ಒಡಿಪು ಪುತ್ತೂರು ಬೊಲ್ತೆರ್

ಪೊಂಜೊವ್ಲೆನ ಮಿತ್ತ್ ಆಪಿನ ದೌರ್ಜನ್ಯದ ವಿರುದ್ಧ ಹೆಬ್ರಿಡ್ ಬ್ಲಾಕ್ ಕಾಂಗ್ರೆಸ್ ಪ್ರತಿಭಟನೆ

ಕಾರ್ಕಳ : ಮೈಸೂರುಡು ಪೊಣ್ಣನ ಮಿತ್ತ್ ನಡತಿನ ಅತ್ಯಾಚಾರ ಅಮಾನವೀಯ ಕೃತ್ಯವಾತುಂಡು ಉಂದೆನ್ ಹೆಬ್ರಿ ಬ್ಲಾಕ್ ಕಾಂಗ್ರೆಸ್ ಖಂಡಿಸಾವುಂಡು . ಈ ಘಟನೆ ನಡತ್ 48 ಗಂಟೆ ಆದಿತ್ತುಂಡಲ ಪೊಲೀಸ್ ಇಲಾಖೆ ಎಫ್ ಐಆರ್ ದಾಖಲ್ ಮಲ್ಪಂದೆ ದೂರು ಕೊರ್ನ್ಡಲಾ ಕರ್ತವ್ಯಲೋಪ ಮಲ್ದುಂಡು . ಜೋಕುಲು , ಪೊಂಜೊವುಲು ಸೇರಿನಂಚ ಜನಸಾಮಾನ್ಯಯೆರೆಗ್ ಈ ಸರಕಾರರ್ದ್ ನ್ಯಾಯ ತಿಕ್ಕೊಂದು ಇಜ್ಜಿ ಪಂದ್ ಹೆಬ್ರಿ ಬ್ಲಾಕ್ ಕಾಂಗ್ರೆಸ್ ಗುರ್ಕಾರ್ಲಾಯಿನ ಮುದ್ರಾಡಿ ಮಂಜುನಾಥ ಪೂಜಾರಿ ಆಗ್ರಹ ಮಲ್ತೆರ್ .

ಶನಿವಾರ ಹೆಬ್ರಿದ ಬ್ಲಾಕ್ ಕಾಂಗ್ರೆಸ್ ಕಚೇರಿದ ಎದುರು ರಾಜ್ಯ ಸರಕಾರದ ಕಾನೂನು ಸುವ್ಯವಸ್ಥೆ ಬಗ್ಗೆ ಪ್ರತಿಭಟನೆ ನಡಪಾದ್ ಪಾತೆರಯೇರ್.

ಮದತ್ತ್ ಪೋಪುಜಿ ಮಸುಲುಡಿಕೆದ ಗೌಜಿ ಗಮತ್ತ್

ಇಲ್ಲದ ಪಿದಯಿಡಿತ್ತಿನ  ನಾಯಿ, ಇಲ್ಲದ ಉಲಯಿಡಿತ್ತಿನ ಪುಚ್ಚೆಡ ಕೇನುಂಡುಗೆ….”ಮಂಗಕ್ಕ… ಮಂಗಕ್ಕ.. ಅಟ್ಟೆಮಿ ಏಪಗೇ..?’ ಪಂದ್ ಅಯಿಕ್ ಪುಚ್ಚೆ ನೆರ್ದ್ ಪುಂಡುಗೆ ಅಟ್ಟೆಮಿ ಆಂಡ ದಾನೆ..ನಿಕ್ ಗುಂಡೆಮಿ ಆಂಡ ದಾನೆ ನಿಕ್, ಈ ಇಲ್ಲದ ಪಿದಯಿ ಉಪ್ಪುನಾ ಪಂದ್ ನಾಯಿಗ್ ಮಕ್ಕರ್‌ ಮಲ್ಪುಂಡುಗೆ, ಅಟ್ಟೆಮಿ ಬತ್ತಂಡ ನಾಯಿಗ್ಲಾ ಕುಸಿ, ಅಟ್ಟೆಮಿದಾನಿ ಆಂಡಲ ಮಸ್ತ್ ತಿನಿಯರೆ ತಿಕ್ಕುಂಡತ್ತ ಪಂದ್. ಇಂಚಿನ ಕತೆ ಇತ್ತೆ ಹಿರಿಯೆರ್‌ನಕ್ಲಗ್ ಮಾತ್ರ ಗೊತ್ತು…!

ಅಂದ್.. ಏಪದಲೆಕ್ಕ ಆಂಡ ನಮಕ್ಕೆ ಇತ್ತೆ ಅಟ್ಟೆಮಿ ಬಾರಿ ಗೌಜಿ, ಆಟಿ ಕರಿದ್ ಸೋಣ ಬತ್ತುಂಡ ಪಂಚೆಮಿ,ಅಟ್ಟೆಮಿ, ಚೌತಿ ಸೋಣ ಇಂಚ ಎಡ್ಡೆದಿನೊಕ್ಕುಲು ಸಾಲ್ ಕಟ್ಟಿದ್ ಬರ್ಪ. ಆಂಡ ಇತ್ತೆದ ಕಾಲೊಡು ಕೊರೊನಾ ಸೀಕ್‌ದನೇ ರಾಪಾಟ. ಸುರುವಾದ್ ರಡ್ಡ ವರ್ಸ ಆವೊಂದು ಬಂಡಲ ಅಯಿತ್ತ ಪೋಡಿಗೆ ಪೋತುಜಿ , ಅಂಚ ಪಂದ್ ತುಳುನಾಡ್‌ದ ಸಂಪ್ರದಾಯ, ಅಚರಣೆಲೆನ್ ಬುಡಿಯರೆ ಆಪುಂಡಾ?

ಒಡಿಪದ ಪುಣ್ಯ ಮಣ್ಣ್ ಡ್ ಸಿರಿ ಕಿಷ್ಠ ದೇವೆರ್ ಏಪ ನಿಲೆ ಆಯೆರಾ ಅವೆರ್ದ್ ಬೊಕ್ಕ ತುಳುವೆರೆಗ್ ಅಟ್ಟೆಮಿ ಗೌಜಿದ ಪರ್ಬ, ರಾತ್ರಿ ಭಜನೆ ಪಂದ್ ಜಾಗರ ಕುಲ್ಲುದು ರೋಹಿಣಿ ನಕ್ಷತೊಡು ಸಿರಿ ಕಿಷ್ಣ ದೇವೆರ್ ಪುಟ್ಟುನ ಪೊರ್ತುನು, ಪೊರ್ಲುನು ಜೋಕು ತೂವರೆ ಲಕ್ಷ ಲಕ್ಷ ಜನ ಕಾತ್ ಕುಲ್ಲುವೆರ್, ಒಡಿಪು ದಿನೊಕ್ಕು ಮಟೊ ಅತ್ತಾಂದೆ ಬಾಲೆ ಕಿಸ್ನ ದೇವೆರೆಗ್
ಆರಿಗೆ ಕೊರ್ಪಿನ ಕ್ರಮ ಮಾತ ಕಡೆಟ್ಲ ಉಂಡು. ರಾತ್ರೆ ಪದಿರಾಡ್ ಗಂಟೆಗ್ ದೂರದ ದೇವಸ್ಥಾನೊದ ಬೆಡಿ ಕೇಂಡಿ ಪೆಟ್ಟಿಗೆ ಇಲ್ಲದಕುಲು ಮಾತೆರ್ಲ ಮೋನೆ ದೆಕ್ಕದ್ ಸೇಮಯದಡ್ಡೆಲ ಪೇರ್‌ಲ ತಿನ್ಪಿನವು ತುಳುನಾಡ್‌ದ ಕಟ್ಟ್.

ಬಾಲೆ ಸಿರಿ ಕಿಷ್ಣ ದೇವೆರ್ ಪಂಡ ಜೋಕುಲಾಟಿಕೆದ ಸಾಕ್ಷಾತ್ ರೂಪ. ಪೋಕಿರಿದ ಕಾಲೊಡು – ದಿನೊಕ್ಕುಲು, ಎಲ್ಯ ಉಪ್ಪುನಗ ತುಂಟಾಟ, ಪೋಕಿರಿಲೆನ್ ನೆಂಪು ಮಲ್ತ್ ಆಚರಣೆ ಉಪ್ಪುಂಡು ಉಂದುವೇ ಮಸುಲುಡಿಕೆ. ಕನ್ನಡೊಡು ವಿಟ್ಲ ಪಿಂಡಿ ಅತ್ತುಂಡ ಶ್ರೀ ಕೃಷ್ಣ ಲೀಲೋತ್ಸವ ಪನ್ಪರ್ .

ಮದತ್ತ್ ಪೋಪುಜಿ ಮಸುಲುಡಿಕೆದ ಗೌಜಿ ಗಮತ್ತ್

ದುಂಬುದ ಕಾಲೊಡು ವಿಟ್ಲ ಪಿಂಡಿದ ದಿನತ್ತಾನಿ ಒಡಿಪುದ ಮರೊಟ್ಟು ಅತ್ತoದೆ ಬೇತೆ ಬೇತೆ ಕಡೆಟ್ ಮಸುಲುಡಿಕೆ ನಡತೊಂದಿತ್ತಂಡ್, ಅವೆತ್ತ ಉದ್ದೇಸ ಮನಸ್‌ಗೆ ರಂಜನೆ ಕೊರ್ಪಿನಿವು. ಆ ಕಾಲೊಡು ಇತ್ತೆದ ಲೆಕ್ಕ ಮೊಬೈಲ್, ಟಿವಿದ ಕಾಲ ಅತ್ತೆ, ಮನರಂಜನೆಗ್ ಇಂಚಿನನೇ ಕಾರ್ಯಕ್ರಮ ಉಪ್ಪುಂಡು. ಅಯಿಕ್ ಬಾರಿ ಸಂಖ್ಯೆಡ್ ಜನಸೇರೊಂದಿತ್ತೆರ್. ಬೆನ್ನಿದ ಕೆಲಸ, ಕೂಲಿ ಕೆಲಸ ಮಲ್ಕ್ ಬತ್ತಿನಕ್ಲಗ್ ಆನಿದ ದಿನೊಟ್ಟು ಮಸುಲುಡಿಕೆ ತೂದೆ ಖುಷಿ ಪಡೆವೊಂದಿತ್ತೆರ್.

ಪ್ರಾಯದಕುಲು, ಜವನೆರ್, ಜೋಕುಲು ಇಂಚ ಮಾತೆರ್ಲ ಏಸ ಪಾಡ್ದ್ ವೇದಿಕೆಗ್ ತಮಾಸೆ ಪಾತೆರ್ದಾ, ಕೋಂಗಿ ಕಟ್ಟಿದಾ, ಪದ್ಯ ಪಂದಾ, ನಾಲ್ ಜನೊಕ್ಲನ್ ತೆಲಿಪಾವೊಂದಿತ್ತೆರ್. ಪೊಂಜೊವುಲು ವೇದಿಕೆ ಬರೊಂದಿತ್ತಿಜೆರ್ಡಲ ಮಸುಲುಡಿಕೆ ತೂವರೆ ಬರೊಂದಿತ್ತೆರ್. ಪಿಲಿ, ಸಿಮ್ಮ, ಕರಡಿ, ಕರಿ ಏಸ ಇಂಚ ಮಾತಾ ರೂಪೋದಲ ಏಸ ಪಾರ್ದ್ ಮನರಂಜನೆ ಕೊರೊಂದಿತ್ತೆರ್.

ಬದಲಾವಣೆದ ಕಾಲ ಬನ್ನಗ ಮಸುಲುಡಿಕೆದ ಸುರ್ಪ ಬದಲಾಂಡ್, ಒಡಿಪುದ ಗೋಪಾಲಕೆರ್ ಪೇರ್‌ ಕಡ್ಯ ಪಡಪುನ ಪದ್ಧತಿ ಇಂಚ ಮಾತ ಸಾಂಪ್ರದಾಯಿಕ ಕ್ರಮೊಕ್ಕುಲು ಒರಿದ್ ಬೈದ್‌ಂಡ್. ಆಂಡ ಕುಡ್ಲ ತಾಲೂಕುದ ಸಸಿಹಿತ್ಲು , ತೆಲಾರಪದವು ಇಂಚಿನ ಮಾತಾ ಕೆಲವು ಕಡೆಟ್ಟ್ ಮಸುಲುಡಿಕೆ ಉಂತುದೇ ಪೋತುಂಡು, ತೊರ್ತಲ್, ಪಾವಂಜ, ಪುನರ್, ಬೆದ್ರ, ಕೊಟ್ಟಾರ, ಕದ್ರಿ ಇಂಚಿನ ಮಾತ ಕಡೆಟ್ಟ್ ಮಸುಲುಡಿಕೆ ಪೊಸ ರೂಪೊಡು ಆಚರಣೆಡ್ ಉಂಡು. ಎಂಚಿನನೇ ಆವಡ್ ತುಳುನಾಡ್‌ ಸಂಪ್ರದಾಯ, ಆಚರಣೆ ಆದುಪ್ಪುನ ಮಸುಲುಡಿಕೆ ಒರಿದ್ ಬರೊಡು, ನನದ ಜೋಕುಲೆಗ್ ಅಯಿತ ಪೊಲಬು ಆವೊಡು ಪನ್ನಿನವು ನಮ್ಮ ಆಸೆ.

ಬರವು : ಯಶೋಧರ ಕೋಟ್ಯಾನ್

ಕೇರಳಡ್ ಭಾರಿ ಬರ್ಸ : ಆರೆಂಜ್ ಅಲರ್ಟ್

ಕೊಚ್ಚಿ: ಕೇರಳಡ್ ಭಾರಿ ಬರ್ಸ ಬರೊಂದು ಉಂಡು , ಕೆಲವು ಪ್ರದೇಶಡ್ ಐತಾರ 10 ಸೆ.ಮೀ. ಬರ್ಸ ಬೈದುಂಡು . ರಾಜ್ಯದ ಒರಂಬ ಜಿಲ್ಲೆಡ್ ಭಾರತೀಯ ಹವಾಮಾನ ಇಲಾಖೆ(ಐಎಂಡಿ) ಆರೆಂಜ್‌ ಅಲರ್ಟ್‌ ಘೋಷಣೆ ಮಲ್ದುಂಡು .

ಬಾರಿ ಬರ್ಸ ಬರ್ಪಿನ ಸಾಧ್ಯತೆ ಉಪ್ಪುನೆರ್ದಾವರ ಕೊಟ್ಟಾಯಂ, ಎರ್ನಾಕುಳಂ, ಇಡುಕ್ಕಿ, ತ್ರಿಶ್ಯೂರ್‌, ಪಾಲಕ್ಕಾಡ್‌, ಮಲಪ್ಪುರ, ಕೋಯಿಕ್ಕೋಡ್, ವಯನಾಡ್‌ ಬೊಕ್ಕ ಕಣ್ಣೂರು ಜಿಲ್ಲೆಡ್ ಆರೆಂಜ್‌ ಅಲರ್ಟ್‌ ಘೋಷಣೆ ಮಲ್ದೆರ್ .

ಸುರತ್ಕಲ್ ಡ್ ಮಹಿಳಾ ರಕ್ಷಣಾ ಆಯೋಗದ ಕಾರ್ಯಗಾರ

ಸುರತ್ಕಲ್: ಪೊಂಜೊವುಲು ತಮಕ್ ಆಪಿನ ದೌರ್ಜನ್ಯ, ಅನ್ಯಾಯಗೆ ಸಂಬಂಧಿಸಾದ್ ನ್ಯಾಯ ಕೇನೆರೆ ಪೊಲೀಸ್ ಇಲಾಖೆದ 112 ಸಂಖ್ಯೆಗೆ ಲೆಪ್ಪು ಕೊರೋಲಿ ಪಂದ್ ಸುರತ್ಕಲ್ ಠಾಣೆದ ಕಾನೂನು ಸುವ್ಯವಸ್ಥೆ ವಿಭಾಗದ ಎಸ್ಸೈ ಪುನೀತ್ ಗಾಂವ್ಕರ್ ಪಂಡೆರ್ .

ಕುಡ್ಲ ಪೊಲೀಸ್ ಕಮೀಷನರೇಟ್ ವ್ಯಾಪ್ತಿಡ್ ಪೊಂಜೊವ್ಲೆನ ಸುರಕ್ಷೆಗಾದ್ ಸುರತ್ಕಲ್ ಬಂಟರ ಸಂಘದ ಮಹಿಳಾ ವೇದಿಕೆ ಬೊಕ್ಕ ಸುರತ್ಕಲ್ ಠಾಣೆದ ಒಟ್ಟು ಸೇರಿಗೆಡ್ ಸುರತ್ಕಲ್ ಬಂಟರ ಸಂಘಡ್ ಶನಿವಾರ ಅಟ್ಟನೆ ಮಲ್ತಿನ ಮಹಿಳಾ ದೌರ್ಜನ್ಯ ತಡೆ ಮಾಹಿತಿ ಕಾರ್ಯಾ ಗಾರಡ್ ಪಾಲ್ ಪಡೆದ್ ಪಾತೆರಿಯೆರ್.

ಅಖಿಲ ಭಾರತೀಯ ತುಲು ಒಕ್ಕೂಟದ ಸದಸ್ಯತ್ವಗ್ ಅರ್ಜಿ ಲೆಪ್ಪೋಲೆ

ಕುಡ್ಲ : ಮೂಜಿ ದಶಕರ್ದ್ ವಿಶ್ವ ಮಟ್ಟದ ಬೇತೆ ಬೇತೆ ಸ್ವರೂಪದ ತುಳು ಪರ್ಬಲೆನ್ ಅಟ್ಟನೆ ಮಲ್ಪುನ ಮುಖೇನ ಗಮನ ಸೆಳೆಯಿನ ಕುಡ್ಲದ ಅಖಿಲ ಭಾರತ ತುಳು ಒಕ್ಕೂಟ (ರಿ)ಡ್ 52 ತುಳು ಸಂಘಟನೆಲು ಬೇಲೆ ಮಲ್ತೊಂದು ಉಂಡು . ಧರ್ಮಪಾಲ ಯು.ದೇವಾಡಿಗ ಮೆರ್ನ ಗುರ್ಕಾರ್ಮೆಡ್ ಡ್ ಉಪ್ಪುನ ಈ ಸಂಘಟನೆ ಜಾಗತಿಕ ಮಟ್ಟಡ್ ಪುಗಾರ್ತೆ ಪಡೆತುಂಡು .

ದೇಶದ ಬೇತೆ ಬೇತೆ ರಾಜ್ಯ, ಜಿಲ್ಲೆ, ನಗರ ಪ್ರದೇಶಡ್ ಉಪ್ಪುನ ತುಳು ಸಂಘ ಸಂಸ್ಥೆಗಲು ಅಖಿಲ ಭಾರತ ತುಳು ಒಕ್ಕೂಟದ ಸದಸ್ಯತ್ವ ಪಡೆರೆ ಅರ್ಜಿ ಲೆಪ್ಪೋಲೆ ಬೈದುಂಡು .

ದೇಶಡ್ ಒಂಜೇ ದಿನಟ್ 1ಕೋಟಿ ಜನಕ್ ವ್ಯಾಕ್ಸಿನೇಷನ್ | ಸೊಲ್ಮೆ ಸಂದೈತ ಮಲ್ತಿನ ಮೋದಿ

ನವದೆಹಲಿ: ಕೊರೊನಾ ವ್ಯಾಕ್ಸಿನೇಷನ್‌ಡ್ ಭಾರತ ಕೊಡೆ ಪೊಸ ದಾಖಲೆನ್ ಬರೆತುಂಡು . ಬರೋಬ್ಬರಿ ಒಂಜಿ ಕೋಟಿ ಜನಕ್ ಕೊರೊನಾ ಲಸಿಕೆ ಕೊರ್ತುಂಡು ಪಂದ್ ಪ್ರಧಾನಿ ನರೇಂದ್ರ ಮೋದಿ ತೆರಿಪಾದೆರ್ .

ಈ ಬಗ್ಗೆ ಟ್ವಿಟ್ ಮಲ್ತ್ ಮಾಹಿತಿ ಕೊರಿನ ಪ್ರಧಾನಿ ಮೋದಿ, ವ್ಯಾಕ್ಸಿನೇಷನ್ ಸಂಖ್ಯೆಡ್ ಪೊಸ ದಾಖಲೆ ಸೃಷ್ಟಿಯಾತುಂಡು . ಒಂಜಿ ಕೋಟಿ ಜನಕ್ ಒಂಜೇ ದಿನ ವ್ಯಾಕ್ಸಿನ್ ಪಾರ್ದಿನ ಮಹತ್ವದ ಸಾಧನೆ. ಲಸಿಕೆ ಪಾಡಿನಕ್ಲೆಗ್ ಬೊಕ್ಕ ಲಸಿಕೆ ಪಾಡೆರೆ ಯಶಸ್ವಿಯಾಯಿನಕ್ಲೆಗ್ ಸೊಲ್ಮೆ ಸಂದೈತ ಮಲ್ತೆರ್.