ಮುಲ್ಕಿ: ಫ್ರೆಂಡ್ಸ್ ಪಡುಪಣಂಬೂರು ಕೂಟದ ಕ್ರಿಕೆಟ್ ಪಂತೊ ಫೆ.3 ಬೊಕ್ಕ 4 ಕ್ಕ್ ನಡಪರೆ ಉಂಡು.
ನೆತ್ತ ಲೆಪ್ಪೋಲೆನ್ ಮುಲ್ಕಿ ಸೀಮೆ ಅರಸೆರ್ ಎಂ ದುಗ್ಗಣ್ಣ ಸಾವಂತೆರ್ ಬುಡುಗಡೆ ಮಲ್ತೆರ್. ಈ ಪೊರ್ತುಡು ಸತೀಶ್ ಭಟ್ ಬೊಕ್ಕ ಕೂಟದ ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ಬಪ್ಪಂಗಾಯಿ (ಗಂಡ್ ಕಾಯಿ) ಮರತ್ತ ಇರೆಟ್ಟ್ ಆರೋಗ್ಯಗ್ ಮಸ್ತ್ ಪ್ರಯೋಜನ ಉಂಡು.
ಫೈಟೋನ್ಯೂಟ್ರಿಯೆಂಟ್ಸ್ ಬೊಕ್ಕ ಆಂಟಿಆಕ್ಸಿಡೆಂಟ್ ಅಂಶಲು ಬಪ್ಪಂಗಾಯಿ ಇರೆಟ್ಟ್ ಮಸ್ತ್ ಉಂಡು. ಬಪ್ಪಂಗಾಯಿ ಇರೆತ್ತ ಚಾ, ರಸ ಪರ್ಂಡ ಜೀರ್ಣಕ್ರಿಯೆ ಸಮಸ್ಯೆ ನಿವಾರಣೆ ಆಪುಂಡು. ಗ್ಯಾಸ್ಟ್ರಿಕ್, ಅಂಗೈ ಉರಿಲ ಕಮ್ಮಿ ಆಪುಂಡು. ಡೆಂಗ್ಯೂ ಜ್ವರರ್ದ್ ನರಲೊಂದು ಇಪ್ಪುನಕುಲು ಬಪ್ಪಂಗಾಯಿ ಇರೆತ್ತ ರಸ ಪರ್ಂಡ ಪ್ಲೇಟ್ಲೆಟ್ಸ್ ಎಚ್ಚಾಪುಂಡು. ಸಕ್ಕರೆ ಸೀಕ್ ನ್ ಕಮ್ಮಿ ಮಲ್ಪುನ ಕೆಲವು ಮರ್ದ್ ದ ಗುಣ ನೆತ್ತ ಇರೆಟ್ಟ್ ಉಂಡು.
ಉಂದು ಸಮತೋಲನದ ನೆತ್ತೆರ್ ದ ಸಮಸ್ಯೆಗ್ ಸಕಾಯ ಆಪುಂಡು. ಬಪ್ಪಂಗಾಯಿ ಇರೆತ್ತ ರಸನ್ ತರೆಕ್ಕ್ ಪೂಜಿಂಡ ಕುಜಲ್ ಬುಲೆಪುಂಡು. ಆರೋಗ್ಯ ಸರಿ ಮಲ್ಪುಂಡು. ನೆತ್ತ ಇರೆಟ್ಟ್ ಕ್ಯಾನ್ಸರ್ ವಿರೋಧಿ ಗುಣ ಲಕ್ಷಣ ಉಂಡು. ಅತ್ತಂದೆ ಬಚ್ಚುನೆ, ಮಲಬದ್ಧತೆ, ಮಲೇರಿಯಾ ಸೀಕ್ ದ ವಿರುದ್ಧಲ ರಕ್ಷಣೆ ಕೊರ್ಪುಂಡು. ನಮ್ಮ ಆಹಾರ ಪದ್ಧತಿಡ್ ಬಪ್ಪಂಗಾಯಿ ಪರ್ಂದ್ ರ್ದ್ ಎಚ್ಚಾದ್ ಅವೆತ್ತ ಇರೆನ್ ಒಂತೆ ಒಂತೆನೆ ಗಲಸ್ಂಡ ಸುಮಾರ್ ಆರೋಗ್ಯ ಪ್ರಯೋಜನನ್ ಪಡೆವೊಲಿ ಪಂದ್ ಪುಲಮರ್ದ್ ದ ಪಂಡಿತೆರ್ ತೆರಿಪಾದೆರ್.
ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಅಂಗಸಂಸ್ಥೆ ನಿಟ್ಟೆ ಮಹಾಲಿಂಗ ಅಡ್ಯಂತಾಯ ಸ್ಮಾರಕ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಗ್ರಂಥಾಲಯ ಬೊಕ್ಕ ಮಾಹಿತಿ ಕೇಂದ್ರದ ನವೀಕರಣ ಮಲ್ತಿನ ಆವರಣದ ಉದಿಪನ ನಡತ್ಂಡ್.
ಈ ಲೇಸ್ ನ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ನಿರಂಜನ್ ಚಿಪ್ಲೂಣ್ಕರ್ ಮೆರೆನ ಉಪಸ್ಥಿತಿಡ್ ಹಿರಿಯೆರಾಯಿನ ನಿಟ್ಟೆ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಆಡಳಿತ ಮಂಡಳಿ ಸದಸ್ಯೆರ್ ಪ್ರೊ. ಭಾಮೀ ಶೆಣೈ ಉದಿಪನ ಮಲ್ತ್ ದ್ ಪಾತೆರಿಯೆರ್.
ನಿಟ್ಟೆ ವಿದ್ಯಾಸಂಸ್ಥೆದ ನಿರ್ಮಾತೃ ಕೀರ್ತಿಶೇಷ ಜಸ್ಟೀಸ್ ಕೆ.ಎಸ್. ಹೆಗ್ಡೆರೆನ ಭಾವಚಿತ್ರನ್ ನಿಟ್ಟೆ ವಿಶ್ವವಿದ್ಯಾಲಯದ ತಾಂತ್ರಿಕ ಸಂಶೋಧನಾ ಘಟಕದ ನಿರ್ದೇಶಕೆರ್ ಡಾ. ಶ್ರೀನಿಕೇತನ್ ಅನಾವರಣ ಮಲ್ತೆರ್.
ಈ ಪೊರ್ತುಡು ನಿಟ್ಟೆ ವಿಶ್ವವಿದ್ಯಾಲಯದ ಉಪ ಕುಲಸಚಿವೆರ್ ಡಾ.ರೇಖಾ ಭಂಡಾರ್ಕರ್, ಪರೀಕ್ಷಾಂಗ ಉಪ ನಿಯಂತ್ರಕೆರ್ ಡಾ. ಸುಬ್ರಹ್ಮಣ್ಯ ಭಟ್, ಕಾಲೇಜ್ ದ ಪೂರ್ವ ಗ್ರಂಥಪಾಲಕೆರ್ ಯಾಜಿ ಡಾ.ದಿವಾಕರ ಭಟ್, ಬೇತೆ ಬೇತೆ ವಿಭಾಗದ ಮುಖ್ಯಸ್ಥೆರ್ ಬೊಕ್ಕ ಶಿಕ್ಷಕ ಶಿಕ್ಷಕೇತರ ಸಿಬ್ಬಂದಿಲು ಪಾಲ್ ಪಡೆದಿತ್ತೆರ್.
ಹಾಲಿ ಗ್ರಂಥಪಾಲಕೆರ್ ಡಾ. ಪ್ರೀತಮ್ ಶೆಟ್ಟಿ ಕೆ.ವಿ ಎದ್ಕೊನಿಯೆರ್. ಗ್ರಂಥಾಲಯ ಬೊಕ್ಕ ಮಾಹಿತಿ ವಿಜ್ಞಾನ ವಿಭಾಗದ ಸಿಬ್ಬಂದಿಲು ಸಹಕಾರ ಮಲ್ತೆರ್.
ನಿಟ್ಟೆ ಮಾತೃಜಾ ಸೇವಾ ಸಿಂಧು ಕೂಟದಕುಲು 18ನೇ ಸೇವಾ ಯೋಜನೆದ ಮುಕೇನ ಕುಡೊಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.
ಕಲ್ಲಮುಂಡೇರ್ ಕುದ್ರಿಪದವುದ 4 ವರ್ಷದ ಯಶಿಕಾ ಪನ್ಪಿನ ಎಲ್ಯ ಬಾಲೆ RHABDOMYOSARCOMA ಪನ್ಪುನ ಸೀಕ್ ರ್ದ್ ಕುಡ್ಲದ ಕೆ.ಎಂ.ಸಿ ಅತ್ತಾವರ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಂಡು. ಈ ಬಾಲೆದ ಚಿಕಿತ್ಸೆಗ್ 13 ಲಕ್ಷದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಆಂಡ ಆತೊಂಜಿ ಕಾಸ್ ಒಟ್ಟು ಮಲ್ಪರೆ ಆವಂದಿನ ಕಾರಣ ನಿಟ್ಟೆ ಮಾತೃಜಾ ಸೇವಾ ಕೂಟಗ್ ಬಿನ್ನಾಪು ಮಲ್ದೆರ್. ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ ಡಿ.18 ಕ್ಕ್ ನಡತಿನ ಷಷ್ಠಿ ಮಹೋಚ್ಚಯಡ್ ನಿಧಿ ಸಂಗ್ರಹಣೆ ಮಲ್ತೆರ್. ಅವೆಟ್ಟ್ ಸಂಗ್ರಹ ಆಯಿನ 61 ಸಾರ ರೂ. ನ್ ಇನಿ ಕಾರ್ಲ ಶ್ರೀ ಮಾರಿಯಮ್ಮ ದೇವಲ್ಯಡ್ ಕೂಟದ ಸದಸ್ಯೆರೆನ ಸಮ್ಮುಖಡ್ ಕುಟುಂಬಗ್ ಕೊರಿಯೆರ್.
ಜಪಾನ್ ಡ್ (ಜ.1) ಕೋಡೆ ನಡತಿನ 7.6 ಬಿರ್ಸ್ ದ ಭೂಕಂಪಡ್ 6 ಜನ ನಾಗರಿಕೆರ್ ತೀರ್ ಪೋಯೆರ್ ಪಂದ್ ಸರ್ಕಾರ ತೆರಿಪಾದ್ಂಡ್.
ಇಶಿಕಾವಾ ಕಡಲ್ ದ ಬರಿಟ್ಟ್ ಸುನಾಮಿ ಬತ್ತಿನ ಬೊಕ್ಕ ಈ ಪುನಕುಲು ಪತ್ತೆ ಆತ್ಂಡ್ ಪಂದ್ ಅಲ್ಪದ ಅಧಿಕಾರಿಲು ತೆರಿಪಾದೆರ್. ಅತ್ತಂದೆ ಮುಲ್ಪ 2 ಸರ್ತಿ ಭೂಕಂಪ ನಡತಿರ್ನೆದಾವೆರ 30 ಸಾರರ್ದ್ ಎಚ್ಚ ಇಲ್ಲ್ ಗ್ ಕೊರ್ತಿನ ಕರೆಂಟ್ ಸಂಪರ್ಕ ಇಜ್ಜಂದೆ ಜನ ಕತ್ತಲೆಡ್ ಜೀವನ ಸಾಗವೊಂದು ಉಲ್ಲೆರ್.
ಮಂಕುಡೆ ಶ್ರೀ ಧರ್ಮಶಾಸ್ತಾವು ಭಕ್ತವೃಂದದ ಇರುಮುಡಿ ಕಟ್ಟುನ ಲೇಸ್ ಬೊಕ್ಕ ಆಟ ಜ.9 ಮಂಕುಡೆ ಮಹಾವಿಷ್ಣುಮೂರ್ತಿ ದೇವಲ್ಯಡ್ ನಡಪರೆ ಉಂಡು.
ಆನಿ ಬೊಲ್ಪುಗು ಇರುಮುಡಿ ಕಟ್ಟಿಯೆರೆ, ಮಧ್ಯಾಹ್ನ ಮಹಾ ಮಂಗಳಾರತಿ, ಪ್ರಸಾದ ಪಟ್ಟಿಯೆರೆ ಬೊಕ್ಕ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಶ್ರೀ ದೇವಿ ಮಹಾತ್ಮೆ ಆಟ ಬೊಕ್ಕ ಮನಾದಾನಿ (ಜ.10) ಬೊಲ್ಪುಗು ಯಾತ್ರೆ ಪಿದಾಡುಂಡು.
ಈ ಲೇಸ್ ಗ್ ಭಕ್ತೆರ್ ಮಾತೆರ್ಲಾ ಬತ್ತ್ ದ್, ಶ್ರೀ ಸ್ವಾಮಿನ ಯಾತ್ರೆ ಪೊರ್ಲುಡು ಆವಡ್ ಪಂದ್ ಆಶೀರ್ವಾದ ಮಲ್ತ್ ದ್, ಶ್ರೀ ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಮಂಕುಡೆ ಶ್ರೀ ಧರ್ಮಶಾಸ್ತಾವು ಭಕ್ತವೃಂದದ ಗುರುಸ್ವಾಮಿ, ಶಿಷ್ಯವೃಂದದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ನಿಟ್ಟೆ ಮಾತೃಜಾ ಸೇವಾ ಸಿಂಧು ಕೂಟದಕುಲು 17ನೇ ಸೇವಾ ಯೋಜನೆದ ಮುಕೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ಕಿನ್ನಿಗೋಳಿದ ಪೂಜಿತ್ ಶೆಟ್ಟಿಗಾರ್ ಪನ್ಪುನ 6 ತಿಂಗೊಲ್ದ ಬಾಲೆಗ್ ಕಣ್ಣ್ ದ ಕ್ಯಾನ್ಸರ್ ಉಂಡು.
ಇತ್ತೆ ಬೆಂಗ್ಲೂರುದ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಂಡು. ಈ ಬಾಲೆದ ಚಿಕಿತ್ಸೆಗ್ ಸುಮಾರ್ 15 ಲಕ್ಷ ರೂ. ದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್ ಆಂಡ ಆತೊಂಜಿ ಕಾಸ್ ಒಟ್ಟು ಮಲ್ಪರೆ ಆವಂದಿನ ಕಾರಣ ನಿಟ್ಟೆ ಮಾತೃಜಾ ಸೇವಾ ಕೂಟಗ್ ಬಿನ್ನಾಪು ಸಂದಾದೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ ಡಿ.18 ಕ್ಕ್ ನಡತಿನ ಷಷ್ಠಿ ಮಹೋಚ್ಚಯಡ್ ನಿಧಿ ಸಂಗ್ರಹಣೆ ಮಲ್ತೆರ್. ಅವೆಟ್ಟ್ ಸಂಗ್ರಹ ಆಯಿನ 61 ಸಾರ ರೂ. ನ್ ಇನಿ ಕಾರ್ಲ ಶ್ರೀ ಮಾರಿಯಮ್ಮ ದೇವಲ್ಯಡ್ ಕೂಟದ ಸದಸ್ಯೆರೆನ ಸಮ್ಮುಖಡ್ ಕುಟುಂಬಗ್ ಕೊರಿಯೆರ್.
ಒಡಿಪು: ಕಾರ್ಲ ಶ್ರೀ ಕ್ಷೇತ್ರ ಅತ್ತೂರು ಕೃಷ್ಣಗಿರಿ ಕಲ್ಕುಡ ದೈವೊಲ್ಯ ಟ್ರಸ್ಟ್ (ರಿ.) ಬೊಕ್ಕ ಶ್ರೀ ಕ್ಷೇತ್ರ ಅತ್ತೂರು ಪರ್ಪಲೆಗಿರಿ ಪುನರುತ್ಥಾನ ಸಮಿತಿದ ಒಟ್ಟುಸೇರಿಗೆಡ್ ಶ್ರೀ ಕ್ಷೇತ್ರ ಪರ್ಪಲೆಗಿರಿ ಪುನರುತ್ಥಾನದ ವಿಜ್ಞಾಪನಾ ಪತ್ರ ಬುಡುಗಡೆ ಲೇಸ್ (ಇನಿ) ಜ.1 ಸೋಮಾರ ಬಯ್ಯಗ್ ಅತ್ತೂರು ಶ್ರೀ ಕ್ಷೇತ್ರ ಪರ್ಪಲೆಗಿರಿಟ್ಟ್ ನಡಪರೆ ಉಂಡು.
ಈ ಲೇಸ್ ಮಾತ ಹಿಂದೂ ಭಾಂದವೆರ್ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಮಿಯ್ಯಾರ್ ಲವ-ಕುಶ ಬಯಲು ಕಂಬುಲ ಜ.6 ಸನಿಯಾರ ನಡಪರೆ ಉಂಡು.
ಈ ಲೇಸ್ ಡ್ ಕಂಬುಲ ಕ್ರೀಡಾ ಅಭಿಮಾನಿಲು, ಕಂಬುಲ ಕೂಟಡ್ ಪಾಲ್ ಪಡೆಪುನ ಮಾತ ಕೂಟದಕುಲು ಪಾಲ್ ಪಡೆವೊಡು ಪಂದ್ ಕಂಬುಲ ಸಮಿತಿದ ಗುರ್ಕಾರೆ, ಕಾರ್ಲ ಶಾಸಕೆರ್ ಸುನಿಲ್ ಕುಮಾರ್ ಲೆಪ್ಪೋಲೆಡ್ ತೆರಿಪಾದೆರ್.
ವೃತ್ತಿಡ್ ಇಂಜಿನಿಯರ್ ಆಯಿನ ಕಲೆ-ಸಾಹಿತ್ಯಾಸಕ್ತಿರ್ದ್ 30 ರ್ದ್ ಎಚ್ಚ ಪ್ರಸಂಗನ್ ಯಕ್ಷಗಾನ ಕ್ಷೇತ್ರಗ್ ಕೊರ್ನ ಅಗರಿ ಭಾಸ್ಕರ ರಾವ್ (76) ಬೆಂಗ್ಲೂರುಡು ದೇವೆರೆ ಪಾದೊ ಸೇರಿಯೆರ್.
ಯಕ್ಷಗಾನದ ಪುಗರ್ತೆದ ಭಾಗವತೆರಾಯಿನ ಅಗರಿ ಶ್ರೀನಿವಾಸ ಭಾಗವತೆರೆನ ಮಗೆ ಹಿರಿಯೆರಾಯಿನ ರಘುರಾಮೆರ್ ಪುಗರ್ತೆದ ಭಾಗವತೆರಾಂಡ ಅಮ್ಮೆರ್ ನ ಕುಡೊಂಜಿ ಪ್ರವೃತ್ತಿ ಆಯಿನ ಪ್ರಸಂಗ ರಚನೆನ್ ಮೇರ್ ದುಂಬರಿಸಾದ್ ಸುಮಾರ್ ಪ್ರಸಂಗನ್ ಬರೆತೆರ್.
ಶ್ರೀ ವಿಶ್ವಕರ್ಮ ಮಹಾತ್ಮೆ, ಶ್ರೀಹರಿ ಲೀಲಾರ್ಣವ, ಶ್ರೀದೇವಿ ತ್ರಿಕರ್ಣೇಶ್ವರೀ ಮಹಾತ್ಮೆ, ಶ್ರೀ ಗುಂಡುಬಾಳ ಕ್ಷೇತ್ರ ಮಹಾತ್ಮೆ, ರಾಣೀ ಅಪ್ರಮೇಯಿ ಸೇರಿನಂಚೆನೆ ಮೆರೆನ ಸುಮಾರ್ ಪ್ರಸಂಗಲು ರಂಗಡ್ ಪ್ರದರ್ಶನ ಆತ್ಂಡ್. ತುಳು ಭಾಷೆಡ್ಲಾ ಪ್ರಸಂಗ ರಚನೆ ಮಲ್ದೆರ್. 2018 ಟ್ಟ್ ‘ಯಕ್ಷಗಾನ ಪ್ರಸಂಗ ದಶಕ’ ಶೀರ್ಷಿಕೆಡ್ ಡಾ.ಪಾದೆಕಲ್ಲು ವಿಷ್ಣು ಭಟ್ರೆನ ಸಂಪಾದಕತ್ವಡ್ ಒಡಿಪುದ ಶೇವಧಿ ಪ್ರಕಾಶನರ್ದ್ ಪತ್ತ್ ಪ್ರಸಂಗಲು ಪ್ರಕಟ ಆದಿತ್ತ್ಂಡ್. ಅವೆನ್ ಮಾರಿನೆರ್ದ್ ಬತ್ತಿನ ಕಾಸ್ ನ್ ಕಲಾವಿದೆರೆನ ಕ್ಷೇಮ ಚಿಂತನೆಗ್ ಕೆಲಸ ಮಲ್ಪುನ ಒಡಿಪುದ ಯಕ್ಷಗಾನ ಕಲಾರಂಗಗ್ ಕೊರ್ತೆರ್.
ಮೆರೆಗ್ ಬೊಡೆದಿ, ಮಗೆ, ಮಗಲ್ ಉಲ್ಲೆರ್.
