Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಇಲ್ಲದ ಬೀಗ ಪುಡಾತ್ ದ್ ಬಂಗಾರ್ ಕಂಡಿನ ಕಲ್ವೆರ್

ಒಡಿಪು: ಪುತ್ತೂರ್ ಗ್ರಾಮದ ಎಲ್‌ವಿಟಿ ದೇವಲ್ಯದ ಕೈತಲ್ ತನ್ನ ಅಮ್ಮನೊಟ್ಟಿಗೆ ವಾಸ ಇತ್ತಿನ ಪೂಜಾ ಸಾಲ್ಯಾನ್ ಪನ್ಪುನರೆನ ಇಲ್ಲಲ್ ಏರ್ಲ ಇಜ್ಜಂದಿನ ಪೊರ್ತುಡು ಕಲ್ವೆರ್ ಇಲ್ಲದ ಎದುರು ಬಾಕಿಲ್ ದ ಬೀಗ ಪುಡಾತ್ ದ್ ಬಂಗಾರ್ ಕಂಡಿನ ಘಟನೆ ನಡತ್ಂಡ್.

ಮೊಕುಲು ಬೆಡ್ ರೂಮ್ ದ ಗಾಡ್ರೇಜ್‌ಡ್ ಇತ್ತಿನ 16 ಗ್ರಾಂ ತೂಕದ 1 ಬಂಗಾರ್ ದ ಕಜಿ, 4 ಗ್ರಾಂ ತೂಕದ 1 ಬಂಗಾರ್ ದ ಪೆಂಡೆಂಟ್ ಸೇರ್ದ್ ಒಟ್ಟು 20 ಗ್ರಾಂ ತೂಕ ಇತ್ತಿನ ಸುಮಾರ್ 96,000 ಬಿಲಿತ ಬಂಗಾರ್ ನ್ ಕಂಡ್ ದ್ ಬಲಿತ್ ದೆರ್. ಈ ಬಗೆಟ್ ಒಡಿಪು ಪೇಂಟೆದ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಕಿನ್ನಿಗೋಳಿಡ್ ಇನಿ ಸಾರ್ವಜನಿಕ ಶ್ರೀ ಬಾಲ ಗಣೇಶ ಉಚ್ಚಯ ಸಮಿತಿದ ಮುತಾಲಿಕೆಡ್ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ

ಕಿನ್ನಿಗೋಳಿ ಸಾರ್ವಜನಿಕ ಶ್ರೀ ಬಾಲ ಗಣೇಶ ಉಚ್ಚಯ ಸಮಿತಿದ ಮುತಾಲಿಕೆಡ್ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ ಡಿ.10 ಶನಿಯಾರ ಬಯ್ಯಗ್ 4:30 ರ್ದ್ ರಾಜರತ್ನಪುರ ಅಶ್ವಥ ಕಟ್ಟೆಡ್ ನಡಪರೆ ಉಂಡು.

ಬೊಕ್ಕ ರಾತ್ರೆ 8 ಗಂಟೆರ್ದ್ ಬಾಲಗಣಪತಿ ವೇದಿಕೆಡ್ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಕಾಲಮಿತಿ ಆಟ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.18:ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂದಿರ(ರಿ.) ನೆತ್ತ 17 ನೇ ವರ್ಷದ ಸಾಮೂಹಿಕ ಸತ್ಯನಾರಾಯಣ ಪೂಜೆ

ಕೆದಿಲ: ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂದಿರ(ರಿ.) ನೆತ್ತ 17 ನೇ ವರ್ಷದ ಸಾಮೂಹಿಕ ಸತ್ಯನಾರಾಯಣ ಪೂಜೆ, ಏಕಾಹ ಭಜನೆ ಬೊಕ್ಕ ಧಾರ್ಮಿಕ ಸಭಾ ಲೇಸ್ ಡಿ.18    ಐತಾರದಾನಿ ಕರಿಮಜಲು ಶ್ರೀ ಕೃಷ್ಣ ಸಭಾಂಗಣಡ್ ನಡಪರೆ ಉಂಡು.

ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್ ಶ್ರೀನಿವಾಸ ಕುದುಂಬ್ಲಾಡಿ, ಗೌರವಾಧ್ಯಕ್ಷೆರ್ ಚಂದ್ರಶೇಖರ ಭಟ್ ಕುಕ್ಕಾಜೆ, ಕಾರ್ಯದರ್ಶಿ ಹರೀಶ್ ಕರಿಮಜಲು ಬೊಕ್ಕ ಶ್ರೀ ಕೃಷ್ಣ ಭಜನಾ ಮಂಡಳಿ (ರಿ.) ಕರಿಮಜಲ್ ದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಹಾಳಾಯಿನ ಮಾರ್ಗದ ಬೇಲೆನ್ ಮಲ್ಪೆರೆ ಅನುದಾನ ಕೊರೊಡು ಪಂದ್ ಧರ್ಮಸ್ಥಳ ವೀರೇಂದ್ರ ಹೆಗ್ಗಡೆರ್ದ್ ಕೇಂದ್ರ ಸಚಿವೆರ್ ನಿತಿನ್ ಗಡ್ಕರಿಗ್ ಪತ್ರ

ಬೊಲ್ತೇರ್: ಮಸ್ತ್ ಆಳಾಯಿನ ಕುಡ್ಲ-ಶಿರಾಡಿ-ಬೆಂಗ್ಲೂರ್ ರಾಜ್ಯ ಮಾರ್ಗ ಕೂಡ್ಲೆ ಸರಿ ಮಲ್ಪೆರೆ ಅನುದಾನ ಕೊರೊಡು ಪಂದ್ ರಾಜ್ಯಸಭಾ ಸದಸ್ಯೆರಾಯಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ ಮೇರ್ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವೆರ್ ನಿತಿನ್ ಗಡ್ಕರಿ ಮೆರೆಗ್ ಪತ್ರ ಬರೆತೆರ್.

ಹೆಗ್ಗಡೆರ್ ಬರೆಯಿನ ಪತ್ರಗ್ ಕೂಡ್ಲೆ ಸ್ವಂದಿಸಯಿನ ಕೇಂದ್ರ ಸಚಿವೆರ್ ನಿತಿನ್ ಗಡ್ಕರಿ ಈ ಬಗೆಟ್ ಪರಿಶೀಲನೆ ಮಲ್ತ್ ದ್, ಸರಿಯಾಯಿನ ಕ್ರಮ ದೆತೊನೊವ ಪಂದ್ ಪತ್ರದ ಮುಖೇನ ಭರವಸೆ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್.

ಬಲ್ಬ್ ತಿಕ್ಕಾನಗ ಕರೆಂಟ್ ಶಾಕ್ ಹಾಕ್ ದ್ ತೀರ್ ಪೋಯಿನ ವ್ಯಕ್ತಿ

ಶಿವಮೊಗ್ಗ: ಇಲ್ಲಲ್ ಹೋಲ್ಡರ್‌ಗ್ ಬಲ್ಬ್ ಪಾಡ್ನಗ ಕರೆಂಟ್ ತಾಗ್ ದ್ ರೂಪ್ ಸಿಂಗ್(33) ಪನ್ಪುನಾರ್ ತೀರ್ ಪೋಯಿನ ಘಟನೆ ಶಿವಮೊಗ್ಗ ಜಿಲ್ಲೆದ ಸಾಗರದ ಶಾಂತಿ ನಗರಡ್ ನಡತ್ಂಡ್.

ಮೆರೆಗ್ ಕರೆಂಟ್ ತಾಗಿನ ಕೂಡ್ಲೆ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಆಂಡ ಮೇರ್ ಆತಾನಗನೇ ತೀರ್ ಪೋತೆರ್ ಪಂದ್ ಡಾಕ್ಟರ್ ತೆರಿಪಾದೆರ್. ಈ ಘಟನೆದ ಜಾಗೆಗ್ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್. ಸಾಗರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ವಿಟ್ಲ ಬಸ್ ಸ್ಯಾಂಡ್ ಡ್ ಬಸ್ ತಕ್ಲೆನ ಫೈಟಿಂಗ್!

ವಿಟ್ಲ: ಖಾಸಗಿ ಬಸ್ ತ್ತ ಚಾಲಕೆರಾಯಿನ ಮಣಿಕಂಠ ಬೊಕ್ಕ ಮಹೇಶ್ ಪೆಟ್ಟ್ ಮಲ್ತೊನ್ನ ಘಟನೆ ವಿಟ್ಲ ಸಾರ್ವಜನಿಕ ಬಸ್ ಸ್ಯಾಂಡ್ ಡ್ ನಡತ್ಂಡ್.

ಮೊಕುಲು ಬಸ್ ತ ಟೈಮಿಂಗ್ಸ್ ಇಚಾರಗ್ ಗಲಾಟೆ ಮಲ್ತೊಂದೆರ್ ಪಂದ್ ತೆರಿದ್ ಬೈದ್ಂಡ್. ಈ ಘಟನೆದ ಜಾಗೆಗ್ ವಿಟ್ಲ ಪೊಲೀಸೆರ್ ಬತ್ ದ್, ರಡ್ಡ್ ಜನನ್ಲಾ ವಶಕ್ ಪಡೆತೆರ್ ಪಂದ್ ವರದಿ ಆತ್ಂಡ್.

ಪಿಎಫ್ಐ ಕಾರ್ಯಕರ್ತೆರೆನ ಇಲ್ಲ್ ದ ಮಿತ್ತ್ ಎನ್ಐಎ ರೈಡ್

ಬೆಂಗ್ಲೂರ್: ದೇಶಡ್ ನಿಷೇಧ ಮಲ್ತಿನ ಪಾಪ್ಯುಲರ್‌ ಫ್ರಂಟ್‌ ಆಫ್ ಇಂಡಿಯಾ(ಪಿಎಫ್ಐ) ಕಾರ್ಯಕರ್ತೆರೆನ ಇಲ್ಲ್ ದ ಮಿತ್ತ್ ರಾಷ್ಟ್ರೀಯ ತನಿಖಾ ದಳ(ಎನ್‌ಐಎ) ಗುರುವಾರ ರಾಜ್ಯದ ಕಲಬುರಗಿ ಬೊಕ್ಕ ಕೇರಳದ ಕೋಝಿಕ್ಕೋಡ್‌ದ ಮೂಜಿ ಜಾಗೆಲೆಗ್ ರೈಡ್ ಮಲ್ದ್ಂಡ್.

ರೈಡ್ ಮಲ್ತಿನ ಪೊರ್ತುಡು ಡಿಜಿಟಲ್‌ ಸಾಧನಲು ಬೊಕ್ಕ ಬೇತೆ ಬೇತೆ ದಾಖಲೆನ್ ವಶಕ್ ಪಡೆತ್ಂಡ್. ಈ ಬಗೆಟ್ ಡೆಲ್ಲಿ ದ ಎನ್‌ಐಎ ಕೇಸ್ ದಾಖಲ್ ಮಲ್ದ್ಂಡ್ ಪಂದ್ ಎನ್‌ಐಎ ತೆರಿಪಾದ್ಂಡ್.

ಬುರ್ಕಾ ಪಾಡ್ದ್ ಡ್ಯಾನ್ಸ್ ಮಲ್ತಿನ ನಾಲ್ ಜನ ಮುಸ್ಲಿಂ ಕಲ್ಪಾರ್ಥಿಲು ಸಸ್ಪೆಂಡ್..!!

ಕುಡ್ಲ: ಬುರ್ಕಾ ಪಾಡ್ದ್ ಡ್ಯಾನ್ಸ್ ಮಲ್ತಿನ ನಾಲ್ ಜನ ಮುಸ್ಲಿಂ ಕಲ್ಪಾರ್ಥಿಲೆನ್ ಸಸ್ಪೆಂಡ್ ಮಲ್ತಿನ ಘಟನೆ ಕುಡ್ಲದ ವಾಮಂಜೂರ್ ದ ಖಾಸಗಿ ಇಂಜಿನಿಯರಿಂಗ್ ಕಾಲೇಜ್ ಡ್ ನಡತ್ಂಡ್.

ಈ ಘಟನೆದ ವೀಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.

ಡಿ.28: ಗಾಂದೋಡಿ ಮೈತ್ರಿ ಫ್ರೆಂಡ್ಸ್ ಕ್ಲಬ್ ದ ಮುತಾಲಿಕೆಡ್ 2 ನೇ ವರ್ಷದ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ

ಬಂಟ್ವಾಳ: ಗಾಂದೋಡಿ ಮೈತ್ರಿ ಫ್ರೆಂಡ್ಸ್ ಕ್ಲಬ್ ದ ಮುತಾಲಿಕೆಡ್ 2 ನೇ ವರ್ಷದ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ಡಿ.28 ಬುಧಾರದಾನಿ ಬಯ್ಯಗ್ 5 ಗಂಟೆಗ್ ನಡಪರೆ ಉಂಡು.

ಸಭಾ ಲೇಸ್ ದ ಅಧ್ಯಕ್ಷತೆನ್ ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯಕ್ ಉಳಿಪ್ಪಾಡಿಗುತ್ತು ಒಯಿಸೊನ್ವೆರ್. ಬಂಟ್ವಾಳ ಪುರಸಭೆ ಮಾಜಿ ಅಧ್ಯಕ್ಷೆರ್ ರಾಮಕೃಷ್ಣ ಆಳ್ವ ಗೌರವಾಧ್ಯಕ್ಷೆರಾದ್ ಉಲ್ಲೆರ್. ಮಲ್ಲ ಬಿನ್ನೆರಾದ್ ಸಂಜೀಪ ಸಂಕೇಶ, ಶ್ರೀಕಾಂತ್ ಶೆಟ್ಟಿ, ಬಿ.ಸಿ ರೋಡ್ ಗಣೇಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಸತೀಶ್ ಭಂಡಾರಿ ಕುಲತ್ತಬೆಟ್ಟು ಬರಿಯೆರೆ ಉಲ್ಲೆರ್.

ಬೊಕ್ಕ ಗೌರವ ಪಾಲ್ವಿಕೆಡ್ ಬಂಟ್ವಾಳ ವಾಲಿಬಾಲ್ ಅಸೋಸಿಯೇಶನ್ ಅಧ್ಯಕ್ಷೆರ್ ಸುಪ್ರೀತ್ ಆಳ್ವ, ಬಂಟ್ವಾಳ ಪುರಸಭೆ ಸದಸ್ಯೆರ್ ಲೋಲಾಕ್ಷ ಶೆಟ್ಟಿ, ಬಂಟ್ವಾಳ ಪುರಸಭೆ ಮಾಜಿ ಬೂಡಾ ಅಧ್ಯಕ್ಷೆರ್ ಸದಾಶಿವ ಬಂಗೇರ, ಬಿ.ಸಿ ರೋಡ್ ಉದ್ಯಮಿ ಕಿರಣ್ ಕುಮಾರ್ ಉಲ್ಲೆರ್. ಬೊಕ್ಕ ಟೀಮ್ ಡಿವೈನ್ ಬಂಟ್ವಾಳ ಬೊಕ್ಕ ಕೈತಲ್ ದ ಜೋಕುಲೆರ್ದ್ ನೃತ್ಯ ವೈಭವ ಸಾಂಸ್ಕೃತಿಕ ಲೇಸ್ ನಡಪುಂಡು. ಆಯಿರ್ದ್ ಬೊಕ್ಕ ಕಲಾಸಂಗಮ ಕಲಾವಿದೆರೆರ್ದ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ನಿರ್ದೇಶನಡ್ ಶಿವದೂತೆ ಗುಳಿಗೆ ತುಳು ನಾಟಕ ನಡಪುಂಡು ಪಂದ್ ಸಂಘದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ವಿಟ್ಲದ ಖಾಸಗಿ ಶಾಲೆಡ್ ಛದ್ಮವೇಷ ಪಂತೊಡ್ ಕಾಂತಾರ

ವಿಟ್ಲ: ಖಾಸಗಿ ಶಾಲೆದ ವಾರ್ಷಿಕ ಉಚ್ಚಯದ ಅಂಗವಾದ್ ಅಟ್ಟಣೆ ಮಲ್ತಿನ ಛದ್ಮವೇಷ ಪಂತೊಡ್ ಪೊಣ್ಣು ಒರ್ತಿ ಕಾಂತಾರ ಪಿಕ್ಚರ್ ದ ದೈವದ ವೇಷ ಪಾಡ್ದ್ ನಲಿತಿನ ವೀಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.

ಈ ಬಗೆಟ್ ಸಾರ್ವಜನಿಕ ವಲಯಡ್ ಬೆಚ್ಚ ಆತೆರ್. ‘ಒಡೆಗ್ ಬತ್ಂಡ್ ದೈವ, ದೇವೆರೆನ ದುಸ್ಥಿತಿ.!!??, ಪಂದ್ ದೈವ ಭಕ್ತೆರ್ ಛದ್ಮವೇಷ ಪಂತೊದ ಬಗೆಟ್ ಅಸಮಾಧಾನ ತೂಪಾದೆರ್. ಅಂಚನೆ ದೈವರಾಧಾನೆಗ್ ತುಳುನಾಡ್ ಡ್ ಇಸೇಸ ಸ್ಥಾನ ಉಂಡು. ದೈವಪಾತ್ರಿಲೆಗ್ ಅಕುಲೆನನೇ ಆಯಿನ ಕಟ್ಟುಪಾಡ್, ನಿಯಮ ಉಂಡು. ಏರ್ ಬೋಡಾಂಡಲ ಅಕುಲು ದೈವದ ವೇಷ ಪಾಡುಲೆಕ್ಕ ಇಜ್ಜಿ‌. ಈತ್ ಮಾತ ಇತ್ಂಡಲ ಕೆಲವೆರ್ ನೆನ್ ಲೆಕ್ಕೊಗು ದೀವಂದೆ ಅಕ್ಲೆಗ್ ಬೋಡಾನಗ ದೈವದ ವೇಷ ಪಾಡುನ ಎಡ್ಡೆ ಅತ್ತ್, ಉಂಡು ದೈವಾರಾಧನೆಗ್ ಮಲ್ತಿನ ಅಪಮಾನ ಪಂದ್ ದೈವ ಭಕ್ತೆರ್ ಬೇಜಾರ್ ಮಲ್ತ್ ದೆರ್.