ಉಡುಪಿದ ಸುದ್ದಿ | Udupi News

ಪರ್ಬೊಗು ರಾತ್ರೆ 10 ಗಂಟೆರ್ದ್ ಬೊಕ್ಕ ಪಟಾಕಿ ಬುಡ್ರೆ ಇಜ್ಜಿ !

ತುಡರ ಪರ್ಬ, ತುಳಸಿ ಪರ್ಬ ಅಂಚೆನೆ ಕ್ರಿಸ್ಮಸ್ ದಪಗ ಪಟಾಕಿಲೆನ ಮಾರಾಟ ಬೊಕ್ಕ ಗಲಕೆ ನಿಯಂತ್ರಣ ಮಲ್ಪುನ ಬಗೆಟ್ ಸರ್ವೋಚ್ಛ ನ್ಯಾಯಾಲಯದ ಆದೇಶ ಉಪ್ಪುನೆರ್ದಾವರ ಕುಡ್ಲ ಮಹಾನಗರ ಪಾಲಿಕೆದ ವ್ಯಾಪ್ತಿಡ್ ರಾತ್ರೆ 10 ಗಂಟೆ ಮುಟ್ಟ ಮಾತ್ರ ಪಟಾಕಿ ಬುಡೊಡು ಪನ್ದ್ ಆದೇಶ ಆತ್ಂಡ್.

ಪರ್ಬದ ಪೊರ್ತುಡು ರಾತ್ರೆ 8 ರ್ದ್ 10 ಮುಟ್ಟ ಪಚ್ಚೆ ಪಟಾಕಿ( ಕಮ್ಮಿ ಸೌಂಡುದ) ಬೊಕ್ಕ ಬೆಡಿಮರ್ದ್ ಬುಡೊಡು ಪನ್ದ್ ಸರ್ವೋಚ್ಚ ನ್ಯಾಯಂತಡೆ ಪನ್ತ್ಂಡ್. ಒರಿದಿನ ಪೊರ್ತುಡು ಪಟಾಕಿ ಬುಡ್ಪಿನೆನ್ ನಿಷೇಧ ಮಲ್ದೆರ್. ಕಡ್ಡಾಯವಾದ್ ಪಸಂತ್ರ ಪಾಸಾಡಿ ಪಚ್ಚೆ ಪಟಾಕಿ ಬುಡೊಡು ಪನ್ದ್ ನಗರ ಪಾಲಿಕೆದ ಉಪ ಆಯುಕ್ತೆರ್(ಕಂದಾಯ) ತೆರಿಪಾದೆರ್.

ಒಡಿಪು : ಇನಿ, ಎಲ್ಲೆ ಶಾಲೆಲೆಡ್ ಅಟಿಲ್ ಮಲ್ಪುನ ಬೇಲೆದಕಲೆನ ಸ್ಟ್ರೈಕ್

ಒಡಿಪು ಜಿಲ್ಲೆಡ್ ಅಂಗಾರೆ ಬೊಕ್ಕ ಬುದಾರ ಅಕ್ಷರದಾಸೋಹ ಬೇಲೆದಕುಲು ಸುಮಾರ್ ಬೇಡಿಕೆಲೆನ್ ದೀವೊಂದು ಅವೆನ್ ಈಡೇರಿಪೊಡು ಪನ್ದ್ ಬಂದ್‌ಗ್ ಲೆಪ್ಪು ಕೊರ್ತೆರ್.

ಉಂದೆರ್ದಾವರ ಕೆಲವು ಶಾಲೆಲೆಡ್ ಮದ್ಯಾನದ ವನಸ್‌ಗ್ ತಾಪತ್ರ ಬರು. ಅಕ್ಷರದಾಸೋಹ ಬೇಲೆದಕುಲು ಸ್ಟ್ರೈಕ್ ಮಲ್ತ್ಂಡಲಾ ಜೋಕುಲೆಗ್ ತೊಂದರೆ ಆವಂದಿಲೆಕ್ಕ ಮದ್ಯಾಹ್ನದ ವನಸ್ ರೆಡಿ ಮಲ್ಪೊಡು ಪನ್ದೇ ಶಾಲೆಲೆಗ್ ಆದೇಶ ಕೊರ್ತುಂಡು ಪನ್ದ್ ಅಧಿಕಾರಿ ಒರಿ ತೆರಿಪಾದೆರ್.

ಸಂಬಲ ಎಚ್ಚ ಮಲ್ಪೊಡು ಅಂಚೆನೆ ಬೇತೆ ಬೇತೆ ಸೌಲಭ್ಯ ಕೊರೊಡು ಪನ್ದ್ ಪ್ರತಿಭಟನೆ ಮಲ್ಪರೆ ಅಕ್ಷರ ದಾಸೋಹ ಬೇಲೆದಕುಲು ದುಂಬು ಬೈದೆರ್.

ಒಡಿಪು: ಶ್ರೀ ರಾಮ ಮಂದಿರಗ್‌ ಕಂಡೆರೆ ಬತ್ತಿನ ಕಲ್ವೆ…!!

ಒಡಿಪು: ಬೈಂದೂರು ತಾಲೂಕು ಮರವಂತೆದ ಶ್ರೀ ರಾಮ ಮಂದಿರಡ್ ಕಲ್ವೆ ಒರಿ ಕಂಡೆರೆ ಪ್ರಯತ್ನ ಮಲ್ತಿನ ಘಟನೆ ನಡತ್‌ಂಡ್.‌ ಗುರ್ತದಾಂತಿನ ನರಮಾನಿ ಮಂದಿರದ ಎದುರುದ ಬೀಗ ಹಾಕ್‌ದ್ ಕಂಡೆರೆ ಪ್ರಯತ್ನ ಮಲ್ತ್‌ದ್ ಬೀಗ ಹಾಕರೆ ಸಾಧ್ಯ ಆವಂದೆ ವಾಪಾಸ್ಸಾತೆ.

ಕಂಡೆರೆ ಬತ್ತಿನ ಜನ ತರೆಕ್ಕ್ ಹೆಲ್ಮೆಟ್ ಪಾರ್ದಿನ ಸಿ.ಸಿ ಕ್ಯಾಮರಾದ ದೃಶ್ಯ ಸೆರೆಯಾತ್‌ಂಡ್.‌ ಘಟನಾ ಜಾಗೆಗ್ ಪೊಲೀಸೆರ್‌ ಬತ್ತ್‌ದ್‌ ಪರಿಶೀಲನೆ ಮಲ್ತ್‌ದೆರ್.

60ರ್ದ್ ಎಚ್ಚ ಕಂಡಿನ ಕೇಸ್: ಅರ್ಧ ಕೆಜಿ ಬಂಗಾರ್‌ದೊಟ್ಟಿಗೆ ಕಲ್ವೆ ಅರೆಸ್ಟ್!

ಒಡಿಪು: ಕುಂಜಿಬೆಟ್ಟು ಲಾಲಾ ಲಜಪತ್ ರಾಯ್ ಮಾರ್ಗದ ಇಲ್ಲಡ್‌ ಕೆಲವು ದಿನತ ಪಿರಾವ್ ನಡತ್ತಿನ ಕಂಡಿನ ಕೇಸ್‌ಡ್ ಒಡಿಪು ಪೊಲೀಸೆರ್ ಒರಿ ಆರೋಪಿನ್‌ ಅರೆಸ್ಟ್‌ ಮಲ್ತ್‌ದ್‌, ಲಕ್ಷಾಂತರ ರೂ. ಬಿಲೆತ್ತ ಸೊತ್ತುಲೆನ್‌ ವಶಕ್ಕ್‌ ಪಡೆಯೊಂದೆರ್.

ಈ ಬಗೆಟ್ಟ್ ಒಡಿಪು ಠಾಣೆಡ್ ಬುಧವಾರ ನಡತ್ತಿನ ಪತ್ರಿಕಾಗೋಷ್ಠಿಡ್ ಜಿಲ್ಲಾ ಹೆಚ್ಚುವರಿ ಎಸ್ಪಿ ಎಸ್.ಟಿ.ಸಿದ್ಧಲಿಂಗಪ್ಪ ಮಾಹಿತಿ ಕೊರಿಯೆರ್. ಬೆಂಗಳೂರು ಉತ್ತರಹಳ್ಳಿದ ಭುವನೇಶ್ವರಿ ನಗರದ ನಿವಾಸಿ ಮಂಜುನಾಥ ಯಾನೆ ಕಲ್ಕೆರೆ ಮಂಜ(43) ಅರೆಸ್ಟ್‌ ಆಯಿನ ಆರೋಪಿ.

ಆರೋಪಿನ ಮಿತ್ತ್‌ ಬೆಂಗಳೂರು, ಕೋಲಾರ, ತುಮಕೂರು, ದಾವಣಗೆರೆ ಬೊಕ್ಕ ಚಿಕ್ಕಬಳ್ಳಾಪುರ ಜಿಲ್ಲೆದ ಬೇತೆ ಬೇತೆ ಪೊಲೀಸ್ ಠಾಣೆಡ್ 60ರ್ದ್‌ ಎಚ್ಚ ಕೇಸ್‌ ದಾಖಲಾತ್‌ಂಡ್‌ ಪಂದ್ ಹೆಚ್ಟುವರಿ ಎಸ್ಪಿ ತೆರಿಪಾಯೆರ್. ಸುದ್ದಿಗೋಷ್ಠಿಡ್‌ ಡಿವೈಎಸ್ಪಿ ದಿನಕರ ಪಿ.ಕೆ., ಒಡಿಪು ನಗರ ಠಾಣಾ ಪೊಲೀಸ್ ನಿರೀಕ್ಷಕೆರ್ ಮಂಜಪ್ಪ ಡಿ. ಆರ್. ಇತ್ತೆರ್.