Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಇಟೆಲಿಗ್ ಭೇಟಿ ಕೊರ್ನ ಕೃಷಿ ಸಚಿವೆರ್ ಶೋಭಾ ಕರಂದ್ಲಾಜೆ

ಇಟಲಿ ಪ್ರವಾಸಡ್ ಇಪ್ಪುನ ಕೇಂದ್ರ ಕೃಷಿ ಬೊಕ್ಕ ರೈತೆರೆನ ಕಲ್ಯಾಣ ರಾಜ್ಯ ಸಚಿವೆರ್, ಶೋಭಾ ಕರಂದ್ಲಾಜೆ ಮೇರ್ ಕೋಡೆ ಇಟಲಿದ ಕೃಷಿ ಸಚಿವೆರಾಯಿನ ಶ್ರೀ ಪ್ರಾನ್ಸಿಸ್ಕೋ ಲೊಲ್ಲೋಬ್ರಿಗಿದಾ ಮೆರೆನ್ ಇಟಲಿದ ರೋಮ್ ನಗರಡ್ ಭೇಟಿಯಾದ್ ಚರ್ಚೆ ಮಲ್ತೆರ್.


ರಡ್ಡ್ ದೇಶಲೆನ ನಡುಟ್ ಕೃಷಿ ರಪ್ತು, ಕೃಷಿ ಕ್ಷೇತ್ರದ ಅಭಿವೃದ್ಧಿಗಾದ್ ತಂತ್ರಜ್ಞಾನಲೆನ ವರ್ಗಾವಣೆ ಬೊಕ್ಕ ಬೇತೆ ಬೇತೆ ಕೆಲವು ರಾಜತಾಂತ್ರಿಕ ವಿಚಾರದ ಬಗೆಟ್ ಚರ್ಚೆ ಮಲ್ತೆರ್.

ಅಂಬಿದ ಗುಂಡಿಗ್ ಬೂರ್ದು ತೀರ್ ಪೋಯಿನ ಬಾಲೆ

ಕಾರ್ಲ: ತೋಟಡ್ ಬೇಲೆ ಮಲ್ತೊಂದು ಇತ್ತಿನ ಪೊರ್ತುಡು ಬಾಲೆವೊಂಜಿ ಅಂಬಿದ ಗುಂಡಿಗ್ ಬೂರ್ದು ತೀರ್ ಪೋಯಿನ ಘಟನೆ ಹೆಬ್ರಿ ತಾಲೂಕ್ ದ ಮುದ್ರಾಡಿ ಬಚ್ಚಪುಡ್ ನಡತ್ಂಡ್.‌


ಜಾರ್ಖಂಡ್ ಮೂಲದ ಮುನೇಶ್ವರ (6) ತೀರ್ ಪೋಯಿನ ಬಾಲೆ. ಜಾರ್ಖಂಡ್ ಮೂಲದ ಸೋಮೇಶ್ವರ ಓಕಾನ್ ದಂಪತಿಲು ಅಂಟೋನಿ ಪನ್ಪುನರೆನ ತೋಟಡ್ ಕರಿನ 6 ವರ್ಷೋರ್ದಿಂಚ ಬೇಲೆ ಮಲ್ತೊಂದು ಉಲ್ಲೆರ್. ಐತಾರ ರಜೆ ದಿನ ಆಯಿನೆರ್ದಾವೆರ ಬಾಲೆ ಗೊಬ್ಬೊಂದು ಇಪ್ಪುನಗ ಈ ಘಟನೆ ನಡತ್ಂಡ್. ಈ ಬಗೆಟ್ ಹೆಬ್ರಿ ಪೋಲಿಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಡಿ. 9ರ್ದು ಕುಡ್ಲ-ಬೊಂಬೈ ಗ್ ಕುಡೊಂಜಿ ಇಸೇಸ ರೈಲ್

ಕುಡ್ಲ: ಕುಡ್ಲ ಜಂಕ್ಷನ್‌ ಬೊಕ್ಕ ಬೊಂಬೈದ ಲೋಕಮಾನ್ಯ ತಿಲಕ್‌ ನಿಲ್ದಾಣದ ನಡುಟ್ ನಂ. 01453 ಸಾಪ್ತಾಹಿಕ ಇಸೇಸ ರೈಲ್ ಪೋಯೆರೆ ಉಂಡು.

ಈ ರೈಲ್ ಬೊಂಬೈರ್ದ್ ಡಿ. 9, 16, 23, 30 ಬೊಕ್ಕ ಜನವರಿ 6 (ಶುಕ್ರಾರ) ರಾತ್ರೆ 10.15ಗ್ ಪಿದಡ್ ದ್ ಮನದಾನಿ ಬಯ್ಯಗ್ 5.05ಗ್ ಕುಡ್ಲ ಜಂಕ್ಷನ್‌ ಎತ್ತೆರೆ ಉಂಡು. ಈ ರೈಲ್ ಕುಡ್ಲ ಜಂಕ್ಷನ್‌ರ್ದ್ ಡಿ. 10, 17, 24, 31 ಬೊಕ್ಕ ಜನವರಿ 7 (ಶನಿಯಾರ) ಬಯ್ಯಗ್ 6.45ಕ್ ಪಿದಡ್ ದ್ ಮನದಾನಿ ಬೊಂಬೈಗ್ ಮಧ್ಯಾಹ್ನ 2.25ಗ್ ಎತ್ತುಂಡು. ಥಾನೆ, ಪನ್ವೆಲ್‌, ರೋಹ, ಖೇಡ್‌, ಚಿಪ್ಲೂನ್, ಸಂಗಮೇಶ್ವರ ರೋಡ್‌, ರತ್ನಗಿರಿ, ಕಂಕಾವಿ, ಸಿಂಧುದುರ್ಗ, ಕುಡಾಳ್‌, ಸಾವಂತವಾಡಿ ರೋಡ್‌, ತಿವಿಮ್‌, ಕರ್ಮಾಲಿ, ಮಡಗಾಂವ್‌, ಕಾರವಾರ, ಗೋಕರ್ಣ ರೋಡ್‌, ಕುಮಟಾ, ಮುರುಡೇಶ್ವರ, ಭಟ್ಕಳ, ಬೈಂದೂರು, ಕುಂದಾಪುರ, ಒಡಿಪು, ಮುಲ್ಕಿ, ಸುರತ್ಕಲ್‌ಡ್ ಉಂತೆರೆ ಉಂಡು.

ಜೋಕುಲೆಗ್ ಬಾಂಬ್, ಗನ್ ಪಂದ್ ಪುದರ್ ದೀವೊಡು ಪಂದ್ ಆದೇಶ ಮಲ್ತಿನ ಉತ್ತರ ಕೊರಿಯಾ ಸರ್ಕಾರ..!

ಪ್ಯಾಂಗ್ಯಾಂಗ್: ಜೋಕುಲೆಗ್ ಬಾಂಬ್, ಗನ್, ಸ್ಯಾಟಲೈಟ್ ಪಂದ್ ಪುದರ್ ದೀಯರೆ ಉತ್ತರ ಕೊರಿಯಾ ಸರ್ಕಾರ ವಿಚಿತ್ರ ಆದೇಶ ಮಲ್ತ್‌ದ್ಂಡ್.

ಜನಕ್ಲೆಡ ದೇಶ ಭಕ್ತಿ ಎಚ್ಚ ಮಲ್ಪುನ ಬಗೆಟ್ ಈ ಕ್ರಮ ದೆತೊಂದೆರ್. ಜೋಕುಲೆಗ್ ಮಿಲಿಟರಿ ಅರ್ಥ ಬರ್‍ಪಿನಂಚಿನ ಪುದರ್ ದೀವೊಡು ಪಂದ್ ಅದೇಶ ಮಲ್ತ್‌ದೆರ್ ಪಂದ್ ಸರ್ಕಾರದ ಮೂಲಲು ತೆರಿಪಾದ್ಂಡ್.

ಡಿ.10,11:ನಾಗುರಿ ಶ್ರೀ ಕಲ್ಲುರ್ಟಿ ಪಂಜುರ್ಲಿ ಬೊಕ್ಕ ಪರಿವಾರ ದೈವೊಲೆನ ನೇಮೋಚ್ಚಯ

ನಾಗುರಿ: ಮರಕಲಬೆಟ್ಟು ಶ್ರೀ ಕಲ್ಲುರ್ಟಿ ಪಂಜುರ್ಲಿ ಬೊಕ್ಕ ಪರಿವಾರ ದೈವೊಲೆನ ದೈವೊಲ್ಯಡ್ ಡಿ.10 ಶನಿಯಾರ ಬೊಲ್ಪುಗು 7 ಗಂಟೆಗ್ ಗಣಹೋಮ ಬೊಕ್ಕ ರಾತ್ರೆ 7 ಗಂಟೆರ್ದ್ ಪೊಸಪ್ಪೆ, ಕಲ್ಲುರ್ಟಿ-ಪಂಜುರ್ಲಿ ದೈವೋಲೆನ ನೇಮೋಚ್ಚಯ, ಡಿ.11 ಐತಾರ ಬೊಲ್ಪುಗು 6 ಗಂಟೆಗ್ ಶ್ರೀ ಚಾಮುಂಡೇಶ್ವರಿ-ಕತ್ತಲೆಕಾನ ಗುಳಿಗ ದೈವಲೆನ ನೇಮೋಚ್ಚಯ ಬೊಕ್ಕ ಬೊಲ್ಪುಗು 11 ಗಂಟೆಗ್ ರಾಹುಗುಳಿಗ ದೈವದ ನೇಮೋಚ್ಚಯ ನಡಪರೆ ಉಂಡು.

ಈ ಲೇಸ್ ಗ್ ಮಾತಾ ಭಕ್ತಾಭಿಮಾನಿಲು ಬತ್ ದ್ ದೈವಲೆನ ಸಿರಿಮುಡಿ ಗಂಧ-ಪ್ರಸಾದನ್ ದೆತೊಂದು ದೈವಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಮರಕಲಬೆಟ್ಟು ಕೋಟ್ಯಾನ್ ಕುಟುಂಬಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕೋಲಾರದ ಬಂಗಾರ್‍ದ ಗಣಿ ಕುಡ ಸುರು

22 ವರ್ಷದ ಪಿರವು ಬಂದ್ ಆತಿನ ಕೋಲಾರ ಬಂಗಾರ್‌ದ ಗಣಿ (ಕೆಜಿಎಫ್) ನ್ ಕುಡ ಸುರು ಮಲ್ಪರೆ ಕೇಂದ್ರ ಅಂಚನೆ ರಾಜ್ಯ ಸರ್ಕಾರ ದುಂಬು ಬೈದ್ಂಡ್.

ಇಂಚಿಪ್ಪಗ್ ಕೇಂದ್ರ ಸರ್ಕಾರ ಕೆಜಿಎಫ್ ಕೈತಲ್ ಇಪ್ಪುನ 13 ಸೈನೈಡ್ ಗುಡ್ಡೆಲೆಡ್ ಬಂಗಾರ್ ನಾಡುನ ಬೇಲೆಗ್ ಟೆಂಡರ್ ಲೆತ್ತ್‌ದ್ಂಡ್. ಈ ಗುಡ್ಡೆದ ಸುತ್ತುಮುತ್ತ 250 ಲಕ್ಷ ಟನ್ ಮಣ್ಣ್ ಇಪುನ ಬಗೆಟ್ಟ್ ಅಂದಾಜಿ ಮಲ್ತ್‌ದಿತ್ತ್‌ದ್, 25 ಟನ್ ಬಂಗಾರ್ ತಿಕ್ಕುನ ನಿರೀಕ್ಷೆ ಉಂಡು ಪಂದ್ ಸಂಶೋಧನೆ ತೆರಿಪಾದ್ಂಡ್.

ಇನಿರ್ದ್ ದತ್ತಪೀಠಡ್ ದತ್ತ ಜಯಂತಿ ಉಚ್ಚಯ: ಬಿಗಿ ಪೊಲೀಸ್ ಬಂದೋಬಸ್ತ್

ಚಿಕ್ಕಮಗಳೂರು: ಇನಿರ್ದ್ ಮೂಜಿ ದಿನ ಮುಟ್ಟ ದತ್ತಪೀಠಡ್ ದತ್ತ ಜಯಂತಿ ನಡಪರೆ ಉಂಡು.

ಈ ನಿಲೆಟ್ಟ್ ಜಿಲ್ಲೆಡ್ ಬಿಗಿ ಪೊಲೀಸ್ ಬಂದೋಬಸ್ತ್ ಮಲ್ತ್‌ದೆರ್.

ನೆರ್ದ್ ದುಂಬು ದತ್ತ ಜಯಂತಿ ನಿಲೆಟ್ಟ್ ಚಿಕ್ಕಮಗಳೂರುಡ್ ಪೊಲೀಸೆರ್ ಪಥಸಂಚಲನ ನಡಪಾದೆರ್. ಚಿಕ್ಕಮಗಳೂರು ಎಂಜಿ ರಸ್ತೆ, ಐಜಿ ರಸ್ತೆ, ಬಸವನಹಳ್ಳಿ ಮಾರ್ಗಡ್ ಪೊಲೀಸೆರ್ ಪಥ ಸಂಚಲನ ಮಲ್ತ್‌ದೆರ್. ಬೇತೆ ಬೇತೆ ಜಿಲ್ಲೆರ್ದ್ ಆ ಜಾಗೆಗ್ 4500 ಪೊಲೀಸೆರ್ ಬೈದೆರ್.

ಚಾರ್ಮಾಡಿ ಘಾಟ್ ಡ್ ಟ್ರ್ಯಾಕ್ಟರ್ ಪಲ್ಟಿಯಾದ್ ಒರಿ ತೀರ್ ಪೋಯೆರ್

ಬೊಲ್ತೇರ್: ಚಾರ್ಮಾಡಿ ಘಾಟ್ ದ ರಾಷ್ಟ್ರೀಯ ಹೆದ್ದಾರಿಡ್ ಟ್ರ್ಯಾಕ್ಟರ್ ಪಲ್ಟಿಯಾದ್ ಒರಿ ತೀರ್ ಪೋಯಿನ ಘಟನೆ ನಡತ್ಂಡ್.


ಈ ಘಟನೆಡ್ ಕುಡೊರಿಯಗ್ ಪೆಟ್ಟಾತ್ಂಡ್. ತೀರ್ ಪೋಯಿನಾರ್ ಜಾರ್ಖಂಡ್ ಮೂಲದ ಕೂಲಿ ಬೇಲೆದಾರ್ ದಿಬೋ ಶಂಕರ್ ನಾಯಕ್ (22) ಪಂದ್ ತೆರಿದ್ ಬೈದ್ಂಡ್. ಪೆಟ್ಟಾಯಿನ ಕುಡೊರಿ ಬೇಲೆದಾಯನ್ ಮೂಡಿಗೆರೆ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಬಗೆಟ್ ಬಣಕಲ್ ಪೊಲೀಸೆರ್ ಜಾಗೆ ಪರಿಶೀಲನೆ ಮಲ್ತ್ ದ್ ಕೇಸ್ ದಾಖಲ್ ಮಲ್ದೆರ್.

ಕೇರಳ ಸಿ.ಎಂ ಇಲ್ಲ್ ದ ಮಿತ್ತ್ ಗುಂಡುದ ದಾಳಿ

ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಮೆರೆನ ಇಲ್ಲ್ ಕ್ಲಿಫ್ ಹೌಸ್ ದ ಮಿತ್ತ್ ಅಂಗಾರೆ ಕಾಂಡೆ ಗುಂಡುದ ದಾಳಿ ನಡತ್ಂಡ್.

ಕರ್ತವ್ಯಡ್ ಇಪ್ಪುನ ಪೊಲೀಸ್ ಸಿಬ್ಬಂದಿನ ಗನ್ ರ್ದ್ ಗುಂಡು ಪಾಡ್ದೆರ್. ಉಂದು ಆಕಸ್ಮಿಕವಾದ್ ನಡತ್ಂಡ್ ಪನ್ಪುನವು ಪೊಲೀಸೆರ್ ತೆರಿಪಾದೆರ್. ಘಟನೆ ನಡಪುನಾಗ ಮುಖ್ಯಮಂತ್ರಿಲು ಕ್ಲಿಫ್ ಹೌಸ್ ಡ್ ಇತ್ತೆರ್. ಈ ಘಟನೆದ ಬಗೆಟ್ ತನಿಖೆ ನಡತೊಂದು ಉಂಡು. ಹೆಚ್ಚದ ಮಾಹಿತಿ ನನ ಗೊತ್ತಾವೊಡಾತೆ.

ಅಂಡಮಾನ್ ಡ್ ಚಂಡಮಾರುತ, ತುಳುನಾಡ್ ಡ್ ಬರ್ಸ!

ಅಂಡಮಾನ್ ಕಡಲ ಕುದುರುದ ತೆನ್ಕಾಯಿ ಜಾಗೆಡ್ ವಾಯುಭಾರ ಕುಸಿತ ಆದ್, ತೆನ್ಕಾಯಿ ರಾಜ್ಯಲೆಗ್ ಚಂಡಮಾರುತ ಬರ್ಪಿನ ಸಾಧ್ಯತೆ ಉಂಡು.


ಈ ಚಂಡಮಾರುತಗ್ ಮ್ಯಾಂಡಸ್ ಪಂದ್ ಪುದರ್ ದೀತೆರ್. ತಮಿಳುನಾಡ್-ಪುದುಚೇರಿ ಮುಖೇನ ಡಿ.8 ಕ್ ಅವು ಆಂಧ್ರದ ತೆನ್ಕಾಯಿ ಭಾಗೊಗು ಹಾಕುನ ನಿಸಾನಿ ಉಂಡು ಪಂದ್ ಹವಾಮಾನ ಇಲಾಖೆ ಪಂತ್ಂಡ್. ನೆತ್ತ ಪರಿಣಾಮವಾದ್ ತುಳುನಾಡ್ ಸೇರ್ದ್ ಕರ್ನಾಟಕ ದಕ್ಷಿಣ ಒಳನಾಡ್, ಉತ್ತರ ಒಳನಾಡ್ ಜಿಲ್ಲೆಲೆಡ್ ಡಿ.8 ಬೊಕ್ಕ 9 ದಾನಿ ಭಾರೀ ಬರ್ಸ ಬರ್ಪುಂಡು. ಅಂಚಾದ್ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್.

You Missed