ಕರ್ನಾಟಕ ರಾಜ್ಯಡ್ ಸುದ್ದಿಲು | Karnataka News

ನನ ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್‌ದ ಮಿತ್ತ್ ಕ್ಯೂಆರ್ ಕೋಡ್..!!

ನಮ ಅಟಿಲ್‌ಗ್ ಗಲಸುನ ಗ್ಯಾಸ್ ಸಿಲಿಂಡರ್‌ದ ಮಿತ್ತ ಪೊಸ ಕ್ಯೂಆರ್ ಕೋಡ್‌ ಬರ್ಪುಂಡು. ಉಂದೆನ್ ಪಾಡುನೆಡ್ದಾವರ ಸಿಲಿಂಡರ್‌ದ ಬಗೆಟ್ ಮಾತ ರೀತಿದ ಮಾಹಿತಿ ತಿಕ್ಕುಂಡು. ಲಿಕ್ವಿಫೈಡ್ ಪೆಟ್ರೋಲಿಯಂ ಗ್ಯಾಸ್ ಸಿಲಿಂಡರ್‌ದ ಮಿತ್ತ್ ನನ ಭಾರೀ ಬೇಗಡೆ ಕ್ಯೂಆರ್ ಕೋಡ್ ಪಾಡಿಯರೆ ಉಂಡು ಪಂದ್ ಕೇಂದ್ರ ಪೆಟ್ರೋಲಿಯಂ ಸಚಿವೆರ್ ಹರ್ದೀಪ್ ಸಿಂಗ್ ಪುರಿ ಪಂತೆರ್.

ಕ್ಯೂಆರ್ ಕೋಡ್‌ ಪಾಡುನೆತ್ತ ಪ್ರಯೋಜನ ಇಂಚ ಉಂಡು.

ಪೊಸ ಸಿಲಿಂಡರ್‌ದ ಮಿತ್ತ್ ಕ್ಯೂಆರ್ ಕೋಡ್‌ನ್ ವೆಲ್ಡ್ ಮಲ್ಪುವೆರ್. ಕ್ಯೂಆರ್ ಕೋಡ್ ಮುಕೇನ ಗ್ರಾಹಕೆರ್ ಸಿಲಿಂಡರ್ ಬಗೆಟ್ ಸಂಪೂರ್ಣ ಮಾಹಿತಿ ಪಡೆಯರೆ ಸಾಧ್ಯ ಆಪುಂಡು. ಉದಾಹರಣೆಗ್ ಸಿಲಿಂಡರ್‌ನ್ ಒಲ್ಪ ರಿಫೀಲ್ ಮಲ್ತ್‌ದೆರ್, ಎಲ್‌ಪಿಜಿ ಸಿಲಿಂಡರ್‌ಗ್ ಸಂಬಂಧಪಟ್ಟಿನ ಒವ್ ಸುರಕ್ಷತಾ ಪರೀಕ್ಷೆ ಮಲ್ತ್‌ದೆ ಇಂಚಿನ ಮಾಹಿತಿ ಈ ಕ್ಯೂಆರ್ ಕೋಡ್ ಮುಕೇನ ತಿಕ್ಕರೆ ಉಂಡು. ಕ್ಯೂಆರ್ ಕೋಡ್‌ನ್ ಸಿಲಿಂಡರ್‌ದ ಲೇಬಲ್ ಮುಕೇನ ಅಂಟಾಯರೆ ಉಂಡು.

2022 ತ್ತ ಎಲ್‌ಪಿಜಿ ಸಪ್ತಾಹದ ಪೊರ್ತುಡು, ಗ್ರಾಹಕೆರ್ ಎಲ್‌ಪಿಜಿ ಸಿಲಿಂಡರ್‌ನ್ ಟ್ರ್ಯಾಕ್ ಮಲ್ಪರೆ ಸಾಧ್ಯ ಆಪಿನೆಡ್ದಾವರ ಇನಿ ಕ್ರಾಂತಿಕಾರಿ ಬದಲಾವಣೆ ಆತ್ಂಡ್ ಪಂದ್ ಕೇಂದ್ರ ಪೆಟ್ರೋಲಿಯಂ ಸಚಿವೆರ್ ಹರ್ದೀಪ್ ಸಿಂಗ್ ಪುರಿ ಪಂತೆರ್.

ಸುರುತ್ತ ಹಂತೊಡು ಕ್ಯೂಆರ್ ಕೋಡ್ ಇಪ್ಪುನ 20,000 ಎಲ್‌ಪಿಜಿ ಸಿಲಿಂಡರ್‌ನ್ ಯುಎನ್ ಕೋಡ್ ಆಧಾರಿತ ಟ್ರ್ಯಾಕ್ ಅಡಿಟ್ ಕೊರಿಯರೆ ಉಂಡು. ಉಂದು ಒಂಜಿ ಬಾರ್‌ಕೋಡ್ ಆತ್ಂಡ್, ಡಿಜಿಟಲ್ ಸಾಧನದ ಮುಕೇನ ಉಂದೆನ್ ಓದೊಲಿ.

300 ಕಡೆಟ್ಟ್ 50 ದಿನ ದಾಂಟಿನ ಕಾಂತಾರ ಪಿಚ್ಚರ್ ಶೋ

ಹೊಂಬಾಳೆ ಫಿಲಂಸ್ ಬ್ಯಾನರ್ನಡಿ ವಿಜಯ್ ಕುಮಾರ್ ಕಿರಗಂದೂರು ನಿರ್ಮಾಣ ಮಲ್ತ್‌ದ್ ರಿಷಭ್ ಶೆಟ್ಟಿ ನಟನೆ ಬೊಕ್ಕ ನಿರ್ದೇಶನ ಮಲ್ತಿನ ಕಾಂತಾರ ಪಿಚ್ಚರ್ ಯಶಸ್ವಿಯಾದ್ 50 ದಿನನ್ ಪೂರೈಸಾದ್ಂಡ್.

ಸೆ.30 ಗ್ ಬುಡುಗಡೆ ಆಯಿನ ಪಿಚ್ಚರ್ ರಾಜ್ಯದ 300 ರ್ದ್ ಎಚ್ಚದ ಥೀಯೆಟರ್ ಅತ್ತಂದೆ ಪಿದಯ್ ದೇಶದ ಮಸ್ತ್ ಥೀಯೆಟರ್‌ಡ್ 50 ದಿನನ್ ಮುಗಿತ್ತ್‌ದ್ 100 ನೇ ದಿನಗ್ ಕಾರ್ ದೀವೊಂದುಂಡು.