ರಾಜ್ಯದ ಸುದ್ದಿ | State News

ತಮಿಳ್‌ನಾಡ್‌ ದೇವಲ್ಯೊಲೆಡ್ ಮೊಬೈಲ್ ಬ್ಯಾನ್

ಚೆನ್ನೈ: ತಮಿಳ್‌ನಾಡ್‌ದ ದೇವಲ್ಯಡ್ ಮೊಬೈಲ್ ಫೋನ್ ಬಳಕೆ ಮಲ್ಪುನೆನ್ ನಿಷೇಧ ಮಲ್ತ್‌ದ್ ಮದ್ರಾಸ್ ಹೈಕೋರ್ಟ್ ಮಹತ್ವದ ಆದೇಶ ಕೊರ್ತ್ಂಡು.

ದೇವಲ್ಯಡ್ ಪೂಜೆ ಆನಗ ಇಪ್ಪುನ ಭಕ್ತಿ ಅಂಚನೆ ಶಿಸ್ತು ಕಾಪುನವು ಅತ್ಯಗತ್ಯ. ಇಂಚಾದ್ ದೇವಲ್ಯಡ್ ಮೊಬೈಲ್ ಫೋನ್‌ನ್ ಸಂಪೂರ್ಣವಾದ್ ನಿಷೇಧ ಮಲ್ತ್‌ದ್ಂಡ್.

ಪಿರವುರ್ದ್ ಬರೊಂದಿತ್ತಿನ ಟೆಂಪೋ ಗುದ್ದುದು ಬೈಕ್ ಸಮೇತ ಲಾಗಿದ್ ಎದುರುಗು ಪೋವೊಂದಿತ್ತಿನ ಕಾರ್‌ಗ್ ಗುದ್ದುದು ಫೋಟೋಗ್ರಾಫರ್ ತೀರ್ ಪೋಯೆರ್

ಕಾರವಾರ: ಬೈಕ್ ಬೊಕ್ಕ ಟೆಂಪೋದ ನಡುಟ್ಟ್ ಆಕ್ಸಿಡೆಂಟ್ ಆದ್ ಆಸ್ಪತ್ರೆಗ್ ಕೊನನಗ ಸಾದಿದ ನಡುಟ್ಟ್ ಬೈಕ್ ಡ್ರೈವರ್ ತೀರ್ ಪೋಯಿನ ಘಟನೆ ಕಾರವಾರದ ಅಮದಳ್ಳಿ ಕೈತಲ್ ನಡತ್ಂಡ್.

ಕುಮಟಾದ ಫೋಟೊಗ್ರಾಫರ್ ಆಯಿನ ಮಹಾಬಲೇಶ್ವರ ಅಂಬಿಗ ತೀರ್ ಪೋಯಿನಾರ್. ಬೈಕ್‌ಡ್ ಪೋವೊಂದಿಪ್ಪುನಗ ಮಹಾಬಲೇಶ್ವರ ತಿರ್ಗಾಸ್‌ಡ್ ಬೈಕ್ ಟರ್ನ್ ಮಲ್ಪುನಗ ಈ ಘಟನೆ ನಡತ್ಂಡ್.

ಬೈಕ್‌ದ ಪಿರವು ಇತ್ತಿನ ಟೆಂಪೋ ಡ್ರೈವರ್‌ನ ನಿಯಂತ್ರಣ ತಿಕ್ಕಂದೆ ದುಂಬು ಇತ್ತಿನ ಮಹಾಬಲೇಶ್ವರ ಮೆರೆನ ಬೈಕ್‌ಗ್ ಗುದ್ದುದ್ಂಡ್. ಬೈಕ್‌ಡ್ ಇತ್ತಿನ ಮಹಾಬಲೇಶ್ವರ ಪಿಚ್ಚರ್‌ದ ರೀತಿಡ್ ಬೈಕ್ ಸಮೇತ ಲಾಗಿದ್ ಎದುರುಗು ಪೋವೊಂದಿತ್ತಿನ ಕಾರ್‌ಗ್ ಗುದ್ದುದು ಮಾರ್ಗದ ಬರಿಕ್ಕ್ ಬೂರ್ದೆರ್.

ಕರ್ನಾಟಕದ ಗಡು ಜಿಲ್ಲೆಡ್ ಹೈ ಅಲರ್ಟ್

ಕರ್ನಾಟಕ-ಮಹಾರಾಷ್ಟ್ರ ಗಡಿ ವಿವಾದ ಕೇಸ್‌ದ ಬಗೆಟ್ ಇನಿ ಸುಪ್ರೀಂಕೋರ್ಟ್‌ಡ್ ಮಹತ್ವದ ವಿಚಾರಣೆ ನಡಪರೆ ಇಪ್ಪುನ ಕಾರಣ ಗಡಿ ಜಿಲ್ಲೆಲೆಡ್ ಒವ್ವೇ ರೀತಿದ ಹಾಳ್ ಘಟನೆ ಆವಂದಿಲೆಕ್ಕ ಮುನ್ನೆಚ್ಚರಿಕಾ ಕ್ರಮ ದೆತೊಂದ ಪಂದ್ ಎಡಿಜಿಪಿ ಅಲೋಕ್ ಕುಮಾರ್ ತೆರಿಪಾದೆರ್.

ರಡ್ಡ್ ರಾಜ್ಯದ ಪೊಲೀಸ್ ಅಧಿಕಾರಿಲೆನ ಸಭೆ ಆಯಿಬೊಕ್ಕ ಪಾತೆರಿನ ಆರ್, ಸುಪ್ರೀಂ ತೀರ್ಪುದ ನಿಲೆಟ್ಟ್ ಒವ್ವೆ ಲಡಾಯಿ ಆವಂದಿಲೆಕ್ಕ ಮೂಜಿ ಕಡೆ ಚೆಕ್‌ಪೋಸ್ಟ್ ಪಾಡ್ದಿತ್ತ್‌ದ್, ಗಡಿ ಜಿಲ್ಲೆಲೆಡ್ ಎಚ್ಚದ ಭದ್ರತೆ ಮಲ್ತ್‌ದ ಪಂದ್ ಪಂಡೆರ್.

ಮಾರ್ಚ್ 9 ತಾರೀಕ್ ರ್ದ್ ಸೆಕೆಂಡ್ ಪಿಯುಸಿ ಪರೀಕ್ಷೆ ಸುರು

ಬೆಂಗ್ಳೂರ್: 2023 ತ್ತ ಮಾರ್ಚ್ 9 ರ್ದ್ 29 ಮುಟ್ಟ ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆ ನಡಪರೆ ಉಂಡು ಪಂದ್ ಶಿಕ್ಷಣ ಸಚಿವೆರ್ ಬಿ.ಸಿ. ನಾಗೇಶ್ ತೆರಿಪಾದೆರ್.

ಈ ಬಗೆಟ್ ಟ್ವೀಟ್ ಮಲ್ತಿನ ಆರ್, ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆದ ಟೈಮ್ ಟೇಬಲ್ ಪ್ರಕಟಣೆ ಆತ್ಂಡ್. 2023 ತ್ತ ಮಾರ್ಚ್ 9 ರ್ದ್ ಮಾರ್ಚ್ 29 ಮುಟ್ಟ ಪರೀಕ್ಷೆ ನಡೆಪರೆ ಉಂಡು ಪಂದ್ ತೆರಿಪಾದೆರ್.