Fri. Nov 20th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಕಡಬ: ಡ್ರೈವರ್ ನ ಅಕಲ್ ತತ್ತ್ ದ್ ಕರೆಂಟ್ ಕಂಬೊಗು ಗುದ್ದಿನ ಕಾರ್

ಕಡಬ: ಕಾರೊಂಜಿ ಡ್ರೈವರ್ ನ ಅಕಲ್ ತತ್ತ್ ದ್ ಕರೆಂಟ್ ಕಂಬೊಗು ಗುದ್ದ್ ದ್, ಐನ್ ಜನಕ್ ಮಸ್ತ್ ಪೆಟ್ಟಾಯಿನ ಘಟನೆ ದಕ್ಷಿಣ ಕನ್ನಡ ಜಿಲ್ಲೆದ ಕಡಬ ತಾಲೂಕ್ ದ ಧರ್ಮಸ್ಥಳ– ಸುಬ್ರಹ್ಮಣ್ಯ ರಾಜ್ಯ ಮಾರ್ಗದ ಮರ್ಧಾಳಡ್ ಇಪ್ಪುನ ಕಲ್ಲಾಜೆಡ್ ನಡತ್ಂಡ್.

ಈ ಘಟನೆಡ್ ಪೆಟ್ಟಾಯಿನಕ್ಲೆಗ್ ಕಡಬ ಸಮುದಾಯ ಆರೋಗ್ಯ ಕೇಂದ್ರಡ್ ಪ್ರಾಥಮಿಕ ಚಿಕಿತ್ಸೆ ಕೊರ್ದು, ಹೆಚ್ಚದ ಚಿಕಿತ್ಸೆಗಾದ್ ಪುತ್ತೂರ್ ದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ಪೆರೆ ಆತ್ಂಡ್ ಪಂದ್ ಮಾಹಿತಿ ತೆರಿದ್ ಬೈದ್ಂಡ್.

ರಾಷ್ಟ್ರಮಟ್ಟ್ ದ ಕರಾಟೆಡ್ ರಡ್ಡ್ ವಿಭಾಗೊಡ್ಲ ಬಂಗಾರ್ ದ ಪದಕ ಗೆಂದಿನ ರಿಯಾ.ಜಿ ಶೆಟ್ಟಿ

ಹಾವಂಜೆ ಗ್ರಾಮದ ಛಾಯಾಗ್ರಾಹಕೆರ್ ಕೀಳಂಜೆ ಗಣೇಶ್ ಶೆಟ್ಟಿ ಬೊಕ್ಕ ಜಯಲಕ್ಷ್ಮೀ ಶೆಟ್ಟಿ ದಂಪತಿಲೆನ ಮಗಲ್ ರಿಯಾ ಜಿ ಶೆಟ್ಟಿ ಮೇರ್ ರಾಷ್ಟ್ರಮಟ್ಟದ ಕರಾಟೆದ ರಡ್ಡ್ ವಿಭಾಗೊಡ್ಲ ಬಂಗಾರ್ ದ ಪದಕ ಗೆಂದ್ ದೆರ್.

ಮೇರ್ ನ.5 ಬೊಕ್ಕ 6 ಕ್ಕ್ ಇನ್ಸ್ ಟಿಟ್ಯೂಟ್ ಅಫ್ ಕರಾಟೆ ಎಂಡ್ ಆಟ್ಸ್೯ ಕೊಡವೂರು ನೆತ್ತ ಮುತಾಲಿಕೆಡ್ ಒಡಿಪುದ ಅಮ್ರತ್ ಗಾರ್ಡನ್ ದ ಸಭಾಂಗಣಡ್ ನಡತಿನ ರಾಷ್ಟ್ರ ಮಟ್ಟದ 40 ನೇ ಸ್ಪರ್ಧಾ ಕೂಟಡ್ ಪದಕ ಗೆಂದ್ ದೆರ್. ಕರ್ನಾಟಕ ರಾಜ್ಯನ್ ಪ್ರತಿನಿಧಿಸಾಯಿನ ರಿಯಾ ಜಿ. ಶೆಟ್ಟಿ ಕಟಾ ಬೊಕ್ಕ ಕುಮಿಟೆ ರಡ್ಡ್ ವಿಭಾಗಡ್ ಲ ಬಂಗಾರ್ದ ಪದಕ ಗೆಂದಿನ ಸಾಧಕಿ ಆತೆರ್. ಮೇರ್ ಒಡಿಪು ಒಳಕಾಡು ಶಾಲೆದ 8 ನೇ ಕ್ಲಾಸ್ ದ ವಿದ್ಯಾರ್ಥಿನಿ. ಅಂತರಾಷ್ಟ್ರೀಯ ಮಟ್ಟದ ಕರಾಟೆ ಪಟು ಶಿಕ್ಷಕಿ ಪ್ರವೀಣ ಪರ್ಕಳ ಮೆರೆನ ಶಿಷ್ಯೆ. ಪರ್ಕಳ ಪಿ.ಕೆ.ಸಿ ಕೂಟದ ಪೆರ್ಮೆದ ಸದಸ್ಯೆ ಆದುಲ್ಲೆರ್.  ಕರಾಟೆಡ್ ಮಲ್ಲ ಸಾಧನೆ ಮಲ್ತಿನ ಈ ಎಲ್ಯ ಪ್ರತಿಭೆ ಭವಿಷ್ಯಡ್ ಕರಾಟೆ ಚಾಂಪಿಯನ್ ಆಪುನ ಭರವಸೆ ತೊಜಪಾದೆರ್.

ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಚಂಪಾ ಷಷ್ಠಿ ಮಹೋಚ್ಚಯ

ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ನವೆಂಬರ್ 21 ತಾರೀಕ್‌ರ್ದ್ ಡಿಸೆಂಬರ್ 5 ತಾರೀಕ್ ಮುಟ್ಟ ಚಂಪಾ ಷಷ್ಠಿ ಮಹೋಚ್ಚಯ ನಡಪರೆ ಉಂಡು. 21 ತಾರೀಕ್‌ಗ್ ಕೊಪ್ಪರಿಗೆ ಏರುನ ಮುಕೇನ ಕುಕ್ಕೆ ಸುಬ್ರಮಣ್ಯ ದೇವೆರೆನ ಜಾತ್ರೆ ನಡಪರೆ ಉಂಡು.

ರಾಮ ಲಕ್ಷ್ಮಣ ಪನ್ಪಿನ ರಡ್ಡ್ ಕೊಪ್ಪರಿಗೆಡ್ ದಿನಲ ನೈವೇದ್ಯ ಮಲ್ತ್‌ದ್ ದೇವೆರೆಗ್ ಬಲಸ್ ದ್ ಬೊಕ್ಕ ಭಕ್ತೆರೆಗ್ ನುಪ್ಪುಡು ಪಾಡ್ದ್ ಕೊರ್ಪೆರ್.

ನವೆಂಬರ್ 21 ತಾರೀಕ್‌ಗ್ ಕೊಪ್ಪರಿಗೆ ಏರ್ದ್ ರಾತ್ರೆ ಶೇಷವಾಹನಯುಕ್ತ ಬಂಡಿ ಉಚ್ಚಯ, 22, 24 ತಾರೀಕ್‌ಗ್ ಶೇಷವಾಹನಯುಕ್ತ ಬಂಡಿ ಉಚ್ಚಯ, 23 ಕ್ಕ್ ಲಕ್ಷ ದೀಪೋಚ್ಚಯ, 25 ಕ್ಕ್ ಅಶ್ವವಾಹನೋಚ್ಚಯ, 26 ಕ್ಕ್ ಮಯೂರ ವಾಹನೋಚ್ಚಯ, 27 ಕ್ಕ್ ಪೂತ್ತ ತೇರ್‌ದ ಉಚ್ಚಯ, 28 ಗ್ ರಾತ್ರೆ ಪಂಚಮಿ ರಥ ಉಚ್ಚಯ, 29 ಗ್ ಪುಲ್ಯ ಕಾಂಡೆ ಚಂಪಾಷಷ್ಠಿದ ಮಹಾರಥೋಚ್ಚಯ, 30 ಗ್ ನೌಕಾವಿಹಾರ, ಡಿಸೆಂಬರ್ 5 ಕ್ಕ್ ಕೊಪ್ಪರಿಗೆ ಜಪ್ಪುನ ಮುಕೇನ ರಾತ್ರೆ ನೀರ್‌ಡ್ ಬಂಡಿ ಉಚ್ಚಯ ನಡತ್‌ದ್ ಆಯಿಬೊಕ್ಕ ಶ್ರೀ ದೈವಲೆನ ನಡಾವಳಿ ನಡಪರೆ ಉಂಡು.
(ವರದಿ : ಗೋಪಿಚಂದನ್ ಕೆ.ಎಸ್.)

ಇಂಡಿಯಾ ಟೀಮ್ ದ ಕ್ಯಾಪ್ಟನ್ ರೋಹಿತ್ ಶರ್ಮಾನ ಕೈಕ್ಕ್ ಪೆಟ್ಟ್

ಅಡಿಲೈಡ್: ಭಾರತ ಕ್ರಿಕೆಟ್ ಟೀಮ್ ದ ಕ್ಯಾಪ್ಟನ್ ರೋಹಿತ್ ಶರ್ಮಾಗ್ ಪ್ರಾಕ್ಟೀಸ್ ದ ಪೊರ್ತುಡು ಕೈಕ್ಕ್ ಪೆಟ್ಟಾತ್ಂಡ್.


ಗುರುವಾರ ಭಾರತ- ಇಂಗ್ಲೆಂಡ್ ದ ನಡುಟ್ಟು ಸೆಮಿಫೈನಲ್ ಗೊಬ್ಬು ನಡಪರೆ ಉಂಡು. ನೆತ ಅಟ್ಟಣೆಗಾದ್ ಪ್ರಾಕ್ಟೀಸ್ ಮಲ್ತೊಂದು ಇಪ್ಪುನ ಪೊರ್ತುಡು ಚೆಂಡ್ ರೋಹಿತ್ ಶರ್ಮಾ ಮೆರೆನ ಬಲತ ಕೈಕ್ ಬೂರ್ದುಂಡು. ಆಂಡ ಮಲ್ಲ ಪೆಟ್ಟಾತಿಜಿ. ಒಂತೆ ಬೇನೆ ಉಂಡು ಪಂದ್ ಡಾಕ್ಟರ್ ತೆರಿಪಾದೆರ್.

ಎರ್ಮಾಳ್ ಜನಾರ್ಧನ ದೇವಲ್ಯಗ್ ಭೇಟಿ ಕೊರಿಯೆರ್ ಪುಗರ್ತೆದ ನಟಿ ಜಯಪ್ರದ

ಎರ್ಮಾಳ್: ಉತ್ತರ ಪ್ರದೇಶದ ರಾಂಪುರ ಕ್ಷೇತ್ರದ ಮಾಜಿ ಲೋಕಸಭಾ ಬೊಕ್ಕ ರಾಜ್ಯಸಭಾ ಸದಸ್ಯೆ ಅಂಚೆನೆ ಪುಗರ್ತೆದ ಪಿಚ್ಚರ್‌ದ ನಟಿ ಜಯಪ್ರದ ಎರ್ಮಾಳ್ ಶ್ರೀ ಜನಾರ್ಧನ ದೇವಲ್ಯಗ್ ಭೇಟಿ ಕೊರಿಯೆರ್.

ಈ ಪೊರ್ತುಡು ದೇವಲ್ಯದ ಆಡಳಿತ ಮೊಕ್ತೇಸರೆರ್ ಆಶೋಕ್ ರಾಜ್ ಎರ್ಮಾಳ್ ಬೂಡು, ಹರೀಶ್ ಶೆಟ್ಟಿ ಎರ್ಮಾಳ್, ಸಂತೋಷ್ ಶೆಟ್ಟಿ ಬರ್ಪಾಣಿ, ಕಿಶೋರ್ ಶೆಟ್ಟಿ ಎರ್ಮಾಳ್ ಇತ್ತೆರ್.

ಉಳ್ಳಾಲದ ತಲಪಾಡಿ ಚೆಕ್ ಪೋಸ್ಟ್‌ ಆಫೀಸ್ ಗ್ ಲೋಕಾಯುಕ್ತ ರೈಡ್

ಕುಡ್ಲ: ರಾಷ್ಟ್ರೀಯ ಹೆದ್ದಾರಿ 66ತ್ತ ಕರ್ನಾಟಕ-ಕೇರಳ ಗಡಿ ಭಾಗದ ಉಳ್ಳಾಲದ ತಲಪಾಡಿ ಕೈತಲ್ ಇಪ್ಪುನ ಆರ್‌ಟಿಒ ಕಚೇರಿಗ್ ಕೋಡೆ ಕರ್ನಾಟಕ ಲೋಕಾಯುಕ್ತ ಎಸ್ ಪಿ ಲಕ್ಷ್ಮೀ ಗಣೇಶ್ ಮುತಾಲಿಕೆದ ಕೂಟ ದಾಳಿ ಮಲ್ತ್‌ದ್ ಮೂಜಿ ಗಂಟೆರ್ದ್ ದಾಖಲೆನ್ ಪರಿಶೀಲನೆ ಮಲ್ತ್‌ದ್ಂಡ್.

ಕೇರಳ- ಕುಡ್ಲ ನಡುಟ್ಟು ಸವಾರಿ ಮಲ್ಪುನ ಲಾರಿನ್ ಚೆಕ್ ಮಲ್ಪುನ ನೆಪಟ್ಟ್ ಉಂತಾದ್ ಲಂಚಗಾದ್ ಒತ್ತಾಯ ಮಲ್ತೊಂದುಲ್ಲೆರ್ ಪನ್ಪಿನ ಆರೋಪದ ಬಗೆಟ್ ತಲಪಾಡಿ ಆರ್‌ಟಿಒ ಕಚೇರಿಗ್ ಲೋಕಾಯುಕ್ತ ಅಧಿಕಾರಿಲು ದಾಳಿ ಮಲ್ತ್‌ದೆರ್.

ಬಿಗ್ ಬಾಸ್‌ದ ಸ್ಪರ್ಧಿ ರೂಪೇಶ್ ಶೆಟ್ಟಿಗ್ ಬೊಡ್ಚಾಂದಿನ ಶಬ್ದೊಡು ನೆರಿನ ಬಗೆಟ್ಟ್ ದೂರು ದಾಖಲ್

ಕುಡ್ಲ: ನಟೆ ರೂಪೇಶ್ ಶೆಟ್ಟಿ ಬಿಗ್‌ಬಾಸ್‌ಡ್ ರಿಯಾಲಿಟಿ ಶೋಟ್ಟು ಪಾತೆರಿನ ಪಾತೆರದ ಆಧಾರಡ್ ಸಾಮಾಜಿಕ ಜಾಲತಾಣಡ್ ಅರೆಗ್ ಬೊಡ್ಚಾಂದಿನ ಶಬ್ದರ್ದ್ ನೆರ್ದ್ ಪೋಡಿಪಾಯಿನ ಬಗೆಟ್ಟ್ ಅರೆನ ಕುಟುಮದ ಸದಸ್ಯೆರ್ ಕುಡ್ಲ ಪೊಲೀಸ್ ಆಯುಕ್ತೆರೆಗ್ ದೂರು ಕೊರ್ತೆರ್.

ಈ ಬಗೆಟ್ ಕೋರ್ಟುದ ಅನುಮತಿ ದೆತೊಂದು ಸೈಬರ್ ಕ್ರೈಮ್ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲ್ ಮಲ್ತ್‌ದ ಪಂದ್ ಪೊಲೀಸ್ ಆಯುಕ್ತೆರ್ ಎನ್ ಶಶಿಕುಮಾರ್ ತೆರಿಪಾದೆರ್.

ಬೆದ್ರ ಪಾರ್ಕ್ ಡಿತ್ತಿನ ಪಿಲಿ ಕುಂಡೇಲ್ ದ ಗೂಡು ದೆಪ್ಪಾಯಿನ ಪುರಸಭೆ, ಟೈಮ್ಸ್ ಆಫ್ ಕುಡ್ಲ ವರದಿದ ಫಲಶ್ರುತಿ

ಬೆದ್ರ: ಬೆದ್ರ ಪೊಲೀಸ್ ಠಾಣೆದ ಕೈತಲ್ ಇಪ್ಪುನ ಜ್ಯೋತಿನಗರ ಮಹಾತ್ಮಾ ಗಾಂಧಿ ಪಾರ್ಕ್‌ಡ್ ಇತ್ತಿನ ಪಿಲಿ ಕುಂಡೇಲ್ದ ಮಲ್ಲ ಗೂಡುನು ಪುರಸಭೆತ್ತ ಕುಲು ದೆಪ್ಪಾದ್ ಜನಕ್ಲೆಗ್ ಆವರೆ ಇತ್ತಿನ ಮಾಮಲ್ಲ ಅಪಾಯೊನು ತಪ್ಪಾದೆರ್.

ಪಾರ್ಕ್ ದ ಮರಟ್ಟ್ ನೇಲೊಂದುತ್ತಿನ ಪಿಲಿ ಕುಂಡೆಲ್ದ ಗೂಡು ಜನಕ್ಲೆಗ್ ಮಸ್ತ್ ಡೇಂಜರ್ ಆದುಂಡು, ಅವೆನ್ ದೆಪ್ಪಾಲೆ ಪಂದ್ ಟೈಮ್ಸ್ ಆಫ್ ಕುಡ್ಲ ವರದಿ ಮಲ್ದಿತ್ತ್ಂಡ್. ಈ ವರದಿಗ್ ಕೂಡ್ಲೆ ಬಿಲೆ ಕೊರಿನ ಬೆದ್ರ ಪುರಸಭಾ ಅಧಿಕಾರಿಲು ಸಿಬ್ಬಂದಿಲೆನ ಮುಕೇನ ಗೂಡುನು ದೆಪ್ಪಾದೆರ್.

ಇದ ಮುಟ್ಟ ಈ ಸಂಗತಿ ಪಾರ್ಕ್‌ಗ್ ಸಂಬಂಧ ಪಟ್ಟಿನ ಒವ್ವೇ ಅಧಿಕಾರಿಗ್ಲಾ ತೆರಿದಿಜ್ಜಾಂಡ್. ಮುಲ್ಪ ಬೊಲ್ಪುಗು ಬಯ್ಯಗ್ ಸುಮಾರ್ ಜನ ವಾಕಿಂಗ್ ಬೊಕ್ಕ ತಿರ್ಗರೆ ಬರ್ಪೆರ್. ಶಾಲೆ ಕಾಲೇಜ್ ಜೋಕುಲುಲ ಬರೊಂದಿತ್ತೆರ್. ಅಂಚಾದ್ ಈ ಪಾರ್ಕ್ ಭಾರೀ ಡೇಂಜರ್ ಜಾಗೆ ಆದಿತ್ತ್ಂಡ್. ಆಂಡ ಇತ್ತೆ ಈ ವಿಷಯನ್ ತೆರಿನ ಪುರಸಭೆತ್ತ ಅಧಿಕಾರಿಲು ಸಿಬ್ಬಂದಿಲೆನ್ ಕಡಪಾದ್ ಪಿಲಿ ಕುಂಡೇಲ್ದ ಗೂಡುನ್ ದೆತ್ತ್‌ದೆರ್. ಪುರಸಭೆತ್ತಕ್ಲೆನ ಈ ಬೇಲೆನ್ ಜನಕುಲು ಮೆಚ್ಚಿದ್ ಸೊಲ್ಮೆ ಸಂದಾದೆರ್.
(ವರದಿ : ಜಗದೀಶ್ )

ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ದ ನಿರ್ದೇಶಕೆರ್, ಮಾಜಿ ಕಾರ್ಯಾಧ್ಯಕ್ಷೆರ್ ವಾಸುದೇವ ಆರ್. ಕೋಟ್ಯಾನ್ ನನ ನೆಂಪು ಮಾತ್ರ

ನಿಷ್ಠಾವಂತ ಸಮಾಜ ಸೇವಕೆರ್, ಧೀಮಂತ ವ್ಯಕ್ತಿತ್ವದ ವಾಸುದೇವ ಆರ್ ಕೋಟ್ಯಾನ್ ಮೇರ್ ದೇವೆರೆ ಪಾದ ಸೇರಿಯೆರ್. ಆರ್ ನನ ನಂಕ್ ನೆಂಪು ಮಾತ್ರ.

ಮೇರ್ ಬಿಲ್ಲವ ಅಸೋಸಿಯೇಷನ್‌ದ ಕೋಶಾಧಿಕಾರಿಯಾದ್, ಉಪಾಧ್ಯಕ್ಷೆರಾದ್, ಸುಮಾರ್ ವರ್ಷ ಸೇವೆ ಸಂದಾದೆರ್. 5 ವರ್ಷ ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರಾದ್, 10 ವರ್ಷ ಉಪ ಕಾರ್ಯಾಧ್ಯಕ್ಷೆರಾದ್, ಜೀವ ಇಪ್ಪುನ ಮುಟ್ಟ ನಿರ್ದೇಶಕೆರಾದ್ ಸೇವೆ ಸಂದಾದ್, ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ಮಲ್ಲ ಮಟ್ಟ್ ಡ್ ಬುಳೆಯರೆ ಕಾರಣ ಆತೆರ್. ಮೇರ್ ಏತೋ ಜನಕ್ಕ್ ಜೀವದಾನ ಮಲ್ತಿನ ಪುಣ್ಯಾತ್ಮೆರ್.
ಬೊಂಬೈ ದ ಪುಗರ್ತೆದ ಡಾಕ್ಟರ್ ನಕುಲೆನ ಗುರ್ತ ದೀವೊಂದಿನ ಮೆರೆನ ಅಡೆಗ್ ಹುಷಾರ್ ಇಜ್ಜಿಂದ್ ಯೇರೇ ಬತ್ತ್ಂಡಲ ಅಕಲೆನ್ ಒರಿಪಾಯೆರೆ ಏತೇ ಕರ್ಚಿ ಆಂಡಲ ಪಿರ ಜಾರೊಂದು ಇಜ್ಜಂಡ್. ಇನಿ ಅವೇತೋ ಜನ ಮೆರೆರ್ದ್ ಆರೋಗ್ಯವಂತೆರಾದ್, ವಿದ್ಯಾವಂತೆರಾದ್ ಉಲ್ಲೆರ್. ಮೆರೆನ ಪರಿಶ್ರಮರ್ದ್ ಇನಿ ಪೆಜಮಾಡಿ ಊರುಡು ಆರ್ ಚಿರಪರಿಚಿತೆರ್. ಮುಖ್ಯವಾದ್ ಮೇರ್ ಪೆಜಮಾಡಿ ಬಿಲ್ಲವ ಸಂಘ, ಪೆಜಮಾಡಿ ಬ್ರಹ್ಮ ಬೈದೆರ್ಲೆ ಗರಡಿ, ಪೆಜಮಾಡಿ ಮಹಾಲಿಂಗೇಶ್ವರ ದೇವಲ್ಯ, ಮಾರುತಿ ಮಂದಿರ ಪೆಜಮಾಡಿ ಅಂಚನೆ ತುಳುನಾಡ್ ದ ಸುಮಾರ್ ದೈವ ದೇವಸ್ಥಾನಲೆನ ಜೀರ್ಣೋದ್ದಾರದ ರೂವಾರಿ. ಇಂಚಿನ ವ್ಯಕ್ತಿನ್ ಕಲೆವೊಂದು ಮಾತೆರ್ಲಾ ದುಃಖೊಡು ಉಲ್ಲೆರ್. ಮೆರೆನ ಆತ್ಮೊಗು ದೇವೆರ್ ಚಿರಶಾಂತಿ, ನೆಮ್ಮದಿನ್ ಕೊರಡ್ ಪಂದ್ ದೇವೆರೆಡ ಸುಗಿತೊನುವ
(ವರದಿ : ವೈ.ಟಿ.ಶೆಟ್ಟಿ)

Vasudev R Kotian director and former Chairman of Bharat Cooperative bank is no more

A well known social worker, a person with humility and empathy; is no more.
He served as treasurer and vice President of Billava Association Mumbai, for many terms.
He was the chairman of Bharat Cooperative bank for five years, and vice President for a period of ten years.As a director he was responsible for taking Bharat Cooperative bank to greater heights.

He was always ready to help people in distress and had provided contacts to well known doctors for people with serious ailments.He had even given financial aid for medical expenses.

His contribution to his hometown Pejmady has made him a household name here.
He was responsible for the development of Billava Sangha, renovation of many temples and Daivastana around here.

A heartfelt condolences to the family and well wishers and a prayer may his soul rest in peace.

ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಪಿಲಿಕೋಲ ದೈವನರ್ತಕೆರ್ ಗುಡ್ಡ ಪಾಣಾರರೆಗ್ ತಮ್ಮನ, “ಮೂಳೂರ್ದ ಮುತ್ತು” ಬಿರ್ದ್ ಬಲ್ಮನ

ಮೂಳೂರು: ಪ್ರಶಸ್ತಿದ ಬೆರಿಯೆ ಪೋಪಿನ ಒಂಜಿ ಕಾಲ ಇತ್ತ್ಂಡ್. ಆಂಡ ಇನಿ ಪ್ರಶಸ್ತಿ ಯೋಗ್ಯ ವ್ಯಕ್ತಿನ್ ನಾಡೊಂದು ಬತ್ತಿನ ಪೊರ್ತು ಬೈದ್ಂಡ್. ಯೋಗ್ಯವಾಯಿನಾರೇ ಈ ಪ್ರಶಸ್ತಿಗ್ ಆಯ್ಕೆ ಆತೆರ್ ಪಂದ್ ಜಾನಪದ ವಿದ್ವಾಂಸೆರ್ ಡಾ.ವೈ.ಎನ್.ಶೆಟ್ಟಿ ಪಂಡೆರ್.

ಮೇರ್ 2022 ನೇ ವರ್ಷದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಪಿಲಿ ಕೋಲ ದೈವನರ್ತಕೆರ್ ಗುಡ್ಡ ಪಾಣಾರ ಮೂಳೂರು ಮೆರೆನ ಪುಟ್ಟಿನ ಊರುದ ತಮ್ಮನ ಲೇಸ್ ಡ್ ಪಾತೆರ್ಯೆರ್. ಈ ಲೇಸ್ ನ್ ಬಿಕ್ರಿಗುತ್ತು ಸುಂದರ ಹೆಗ್ಡೆ ದೀಪ ಪೊತ್ತಾದ್ ಉದಿಪನ ಮಲ್ತೆರ್.

ಸರ್ವೇಶ್ವರ ಫ್ರೆಂಡ್ಸ್ ಮುತಾಲಿಕೆಡ್ ನಡತಿನ ತಮ್ಮನ ಲೇಸ್ ಡ್ ಪ್ರಶಸ್ತಿ ವಿಜೇತೆರಾಯಿನ ಗುಡ್ಡ ಪಾಣಾರ ಮೆರೆನ್ ಶಾಲ್, ಪೇಟ ಪಾಡ್ದ್ ಸನ್ಮಾನ ಪತ್ರ ಕೊರ್ಪುನೆತದೊಟ್ಟಿಗೆ “ಮೂಳೂರ್ದ ಮುತ್ತು” ಪಂದ್ ಬಿರುದು ಕೊರ್ದು ತಮ್ಮನ ಮಲ್ತೆರ್.


ಈ ಪೊರ್ತುಡು ಮಹಾಲಕ್ಷ್ಮಿ ಕೋ ಆಪರೇಟಿವ್ ಬ್ಯಾಂಕ್ ಅಧ್ಯಕ್ಷೆರ್ ಯಶ್ಪಾಲ್ ಸುವರ್ಣ, ಡಾ.ವೈ.ಎನ್.ಶೆಟ್ಟಿ, ಮೂಳೂರು ಬಿಲ್ಲವ ಸಂಘದ ಉಪಾಧ್ಯೆಕ್ಷೆರ್ ಪ್ರಕಾಶ್ ಮೂಳೂರು, ಮಟ್ಟಾರ್ ರತ್ನಾಕರ್ ಹೆಗ್ಡೆ, ಸೇಸು ಮಾಸ್ಟರ್, ಪಾಂಡುರಂಗ ಎಸ್.ಪಡ್ಡಮೆ, ಸಂತೋಷ್, ವೀರ ಕೇಸರಿ ಶೆಟ್ಟಿ, ಕೊರಗ ಬಂಗೇರ, ಸತೀಶ್ ಚಂದ್ರ ಇತ್ತೆರ್. ಪುರುಷೋತ್ತಮ್ ಮೂಳೂರು ಪ್ರಾಸ್ತಾವಿಕ ಪಾತೆರ್ದ್ ಎದ್ಕೊನಿಯೆರ್.

You Missed