ಒಡಿಪು ಪುತ್ತೂರು ಬೊಲ್ತೆರ್

ವರ್ಕ್ ಫ್ರಮ್ ಹೋಂ ಡ್ಲ ಧೂಮಪಾನ ಮಲ್ಪುನ ನಿಷೇಧ : ಜಪಾನ್ ಕಂಪನಿದ ಆದೇಶ

ಟೋಕ್ಯೋ : “ಕಚೇರಿ ಬೇಲೆಡ್ ಉಪ್ಪುನಗ ಏರ್ಲ ಧೂಮಪಾನ ಮಲ್ಪರೆ ಇಜ್ಜಿ . ಇಲ್ಲರ್ದೆ ಬೇಲೆ ಮಲ್ತುಂಡಲ ಈ ನಿಯಮ ಅನ್ವಯ…’ಪಂದ್ ತನ್ನ ಬೇಲೆದಕ್ಲೆಗ್ ಜಪಾನ್‌ದ ನೊಮುರಾ ಹೋಲ್ಡಿಂಗ್ಸ್‌ ಕಂಪನಿ ಆದೇಶ ಕೊರ್ತುಂಡು .

ಅಕ್ಟೋಬರ್‌ರ್ದ್ ಈ ನಿಯಮ ಜಾರಿಯಾಯರೆ ಉಂಡು . ಡಿಸೆಂಬರ್‌ ಕಡೆಟ್ ನೊಮುರಾ ಗ್ರೂಪ್‌ದ ಮಾತಾ ಸ್ಮೋಕಿಂಗ್‌ ರೂಂ ಮುಚ್ಚರೆ ಕಂಪನಿ ತೀರ್ಮಾನ ಮಲ್ದುಂಡು .

ಒಡಿಪುಡು ವಾರಾಂತ್ಯ ಕರ್ಫ್ಯೂಗ್ ಜನಕ್ಲೆನ ವಿರೋಧ

ಒಡಿಪು : ಕೊರೊನಾ ಸುರುತ ಬೊಕ್ಕ ರಡ್ಡನೆ ಅಲೆರ್ದ್ ಪಾಡಿನ ಲಾಕ್‌ಡೌನ್‌, ನಿರ್ಬಂಧರ್ದ್ ಬೇರ ಮಲ್ಪುನ ವಾಣಿಜ್ಯ ವಲಯ, ಕೈತಲ್ ದ ಆರ್ಥಿ ಕತೆ ಕುಗ್ಗುದು ಪೋತುಂಡು , ಇತ್ತೆ ಆತೆ ಸುಧಾರೊಂದು ಬರೊಂದು ಉಂಡು . ಪರ್ಬ ಬರೊಂದು ಉಪ್ಪುನೆರ್ದಾವರ ಆರ್ಥಿಕತೆ ಸುಧಾರನೆಗ್ ಬರ್ಪಿನ ನಿರೀಕ್ಷೆ ಉಂಡು ಬೇರ ದಕ್ಲೆಗ್.

ಆಂಡ ನೆತ್ತ ನಡುಟು ವಾರಾಂತ್ಯ ಕರ್ಫ್ಯೂ ಪಾಡಿನವು ಚಿಗುರುದ ಮಿತ್ತ್ ಕುದಿನೀರು ಪಾಡುನಚಿoನ ಕ್ರಮ ಪನ್ಪಿನ ಅಭಿಪ್ರಾಯ ಜನಕ್ಲೆನೆರ್ದ್ ಕೇಂದ್ ಬರೊಂದು ಉಂಡು.

ಜನಪ್ರತಿನಿಧಿಲುಲಾ ವಾರಾಂತ್ಯ ಕರ್ಫ್ಯೂಗ್ ಬಲವಾಯಿನ ವಿರೋಧ ವ್ಯಕ್ತ ಮಲ್ದೆರ್ , ಪ್ರಾಯಃಷ ದುಂಬುದ ವಾರಾಂತ್ಯ ಕರ್ಫ್ಯೂ ಉಂತಾವುನ ಸಾಧ್ಯತೆ ಉಂಡು .

ತಮಿಳ್ದ ಖ್ಯಾತ ಸಿನಿಮಾ ನಿರ್ದೇಶಕ ಮಣಿ ರತ್ನಂ ಮಿತ್ತ್ ಎಫ್​ಐಆರ್ ದಾಖಲ್

ಚೆನ್ನೈ: ತಮಿಳ್ದ ಖ್ಯಾತ ಸಿನಿಮಾ ನಿರ್ದೇಶಕ ಮಣಿ ರತ್ನಂ ಮೆರೆಗ್ ಕಾನೂನುದ ಕಂಠಕ ಬೈದುಂಡು . ಈ ಪೆರಿಯ ನಿರ್ದೇಶಕನ ವಿರುದ್ಧ ದೂರು ದಾಖಲಾತುಂಡು.

ಮಣಿ ರತ್ನಂ ಮೇರ್ ಐತಿಹಾಸಿ ಕಥಾ ಹಂದರದ ‘ಪೊನ್ನಿಯಿನ್ ಸೆಲ್ವನ್’ ಸಿನಿಮಾ ನಿರ್ದೇಶನ ಮಲ್ತೊಂದು ಉಲ್ಲೆರ್ .ಈ ಸಿನಿಮಾಡ್ ಬಳಕೆ ಮಲ್ತಿನ ಕುದುರೆಯೊಂಜಿ ಚಿತ್ರೀಕರಣದ ಪೊರ್ತು ತೀರ್ ಪೋತುಂಡು. ಈ ಕಾರಣವಾದ್ ಹೈದರಾಬಾದ್​ಡ್ ಕುದುರೆದ ಮಾಲೀಕೆ, ಸಿನಿಮಾ ನಿರ್ಮಾಣ ಸಂಸ್ಥೆ ಬೊಕ್ಕ ಚಿತ್ರತಂಡದ ವಿರುದ್ಧ ಎಫ್​ಐಆರ್ ದಾಖಲ್ ಆತುಂಡು .

ಬಿರುವೆರೆ ಅಸೋಸಿಯೇಶನ್‌ ಮುಂಬಯಿ ವತಿರ್ದ್ ನಾರಾಯಣ ಗುರು ಉಚ್ಚಯ

ಅಂಧೇರಿ: ಬಿರುವೆರೆ ಅಸೋಸಿಯೇಶನ್‌ ಮುಂಬಯಿ ನೆತ್ತ ಅಂಧೇರಿ ಕೈತಲ್ದ ಕಚೇರಿ ವತಿರ್ದ್ ಬ್ರಹ್ಮಶ್ರೀ ನಾರಾಯಣಗುರುಕ್ಲೆನ 167ನೇ ಜಯಂತ್ಯುವ ಆ. 29ಗ್ ಮಧ್ಯಾಹ್ನ 4 ಗಂಟೆರ್ದ್ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮದೊಟ್ಟುಗು ನಡತುಂಡು.

ಕೈತಲ್ದ ಸಮಿತಿದ ಕಾರ್ಯಾಧ್ಯಕ್ಷ ಬಾಬು ಕೆ.ಪೂಜಾರಿ, ಕಾರ್ಯಾಧ್ಯಕ್ಷ ರವೀಂದ್ರ ಎಸ್‌. ಕೋಟ್ಯಾನ್‌, ಒತ್ತು ಗುರ್ಕಾರ್ಲಾಯಿನ ಸುರೇಶ್‌ ಬಿ. ಸುವರ್ಣ, ಜಗನ್ನಾಥ್‌ ಕರ್ಕೇರ, ಗೌರವ ಕೋಶಾಧಿಕಾರಿ ಸುಧಾಕರ ಎಂ. ಜತ್ತನ್‌ ಮೆಕ್ಲೆನ ಮುತಾಲಿಕೆಡ್ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್.

ಮುಲ್ಕಿ ಬಿಲ್ಲವ ಸಂಘೊಡು ಭಜನೆ, ಹಾರ್ಮೋನಿಯಂ ಕಲ್ಪಾವುನ ಕ್ಲಾಸ್ ಸುರು

ಮುಲ್ಕಿ : ಬಿಲ್ಲವ ಸಮಾಜ ಸೇವಾ ಸಂಘ ಮುಲ್ಕಿ ಉಂದೆತ್ತ ಆಶ್ರಯೊಡು ಬ್ರಹ್ಮಶ್ರೀ ನಾರಾಯಣ ಗುರು ಸಭಾಗೃಹೊಡು ಭಜನೆ ಬೊಕ್ಕ ಹಾರ್ಮೋನಿಯಂ ಕಲ್ಪಾವುನ ತರಗತಿ ಐತಾರ ಕಾಂಡೆ ಸುರುವಾಂಡ್.
ಅರ್ಚಕೆರ್ ಕೆ. ಕೃಷ್ಣ ಶಾಂತಿ ಮೇರ್ ಪ್ರಾರ್ಥನೆ ಮಲ್ತ್ ದ್ ತರಗತಿಗ್ ಚಾಲನೆ ಕೊರಿಯೆರ್.
ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರಕಲ್, ಮಹಿಳಾ ವಿಭಾಗದ ಅಧ್ಯಕ್ಷೆರ್ ಅಂಬಾವತಿ, ಬಿರುವೆರ್ ಕುಡ್ಲ ಮುಲ್ಕಿ ಅಧ್ಯಕ್ಷೆರ್ ಕಿಶೋರ್ ಜೆ. ಸಾಲ್ಯಾನ್ , ಭಜನಾ ಸಮಿತಿದ ಗಿರಿಧರ ಅಮೀನ್, ಸೇವಾ ದಳದ ಅಧ್ಯಕ್ಷೆರ್ ಸತೀಶ್ ಕಿಲ್ಪಾಡಿ ಮೊಕುಲು ಮಾತ ಇತ್ತೆರ್.

ಗುರು ನಿತಿನ್ ಕಿಲ್ಪಾಡಿ ಭಜನೆ ಬೊಕ್ಕ ಹಾರ್ಮೋನಿಯಂ ಕಲ್ಪಾವೊಂದುಲ್ಲೆರ್.
ಪ್ರತಿ ಐತಾರ ಕಾಂಡೆ 9 ಗಂಟೆರ್ದ್ 11 ಗಂಟೆ ಮುಟ್ಟ ಕ್ಲಾಸ್ ನಡಪರೆ ಉಂಡು.

ಟ್ವಿಟ್ಟರ್ಡ್ ಇನಿ ತುಳುವೆರ್ನ ಹೋರಾಟ : ತುಳು ರಾಜ್ಯ ಭಾಷೆಗಾದ್ ಇನಿ ಟ್ವಿಟ್ ಅಭಿಯಾನ

ಕುಡ್ಲ : ಜೈ ತುಳುನಾಡು ಸೇರಿನಂಚ ತುಳುನಾಡ್ ದ ಬೇತೆ ಬೇತೆ ಸಂಘಟನೆದ ಒಟ್ಟು ಸೇರಿಗೆಡ್ ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆಯಾದ್ ಮಲ್ಪರೆ ಸೆ. 13ರ್ದ್ 24 ಮುಟ ನಡಪುನ ಅಧಿವೇಶನಡ್ ಮಲ್ಪೋಡು ಪಂದ್ ಆಗ್ರಹ ಮಲ್ತ್ ಇನಿ “ಟ್ವಿಟ್ ಅಭಿಯಾನ ನಡತೊಂದು ಉಂಡು .

ಅಧಿವೇಶನಡ್ “ನಮ್ಮ ಶಾಸಕೆರ್ ಮಸೂದೆ ಮಂಡನೆ ಮಲ್ತ್ ತುಳು ಭಾಷೆನ್ ನಮ್ಮ ರಾಜ್ಯದ ಅಧಿಕೃತ ಭಾಷೆಯಾದ್ ಮಲ್ಪೋಡು ‘ ಪನ್ಪಿನ ಒತ್ತಾಯದೊಟ್ಟುಗು ಸೆ. 4ನೆ ನಡು ರಾತ್ರಿ 12 ಗಂಟೆರ್ದ್ ಸೆ. 5 ಪಂಡ ಇನಿ ರಾತ್ರಿ 11.59 ಮುಟ #TuluOfficialinKA_KL ಬೊಕ್ಕ #SpeakUpForTulu ಪನ್ಪಿನ ಹ್ಯಾಶ್ಟ್ಯಾಗ್ ಮುಖೇನ ಟ್ವಿಟರ್ ಅಭಿಯಾನ ನಡಪರೆ ಉಂಡು .

ಭಾರತ ಕೂಟ ಸೇರಿನ ಕರ್ನಾಟಕದ ವೇಗದ ಬೌಲರ್ ಪ್ರಸಿಧ್ ಕೃಷ್ಣ

ದೆಹಲಿ : ಇಂಗ್ಲೆಂಡ್ ವಿರುದ್ಧ ನಾಲನೆ ಟೆಸ್ಟ್ ಪಂದ್ಯಗ್ ಕರ್ನಾಟಕದ ವೇಗದ ಬೌಲರ್​ ಪ್ರಸಿಧ್ ಕೃಷ್ಣ ಭಾರತ ಕೂಟಗ್ ಸೇರ್ದೆರ್ ಪಂದ್ ಬಿಸಿಸಿಐ ಬುಧವಾರ ಪಂತುಂಡು . ಗುರುವಾರರ್ದ್ ಭಾರತ ಬೊಕ್ಕ ಇಂಗ್ಲೆಂಡ್​ ನಡುಟು 4ನೇ ಟೆಸ್ಟ್ ಪಂದ್ಯ ನಡಪರೆ ಉಂಡು .

ರಡ್ಡ್ ಕೂಟಲಾ ತಲಾ ಒಂಜಿ ಟೆಸ್ಟ್​ ಪಂದ್ಯ ಗೆಂದ್ ದ್ 1-1ಟ್ಟ್ ಸರಣಿ ಸಮಬಲ ಸಾಧಿಸಾದುಂಡು .

ಮಾರ್ಗದ ಅಪಘಾತರ್ದ್ ತೀರ್ ಪೋಯಿನ ನರಿಕೊಂಬು ಗ್ರಾ.ಪಂ.ಡ್ ಪಿಡಿಓ ಶಿವು ಜನಕುಂಡ

ಬಂಟ್ವಾಳ : ಬಂಟ್ವಾಳ ಪೇಂಟೆದ ನರಿಕೊಂಬು ಗ್ರಾ.ಪಂ.ಡ್ ಪಿಡಿಓ ಆದ್ ಇತ್ತಿನ ಶಿವು ಜನಕುಂಡ ಮೇರ್ ಶುಕ್ರವಾರ ತೀರ್ ಪೋಯೆರ್ .

ಕೆಲವು ದಿನತ ಪಿರವು ಮಾರ್ಗದ ಅಪಘಾತರ್ದ್ ಗಾಯಳ್ ಆದ್ ಇತ್ತುಂಡು , ಕರಿನ ರಡ್ಡ್ ದಿನರ್ದ್ ಆರೋಗ್ಯಡ್ ಎಚ್ಚ್ ಕಮ್ಮಿ ಆಯಿನೆರ್ದಾವರ ಮರ್ದ್ ಗಾದ್ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತಿತ್ತೆರ್ .

ಅಲ್ಪ ಮರ್ದ್ ಗ್ ಸ್ಪಂದನೆ ಕೊರಂದೆ ತೀರ್ ಪೋಯೆರ್ . ಮೂಲತಃ ಅಥಣಿದಾರ್ ಆಯಿನ ಮೇರ್ ನರಿಕೊಂಬು ಪಿಡಿಓ ಆದ್ ನೇಮಕ ಆಯಿಬೊಕ್ಕ ಬಿ.ಸಿ. ರೋಡ್ ದ ಕೈಕುಂಜೆಡ್ ಇತ್ತೆರ್ .

ಶಾಂತಿ‌ ನೃತ್ಯ ನಿಕೇತನ ಭರತನಾಟ್ಯ ತರಗತಿದ ಉದಿಪನ

ನಾಟ್ಯ ಪನ್ಪಿನವು ಒಂಜಿ ಸಾಧನೆ, ಸಿದ್ಧಿಸಾಂಡ ಮಾತ್ರ ಮಾತ್ರ ಅವು ಸಾಧ್ಯ ಆಪುಂಡು , ಈ ಸಾಧನೆಗ್ ಜೋಕ್ಲೆನ ಪರಿಶ್ರಮದ ಒಟ್ಟುಗು ಪೋಷಕೆರ್ನ ಪ್ರೋತ್ಸಾಹದ ಅಗತ್ಯ ಉಂಡು ಪಂದ್ ಕರ್ನಾಟಕ ಸಂಗೀತ ನೃತ್ಯ ಅಕಾಡೆಮಿದ ಸದಸ್ಯೆ ಕರ್ನಾಟಕ‌ ಕಲಾಶ್ರೀ ವಿದುಷಿ ಶ್ರೀಮತಿ ಶಾರದಾಮಣಿ ಶೇಖರ್ ಪಂಡೆರ್ . ಮೇರ್ ಕಾಳಿಕಾಂಬ ಜ್ಯೋತಿ ರಂಗಮಂಟಪಡ್ ಶಾಂತಿ‌ ನೃತ್ಯ ನಿಕೇತನ ಭರತನಾಟ್ಯ ತರಗತಿತ ಉದಿಪನನ್ ತುಡರ್ ಅರ್ಲಾದ್ ಜೋಕ್ಲೆಗ್ ಪಜ್ಜೆ ಪಾಡಾವುನ ಮುಖೇನ ಉದಿಪನ ಮಲ್ತೆರ್.

ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯಿನ ವಿದುಷಿ ಶ್ರಿಮತಿ ಶ್ರಿಲತಾ ನಾಗರಾಜ್, ಪುರಸಭಾ ಸದಸ್ಯ‌ ಶುಭದರಾವ್ ಸಂದರ್ಭೋಚಿತ ಪಾತೆರ ಪಂಡೆರ್ . ಈ ಪೊರ್ತುಡು ಜ್ಯೋತಿ ಯುವಕಮಂಡಲದ ವಜ್ರಮಹೋತ್ಸವ ‌ಸಮಿತಿದ ಗುರ್ಕಾರ್ಲಾಯಿನ ಶಿವದೇವಾಡಿಗ, ಶ್ರೀಮತಿ ಪ್ರೇಮ‌ ಜೆ ಶಾಂತಿ ಪಾಲ್ ಪಡೆದಿತ್ತೆರ್ . ನೃತ್ಯ ತರಗತಿದ ಗುರುಕುಲಾಯಿನ ವಿದುಷಿ ಸುಶ್ಮಿತಾ‌‌‌ ಎಸ್‌ ಎನ್ ಎದುಕೊಂಡೆರ್ , ಶುಭಕರ್ ಅಂಚನ್ ಲೇಸ್ ನಡಪಾದ್ ಕೊರಿಯೆರ್, ಸುದೀಂದ್ರ ಶಾಂತಿ ಸೊಲ್ಮೆ ಸಂದೈತ ಮಲ್ತೆರ್ .

ವರದಿ : ಶುಭದ ರಾವ್