ಊರ್ದ ಸುದ್ದಿ Regional News

ಯೋಗಾಸನ ಸ್ಪರ್ಧೆಡ್ ಮೋಹಿತ್ ಕುಮಾರ್ ರಾಷ್ಟ್ರ ಮಟ್ಟಗ್ ಆಯ್ಕೆ‌

ಕಲ್ಮಂಜ: ಸರಕಾರಿ ಪ್ರೌಢ ಶಾಲೆ ಕಲ್ಮಂಜ ಮುಲ್ಪದ 10ನೇ ತರಗತಿದ ಕಲ್ಪಾರ್ಥಿ ಮೋಹಿತ್ ಕುಮಾರ್ ಚಿತ್ರದುರ್ಗಡ್ ನಡತ್ತಿನ 17ರ ವಯೋಮಾನದ ಯೋಗಾಸನ ಸ್ಪರ್ಧೆಡ್ ರಾಷ್ಟ್ರ ಮಟ್ಟಗ್ ಆಯ್ಕೆಯಾತೆರ್. ಮೇರ್ ಕನ್ಯಾಡಿ ಗ್ರಾಮದ ಲಕ್ಷ್ಮಿ ಕೃಪಾ ನಿಲಯದ ರಾಜೇಶ್ ಗೌಡ ಬೊಕ್ಕ ಪ್ರೇಮಾ ದಂಪತಿಲೆನ ಮಗೆ.

ಶ್ರೀ ಧ.ಮಂ.ಪ.ಪೂ ಕಾಲೇಜ್‌ದ ದ್ವೈವಾರ್ಷಿಕ ಪತ್ರಿಕೆ ‘ಪ್ರೇರಣಾ’ ಬುಡುಗಡೆ

ಧರ್ಮಸ್ಥಳ: ಅ.20 ದಾನಿ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಪದವಿ ಪೂರ್ವ ಕಾಲೇಜ್‌ದ ದ್ವೈವಾರ್ಷಿಕ ಪತ್ರಿಕೆ ‘ಪ್ರೇರಣಾ’ನ್ ಶ್ರೀ ಧರ್ಮಸ್ಥಳ ಕ್ಷೇತ್ರದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆರ್‌ ಬುಡುಗಡೆ ಮಲ್ತೆರ್. ಎಸ್.ಡಿ.ಎಂ ಶಿಕ್ಷಣ ಸಂಸ್ಥೆದ ಕಾರ್ಯದರ್ಶಿ ಡಿ.ಹರ್ಷೇಂದ್ರ ಕುಮಾರ್ ಪತ್ರಿಕೆದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಾಯೆರ್.‌
ಪ್ರಾಂಶುಪಾಲೆರ್ ಬೊಕ್ಕ ಪತ್ರಿಕೆಯ ಗೌರವ ಸಂಪಾದಕೆರ್ ಪ್ರಮೋದ್ ಕುಮಾರ್, ಕಾರ್ಯನಿರ್ವಾಹಕ ಸಂಪಾದಕೆರ್ ಡಾ.ರಾಜೇಶ್ ಬಿ, ಸಂಪಾದಕೆರ್ ಮಂಡಳಿದ ಸದಸ್ಯೆರ್ ಸೌಮ್ಯ ಡಿ.ಎಲ್, ಡಾ|.ಫ್ಲಾವಿಯಾ ಪಾವ್ಲ್, ಸುಪ್ರಿತಾ ಪಡಿವಾಳ್, ದೀಕ್ಷಿತ್ ರೈ ಈ ಪೊರ್ತುಡು ಇತ್ತೆರ್.

ಗುರುವಾಯನಕೆರೆ: ಟಿಪ್ಪರ್‌ಗ್ ಟಿಟಿ ಡಿಕ್ಕಿ- ಟಿಪ್ಪರ್ ಜಖಂ

ಬೋಲ್ತೆರ್: ಜೈನ್ ಪೇಟೆ ಕೈತಲ್ ಬೋಲ್ತೆರ್ ಕಡೆಕ್ ಹಿಟಾಚಿನ್‌ ಕೊನೊವೊಂದು ಪೋವೊಂದು ಇತ್ತಿನ ಟಿಪ್ಪರ್ ಬೊಕ್ಕ ಗುರುವಾಯನಕೆರೆ ಕಡೆಕ್‌ ಪೋವೊಂದು ಇತ್ತಿನ ಟಿಟಿ ಗಾಡಿ ಎದುರು ಎದುರು ಡಿಕ್ಕಿಯಾಯಿನ ಘಟನೆ ಇನಿ ಕಾಂಡೆ ನಡತ್‌ಂಡ್. ಡಿಕ್ಕಿಯಾಯಿನ ಪರಿಣಾಮ ಟಿಪ್ಪರ್‌ದ ಎದುರು ಭಾಗ ಪೂರ್ತಿ ಜಖಂ ಆತ್‌ಂಡ್.‌ ಟಿಟಿ ಗಾಡಿಡ್ ಇತ್ತ್‌ನಕ್ಲೆಗ್‌ ಎಲ್ಯ ಎಲ್ಯ ಗಾಯ ಆದ್‌ ಕೈತಲ್‌ದ ಆಸ್ಪತ್ರೆಡ್‌ ಚಿಕಿತ್ಸೆ ಪಡೆಯೊಂದು ಉಲ್ಲೆರ್ ಪಂದ್‌ ತೆರಿದ್‌ ಬೈದ್‌ಂಡ್.

ಶಿರಾಡಿ ಘಾಟ್‌ಡ್‌ ಅರಿ ಕೊನೊವೊಂದು ಇತ್ತಿನ ಲಾರಿಗ್‌ ತೂ…!

ನೆಲ್ಯಾಡಿ : ಹಾಸನ ಕಡೆರ್ದ್ ಕುಡ್ಲಗ್‌ ಬರೊಂದು ಇತ್ತಿನ ಅರಿ ಸಾಗಾಟದ ಲಾರಿಗ್ ಶಿರಾಡಿ ಘಾಟ್‌ದ ಡಬಲ್ ಟರ್ನ್ ಡ್ ತೂ ಪೊತ್ತಿನ ಘಟನೆ ಅ.20 ದಾನಿ ರಾತ್ರೆ ನಡತ್‌ಂಡ್.‌
ಅಪಾಯದ ಮುನ್ಸೂಚನೆ ತಿಕ್ಕ್‌ನಗನೆ ಲಾರಿದ ಡ್ರೈವರ್ ಬೊಕ್ಕ ಕ್ಲೀನರ್, ಲಾರಿರ್ದ್‌ ಜತ್ತ್‌ದ್‌ ಅಪಾಯರ್ದ್‌ ಪಾರಾತೆರ್. ಲಾರಿ ಬೊಕ್ಕ ಅವೆಟ್‌ ಇತ್ತಿನ ಅರಿ ಪೂರ್ತಿ ಕರ್ಂಚಿದ್ ಪೊತ್ತುಂಡ್. ಹಾಸನದ ಅಗ್ನಿಶಾಮಕ ದಳದ ಸಿಬ್ಬಂದಿ ತೂ ತೆಕ್ಕಾಯೆರೆ ಸಹಾಯ ಮಲ್ತೆರ್ ಪಂದ್‌ ವರದಿ ಆತ್‌ಂಡ್.

ಉಜಿರೆ: ಧರ್ಮ ಸಂರಕ್ಷಣಾ ಯಾತ್ರೆದ ಬಗ್ಗೆ ಸಮಾಲೋಚನೆ ಸಭೆ

ಉಜಿರೆ: ಕೊಲ್ಲೂರ್‌ರ್ದ್ ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಧರ್ಮಸಂರಕ್ಷಣಾ ಯಾತ್ರೆದ ಬಗ್ಗೆ ಉಜಿರೆದ ಕೃಷ್ಣಾನುಗ್ರಹ ಸಭಾಭವನಡ್ ಸಮಾಲೋಚನ ಸಭೆ ಅ.20 ದಾನಿ ನಡತ್‌ಂಡ್. ಕೊಲ್ಲೂರ್‌ದ ಅಪ್ಪಣ್ಣ ಹೆಗ್ಡೆ ಬೊಕ್ಕ ಉಜಿರೆ ಜನಾರ್ಧನ ಸ್ವಾಮಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರಾಯಿನ ಶರತ್ ಕೃಷ್ಣ ಮೇರ್‌ನ ಸಂಚಾಲಕತ್ವಡ್ ಈ ಧರ್ಮಸಂರಕ್ಷಣಾ ರಥ ಯಾತ್ರೆ ನಡಪೆರೆ ಉಂಡು.
ಧರ್ಮ ಸಂರಕ್ಷಣಾ ಯಾತ್ರೆದ ಯಶಸ್ಸಿಗಾದ್ ಧರ್ಮಜಾಗೃತಿ ಸಮಿತಿ ರಚಿನೆ ಮಲ್ತ್‌ದ್ ಪ್ರಧಾನ ಸಂಚಾಲಕೆರಾದ್ ಬರೋಡ ಉದ್ಯಮಿ ಶಶಿಧರ್ ಶೆಟ್ಟಿ ನವಶಕ್ತಿ ಆಯ್ಕೆಯಾಯೆರ್.‌ ಕಾರ್ಯಕ್ರಮಡ್ ವಿಧಾನಪರಿಷತ್ ಸದಸ್ಯೆರ್ ಪ್ರತಾಪಸಿಂಹ ನಾಯಕ್, ವಸಂತ ಗಿಳಿಯಾರ್, ಲಕ್ಷ್ಮಿ ಇಂಡಸ್ಟ್ರೀಸ್ ಮಾಲಕೆರ್ ಮೋಹನ್ ಕುಮಾರ್, ಉಜಿರೆ ಎಸ್ ಡಿ ಎಂ ಶಿಕ್ಷಣ ಸಂಸ್ಥೆದ ಕಾರ್ಯದರ್ಶಿ ಡಾ.ಸತೀಶ್ಚಂದ್ರ, ಮಹೇಶ್ ತುಪ್ಪೆಕಲ್ಲು, ರಾಜು ಪೂಜಾರಿ, ಹರ್ಷೇಂದ್ರ ಜೈನ್ ಬೆಂಗಳೂರು, ಪೂರನ್ ವರ್ಮ, ಸುಬ್ರಹ್ಮಣ್ಯ ಪ್ರಸಾದ್, ಅಶೋಕ್ ಭಟ್ ಉಜಿರೆ, ಡಾ.ಜಯಕುಮಾರ್ ಶೆಟ್ಟಿ, ಹಿರಿಯ ನ್ಯಾಯವಾದಿ ಬಿ.ಕೆ.ಧನಂಜಯ ರಾವ್, ಜಿಲ್ಲಾ ಜನಜಾಗೃತಿ ವೇದಿಕೆಯ ಸ್ಥಾಪಕಾಧ್ಯಕ್ಷ ಕೆ.ವಸಂತ ಸಾಲಿಯಾನ್, ಬಿ ಎ ಕುಮಾರ್ ಹೆಗ್ಡೆ,ಯೋಗೀಶ್ ಕುಮಾರ್ ಕೆ.ಎಸ್,ಡಾ.ಎಂ.ಎಂ ದಯಾಕರ್, ಗಣೇಶ್ ಬೆನಕ, ರಾಜೇಶ್ ಶೆಟ್ಟಿ ನವಶಕ್ತಿ, ಶಾರಾದ ಆರ್ ರೈ,ಎಂ.ಪಿ ಶ್ರೀನಾಥ್, ಪಿ.ಕೆ ರಾಜು ಪೂಜಾರಿ, ಬೇತೆ ಬೇತೆ ಸಂಘ ಸಂಸ್ಥೆದ ಮುಖಂಡೆರ್‌, ಪದಾಧಿಕಾರಿಲು, ಈ ಪೊರ್ತುಡ್‌ ಇತ್ತೆರ್.

ಕಸರತ್ತ್ ತುಳು ವೆಬ್ ಸೀರೀಸ್‌ದ ಸುರುತ ಪೋಸ್ಟರ್ ಬುಡುಗಡೆ

ಬೋಲ್ತೆರ್: ಸ್ವಯಂ ಪ್ರಭ ಎಂಟರ್ಟೈನ್ಮೆಂಟ್ ಆಂಡ್ ಪ್ರೊಡಕ್ಷನ್ಸ್ ಬೊಕ್ಕ ಬೋಧಿ ಪ್ರೊಡಕ್ಷನ್ ಪ್ರಸ್ತುತ ಮಲ್ಪುನ, ಟಾಕೀಸ್ ಆಪ್‌ಡ್ ಬುಡುಗಡೆ ಆವೊಂದು ಇಪ್ಪುನ ಯುವ ಪ್ರತಿಭೆ ತುಷಾರ್ ಹೆಗ್ಡೆ ವೇಣೂರು ನಿರ್ದೇಶನ ಮಲ್ತಿನ ತುಳು ವೆಬ್ ಸೀರೀಸ್ ಕಸರತ್ತ್ ನೆತ್ತ ಸುರುತ ಪೋಸ್ಟರ್ ಬುಡುಗಡೆ ಆಂಡ್.
ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್, ಜೀ ಕನ್ನಡ ಕಾಮಿಡಿ ಕಿಲಾಡಿಗಳು ಖ್ಯಾತಿದ ಹಿತೇಶ್ ಕಾಪಿನಡ್ಕ, ಸೂರಜ್ ಕುಮಾರ್, ರಾಕೇಶ್ ಪೂಜಾರಿ ಮುಖ್ಯ ಭೂಮಿಕೆದ ಈ ಸೀರೀಸ್‌ಡ್ ನವ್ಯಾ ಪೂಜಾರಿ ನಾಯಕಿಯಾದ್ ನಟನೆ ಮಲ್ತ್‌ದೆರ್. ಸುರುತ ಸರ್ತಿ ಜೀ ಕನ್ನಡ ಕಾಮಿಡಿ ಕಿಲಾಡಿ ಅನೀಶ್ ಅಮೀನ್ ವೇಣೂರು ವಿಲನ್ ಪಾತ್ರಡ್ ನಟನೆ ಮಲ್ತಿನ ಒಟ್ಟಿಗೆ ಮುಖ್ಯ ಪಾತ್ರಡ್ ಜೀ ಕನ್ನಡ ಕಾಮಿಡಿ ಕಿಲಾಡಿ ಖ್ಯಾತಿದ ಪ್ರವೀಣ್ ಜೈನ್, ಧೀರಜ್ ನೀರುಮಾರ್ಗ, ರಾಧೇಶ್ ಶೆಣೈ, ದಿವ್ಯ ಅಂಚನ್ ವೇಣೂರು ನಟನೆ ಮಲ್ತ್‌ದೆರ್. ಒಟ್ಟಿಗೆ ಚಂದ್ರಶೇಖರ್ ಹೊಕ್ಕಾಡಿಗೋಳಿ, ಮನೀಶ್ ಶೆಟ್ಟಿ, ಸುಕೇಶ್ ವೇಣೂರು, ದೀಕ್ಷಿತ್ ಅಂಡಿಂಜೆ, ನಿಶಿತ್ ಶೆಟ್ಟಿ ಇಂಚಿನ ಕಾಮಿಡಿ ದಿಗ್ಗಜೆರ್ ಈ ಚಿತ್ರಡ್ ನಟನಡ ಮಲ್ತ್‌ದೆರ್.‌ ಕೆ ರತ್ನಾಕರ್ ಕಾಮತ್ ನಿರ್ಮಾಣ ಮಲ್ತ್‌ದ್‌, ಗಣೇಶ್ ಎಂ ಉಜಿರೆ, ರಿತೇಶ್ ಗೌಡ ವೇಣೂರು, ನೆಲ್ವಿಸ್ಟರ್ ಗ್ಲಾನ್ ಪಿಂಟೋ ಸಹಕಾರದ ಈ ಚಿತ್ರಗ್ ಮಾನಸ ಹೊಳ್ಳ ಅರೆನ ಸಂಗೀತ, ಸಂತೋಷ್ ಗುಂಪಲಾಜೆ ಅರೆನ ಛಾಯಾಗ್ರಾಹಣ, ಗಣೇಶ್ ನಿರ್ಚಲ್ ಅರೆನ ಸಂಕಲನ, ಸುಕೇಶ್ ಶೆಟ್ಟಿ ಅರೆನ ಸಾಹಿತ್ಯ, ಕಾಮಿಡಿ ಕಿಲಾಡಿ ಸೂರಜ್ ಕುಮಾರ್ ನೃತ್ಯ ನಿರ್ದೇಶನ, ಅವಿನಾಶ್ ನಾತು ಬೊಕ್ಕ ಪ್ರಣೀತ್ ಜೈನ್ ಕಲೆ ಈ ಚಿತ್ರಗ್‌ ತಿಕ್ಕ್‌ದ್‌ಂಡ್.

ಸ್ಮಿತೇಶ್ ಎಸ್ ಬಾರ್ಯ ಬೊಕ್ಕ ಅನೀಶ್ ಅಮೀನ್ ವೇಣೂರು ತಾಂತ್ರಿಕ ಮೇಲ್ವಿಚಾರಣೆದ ಚಿತ್ರಗ್ ದೀಕ್ಷಿತ್ ಕೆ ಅಂಡಿಂಜೆ ನಿರ್ಮಾಣ ನಿರ್ವಹಣೆ ಮಲ್ತ್‌ದೆರ್. ವಿನಯ್ ಕುಮಾರ್ ಉಜಿರೆ, ನೀರಜ್ ಕುಂಜಾರ್ಪ, ದೀಕ್ಷಿತ್ ಭಂಡಾರಿ, ನಿಶಿತ್ ಶೆಟ್ಟಿ ನಿರ್ದೇಶನ ತಂಡಡ್ ಸಹಕಾರ ಕೊರ್ತೆರ್. ಈ ಸೀರೀಸ್ ಆಯಿನಾತ್‌ ಬೇಗಡ್ ಟಾಕೀಸ್ ಆಪ್‌ಡ್ ಬುಡುಗಡೆ ಆವೆರೆ ಉಂಡು.