ಉಜಿರೆ: ಶ್ರದ್ಧಾ-ಭಕ್ತಿಡ್ ಬರ್ಪಿನ ಮಾತ ಭಕ್ತರೆಗ್ ಶಾಂತಿ, ನೆಮ್ಮದಿ, ತಾಳ್ಮೆ ಇಪ್ಪುಂಡು ಪಂದ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್. ಅ.29 ದಾನಿ ಧರ್ಮಸ್ಥಳಗ್ ಧರ್ಮಸಂರಕ್ಷಣ ರಥ ಭವ್ಯ ಮೆರವಣಿಗೆಡ್ ಬನ್ನಗ ಬೊಕ್ಕ ಉಜಿರೆರ್ದ್ ಭಕ್ತೆರ್, ಅಭಿಮಾನಿಲು ಪಾದಯಾತ್ರೆಡ್ ಬತ್ತಿನ ಸಂದರ್ಭ ದೇವಸ್ಥಾನದ ಎದುರು ನಡತ್ತಿನ ಸಮಾರಂಭಡ್ ಪಾತೆರಿಯೆರ್.
ಶ್ರೀ ಮಂಜುನಾಥ ಸ್ವಾಮಿ ವಿಷನ್ ಕಂಟೆಲ್ಡ್ ದೀಯೊಂದು ಲೋಕಕಲ್ಯಾಣ ಮಲ್ಪುನ ದೇವೆರ್, ದುಷ್ಟಶಕ್ತಿಲೆನ್ ನಾಶಮಲ್ತ್ದ್ ದೇವತೆಲು, ಶಿಷ್ಟೆರ್ನ ರಕ್ಷಣೆ ಮಲ್ಪುವೆರ್. ಧರ್ಮಸ್ಥಳದ ಅಭಿಮಾನಿ ಭಕ್ತೆರೆನ ಸ್ವಯಂ ಪ್ರೇರಣೆರ್ದ್ ಕ್ಷೇತ್ರದ ರಕ್ಷಣೆಗಾದ್ ಒವ್ವೇ ಪ್ರತಿಫಲಾಪೇಕ್ಷೆ ಬಯಕಂದೆ ಮಲ್ತಿನ ಸೇವೆ ಬಗೆಟ್ಟ್ ಮೆಚ್ಚಿಯೆರ್. ಒಂಜಿ ದೇಶ ಹಾಳ್ ಮಲ್ತ್ಂಡ, ಅಲ್ಪದ ಧರ್ಮ, ಸಂಸ್ಕೃತಿಗ್ ಹಾನಿ ಮಲ್ತಿನಂಚ. ಅಂಚೆನೆ ಧರ್ಮಸ್ಥಳದ ಬಗೆಟ್ಟ್ ಸುಳ್ಳು ವದಂತಿದೊಟ್ಟಿಗೆ ಅಪ್ರಚಾರ ಮಲ್ತ್ದೆರ್. ಕಾನೂನುದ ಚೌಕಟ್ಟ್ದ ಉಲಾಯಿ ಒವ್ವೇ ತನಿಖೆಗ್ ಯಾನ್ ಸಿದ್ಧ ಪಂದ್ ಪಂಡೆರ್. ಆಂಡ ಎನ್ನ ಮನಸ್, ಪಾತೆರ, ಕಾಯ ದೇಹ ಪವಿತ್ರ ಆದ್ ಉಂಡು. ನಮಡ ಒವ್ವೇ ಸಂಶಯ, ಗೊಂದಲ ಇಜ್ಜಿ.
ಶ್ರೀ ಮಂಜುನಾಥ ಸ್ವಾಮಿ, ಅಣ್ಣಪ್ಪ ಸ್ವಾಮಿ ಬೊಕ್ಕ ಧರ್ಮದೇವತೆ ಸನ್ನಿಧಿಡ್ ಪ್ರತಿ ತಿಂಗೊಲು ಸಂಕ್ರಾಂತಿ ದಾನಿ ಯಾನ್ ವರದಿ ಒಪ್ಪಿಸಾವೊಡು, ಅಕ್ಲೆನ ಅಭಯ, ಅನುಗ್ರಹ ಯಾನ್ ಮಲ್ಪುನ ಮಾತ ಸೇವಾಕಾರ್ಯಲೆಗ್ ಉಂಡು ಪಂದ್ ಪಂಡೆರ್. ಪ್ರಬಲ ಇಚ್ಛಾಶಕ್ತಿ, ನೈತಿಕ ಬಲ, ದೃಢ ಸಂಕಲ್ಪ ಬೊಕ್ಕ ಭಕ್ತೆರ್, ಅಭಿಮಾನಿಲೆನ ಬೆಂಬಲರ್ದ್ ನಮ್ಮ ಸೇವಾಕಾರ್ಯಲು ನನಾತ್ ಜಾಸ್ತಿ ಆವೆರೆ ಉಂಡು. ಭಕ್ತೆರ್ನ ಬೊಕ್ಕ ಅಭಿಮಾನಿಲೆನ ಪ್ರೀತಿ- ವಿಶ್ವಾಸ, ಗೌರವ ಎಂಕ್ ವಜ್ರಕವಚವಾದ್ ರಕ್ಷಣೆ ಕೊರ್ಪುಂಡು ಪಂದ್ ಹೆಗ್ಗಡೆರ್ ವಿಶ್ವಾಸ ವ್ಯಕ್ತಪಡಿಸಾಯೆರ್. ಸಭೆತ ಸುರುಕು ಹೆಗ್ಗಡೆರ್ ವೇದಿಕೆದ ಧರ್ಮಪೀಠಡ್ ಆಸೀನರಾದಿತ್ತಿನ ಮಾತ ಸ್ವಾಮೀಜಿಲೆಗ್ ಹಣ್ಣು-ಹಂಪಲು, ತಾಂಬೂಲ, ಕಾಯಿ, ಬಚ್ಚಿರೆ ಇಪ್ಪುನ ಹರಿವಾಣಗ್ ಅಭಿಮಂತ್ರದ ಮಂತ್ರಾಕ್ಷತೆ ಪಾಡ್ದ್ ಶುಭ ಎಡ್ಡೆ ಪ್ಪು ನಟೊಂಡೆರ್. ಬೊಕ್ಕ ಸಂಕಲ್ಪ ಪೀಠಡ್ ಇತ್ತಿನ ಹರಿವಾಣನ್ ಹೆಗ್ಗಡೆರೆಗ್ ಹಸ್ತಾಂತರ ಮಲ್ತೆರ್. ಸೇರಿನ ಸಭಾಸದಸ್ಯೆರ್ ನಮ ಸದಾ ಧರ್ಮದ ರಕ್ಷಣೆಗಾದ್ ಧರ್ಮಸ್ಥಳದ ರಕ್ಷಣೆಗ್ ನಿಕ್ಲೆನ ಒಟ್ಟಿಗೆ ಉಲ್ಲ ಪಂದ್ ದೃಢಸಂಕಲ್ಪ ಮಲ್ತೆರ್.
ಸಂಸದ ನಳಿನ್ ಕುಮಾರ್ ಕಟೀಲ್, ಶಾಸಕ ಹರೀಶ್ ಪೂಂಜ, ಸುಬ್ರಹ್ಮಣ್ಯ ಮಠದ ವಿದ್ಯಾಪ್ರಸನ್ನ ಸ್ವಾಮೀಜಿ, ಉಡುಪಿ ಕಾಣಿಯೂರು ಮಠದ ವಿದ್ಯಾವಲ್ಲಭತೀರ್ಥ ಸ್ವಾಮೀಜಿ, ಉಡುಪಿ ಕಾಣಿಯೂರು ಮಠದ ವಿದ್ಯಾವಲ್ಲಭತೀರ್ಥ ಸ್ವಾಮೀಜಿ, ಗುರುಪುರ ವಜ್ರದೇಹಿ ಮಠದ ರಾಜಶೇಖರಾನಂದ ಸ್ವಾಮೀಜಿ, ಕಾರಿಂಜೆದ ಮುಕ್ತಾನಂದ ಸ್ವಾಮೀಜಿ, ಫಲಿಮಾರು ಮಠದ ವಿದ್ಯಾಧೀಶ ಸ್ವಾಮೀಜಿ, ಶರತ್ ಕೃಷ್ಣ ಪಡ್ವಟ್ನಾಯ, ಶಾಸಕ ಹರೀಶ್ ಪೂಂಜ, ಧರ್ಮ ಸಂರಕ್ಷಣಾ ವೇದಿಕೆದ ಸಂಚಾಲಕೆರ್ ಶಶಿಧರ ಶೆಟ್ಟಿ, ಬಸ್ರೂರು ಅಪ್ಪಣ್ಣ ಹೆಗ್ಡೆ ಈ ಪೊರ್ತುಡು ಇತ್ತೆರ್. ಅಂಚನೆ ಸುಮಾರ್ ಐವ ಸಾವಿರ ಭಕ್ತೆರ್ ಪಾಲ್ ಪಡೆದಿತ್ತೆರ್.
