ಬೊಂಬೈದ ಕಾರ್ಪೊರೇಷನ್ ಓಟುಡು ತುಳು ಕನ್ನಡಿಗ ಅಭ್ಯರ್ಥಿ
ಭಾಂಡುಪ್ 110ನೇ ವಾರ್ಡ್ಡ್ ಹರಿಣಾಕ್ಷಿ ಮೋಹನ್ ಚಿರತ್ ಪೂಜಾರಿ ಸ್ಪರ್ಧೆ
ಈ ಸರ್ತಿದ ಬೊಂಬೈದ ಮಹಾನಗರಪಾಲಿಕೆದ ಓಟುಡು ಭಾಂಡುಪ್ 110 ನೇ ವಾರ್ಡ್ಡ್ ಮಹಾರಾಷ್ಟ್ರ ನವನಿರ್ಮಾಣ ಸೇನೆ, ಶಿವಸೇನೆ ಬೊಕ್ಕ ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ ಮೈತ್ರಿ ಅಭ್ಯರ್ಥಿಯಾದ್ ತುಳು ಕನ್ನಡತಿ ಹರಿಣಾಕ್ಷಿ ಮೋಹನ್ ಚಿರತ್ (ಪೂಜಾರಿ) ಮೇರ್ ಓಟುದ ಕಲಕ್ಕ್ ಜೈದೆರ್.
ಮೂಲತಃ ಉಡುಪಿ ಜಿಲ್ಲೆದ ಕಟಪಾಡಿ ಕುರ್ಕಾಲು ಗ್ರಾಮದ ವಿಜಯ್ ಬಿ ಸುವರ್ಣ ಬೊಕ್ಕ ರತ್ನ ವಿ ಸುವರ್ಣ ಮೊಕ್ಲೆನ ಮಗಲ್ ಆಯಿನ
ಹರಿಣಾಕ್ಷಿ ಮೋಹನ್ ಚಿರತ್ ಬೊಂಬೈಡ್ ಪುಟುದು ಬಲದಿನಾರ್ ಆಂಡಲ ಸರ್ವ ತುಳು ಕನ್ನಡಿಗೆರೆನ ಸಂಘ ಸಂಸ್ಥೆಲೆಡ್ ಅತ್ಯಂತ ನಿಕಟ ಸಂಬಂಧ, ಎಡ್ಡೆ ಬಾಂಧವ್ಯ ದೀವೊಂದಿನಾರ್.
ಹರಿಣಾಕ್ಷಿ ಮೋಹನ್ ಚಿರತ್ ಮೇರ್ ಒರ್ತಿ ಯಶಸ್ವಿ ಉದ್ಯಮಿಯಾದ್ ಮೊವಿ ಫುಡ್ ಅಂಡ್ ಬೆವರೇಜಸ್ ಪ್ರೈ.ಲಿ.ದ ನಿರ್ದೇಶಕೆರಾದ್
ಸಕ್ರಿಯ ಸಾಮಾಜಿಕ ಕಾರ್ಯಕರ್ತೆರ್ ಬೊಕ್ಕ ರಾಜಕಾರಣಿಯಾದ್ ಎಡ್ಡೆ ಬೇಲೆ ಮಲ್ತೊಂದುಲ್ಲೆರ್.
ಹರಿಣಾಕ್ಷಿ ಮೋಹನ್ ಚಿರತ್ ಮೇರ್ ಕಾಮರ್ಸ್ ಪದವೀಧರೆಯಾದ್ ಮನಃಶಾಸ್ತ್ರಡ್ ಡಿಪ್ಲೊಮಾ ಮಲ್ದೆರ್.
ಬ್ಯಾಂಕಿಂಗ್ ಕ್ಷೇತ್ರಡ್ 11 ವರ್ಷರ್ದಲ ಹೆಚ್ಚ ಅನುಭವ ಉಂಡು.
ಎನ್ ಜಿಒ ಜತೆಟ್ಟ್ಲ ಎಡ್ಡೆ ಸಂಬಂಧ ದೀವೊಂದು, ಮಹಿಳಾ ಉನ್ನತಿರ್ದ್ ಪತಿನ ಜೋಕ್ಲೆನ ಶಿಕ್ಷಣ ಮುಟ್ಟ ವಿವಿಧ ಕ್ಷೇತ್ರಡ್ ಕೆಲಸ ಮಲ್ತೊಂದುಲ್ಲೆರ್.
ಸಮಾಜಸೇವೆ :
ಮೇರ್ ರಾಜಕೀಯವಾದ್ ಸಮಾಜ ಸೇವೆದ ಮುಕೇನ ಮಸ್ತ್ ಜನಕ್ಲೆನ ಸಂಪರ್ಕ ಮಲ್ದೆರ್.
ಕರಿನ 19 ವರ್ಷರ್ದ್, ಸಾಮಾನ್ಯ ಜನಕ್ಲೆನ ನಡುಟ್ಟು ವಾಸ ಮಲ್ತೊಂದುಲ್ಲೆರ್. ಈ ವಾರ್ಡ್ ದ ಸ್ಥಳೀಯ ನಿವಾಸಿ, ಸುಶಿಕ್ಷಿತ ಬೊಕ್ಕ ತಳಮಟ್ಟದ ಕಾರ್ಯಕರ್ತೆರಾದುಪ್ಪೆನೆರ್ದಾವರ ಜನಕ್ಲೆನ ಕಷ್ಟ ಸುಖೊಟ್ಟು ಭಾಗಿಯಾದುಲ್ಲೆರ್. ಮರಿಯಲೊಡು ಬೊಲ್ಲದ ನೀರ್ ದಿಂಜಿನಗ ಜನಕ್ಲೆನ ಪರವಾದ್ ಉಂತುದು ಹೋರಾಟ ಮಲ್ತ್ದೆ. ಬೊಂಬೈದ ಮಾಮಲ್ಲ ದಹಿ ಹಂಡಿ ಉತ್ಸವದ ಸಂಘಟಕೆರಾದ್ ಪ್ರತಿ ಕುಟುಂಬಲ ದೀಪಾವಳಿನ್ ಕುಷಿಟ್ಟ್ ಆಚರಣೆ ಮಲ್ಪರೆ ಬೋಡಾದ್ ಪ್ರತಿ ವರ್ಷ ಸುಮಾರ್ 5,000 ನಾಗರಿಕೆರೆಗ್ ಉಚಿತ ಸಕ್ಕರೆ ಬೊಕ್ಕ ಆಹಾರ ಧಾನ್ಯಲೆನ್ ವಿತರಣೆ ಮಲ್ದೆರ್. ಕೋವಿಡ್-19 ಸೀಕ್ದ ಪೊರ್ತುಡು ಜನಕ್ಲೆಗ್ ಆಹಾರ ಬೊಕ್ಕ ಪರ್ಪಿನ ನೀರ್ ಪೂರೈಕೆ ಮಲ್ಪುನ ಮುಕೇನ ಜನ ಸೇವೆ ಮಲ್ದೆರ್. 3,500 ನಾಗರಿಕೆರೆಗ್ ಉಚಿತ ಕೋವಿಡ್ ಲಸಿಕೆ ಕೊರ್ಪಾದೆರ್. ಪ್ರತಿ ವರ್ಷ ಗುಡಿ ಪಡ್ವಾ ಸಂದರ್ಭಡ್ ಉಚಿತ ಶ್ರೀಖಂಡ ಪಟ್ಟುವೆರ್. ಕೆಲವು ಸಂದರ್ಭಡ್ ವಾರ್ಡ್ ನಿವಾಸಿಲೆಗ್ ಉಚಿತ ಶಿರಡಿ ತೀರ್ಥಯಾತ್ರೆ ಆಯೋಜನೆ ಮಲ್ದೆರ್.
ಸಮಸ್ಯೆಲೆನ ಸವಾಲ್ :
ವಾರ್ಡ್ ಡ್ ಮೆರೆನ ಎದುರು ಮಸ್ತ್ ಸವಾಲ್ಲು ಉಂಡು. ಮಾರ್ಗದ ಬೇಲೆ, ನೀರ್ ಸರಬರಾಜು, ಸ್ವಚ್ಛತೆ, ಶಿಕ್ಷಣ ಬೊಕ್ಕ ಸುರಕ್ಷತೆ ಇಂಚಿನ ಮೂಲಸೌಕರ್ಯದ ಅಗತ್ಯ ಉಂಡು. ಉಂದೆಕ್ಕ್ ಬೋಡಾದ್ ಹೋರಾಟ ಮಲ್ಪರೆ ನಿಕ್ಲೆನ ಪ್ರತಿನಿಧಿಯಾದ್ ಓಟುಗು ಉಂತುನ ಸಂಪೂರ್ಣ ಜವಾಬ್ದಾರಿನ್ ದೆತೊಂದೆರ್. ಪ್ರೀತಿದ ಮತದಾರ ಸಹೋದರ ಸಹೋದರಿಯೆರ್ನ ಜೊತೆಯಾದುಲ್ಲೆರ್. ಮಹಾರಾಷ್ಟ್ರ ನವನಿರ್ಮಾಣ ಸೇನೆ, ಶಿವಸೇನೆ (ಉದ್ಧವ್ ಬಾಳಾಸಾಹೇಬ್ ಠಾಕ್ರೆ) ಬೊಕ್ಕ ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ (ಶರದ್ ಪವಾರ್) ಅಧಿಕೃತ ಮೈತ್ರಿ ಅಭ್ಯರ್ಥಿಯಾದ್ ಹರಿಣಾಕ್ಷಿ ಮೋಹನ್ ಚಿರತ್ ಮೇರ್ ವಾರ್ಡ್ ಸಂಖ್ಯೆ 110 ರ್ದ್ ಅಭ್ಯರ್ಥಿಯಾದ್ ಪ್ರತಿಯೊಂಜಿ ಮತದಾರೆರೆನ್ ಗೌರವ ಬೊಕ್ಕ ಪ್ರಾಮಾಣಿಕತೆ ಸಂಪರ್ಕ ಮಲ್ಪುವೆ” ಪಂದ್ ಪನ್ತೆರ್.
“ಕರಿನ 19 ವರ್ಷರ್ದ್, ಯಾನ್ ನಿಕ್ಲೆನ ನಡುಟ್ಟು ವಾಸ ಮಲ್ತೊಂದುಲ್ಲೆ. ಸಾಮಾಜಿಕ ಬೊಕ್ಕ ರಾಜಕೀಯ ಜೀವನಡ್ ಸಕ್ರಿಯವಾದ್ ಪಾಲ್ ಪಡೆದ್ ನಿಕ್ಲೆನ ಸುಖ ಬೊಕ್ಕ ಹೋರಾಟಡ್ ಪಾಲ್ ಪಡೆಪೆ.ಯಾನ್ ಈ ವಾರ್ಡ್ ದ ಸ್ಥಳೀಯ ನಿವಾಸಿ, ಸುಶಿಕ್ಷಿತ ಬೊಕ್ಕ ತಳಮಟ್ಟದ ಕಾರ್ಯಕರ್ತೆದಿ. ನಿಕ್ಲೆನ ಸ್ವಂತ ಮಗಳ್, ಸಹೋದರಿ ಪನ್ಪಿನ ಭಾವನೆಡ್ ಓಟು ಕೊರ್ಲೆ 2012ನೇ ಇಸ್ವಿಡ್ ಯಾನ್ ಎನ್ನ ಖಾಸಗಿ ವಲಯದ ಕೆಲಸ ಬುಡ್ದು ಒಂಜಿ ಸ್ಪಷ್ಟ ಉದ್ದೇಶ ದೀದ್ ಸಾರ್ವಜನಿಕ ಜೀವನಗ್ ಕಾರ್ ದೀತೆ. ಸಮಾಜ ಸೇವೆ ಮಲ್ಪುನು ಬೊಕ್ಕ ಅರ್ಥಪೂರ್ಣ ಸಾರ್ವಜನಿಕ ಸೇವೆದ ವ್ಯಾಪ್ತಿನ್ ವಿಸ್ತಾರ ಮಲ್ಪುನ ಎಡ್ಡೆ ಉದ್ದೇಶ ಉಂಡು” ಪಂದ್ ಹರಿಣಾಕ್ಷಿ ಪನೊಂದುಲ್ಲೆರ್.
ಹರಿಣಾಕ್ಷಿ ಮೋಹನ್ ಚಿರತ್ ಮೇರ್ ಸಾಮಾಜಿಕ, ಶೈಕ್ಷಣಿಕ ಧಾರ್ಮಿಕ, ಕೆಲಸ ಕಾರ್ಯಲೆಡ್ ತುಳು ಕನ್ನಡಿಗರೆರ್ನ ಒಟ್ಟುಗು ಏಪಲ ಕೈಜೋಡಿಸಾವೊಂದುಲ್ಲೆರ್. ರಾಜಕೀಯ ಕ್ಷೇತ್ರ ಮಾತ್ರ ಅತ್ತಾಂದೆ ತನ್ನ ಸ್ವಂತ ಉದ್ಯಮ ರಾಯಲ್ ಬ್ಯಾಂಕ್ಟ್ ಸಭಾಗೃಹಡ್ ಯಕ್ಷಗಾನ, ನಾಟಕ,ಪೂಜೆ ಲೆಗ್ ಅತಿ ಕಡಿಮೆ ರೇಟ್ಡ್ ಸಭಾಗ್ರಹನ್ ಕೊರ್ದು ಸಹಾಯ ಮಲ್ತೊಂದುಲ್ಲೆರ್.
ಹರಿಣಾಕ್ಷಿ ಮೋಹನ್ ಚಿರತ್ ಮೇರೆಗ್ ನನಲ ಮಸ್ತ್ ಸಮಾಜ ಕಾರ್ಯ ಮಲ್ಪೊಡು ಪನ್ಪಿನ ಉದ್ದೇಶಡ್
ರಸ್ತೆ, ನೀರ್ ಸರಬರಾಜು, ಸ್ವಚ್ಛತೆ, ಶಿಕ್ಷಣ ಬೊಕ್ಕ ಸುರಕ್ಷತೆಗ್ ಆದ್ಯತೆ ಕೊರೊಂದುಲ್ಲೆರ್. ಅವು ಪೂರ ರಾಜಕೀಯ ವಿಷಯ ಅತ್ತ್. ದಿಙಿತ್ಯದ ಅವು ನಮ್ಮ ದೈನಂದಿನ ಜೀವನದ ಭಾಗವಾದುಂಡು. ನಿಕ್ಲೆನ ಧ್ವನಿಯಾದ್ ಬೊಕ್ಕ ನಿಕ್ಲೆನ ಹಕ್ಕ್ ಗ್ ಬೋಡಾದ್ ಗಟ್ಟಿಯಾದ್ ಉಂತುನ ಸಂಪೂರ್ಣ ಜವಾಬ್ದಾರಿನ್ ಯಾನ್ ದೆತೊನುವರ ಪಂದ್ ಪನೊಂದುಲ್ಲೆರ್.
ನಿಕ್ಲೆನ ನಂಬಿಕೆ, ಪ್ರೀತಿ ಬೊಕ್ಕ ನಿಕ್ಲೆನ ಅಮೂಲ್ಯ ಮತ ಮಲ್ಲ ಶಕ್ತಿ ಪಂದ್ ಆರ್ ಪನೊಂದುಲ್ಲೆರ್. ಎಂಕ್ ಸೇವೆ ಮಲ್ಪರೆ, ವಾರ್ಡ್ದ ಅಭಿವೃದ್ಧಿ ಮಲ್ಪರೆ ಅಂಚೆನೆ ನಿಕ್ಲೆಗಾದ್ ಹೋರಾಟ ಮಲ್ಪರೆ ಅವಕಾಶ ಕೊರ್ಲೆ.
ನಿಕ್ಲೆನ ಇಲ್ಲ್, ನಿಕ್ಲೆನ ಭವಿಷ್ಯ ಬೊಕ್ಕ ನಿಕ್ಲೆನ ವಾರ್ಡ್ ಗಾಗದ್ ನಿಕ್ಲೆನ ಓಟು ಪಂದ್ ಆರ್ ನಂಬಿಕೆ ದೀದ್ ಓಟುಡು ವಿಜಯಶಾಲಿ ಆಪಿನ ವಿಶ್ವಾಸಡ್ ಉಲ್ಲೆರ್.
” ಖಾಲಿ ಭರವಸೆಲೆನ್ ಕೊರಂದೆ ಕಾರ್ಯಕ್ಷೇತ್ರೊಗು ಜತ್ತ್ದ್ ಕೆಲಸ ಮಲ್ಪುನೆಟ್ಟ್ ನಂಬಿಕೆ ದೀತೆ. 2012 ಟ್ಟ್ ಖಾಸಗಿ ವಲಯದ ಕೆಲಸ ಬುಡ್ದು ಒಂಜಿ ಸ್ಪಷ್ಟ ಉದ್ದೇಶದ ಒಟ್ಟುಗು ರಾಜಕೀಯ ಕ್ಷೇತ್ರ ಪ್ರವೇಶ ಮಲ್ತ್ದ್, ಸಮಾಜ ಸೇವೆ ಮಲ್ಪುನು ಬೊಕ್ಕ ಅರ್ಥಪೂರ್ಣ ಸಾರ್ವಜನಿಕ ಸೇವೆದ ವ್ಯಾಪ್ತಿನ್ ವಿಸ್ತಾರ ಮಲ್ಪುನ ಉದ್ದೇಶ ಉಂಡು.ಅಡೆತಡೆ ಇತ್ತ್ಂಡಲ ಏಪಲ ಬುಡ್ದು ಪಾಡ್ದಿಜಿ. ನಮ್ಮ ಪ್ರದೇಶದ ಸಮಸ್ಯೆಲೆನ್ ಪರಿಹರಿಸಲು ನಿರಂತರವಾದ್ ಕೆಲಸ ಮಲ್ತ್ದೆ. ಈ ಸರ್ತಿ ಎಂಕ್ ನಿಕುಲು ಮಾತೆರ್ಲ ನಿಕ್ಲೆನ ಅಮೂಲ್ಯ ಓಟುನು ಪಾಡ್ದ್ ಗೆಂದಾವೊಡು. ಸಮಾಜಸೇವೆ ಮಲ್ಪರೆ ಅವಕಾಶ ಕೊರ್ಲೆ ಪಂದ್ ಈ ಮೂಲಕ ಬಿನ್ನಾಪು ಮಲ್ಪುವೆ”
–ಹರಿಣಾಕ್ಷಿ ಮೋಹನ್ ಚರಿತ್ ಪೂಜಾರಿ,
110 ನೇ ವಾರ್ಡ್ ದ ಮನಸೇ ಅಭ್ಯರ್ಥಿ
