಭ್ಯ, ಸಂಚಾರಿ ಪಶು ಚಿಕಿತ್ಸಾಲಯ ಉದಿಪನ . ಶಿಕ್ಷಣ ಇಲಾಖೆರ್ದ್ 75 ಎಸ್.ಎಸ್.ಎಲ್.ಸಿ ಸಾಧಕೆರೆಗ್ ಟ್ಯಾಬ್ ಪಟ್ಟುನ ಲೇಸ್ ಬೊಕ್ಕ ಅರಣ್ಯ ಇಲಾಖೆ ಒಟ್ಟು ಸೇರಿಗೆಡ್ ಶಾಲೆಗ್ 75 ಡೆಸ್ಕ್ ಬೆಂಚ್ ಪಟ್ಟುನ ಲೇಸ್. ಕೃಷಿ ಇಲಾಖೆರ್ದ್ 75 ರೈತೆರೆಗ್ ತೋಟಗಾರಿಕಾ ಬುಲೆ ಪಟ್ಟುನ ಲೇಸ್. ಮಹಿಳಾ ಬೊಕ್ಕ ಮಕ್ಕಳ ಕಲ್ಯಾಣ ಇಲಾಖೆ: 75 ಜನಕ್ ಭಾಗ್ಯಲಕ್ಷ್ಮೀ ಯೋಜನೆದ ಬಾಂಡ್ ಪಟ್ಟುನ ಲೇಸ್, ಅರಣ್ಯ ಇಲಾಖೆರ್ದ್ ಫಲಾನುಭವಿಲೆಗ್ 750 ರಕ್ತ ಚಂದನ, ಶ್ರೀಗಂಧ, ಸಾಗುವಾನಿ ಗಿಡ ಪಟ್ಟುನ ಲೇಸ್, ಟೀ ಪಾರ್ಕ್ಡ್ 75 ಬೇತೆ ಬೇತೆ ಜಾತಿದ ದೈ ನಡ್ಪಿನ ಲೇಸ್ ,
ಮೆಸ್ಕಾಂ ಇಲಾಖೆರ್ದ್ ಮೆಸ್ಕಾಂ ಬೊಲ್ತೆರ್ ಬೊಕ್ಕ ಉಜಿರೆ ಉಪ ವಿಭಾಗ ಬೊಕ್ಕ ವಿದ್ಯುತ್ ಗುತ್ತಿಗೆದಾರರ ಸಂಘ, ಬೊಲ್ತೆರ್ ವತಿರ್ದ್ 75 ಅಂಗನವಾಡಿಗ್ ಫ್ಯಾನ್ ಪಟ್ಟುನ ಲೇಸ್. ಸರ್ವೇ ಇಲಾಖೆರ್ದ್ 75 ಪೋಡಿ ಕಡತದ ವಿಲೇವಾರಿ, ಪೊಲೀಸ್ ಇಲಾಖೆರ್ದ್ 23 ಹಾಸ್ಟೆಲ್ ಗ್ ಸ್ಪರ್ಧಾತ್ಮಕ ಪರೀಕ್ಷೆದ ಪೂರ್ವ ತಾಲೂಕುಗು ಸಂಬಂಧಿ ಬುಕು ಪಟ್ಟುನ ಲೇಸ್,
ಕಾರ್ಮಿಕ ಇಲಾಖೆರ್ದ್ 75 ಜನ ಬೇತೆ ಬೇತೆ ಕಾರ್ಮಿಕ ಯೋಜನೆದಡಿ ಫಲಾನುಭವಿಲೆಗ್ ಮಂಜೂರಾತಿ ಆದೇಶ ಪತ್ರ ಪಟ್ಟುನ ಲೇಸ್, ವಿಕಲಚೇತನ ಕಲ್ಯಾಣ ಇಲಾಖೆರ್ದ್ 75 ಜನ ವಿಶೇಷ ಚೇತನೆರೆಗ್ ಯು.ಡಿ.ಐ.ಡಿ ಕಾರ್ಡ್ ಪಟ್ಟುನ ಲೇಸ್, ಲೋಕೋಪಯೋಗಿ ಗುತ್ತಿಗೆದಾರೆರ್ನ ಸಂಘರ್ದ್ ಸ್ವ ಉದ್ಯೋಗಾಸಕ್ತ 75 ಪೊಂಜೊವ್ಲೆಗ್ ಪೊಲ್ಲುನ ಯಂತ್ರ ಪಟ್ಟುನ ಲೇಸ್, ತಾಲೂಕು ವೈನ್ ಮರ್ಚೆಂಟ್ ಅಸೋಸಿಯೇಸನ್ ಒಟ್ಟು ಸೇರಿಗೆಡ್ 75 ಕೃಷಿಕೆರೆಗ್ ಕಳೆಕೊಚ್ಚುವ ಯಂತ್ರ ವಿತರಣೆ, ಸಭಾ ಲೇಸ್ ರ್ದ್ ಬೊಕ್ಕ ರಾಷ್ಟ್ರ ಭಕ್ತಿನ್ ಉದ್ದೀಪನ ಮಲ್ಪುನ ವೈವಿದ್ಯಮಯ ಸಾಂಸ್ಕೃತಿಕ ಲೇಸ್ ನಡಪೆರೆ ಉಂಡು ಪಂದ್ ಪಂಡೆರ್.
ಇತ್ತೆ ಕೇಂದ್ರ ಸರಕಾರದ ಸೂಚನೆ ಪ್ರಕಾರ ಆಗಸ್ಟ್ 13 ನೇ ಕಾಂಡೆ :8.00 ಗಂಟೆರ್ದ್ ಪ್ರತಿ ಇಲ್ಲಡ್ ಲಾ ರಾಷ್ಟ್ರ ಧ್ವಜಾರೋಹಣ ಬೊಕ್ಕ ಆಗಸ್ಟ್ 15 ತಾರಿಕ್ ಗ್ ಬಯ್ಯಗ್ 5.00 ಗಂಟೆಗ್ ಗೌರವಯುತವಾದ್ ಧ್ವಜಾಅವರೋಹಣ ನಡಪುನ ‘ಹರ್ ಘರ್ ತಿರಂಗ ಅಭಿಯಾನ’ ಇಲ್ಲ ಇಲ್ಲಗ್ ಲಾ ಮುಟ್ಟುದುಂಡು , ನಮ್ಮ ನಾಡ್ ದ ಈ ಸಾಂಸ್ಕೃತಿಕ ಉಚ್ಚಯ ನಮ ಮಾತಾ ಒಟ್ಟು ಸೇರ್ದ್ ಆಚರಣೆ ಮಲ್ತ್ ಯಶಸ್ವಿ ಮಲ್ಪುನ ಏಕ್ ಭಾರತ್ ಶ್ರೇಷ್ಠ ಭಾರತ್ ಪನ್ಪಿನ ಸಂದೇಶನ್ ಜಗತ್ತ್ ಗ್ ಸಾರುನ , ಅಪ್ಪೆ ಭಾರತಿಗ್ ಅಮೃತದ ಗೌರವ ಕೊರ್ಕ ಪಂದ್ ಶಾಸಕೆರ್ ಪಂಡೆರ್ .
ಪತ್ರಿಕಾಗೋಷ್ಠಿಡ್ ತಹಶಿಲ್ದಾರ್ ಪೃಥ್ವಿ ಸಾನಿಕಮ್, ತಾ.ಪಂ ಕಾರ್ಯನಿರ್ವಹಣಾಧಿಕಾರಿ ಕುಸುಮಾಧರ, ಸರ್ಕಲ್ ಇನ್ಸ್ಪೆಕ್ಟರ್ ಶಿವಕುಮಾರ್, ಕ್ಷೇತ್ರ ಶಿಕ್ಷಣಾಧಿಕಾರಿ ವಿರೂಪಾಕ್ಷಪ್ಪ, ಪಟ್ಟಣ ಪಂಚಾಯತ್ ಮುಖ್ಯಾಧಿಕಾರಿ ರಾಜೇಶ್ ಕೆ, ಕೃಷಿ ಇಲಾಖೆದ ಸಹಾಯಕ ನಿರ್ದೇಶಕ ರಂಜಿತ್, ಮೆಸ್ಕಾಂ ಕಾರ್ಯಪಾಲಕ ಇಂಜಿನಿಯರ್ ಶಿವಶಂಕರ್, ಸಿಡಿಪಿಒ ಪ್ರಿಯಾ ಆಗ್ನೇಸ್ ಚಾಕೋ, ಸಮಾಜ ಕಲ್ಯಾಣ ಇಲಾಖೆಯ ಹೇಮಚಂದ್ರ, ಬಿಸಿಎಮ್ ಇಲಾಖೆಯ ಜೋಸೆಫ್, ವಲಯ ಅರಣ್ಯಾಧಿಕಾರಿ ತ್ಯಾಗರಾಜ್, ತೋಟಗಾರಿಕಾ ಇಲಾಖೆದ ಚಂದ್ರಶೇಖರ, ಪಶುಸಂಗೋಪನೆ ಇಲಾಖೆದ ಮಂಜು ನಾಯ್ಕ್ ಪಾಲ್ ಪಡೆದಿತ್ತೆರ್.
.
