ಶ್ರೀ ಮಹಾಲಕ್ಷ್ಮಿ ದೇವಲ್ಯ ಉಚ್ಚಿಲ : ಇನಿತ ಕಾರ್ಯಕ್ರಮದ ವಿವರ
ಮುಲ್ಕಿ: ಉಚ್ಚಿಲದ ಶ್ರೀ ಮಹಾಲಕ್ಷ್ಮಿ ದೇವಸ್ಥಾನ ಜೀರ್ಣೋದ್ಧಾರ ಆದ್ ಪೊಸ ದೇಖಿಡ್ ತೋಜಿದ್ ಲಕ್ಷಾಂತರ ಭಕ್ತೆರೆನ್ ಆಕರ್ಷಣೆ ಮಲ್ತೊಂದುಂಡು. ಈ ಸಾನ್ನಿಧ್ಯಡ್ ೨೦೨೨ನೇ ಏಪ್ರಿಲ್ ೧ ಸುಕ್ರಾರೊರ್ದು ಏಪ್ರಿಲ್ ೧೫ ಸುಕ್ರಾರ ಮುಟ್ಟ ಶ್ರೀ ಮಹಾಲಕ್ಷ್ಮಿ ದೇವಿ, ಪರಿವಾರ ದೇವೆರ್ನ ಪುನರ್ಪ್ರತಿಷ್ಠೆ, ರಥೋತ್ಸವ, ಚತುಃಪವಿತ್ರ ನಾಗಮಂಡಲೋತ್ಸವದ ಲೇಸ್ ಶ್ರೀ ಕ್ಷೇತ್ರದ ತಂತ್ರಿಲು ವಿದ್ವಾನ್ ಕುಕ್ಕಿಕಟ್ಟೆ ರಾಘವೇಂದ್ರ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು. ದೇವಲ್ಯೊಡು ಇನಿ ನಡಪುನ ಲೇಸ್ ದ ವಿವರ.
ಏ.೪ ಸೋಮಾರ ಕಾಂಡೆ ಬಿಂಬ ಶುದ್ಧಿ ಬೊಕ್ಕ ವೈದಿಕ ವಿಧಿವಿಧಾನ, ಬಯ್ಯಡ್ ಸುಗಮ ಸಂಗೀತ, ಚಕ್ರಾಬ್ಧ ಮಂಡಲ ಪೂಜೆ, ನಿತ್ಯ ಭಜನೆ, ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಶ್ರೀ ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮಿಲೆರ್ದ್ ಆಶೀರ್ವಚನ, ೬.೩೦ಕ್ಕ್ ಹೂಡೆ ಶ್ರೀ ಹನುಮಾನ್ ವಿಠೋಭ ಮಾತೃ ಮಂಡಳಿದ ಭಜಕೆರೆರ್ದ್ ನಲಿತ್ದ್ ಭಜನೆ, ನೃತ್ಯ ಭಾರತಿ, ಕದ್ರಿ ಮೊಕ್ಲೆರ್ದ್ ನವದುರ್ಗ ನಮಃ, ಶ್ರೀ ಕೃಷ್ಣಾಂತರಂಗ ನೃತ್ಯ ರೂಪಕ ಬೊಕ್ಕ ದೇವದಾಸ್ ಕಾಪಿಕಾಡ್ ಕೂಟದಕ್ಲೆರ್ದ್ “ನಮಸ್ಕಾರ ಮಾಸ್ಟ್ರೇ’ ತುಳು ನಾಟಕ ಪ್ರದರ್ಶನ ನಡಪರೆ ಉಂಡು.