ಬಿನ್ನಾಪು

ನಂದಿನಿ ಉತ್ಪನ್ನಡ್ ತುಳು ಲಿಪಿ ಪಾಡರೆ ಬಿನ್ನಾಪು ಮಲ್ತಿನ ವೇದವ್ಯಾಸ್ ಕಾಮತ್

ಕುಡ್ಲ : ದಕ್ಷಿಣ ಕನ್ನಡ ಜಿಲ್ಲೆಡ್ ಕೆ.ಎಂ.ಎಫ್ ಸಂಸ್ಥೆರ್ದ್ ಪೋಪಿನoಚಿನ ಉತ್ಪನ್ನದ ಮಿತ್ತ್ ತುಳು ಲಿಪಿತ ವರ್ಣಮಾಲೆ ಮುದ್ರಣ ಮಲ್ತ್ ಪಟ್ಟರೆ ಶಾಸಕ ವೇದವ್ಯಾಸ್ ಕಾಮತ್ ದಕ್ಷಿಣ ಕನ್ನಡ ಹಾಲು ಉತ್ಪಾದಕ ಸಂಸ್ಥೆದ ಗುರ್ಕಾರ್ಲೆಗ್ ಬೊಕ್ಕ ವ್ಯವಸ್ಥಾಪನಾ ನಿರ್ದೇಶಕೆರೆಗ್ ಪತ್ರ ಬರೆತೆರ್ .

ಈ ವಿಚಾರವಾದ್ ಪಾತೆರಿನ ಶಾಸಕ ಕಾಮತ್, ದಕ್ಷಿಣ ಕನ್ನಡ, ಉಡುಪಿ ಬೊಕ್ಕ ಕಾಸರಗೋಡು ಜಿಲ್ಲೆಡ್ ಪಾತೆರುನoಚಿನ ತುಳುಭಾಷೆಗ್ ಐತಿಹಾಸಿಕ ಹಿನ್ನೆಲೆ ಉಂಡು . ಅವ್ವೆತೋ ಶಾಸನಡ್ ತುಳುಲಿಪಿ ತೊಜಿದ್ ಬೈದುಂಡು ಭಾಷೆದ ಉಳಿವು ಅವೆನ್ ಗಲಸ್ಯಡ ಮಾತ್ರ ಆಯೆರೆ ಸಾಧ್ಯ . ಆ ನೆಲೆಟ್ಟ್ ಕೆ.ಎಂ.ಎಫ್ ಸಂಸ್ಥೆದ ಉತ್ಪನ್ನದ ಮಿತ್ತ್ ತುಳುಲಿಪಿತ ವರ್ಣಮಾಲೆದ ಬಳಕೆಗ್ ಪತ್ರ ಬರೆತೆ ಪಂದ್ ಪಂಡೆರ್.

ಜೈ ತುಳುನಾಡ್ (ರಿ.) ಸಂಘಟನೆರ್ದ್ ತುಳು ಭಾಷೆನ್ ರಾಜ್ಯಡ್ ಅಧಿಕೃತ ಮಲ್ಪರೆ ಶಾಸಕ ಶ್ರೀ ರಘುಪತಿ ಭಟ್‌ಗ್ ಬಿನ್ನಾಪು

ಕುಡ್ಲ, ಜುಲೈ 21: 2000 ವರ್ಷದ ಇತಿಹಾಸ ಉಪ್ಪುನ ತುಳುಭಾಷೆನ್ ಕರ್ನಾಟಕ ರಾಜ್ಯಡ್ ಸಂವಿಧಾನದ ವಿಧಿ 347ರ ಪ್ರಕಾರ ಅಧಿಕೃತ ಮಲ್ಪೊಡು ಅಂಚನೇ ಈ ಬಗ್ಗೆ ಅಧಿವೇಶನಡ್ ಸೊರ ಲಕ್ಕವೊಡು ಪಂದ್ ಒಡಿಪು ವಿಧಾನಸಭಾ ಕ್ಷೇತ್ರದ ಶಾಸಕೆರಾಯಿನ ಶ್ರೀ ರಘುಪತಿ ಭಟ್‌ ಮೆರೆಗ್ ಜೈ ತುಳುನಾಡ್ (ರಿ.) ಸಂಘಟನೆ ಒಡಿಪು ಪ್ರೆಸ್ ಕ್ಲಬ್‌ಡ್ ಅರಿಕೆ ಮಲ್ತೆರ್ .

ಈ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ಡಾ. ಆಕಾಶ್ ರಾಜ್ ಜೈನ್, ಶ್ರೀಮತಿ ತಾರ ಉಮೇಶ್ ಆಚಾರ್ಯ, ಜೈ ತುಲುನಾಡ್ (ರಿ.) ಸಂಘಟನೆದ ಅಧ್ಯಕ್ಷೆರಾಯಿನ ಶ್ರೀ ಸುದರ್ಶನ್ ಸುರತ್ಕಲ್, ಪ್ರಧಾನ ಕಾರ್ಯದರ್ಶಿಯಾಯಿನ ಶ್ರೀ ಸದಾಶಿವ ಮುದ್ರಾಡಿ, ಟೈಮ್ಸ್ ಆಫ್ ಕುಡ್ಲದ ಶ್ರೀಮತಿ ಯಶೋಧ ಕೇಶವ್ ಪಾಲ್ ಪಡೆದಿತ್ತೆರ್.

ಜೈ ತುಳುನಾಡ್ ಸಂಘಟನೆದ ವತಿರ್ದ್ ತುಳು ಭಾಷೆನ್ ಅಧಿಕೃತ ಮಲ್ಪೊಡು ಪಂದ್ ಕೇರಳ ಸರ್ಕಾರಗ್ ಬಿನ್ನಾಪು

ಕಾಸ್ರೊಡು, ಜೂನ್ 28: ತುಳುನಾಡ್ ದ ಆಚಾರ ಇಚಾರ ಲಿಪಿ ಸಂಸ್ಕ್ರತಿ ಬೊಕ್ಕ ಭಾಷೆನ್ ಒರಿಪಾದ್ ಬುಳೆಪಾವುನ ನೆಲೆಟ್ಟ್ ಜವಾಬ್ದಾರಿಯುತ ಬೇಲೆನ್ ನಿಸ್ವರ‍್ಥವಾದ್ ಮಲ್ಪರೆ ಜವನೆರ್ ಬೊಕ್ಕ ಪೆರಿಯಾಕುಲು ಒಟ್ಟಾದ್ ಉಪ್ಪುನ ಕೂಟ ನೆ ‘ಜೈ ತುಳುನಾಡ್ ಸಂಘಟನೆ’ ನೆತ್ತ ಕಾಸ್ರೋಡು ಘಟಕರ್ದ್ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ಮೆರ್ನ ಮುತಾಲಿಕೆಡ್ , ಕೇರಳ ರಾಜ್ಯಡ್ ತುಳು ಬಾಷೆನ್ ಅಧಿಕೃತ ಭಾಷೆಯಾದ್ ಮಲ್ಪುನ ಬೇಡಿಕೆನ್ ಸರಕಾರದ ಗೇನಗ್ ಕನವೊಡು ಪಂದ್ ಶಾಸಕೆರ್ನ ಕಚೇರಿಗ್ ಭೇಟಿ ಕೊರ್ದು ಬಿನ್ನಾಪು ಮಲ್ದೆರ್.

ದಾಖಲೆದ ಒಟ್ಟುಗು ಉಪ್ಪುನ ಬಿನ್ನಾಪುನು ಮಂಜೇಶ್ವರ ಶಾಸಕ ಎ ಕೆ ಎಂ ಅಶ್ರಫ್ ಬೊಕ್ಕ ಕ್ಷೇತ್ರದ ಪ್ರಸ್ತುತ ಶಾಸಕೆರಾಯಿನ ಸಿ ಯೆಚ್ ಕುಂಞಂಬು ಮೆರೆಗ್ ಕೊರಿಯೆರ್.

ಈ ಪೊರ್ತುಡು ಜೈ ತುಳುನಾಡ್ ಕಾಸರಗೋಡು ಘಟಕದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು, ಕಾರ್ಯದರ್ಶಿ ಕಾರ್ತಿಕ್ಕೋ ಪೆರ್ಲ, ಕೋಶಾಧಿಕಾರಿ ಪ್ರಶಾಂತ್ ರೈ ಬಂದಡ್ಕ, ಮುಖ್ಯ ಸಂಚಾಲಕ ಪ್ರವೀಶ್ ಕುಲಾಲ್ ಬೊಕ್ಕ ಸದಸ್ಯ ದೇವಿಪ್ರಸಾದ್ ರೈ ಪಾಲ್ ಪಡೆದಿತ್ತೆರ್ .

ಎಂಆರ್ ಪಿಎಲ್ ಡ್ ಕೈತಲ್ ದಕ್ಲೆಗ್ ಬೇಲೆ ದೆತ್ತ್ ಕೊರಿಯರೆ ದಕ್ಷಿಣ ಕನ್ನಡ ಯುವ ಜೆಡಿಎಸ್ ಪರವಾದ್ ಬಿನ್ನಾಪು

ಕುಡ್ಲ, ಜೂನ್ 24: ಎಂ ಆರ್ ಪಿ ಎಲ್ ಸೇರಿನಂಚ ಕೆಲವು ಬೃಹತ್ ಕಂಪೆನಿಡ್ ಕೈತಲ್ ದ ತುಳುನಾಡ್ ದ ಜವನೆರೆಗ್ ಬೇಲೆ ಕೊರೊಡು ಪಂದ್ ಆಗ್ರಹ ಮಲ್ತ್ ದಕ್ಷಿಣ ಕನ್ನಡ ಜಿಲ್ಲಾ ಯುವ ಜೆಡಿಎಸ್ ವತಿರ್ದ್ ಬುಧವಾರ ಸಂಸದ ಪ್ರಜ್ವಲ್ ರೇವಣ್ಣ ಮುತಾಲಿಕೆಡ್ ಬಿನ್ನಾಪು ಮಲ್ತೆರ್ .

ಐರ್ದ್ ಬೊಕ್ಕ ಮಾಧ್ಯಮದೊಟ್ಟುಗು ಪಾತೆರಿನ ಆರ್ 2800 ಎಕ್ರೆ ಜಾಗೆ ದೆತೊoದು ಪಡೆದ್ ಮಲ್ಲ ಕಂಪೆಯನಿಯಾದ್ ಬುಲೆಡ್ ಬೈದುಂಡು ಮುಲ್ಪದ ಜವನೆರೆಗ್ ಬೇಲೆ ಕೊರಂದೆ ಪ್ರಾದೇಶಿಕತೆದ ಭಾವನೆಗ್ ಧಕ್ಕೆಯಾವೊಂದು ಉಂಡು . ತುಳುನಾಡ್ ದ ಜವನೆರೆಗ್ ಬೇಲೆ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.