ಊರ್ದ ಸುದ್ದಿ Regional News

ನೇತ್ರಾವತಿ ಸಂಕಡ್ ಸಾಲ್ ಸಾಲ್ ಆ್ಯಕ್ಸಿಡೆಂಟ್: 6 ಗಾಡಿ ಲಗಾಡಿ

ಕುಡ್ಲ : ನೇತ್ರಾವತಿ ಸಂಕಡ್ ಸೋಮಾರ ಬಯ್ಯಗ್ ನಡತಿನ ಸರಣಿ ಅಪಘಾತ ಆದ್ ಸುಮಾರ್ 2 ಗಂಟೆ ಟ್ರಾಫಿಕ್ ಜಾಮ್ ಆತ್ಂಡ್.

ಸಂಕದ ನಡುಟ್ಟು ಒಂಜಿ ಲಾರಿ ಹಾಳಾದ್ ಉಂತುದು ಇತ್ತ್ಂಡ್. ಈ ಪೊರ್ತುಡು ಬರ್ಸ ಬತ್ತಿರ್ನೆದಾವೆರ ಅಯಿಕ್ ಒಂಜಿ ಕಾರ್ ಗುದ್ದುದ್ಂಡ್.ಇಂಚ ಬೆರಿಕ್ಕ್ ಬೆರಿಕ್ಕ್ ಮಾತ ಗಾಡಿಲುಲ ಒಂಜೆಕ್ಕೊಂಜಿ ತಾಂಟ್ ದ್ ಈ ಘಟನೆ ನಡದ್ಂಡ್. ನೆರ್ದ್ 6 ಗಾಡಿ ಲಗಾಡಿ ಆತ್ಂಡ್.
ಕುಡ್ಲ ದಕ್ಷಿಣ ಸಂಚಾರಿ ಠಾಣೆ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಗಾಡಿಲೆನ್ ದೆಪ್ಪಾದ್ ಸಂಚಾರೊಗು ಸರಿ ಮಲ್ತ್ ಕೊರಿಯೆರ್.

ತೆಡಿಲ್ ಹಾಕ್ ದ್ ಶಾರ್ಟ್​ ಸರ್ಕ್ಯುಟ್, ಪೊಂಜೋವ್, ಬಾಲೆಗ್ ಪೆಟ್ಟ್

ಕುಡ್ಲ: ತೆಡಿಲ್ ಹಾಕ್ ದ್ ಶಾರ್ಟ್ ಸರ್ಕ್ಯುಟ್ ಆದ್ ಪೊಂಜೋವ್ ಬೊಕ್ಕ ಬಾಲೆಗ್ ಪೆಟ್ಟಾಯಿನ ಘಟನೆ ಕುಡ್ಲದ ವಾಮಂಜೂರು ಅಮೃತ ನಗರದ ಗೋಪಾಲ ಪೂಜಾರಿ ಪನ್ಪುನಾರೆನ ಇಲ್ಲಲ್ ನಡತ್ ದ್ಂಡ್.

ತೆಡಿಲ್ ದ ಸೌಂಡ್ ಗ್ ಇಲ್ಲಲ್ ಶಾರ್ಟ್ ಸರ್ಕ್ಯುಟ್​​ರ್ದ್ ಸ್ವಿಚ್ ಬೋರ್ಡ್ ಬೊಕ್ಕ ಮೀಟರ್ ಬಾಕ್ಸ್ ಪೊಡಿ ಆತ್ಂಡ್. ಅತ್ತಂದೆ ಪೊಂಜೋವ್ ಶ್ವೇತಾ ಬೊಕ್ಕ 5 ವರ್ಷೊದ ಬಾಲೆದ ಕೆಬಿಕ್ಕ್ ಪೆಟ್ಟಾತ್ಂಡ್. ಮೊಕುಲು ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಈ ಘಟನೆ ನಡಪುನ ಪೊರ್ತುಡು ಇಲ್ಲಲ್ ನಾಲ್ ಜನ ಕುಟುಂಬಸ್ಥೆರ್ ಇತ್ತೆರ್.

ಸಾಮರಸ್ಯದ ತೊಜಪಾವುನ ಕುಡ್ಲ ದಸರಾ: ಬೊಲ್ತೇರ್ ಧರ್ಮಪ್ರಾಂತ್ಯದ ಬಿಷಪ್

ನರಮಾನಿಲೆಗ್ ಗ್ ಒಂಜೇ ಜಾತಿ ಒಂಜೇ ಮತ ಒಂಜೇ ದೇವೆರ್ ಪಂದ್ ಜಗತ್ತ್ ಗ್ ತೊಜಪಾದ್ ಕೊರಿನ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನಂಚಿನ ಮಹಾಪುರುಷೆರೆನ ಸಿದ್ಧಾಂತ ಇತ್ತೆದ ಸಮಾಜಗ್ ಅಗತ್ಯ. ನಮ ಮಾತೆರ್ಲಾ ದೇವೆರ್ನ ಜೋಕುಲು. ಕುದ್ರೋಳಿ ಕ್ಷೇತ್ರಡ್ ಜಾತಿ ಮತ ಬೇಧ ಇಜ್ಜಂದೆ ನಡತೊಂದು ಇಪ್ಪುನ ಉಚ್ಚಯ ಸ್ನೇಹ ಸೌಹಾರ್ದತೆಗ್ ಮಾದರಿ ಪಂದ್ ಸಿರೋ-ಮಲಬಾರ್ ಬೊಲ್ತೇರ್ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷೆರ್ ಬಿಷಪ್ ‌ಲಾರೆನ್ಸ್ ಮುಕುಝಿ ಪಂಡೆರ್.

ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ನಡತೊಂದು ಇಪ್ಪುನ ಐತಿಹಾಸಿಕ ದಸರಾ ಉಚ್ಚಯಡ್ ಸೋಮಾರ ಪಾಲ್ ಪಡೆದ್ ದೇವೆರೆನ ದರ್ಶನ ಪಡೆದ್ ಕ್ಷೇತ್ರದ ಬಗೆಟ್ಟ್ ಕುಷಿನ್ ಪಟ್ಟೊಂಡೆರ್.

ಕುದ್ರೋಳಿ ಕ್ಷೇತ್ರದ ಪರವಾದ್ ಗುರ್ಕಾರೆ ಎಚ್.ಎಸ್.ಸಾಯಿರಾಂ, ಪ್ರಧಾನ ಕಾರ್ಯದರ್ಶಿ ಮಾಧವ ಸುವರ್ಣ, ಕೋಶಾಧಿಕಾರಿ ಪದ್ಮರಾಜ್ ಆರ್., ಕ್ಷೇತ್ರದ ಅಭಿವೃದ್ಧಿ ಸಮಿತಿದ ಗುರ್ಕಾರೆ ದೇವೇಂದ್ರ ಪೂಜಾರಿ, ಸದಸ್ಯೆರ್ ರಾಧಾಕೃಷ್ಣ, ಬೊಂಬೈ ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ದ ಚೇರ್ಮನ್ ಸೂರ್ಯಕಾಂತ್ ಜೆ. ಸುವರ್ಣ ಬತ್ತಿ ಬಿನ್ನೆರೆನ್ ಎದ್ಕೊನಿಯೆರ್.

ಕಂಕನಾಡಿ ಆಲ್ಫೋನ್ಸ್ ಚರ್ಚ್ ಧರ್ಮಗುರು ಫಾ.ಮಾಣಿ, ಬೊಲ್ತೇರ್ ಧರ್ಮಪ್ರಾಂತ್ಯ ಪಿಆರ್‌ಓ ಸೆಬಾಸ್ಟಿಯನ್ ಕೆ.ವಿ ಈ ಪೊರ್ತುಡು ಇತ್ತೆರ್.

ಈಶ್ವರಗೋಳಿ ಸಮುದಾಯ ಭವನಗ್ ಕೆಸರ್ ಕಲ್ಲ್ ಪಾಡುನ ಲೇಸ್

ಕುಡ್ಲದ ಪುಗರ್ತೆದ ಕಂಪೆನಿ MRPL ದ CSR ಫಂಡ್ ದ ಮುಖೇನ ಶ್ರೀ ಕ್ಷೇತ್ರ ಈಶ್ವರಗೋಳಿದ ಸಮುದಾಯ ಭವನಗ್ ಕೆಸರ್ ಕಲ್ಲ್ ಪಾಡುನ ಲೇಸ್ ನಡತ್ಂಡ್.

ಈ ಪೊರ್ತುಡು MRPL ಸಂಸ್ಥೆದ ಅಧಿಕಾರಿಲು, ಪೊಸೊಡಿ ವಾರ್ಡ್ ದ ಕಾರ್ಪೊರೇಟರ್ ವರುಣ್ ಚೌಟ, ಜೀರ್ಣೋದ್ದಾರ ಸಮಿತಿದ ಗುರ್ಕಾರೆ, ಸದಸ್ಯೆರ್, ಊರುದ ಪರವೂರುದ ಭಕ್ತೆರ್, ಬೊಕ್ಕ ಪತ್ತ್ ಸಮಸ್ತೆರ್ ಪಾಲ್ ಪಡೆದಿತ್ತೆರ್.