ಕುಡ್ಲ : ಮೊಬೈಲ್ ವಿಚಾರೊಡು ಲಡಾಯಿ ಆದ್ ಅಣ್ಣಗ್ ಮೆಗ್ಯೆ ಬಿಸತ್ತಿ ಪಾಡ್ದ್ ಕೊಲೆ ಮಲ್ದಿನ ಘಟನೆ ಬಿಜೈ ಕೊಟ್ಟಾರ ಚೌಕಿ ಕ್ರಾಸ್‌‌ದ ಕೈತಲ್ ಐತಾರ ರಾತ್ರೆ ನಡತ್ಂಡ್.
ಮೂಲ ಬೆಳಗಾವಿ ಬೈಲಹೊಂಗಲ ಮೂಲದ ಕೂಲಿ ಕಾರ್ಮಿಕೆ ಅಡಿವೆಪ್ಪ (40) ಕೊಲೆ ಆಯಿನಾಯೆ. ಮೆಗ್ಯೆ ರಾಜು (36) ಕೊಲೆ ಮಲ್ದಿನ ಆರೋಪಿ ಪಂದ್ ಪೊಲೀಸೆರ್ ತೆರಿಪಾದೆರ್.
ಎಲ್ಯ ಅಂಗಡಿ ದೀದ್ ಬೇರ ಮಲ್ತೊಂದಿತ್ತಿನ ಅಪ್ಪೆ ಐತಾರ ರಾತ್ರೆ ಅಂಗಡಿ ಬಂದ್ ಮಲ್ತ್ ಇಲ್ಲಗ್ ಬನ್ನಗ ವಿಷಯ ಗೊತ್ತಾದ್ ಅಡಿವೆಪ್ಪನ್ ಆಸ್ಪತ್ರೆಗೆ ಸೇರ್ಸಾಂಡಲ ಪ್ರಯೋಜನ ಆತಿಜಿ ಪಂದ್ ತೆರಿಪಾದೆರ್.
ಕುಡ್ಲ : ಬಂಟರ ಯಾನೆ ನಾಡವರ ಮಾತೃಸಂಘ ಮಂಗಳೂರು ತಾಲೂಕು ಸಮಿತಿ ವತಿರ್ದ್ ಎಜುಕೇಷನ್ ಎಕ್ಸಲೆನ್ಸಿ ಅವಾರ್ಡ್ ಪುರಸ್ಕಾರಗ್ ಅರ್ಜಿಗ್ ಲೆಪ್ಪು ಕೊರ್ತೆರ್.
ಮಂಗಳೂರು ತಾಲೂಕು ವ್ಯಾಪ್ತಿಡ್ ವಾಸ ಉಪ್ಪುನ ಬಂಟ ಸಮಾಜದ 2025-26ನೇ ವರ್ಷಡ್ ಎಸ್.ಎಸ್.ಎಲ್.ಸಿ ಬೊಕ್ಕ ದ್ವಿತೀಯ ಪಿ.ಯು.ಸಿಡ್ ಶೇ. 95 ಬೊಕ್ಕ ಅಯಿರ್ದ್ ಎಚ್ಚ ಮಾರ್ಕ್ಸ್ ದೈದಿನ ಕಲ್ಪಾರ್ತಿಲು ಅರ್ಜಿ ಪಾಡೊಲಿ.
ಸ್ವಯಂ ಲಿಖಿತ ಅರ್ಜಿದ ಒಟ್ಟುಗು ಆಧಾರ್ ಕಾರ್ಡ್ ಜೆರಾಕ್ಸ್ , ಅಂಕಪಟ್ಟಿದ ಜೆರಾಕ್ಸ್ ಬೊಕ್ಕ ಒಂಜಿ ಫೊಟೊನ್ ತಾ. 10.09.2026ತ್ತ ಉಲಯಿ ಬಂಟರ ಯಾನೆ ನಾಡವರ ಮಾತೃಸಂಘದ ಕಚೇರಿ, ಅಮೃತೋತ್ಸವ ಕಟ್ಟಡ, ಒಂದನೇ ಮಹಡಿ, ಬಂಟ್ಸ್ ಹಾಸ್ಟೆಲ್ ಮಂಗಳೂರು ಇಡೆಗ್ ಮುಟ್ಟಾವೊಡು. ಎಚ್ಚದ ಮಾಹಿತಿಗಾದ್ ಫೋನ್ ಮಲ್ಪೊಲಿ (9480015895, 9480400994) ಪಂದ್ ಸಂಘದ ಪ್ರಕಟಣೆ ತೆರಿಪಾದ್ಂಡ್.
ಕುಡ್ಲ : “ಬಡಪತ್ತ್‌ಡ್ ಉಪ್ಪುನ ಕೆಲವು ಬಂಟ ಕುಟುಂಬಲೆನ್ ಮಿತ್ತ್ ಕನವರೆ ಪ್ರಯತ್ನ ಆವೊಡು. ಪ್ರತಿ ಬಂಟ ಕುಟುಂಬಲ ಬಿಪಿಎಲ್ ಕಾಡ್೯ರ್ದ್ ಮುಕ್ತ ಆವೊಡು. ಆ ಛಲ ಇತ್ತ್ಂಡ ನಮಕ್ಕ್ ಸಮಾಜೊಡು ಉನ್ನತ ಸ್ಥಾನ ಪಡೆಯರೆ ಸಾಧ್ಯ” ಪಂದ್ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ವಿಶೇಷ ಮಹಾ ನಿರ್ದೇಶಕೆರ್, ಬರೋಡ ಶಶಿ ಕ್ಯಾಟರಿಂಗ್‌ದ ಧಣಿ ಶಶಿಧರ ಶೆಟ್ಟಿ ಬರೋಡ ಪಂಡೆರ್.
ಬಂಟ್ಸ್ ಹಾಸ್ಟೆಲ್ ಅಮೃತೋತ್ಸವ ಕಟ್ವಾಣದ ಸಭಾಂಗಣಡ್ ನಡತಿನ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಆಡಳಿತ ಮಂಡಳಿ ಸಭೆನ್ ಶಶಿಧರ ಶೆಟ್ಟಿ ಬರೋಡ ಮೇರ್ ಉದಿಪನ ಮಲ್ತ್ ಪಾತೆರಿಯೆರ್.
ಜಾಗತಿಕ ಬಂಟರ ಸಂಘಗಳ ಒಕ್ಕೂಟ ಕರಿನ ಏಳೆಡ್ಮ ವರ್ಷರ್ದ್ ಬಡವೆರ್‌ನ ಕಣ್ಣೀರು ಒರೆಸುನ ಕೆಲಸ ಮಲ್ತೊಂದುಂಡು. ಐಕಳ ಹರೀಶ್ ಶೆಟ್ಟಿ ಮೇರ್ ಒಕ್ಕೂಟದ ಅಧ್ಯಕ್ಷೆರಾದ್ 25 ಕೋಟಿ ರೂಪಾಯಿರ್ದ್‌ಲ ಎಚ್ವಿಗೆ ಪರಿಹಾರ ಧನ ಪಟ್‌ದೆರ್. ಪ್ರಸಕ್ತ ಮುಲ್ಕಿಡ್ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣಡ್ ನಿರ್ಮಾಣ ಆಪಿನ ಸಭಾಭವನದ ಬೇಲೆ ಬಿರ್ಸ್‌ಡ್ ಸಾಗೊಂದಿತ್ತ್‌ದ್ ಅಯಿತ ಲೋಕಾರ್ಪಣೆಗ್ ನಮ ಮಾತ ಸಾಕ್ಷಿ ಆವೊಡು” ಪಂದ್ ಪಂಡೆರ್.
ನಮ ಎಡ್ಡೆ ಬೇಲೆ ಮಲ್ಪುನಗ ಪರ ವಿರೋಧ ಚರ್ಚೆ ಸಹಜ. ಮಾತೆರ್ಲ ಸಮಾಜದ ಅಭಿವೃದ್ದಿಗಾದ್ ಕೆಲಸ ಮಲ್ಪೊಡು ಪಂಡೆರ್.
ಒಕ್ಕೂಟದ ನಿರ್ದೇಶಕೆರ್ ಮುನಿಯಾಲು ಉದಯಕುಮಾರ್ ಶೆಟ್ಟಿ ಎಡ್ಡೆಪ್ಪುದ ಪಾತೆರ ಪಂಡೆರ್.
ಈ ಪೊರ್ತುಡು ಉದ್ಯಮಿ, ಒಕ್ಕೂಟದ ನಿರ್ದೇಶಕೆ ಹುಬ್ಬಳ್ಳಿ- ಧಾರಾವಾಡ ಬಂಟರ ಸಂಘದ ಅಧ್ಯಕ್ಷೆರ್ ರಾಜೇಂದ್ರ ವಿ ಶೆಟ್ಟಿ ಮೆರೆನ್ ಸನ್ಮಾನ ಮಲ್ತೆರ್.
ಲೇಸ್‌ದ ಅಧ್ಯಕ್ಷತೆನ್ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ವಹಿಸ್‌ದಿತ್ತೆರ್.
ಪೋಷಕ ಸದಸ್ಯ ನವೀನ್ ಚಂದ್ರ ಶೆಟ್ಟಿ ಪಡುಬಿದ್ರೆ, ಒಕ್ಕೂಟದ ಉಪಾಧ್ಯಕ್ಷೆ ಕರ್ನಿರೆ ವಿಶ್ವನಾಥ ಶೆಟ್ಟಿ, ನಿರ್ದೇಶಕೆರಾಯಿನ ಶಶಿಧರ ಶೆಟ್ಟಿ ಇನ್ನಂಜೆ, ಇಂಜಿನಿಯರ್ ಗೋಪಾಲ ಭಟ್, ಸುಧಾಕರ ಶೆಟ್ಟಿ ಉತ್ರಿಂಜೆ ಬೆಹರಿನ್, ಸತೀಶ್ಚಂದ್ರ ಶೆಟ್ಟಿ ಅಕ್ಕುಂಜೆ, ಒಕ್ಕೂಟದ ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಯುವ ವಿಭಾಗದ ಸಂಚಾಲಕ ಗಿರೀಶ್ ಶೆಟ್ಟಿ ತೆಳ್ಳಾರ್, ಸಂಚಾಲಕ ಬಾಲಕೃಷ್ಣ ರೈ ಕೊಲ್ಲಾಡಿ ಮೊಕುಲು ಮಾತ ಇತ್ತೆರ್.
ಸಭೆಟ್ಟ್ ಹಿರಿಯಡ್ಕ ಬಂಟರ ಸಂಘದ ನೂತನ ಅಧ್ಯಕ್ಷೆರ್ ರವೀಂದ್ರನಾಥ ಹೆಗ್ಡೆ, ಹೆಬ್ರಿ ಬಂಟರ ಸಂಘದ ಅಧ್ಯಕ್ಷೆರ್ ಹರ್ಷ ಶೆಟ್ಟಿ, ಕುಂದಾಪುರ ತಾಲೂಕು ಯುವ ಬಂಟರ ಸಂಘದ ಅಧ್ಯಕ್ಷೆರ್ ಡಾ ಚೇತನ್ ಶೆಟ್ಟಿ ಕೋವಾಡಿ, ಮೂಡಬಿದ್ರೆ ಯುವ ಬಂಟರ ಸಂಘದ ಅಧ್ಯಕ್ಷೆರ್ ಸಂದೀಪ್ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ಯುವ ಸಮಿತಿದ ಸಂಚಾಲಕೆ ಶಿಶಿರ್ ಶೆಟ್ಟಿ ಮೊಕ್ಲೆಗ್ ಮಾನಾದಿಗೆ ನಡತ್ಂಡ್.
ಐಕಳ ಹರೀಶ್ ಶೆಟ್ಟಿ ಸ್ವಾಗತ ಮಲ್ತೆರ್. ಗಿರೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಅನೂಪ್ ಶೆಟ್ಟಿ ಸುರತ್ಕಲ್ ಪ್ರಾರ್ಥನೆ ಮಲ್ತೆರ್. ಡಾ ಪ್ರಿಯಾ ಶೆಟ್ಟಿ, ಡಾ ಮಂಜುಳಾ ಶೆಟ್ಟಿ ಕಾರ್ಯಕ್ರಮ ನಿರ್ವಹಣೆ ಮಲ್ತೆರ್.
ಕುಡ್ಲ : ಸೂಟರ್‌ಪೇಟೆ ನಿವಾಸಿ, ಪುಗರ್ತೆದ ಕ್ರೀಡಾ ಅಂಕಣ ಬರವುಗಾರೆ ಎಸ್. ಜಗದೀಶ್ಚಂದ್ರ ಅಂಚನ್ ಮೇರ್ ಪ್ರತಿಷ್ಠಿತ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿಗ್ ಆಯ್ಕೆ ಆತೆರ್.
ಬೆಂಗಳೂರುದ ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ ಮತ್ತು ಸಾಂಸ್ಕೃತಿಕ ಟ್ರಸ್ಟ್ (ರಿ) ತನ್ನ ಬೊಳ್ಳಿ ಪರ್ಬದ ಸಂಭ್ರಮದ ಅಂಗವಾದ್ ಈ ಪ್ರಶಸ್ತಿನ್ ಪ್ರಕಟ ನಲ್ತ್‌ದ್, ಕನ್ನಡ ನಾಡ್‌ಗ್ ಮೇರ್ ಕೊರ್ತಿನ ಅನುಪಮ ಕ್ರೀಡಾ ಸಾಹಿತ್ಯ ಸೇವೆನ್ ಗುರುತಿಸಾದ್ ಈ ಗೌರವಗ್ ಆಯ್ಕೆ ಮಲ್ದೆರ್.
ಕರಿನ 32 ವರ್ಷರ್ದ್ ಮಾಧ್ಯಮ ಕ್ಷೇತ್ರಡ್ ಸಕ್ರಿಯೆರಾದುಪ್ಪುನ ಮೇರ್, ಜಿಲ್ಲೆ, ರಾಜ್ಯ ಬೊಕ್ಕ ಅಂತರರಾಷ್ಟ್ರೀಯ ಮಟ್ಟದ ದಿನಪತ್ರಿಕೆ, ವಾರಪತ್ರಿಕೆ ಅಙಚಡನೆ ಮಾಸಪತ್ರಿಕೆಲೆಡ್ 4,500ರ್ದ್‌ಲ ಎಚ್ಚ ಕ್ರೀಡಾ ಲೇಖನ ಬೊಕ್ಕ ಅಂಕಣಲೆನ್ ಬರೆತೆರ್. ಇಂಚೊಗು ಮೇರ್ ‘ತ್ಯಾಗಮಯಿ ಮೋಹಳ್ಳಿ’ ಪನ್ಪಿನ ಪುಸ್ತಕ ಬರೆದ್ ಲೋಕಾರ್ಪಣೆ ಮಲ್ದೆರ್.
ಪ್ರಶಸ್ತಿ ಪ್ರದಾನ ಸಮಾರಂಭ ಆಗಸ್ಟ್ 29 ಬೆಂಗಳೂರುದ ಜೆಎಸ್‌ಎಸ್ ಸಭಾಂಗಣಡ್ ನಡಪರೆ ಉಂಡು. ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ , ಸಾಂಸ್ಕೃತಿಕ ಟ್ರಸ್ಟ್ ಬೊಳ್ಳಿ ಪರ್ಬದ ಮುಗಿತಲದ ಲೇಸ್‌ದ ವೇದಿಕೆಡ್ ಜಗದೀಶ್ಚಂದ್ರ ಅಂಚನ್ ಮೆರೆಗ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿ ಕೊರ್ದು ಗೌರವ ಮಲ್ಪರೆ ಉಂಡು ಪಂದ್ ಟ್ರಸ್ಟ್‌ದ ಕಾರ್ಯದರ್ಶಿ ಎಲ್. ಸೋಮಶೇಖರ್ ತೆರಿಪಾದೆರ್.
ಉಳ್ಳಾಲ : ಸಾಂಬಾರ್‌ಡ್ ಎಕ್ಕಲೆ ಪತ್ತೆ ಆಯಿನೆತ್ತ ಬಗೆಟ್ಟ್ ಗ್ರಾಹಕೆರ್ ದೂರು ಕೊರ್ತಿನ ಹಿನ್ನೆಲೆಡ್ ಉಳ್ಳಾಲ ತೊಕ್ಕೊಟ್ಟುದ ಹೋಟೆಲ್‌ ಒಂಜೆಕ್ಕ್ ಆಹಾರ ಇಲಾಖೆದ ಅಧಿಕಾರಿ ಡಾ.ಪ್ರವೀಣ್ ಕುಮಾರ್ ಮೆರೆನ ತಂಡ ರೈಡ್ ಮಲ್ದ್ಂಡ್.
“ರೈಡ್ ಮಲ್ಪುನ ಪೊರ್ತುಡು ಹೋಟೆಲ್‌ದ ಅಟಿಲ್ದ ಕೋಣೆಡ್ ಸ್ವಚ್ಚತೆ ಇಜ್ಜಾಂದಿನವು ಬೊಕ್ಕ ಆಹಾರ ವಸ್ತುಲೆನ್ ಸರಿಯಾದ್ ಜೋಡಿಸಾವಂದಿನವು ಪತ್ತೆ ಆತ್ಂಡ್” ಪಂದ್ ಡಾ. ಪ್ರವೀಣ್ ಮಾಧ್ಯಮದಕ್ಕೆಗ್ ತೆರಿಪಾದೆರ್.
ವಿಟ್ಲ: ಝೀ ಕನ್ನಡ ಸರಿಗಮಪ ಲಿಟ್ಲ್‌ ಚಾಂಪ್ 2026 ವಿನ್ನರ್ ಅಶ್ಮಿತ್ ಕುಡ್ಲ ಮೆರೆಗ್ ವಿಟ್ಲ ಶ್ರೀ ಸರಸ್ವತಿ ಕ್ರೆಡಿಟ್ ಸೌಹಾರ್ದ ಸಂಘ ವಿಟ್ಲ ಶಾಖೆದ ಮುತಾಲಿಕೆಡ್ ಸನ್ಮಾನ ನಡತ್ಂಡ್.
ಈ ಪೊರ್ತುಡು ನಿರ್ದೇಶಕೆರ್ ರವಿಶ್ ಪೊಸವಳಿಕೆ, ಮ್ಯಾನೇಜರ್ ಜೀವಿತಾ ಕೆ, ಸಿಬ್ಬಂದಿಲು ನವೀನ್ ಹಡೀಲ್, ಸಂದೀಪ್, ಶ್ರೀರಂಜಿತಾ, ವಿಟ್ಲ ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷೆರ್ ರಮಾನಾಥ ವಿಟ್ಲ, ಪಟ್ಟಣ ಪಂಚಾಯಿತಿ ಸದಸ್ಯೆರ್ ರವಿಪ್ರಕಾಶ್, ಬಿ ರಾಮದಾಸ್ ಶೆಟ್ಟಿ, ಗೋವರ್ಧನ್ ಕುಮಾರ್, ಜಗದೀಶ್ ಪಾಣೆಮಜಲ್, ಮನೋಜ್ ಕಾಶಿಮಠ, ಶಶಿಕಾಂತ ಪ್ರಭು, ವಾಸುದೇವ ಪ್ರಭು, ಜೀವನ್ ಅಶೋಕ ಅನಿಲಕಟ್ಟೆ ಪಾಲ್ ಪಡೆದಿತ್ತೆರ್.
ಕುಡ್ಲ : ಕರ್ನಾಟಕ ರಾಜ್ಯ ಲೆಕ್ಕಪರಿಶೋಧಕರ ಸಂಘದ (KSCAA) 2026-27ನೇ ವರ್ಷದ ಅಧ್ಯಕ್ಷೆರಾದ್ ಸಿ.ಎ. ಸುನಿಲ್ ಭಂಡಾರಿ ಬೆಂಗಳೂರು ಆಯ್ಕೆ ಆತೆರ್.
ಸಿ ಎ ಸುನಿಲ್ ಭಂಡಾರಿ ಮೆರೆನ ನಾಯಕತ್ವ, ವೃತ್ತಿದ ಮಿತ್ತ್‌ದ ಬದ್ಧತೆ ಬೊಕ್ಕ ಮಾತೆರೆನ್ಲ ಒಟ್ಟು ಮಲ್ಪುನ ಸಾಮರ್ಥ್ಯಡ್ ಕರ್ನಾಟಕದ ಚಾರ್ಟರ್ಡ್ ಅಕೌಂಟೆಂಟ್ ಸಮುದಾಯಡ್ ಅರ್ಥಪೂರ್ಣ ಬದಲಾವಣೆ ಆಪುನ ಸಾಧ್ಯತೆ ಉಂಡು.”ಎಂಕ್ ತಿಕಿನ ಪೊಸ ಜವಾಬ್ದಾರಿಡ್ ಪ್ರಾಮಾಣಿಕವಾದ್ ಕೆಲಸ ಮಲ್ಪುವೆ” ಪಂದ್ ಆರ್ ತೆರಿಪಾದೆರ್.
ಸುನಿಲ್ ಭಂಡಾರಿ ಮೇರ್ ತಾರಿಪಾಡಿ ದಿ. ಕಾಂತಣ್ಣ ಭಂಡಾರಿ ಬೊಕ್ಕ ಪೆಲಪಾಡಿ ವಸಂತಿ ಕೆ ಭಂಡಾರಿ ಮೊಕ್ಲೆನ ಮಗೆ.
ಒಡಿಪು : ಬಾರೆದ ಪರ್ಂದ್ ಜೂವೊಗು ಎಡ್ಡೆ ಪಂದ್ ತಿನರೆ ಪೋಂಡ ಅಯಿಟ್ಲ ವಿಷಕಾರಿ ಕೆಮಿಕಲ್ ಉಂಡು ಪನ್ಪಿನ ಭಯಂಕರ ನ್ಯೂಸ್ ಒಡಿಪುದ ಅಲೆವೂರು ಬೊಕ್ಕ ಮಣಿಪಾಲದ ದುಗ್ಗಿ ಪನ್ಪಿನ ಜಾಗೆರ್ದ್ ಬೈದ್ಂಡ್.
ಈ ಪರಿಸರದ 4-5 ಪರ್ಂದ್ ದ ಗೋಡೌನ್‌ಗ್ ಆರೋಗ್ಯ ಅಧಿಕಾರಿಲು ಇನಿ ಕಾಂಡೆ ದಾಳಿ ಮಲ್ಪುನಗ ಈ ವಿಚಾರ ಗೊತ್ತಾತ್ಂಡ್.
ಅಸಿಸ್ಟೆಂಟ್ ಕಮಿಷನರ್ ರಶ್ಮಿ ಬೊಕ್ಕ ಆರೋಗ್ಯ ಇಲಾಖೆ ಅಧಿಕಾರಿಲು ದಾಳಿ ಮಲ್ಪುನಗ ಪರ್ಂದ್ ಬೇಗ ಪರ್ಂದರೆ ಪಾಡುನ ಕೆಮಿಕಲ್ ಬಾಟಲ್ ಪತ್ತೆ ಆದ್ ಅಕ್ಲೆನ ಮಿತ್ತ್ ಕೇಸ್ ಪಾಡ್ದ್ ತನಿಖೆ ಮಲ್ತೊಂದುಲ್ಲೆರ್.
ಕುಡ್ಲ : ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ರಿ. ದ. ಕ. ಉಡುಪಿ ಜಿಲ್ಲೆ ಬ್ರಹ್ಮಾವರ ವಲಯ ಬೊಕ್ಕ ರೋಟರಿ ಕ್ಲಬ್ ಮೊಕ್ಲೆನ ಒಟ್ಟುಸೇರಿಗೆಡ್ ಇಂಚೊಗು ನಡತಿನ ವಿಶ್ವ ಛಾಯಾಗ್ರಹಣ ದಿನಾಚರಣೆದ ಲೇಸ್‌ಡ್ ಬಂಟ್ವಾಳ ವಲಯದ ಮಾಜಿ ಅಧ್ಯಕ್ಷೆರ್, ಪುಗರ್ತೆದ ಫೊಟೊಗ್ರಾಫರ್ ಕನ್ಯಾನ ಕುಮಾರಸ್ವಾಮಿ ಮೆರೆಗ್ “ಛಾಯಾ ರತ್ನ” ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.
ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ರಿ. ದ. ಕ. ಉಡುಪಿ ಜಿಲ್ಲೆ ಬ್ರಹ್ಮಾವರ ವಲಯ ಬೊಕ್ಕ ರೋಟರಿ ಕ್ಲಬ್ ನೆತ್ತ ಒಟ್ಟುಸೇರಿಗೆಡ್ ಇಂಚೊಗು ನಡತಿನ ವಿಶ್ವ ಛಾಯಾಗ್ರಹಣ ದಿನಾಚರಣೆದ ಲೇಸ್‌ಡ್ ಉಳ್ಳಾಲ ವಲಯದ ಪುಗರ್ತೆದ ಫೊಟೊಗ್ರಾಫರ್ ಉಮೇಶ್ ಉಳ್ಳಾಲ್ ಮೆರೆಗ್ “ಛಾಯಾ ರತ್ನ” ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.
