Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಕಡೇತ್ತ ಬೆಂಚಿದಕ್ಲೆನ ಕತೆ ಪನ್ಪಿನ “ಲಾಸ್ಟ್ ಬೆಂಚ್” ತುಳು ಪಿಚ್ಚರ್ ಡಿ.16 ಕ್ಕ್ ತುಳುನಾಡೊರ್ಮೆ ಬುಡುಗಡೆ

ಕುಡ್ಲ: ಎ.ಎಸ್ ಪ್ರೊಡಕ್ಷನ್ ಲಾಂಛನಡ್ ತಯಾರ್ ಆಯಿನ ಆಶಿಕಾ ಸುವರ್ಣ ನಿರ್ಮಾಣಡ್ ಪ್ರಧಾನ್ ಎಂಪಿ ನಿರ್ದೇಶನಡ್ ತಯಾರ್ ಆಯಿನ ವಿಐಪೀಸ್ “ಲಾಸ್ಟ್ ಬೆಂಚ್” ತುಳು ಪಿಚ್ಚರ್ ಡಿಸೆಂಬರ್ 16 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು.

ಈ ಬಗೆಟ್ ಕುಡ್ಲಡ್ ನಡತಿನ ಪತ್ರಿಕಾಗೋಷ್ಠಿಡ್ ನಿರ್ದೇಶಕೆರ್ ಪ್ರಧಾನ್ ಎಂಪಿ ಪಾತೆರ್ದ್, ಲಾಸ್ಟ್ ಬೆಂಚ್ ಪಿಚ್ಚರ್ ಮೂಜಿ ಕಲ್ಪಾರ್ಥಿಲೆನ ಕಥೆ ಯಾದಿತ್ತ್‌ದ್ ಕ್ಲಾಸ್‌ಡ್ ಕಡೇತ್ತ ಬೆಂಚ್‌ಡ್ ಕುಲ್ಲುನ ಕಲ್ಪಾರ್ಥಿಲು ಏತ್ ಕೇರ್‌ಲೇಸ್ ಆದಿಪ್ಪುವೆರ್ ಅಂಚನೆ ಅಕ್ಲೆನ ಜೀವನ ಎಂಚ ಇಪ್ಪುಂಡು ಪನ್ಪಿನ ಸಾರಾಂಶ ಈ ಪಿಚ್ಚರ್‌ಡ್ ಉಂಡು. ಪೃಥ್ವಿ ಅಂಬರ್, ರೂಪೇಶ್ ಶೆಟ್ಟಿ, ವಿನೀತ್ ಕುಮಾರ್ ಮಲ್ಟಿ ಸ್ಟಾರ್‍ಸ್ ಈ ಪಿಚ್ಚರ್‌ಡ್ ಮುಖ್ಯ ಪಾತ್ರಡ್ ಅಭಿನಯ ಮಲ್ತ್‌ದೆರ್. ಅರವಿಂದ ಬೋಳಾರ್, ಭೋಜರಾಜ್ ವಾಮಂಜೂರು, ವಿಸ್ಮಯ ವಿನಾಯಕ್, ನಿರೀಕ್ಷಾ ಶೆಟ್ಟಿ ಪುತ್ತೂರು ಸೇರಿನಂಚನೆ ತುಳುನಾಡ್‌ಡ್ ಪುಗರ್ತೆದ ಕಲಾವಿದೆರ್ ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್ ಪಂದ್ ಪಂಡೆರ್.

ಸಹ ನಿರ್ಮಾಪಕೆರ್ ಕಿರಣ್ ಶೆಟ್ಟಿ ಪಾತೆರ್ದ್, ಮಲ್ಟಿ ಸ್ಟಾರ್‍ಸ್ ಕಲಾವಿದೆರೆನ ಮಲ್ಲ ದಂಡೇ ಈ ಪಿಚ್ಚರ್‌ಡ್ ಉಂಡು. ಇಂಚಾದ್ ತೆರಿಕೆಗ್ ಬರ ಇಪ್ಪುಜಿ. ಅತ್ತಂದೆ ಪೊಸ ಕಲಾವಿದೆರ್‌ಲ ಅಭಿನಯ ಮಲ್ಪರೆ ಅವಕಾಶ ಕೊರ್ತೆರ್. ತುಳುನಾಡ್ ಅತ್ತಂದೆ ಪಿದಯಿ ದೇಶಡ್‌ಲ ಈ ಪಿಚ್ಚರ್ ರಿಲೀಸ್ ಆಯರೆ ಉಂಡು. ಪಿಚ್ಚರ್‌ಡ್ ಕಾಮಿಡಿ ಮಾತ್ರ ಅತ್ತಂದೆ ಸೆಂಟಿಮೆಂಟಲ್ ಕಥೆಲ ಉಂಡು ಪಂದ್ ಪಂಡೆರ್.

ಪ್ರಧಾನ್ ಎಂಪಿ ನಿರ್ದೇಶನದ ಪಿಚ್ಚರ್‌ಗ್ ಕೀರ್ತನ್ ಭಂಡಾರಿ ಬೊಕ್ಕ ಸೃಜನ್ ಪೇಜಾವರ ಕಥೆ-ಸಾಹಿತ್ಯ-ಸಂಭಾಷಣೆ ಬರೆತ್ತೆರ್. ಈ ಪಿಚ್ಚರ್‌ನ್ ಕುಡ್ಲದ ಸುತ್ತಮುತ್ತಲ್‌ದ ಮಸ್ತ್ ಜಾಗೆಡ್ ಶೂಟಿಂಗ್ ಮಲ್ತ್‌ದೆರ್. ಡಿ.16 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು ಪಂದ್ ಪಂಡೆರ್.

ಪ್ರತಿಕಾಗೋಷ್ಠಿಡ್ ನಿರ್ಮಾಪಕಿ ಆಶಿಕಾ ಸುವರ್ಣ, ನಟೆ ವಿನೀತ್ ಕುಮಾರ್, ವಿಸ್ಮಯ ವಿನಾಯಕ್, ಸಚಿನ್ ಉಬಾರ್ ಇತ್ತೆರ್.

ಡಿ.18: ಕುಕ್ಕೆ ಸುಬ್ರಹ್ಮಣ್ಯಡ್ ಷಣ್ಮುಖ ನಮಸ್ಕಾರ: ರಾಜ್ಯ ಮಟ್ಟದ ಸಾಮೂಹಿಕ ಯೋಗ

ಸುಬ್ರಹ್ಮಣ್ಯ: ಶ್ರೀ ಪತಂಜಲಿ ಯೋಗ ಶಿಕ್ಷಣ ಸಮಿತಿ ಮುತಾಲಿಕೆಡ್ ಶ್ರೀ ಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯದ ಜಾಗೆಡ್ ಡಿ. 18 ತಾರೀಕ್‌ಗ್ ಯೋಗದ ಬಗೆಟ್ ಜನಜಾಗೃತಿಗಾದ್ ಸಾಮೂಹಿಕ ಯೋಗ “ಷಣ್ಮುಖ ನಮಸ್ಕಾರ” ನಡಪರೆ ಉಂಡು ಪಂದ್ ಸಮಿತಿದ ಜಿಲ್ಲಾ ಸಂಚಾಲಕೆರ್ ಜಯರಾಮಣ್ಣ ತೆರಿಪಾದೆರ್.

ತುಳುನಾಡ್‌ದ ಬೇತೆ ಬೇತೆ ಶಾಖೆರ್ದ್ 2 ಸಾರ ಯೋಗ ಬಂಧುಲು ಅಂಚೆನೆ ರಾಜ್ಯದ ಬೇತೆ ಜಿಲ್ಲೆರ್ದ್ ಸುಮಾರ್ 1 ಸಾರ ಯೋಗ ಬಂಧುಲು ಈ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಆರ್ ತೆರಿಪಾದೆರ್.

ಡಿ.17: ಹೊಕ್ಕಾಡಿಗೋಳಿ ಮಹಿಷಮರ್ದಿನಿ ಕಂಬುಲ ಸಮಿತಿದ ಮುತಾಲಿಕೆಡ್ ವೀರ-ವಿಕ್ರಮ ಜೋಡುಕರೆ ಕಂಬುಲ

ಬಂಟ್ವಾಳ: ಹೊಕ್ಕಾಡಿಗೋಳಿ ಮಹಿಷಮರ್ದಿನಿ ಕಂಬುಲ ಸಮಿತಿದ ಮುತಾಲಿಕೆಡ್ ವೀರ-ವಿಕ್ರಮ ಜೋಡುಕರೆ ಕಂಬುಲ ಡಿ.17 ಶನಿಯಾರ ನಡಪರೆ ಉಂಡು.


ಕಂಬುಲದ ಅಭಿಮಾನಿಲಾಯಿನ ನಿಕುಲು ಬತ್ ದ್ ಕಂಬುಲನ್ ಯಶಸ್ವಿ ಮಲ್ತ್ ದ್ ಕೊರೊಡು ಪಂದ್ ಗೌರವಾಧ್ಯಕ್ಷೆರ್ ಸಂಜೀವ ಶೆಟ್ಟಿ ಗುಂಡ್ಯಾರು, ಗೌರವ ಸಲಹೆಗಾರೆರ್ ಸಿದ್ದಕಟ್ಟೆದ ನೋಟರಿ ಬೊಕ್ಕ ವಕೀಲೆರ್ ಸುರೇಶ್ ಶೆಟ್ಟಿ ಬೊಕ್ಕ ಬಾಬು ರಾಜೇಂದ್ರ ಶೆಟ್ಟಿ ಅಜ್ಜಾಡಿ ಬೊಕ್ಕ ಕಿರಣ್ ಕುಮಾರ್ ಮಂಜಿಲ, ಅಧ್ಯಕ್ಷೆರ್ ರಶ್ಮಿತ್ ಶೆಟ್ಟಿ ನೋಣಾಲ್ ಗುತ್ತು, ಪ್ರಧಾನ ಕಾರ್ಯದರ್ಶಿ ಸಂದೇಶ್ ಶೆಟ್ಟಿ ಪೊಡುಂಬು, ಕೋಶಾಧಿಕಾರಿ ಹೆಚ್. ಹರೀಶ್ ಹಿಂಗಾಣಿ, ಕಾರ್ಯದರ್ಶಿ ಪುಷ್ಪರಾಜ್ ಜೈನ್ ನಡ್ಯೋಡಿ, ಪ್ರಧಾನ ಸಂಚಾಲಕೆರ್ ರಾಜೇಶ್ ಶೆಟ್ಟಿ ಕೊನೆರೊಟ್ಟು, ಸಂಘಟನಾ ಕಾರ್ಯದರ್ಶಿ ಹರಿಪ್ರಸಾದ್ ಶೆಟ್ಟಿ ಕುರುಡಾಡಿ, ಸಂಚಾಲಕೆರ್ ಸುಧೀಂದ್ರ ಶೆಟ್ಟಿ ಕಲಾಯಿದಡ್ಕ, ಪ್ರಭಾಕರ ಎಚ್ ಹುಲಿಮೇರು, ರಾಘವೇಂದ್ರ ಭಟ್ ಹೊಕ್ಕಾಡಿಗೋಳಿ, ಜನಾರ್ಧನ ಬಂಗೇರ ತಿಮರಡ್ಕ, ನಿತ್ಯಾನಂದ ಪೂಜಾರಿ ಕೆಂತಲೆ ಬೊಕ್ಕ ಕಂಬುಲ ಜಾಗೆದ ದಾನಿಲು ಸುಧೀರ್ ಶೆಟ್ಟಿ ಹೊಕ್ಕಾಡಿಗೋಳಿ, ಪ್ರವೀಣ್ ಕುಲಾಲ್ ಬೊಕ್ಕ ಸಹೋದರೆರ್ ಹೊಕ್ಕಾಡಿಗೋಳಿ, ಬಾಬು ಶೆಟ್ಟಿ ಕೊಲ್ಯ ಮನೆ ಬೊಂಬೈ, ರಾಜು ಗುಮ್ಮಣ್ಣ ಶೆಟ್ಟಿ ಬೊಕ್ಕ ಸಹೋದರೆರ್ ಹೊಕ್ಕಾಡಿಗೋಳಿ, ಹರೀಶ್ ಶೆಟ್ಟಿ ಬೊಕ್ಕ ಸಹೋದರೆರ್ ಹೊಕ್ಕಾಡಿಗೋಳಿ, ಸುಧಾಕರ ಚೌಟ ಬಾವ ಹೊಸಬೆಟ್ಟು, ಮಹಾವೀರ ಚೌಟ ಉಗ್ರೋಡಿ, ಸುಂದರ ಪೂಜಾರಿ ಬೊಕ್ಕ ಸಹೋದರೆರ್ ನಿಡ್ಯಾಲ ಬೊಕ್ಕ ಸಂಪೂರ್ಣ ಸಹಕಾರನ್ ಸಮಿತಿದ ಸರ್ವಸದಸ್ಯೆರ್ ಎಲಿಯನಡುಗೋಡು, ಆರಂಬೋಡಿ, ಕುಕ್ಕಿಪಾಡಿ ಬೊಕ್ಕ ಸಂಗಬೆಟ್ಟು ಗ್ರಾಮದ ಬೊಕ್ಕ ಪರವೂರ ಗ್ರಾಮಸ್ಥೆರ್ ತೆರಿಪಾದೆರ್.

ರಾಜ್ಯಡ್ ಸುರುತ ಝೀಕಾ ವೈರಸ್ ಪತ್ತೆ

ಬೆಂಗ್ಲೂರ್: ರಾಜ್ಯಡ್ ಸುರುತ ಝೀಕಾ ವೈರಸ್ ಪತ್ತೆ ಆತ್ಂಡ್ ಪಂದ್ ಆರೋಗ್ಯ ಸಚಿವೆರ್ ಡಾ.ಸುಧಾಕರ್ ಮಾಹಿತಿ ಕೊರ್ತೆರ್.

ರಾಯಚೂರು ಜಿಲ್ಲೆದ ಮಾನ್ವಿ ತಾಲೂಕ್ ದ 5 ವರ್ಷದ ಪೊಣ್ಣಗ್ ಝೀಕಾ ವೈರಸ್ ಸೋಂಕು ಪತ್ತೆ ಆತ್ಂಡ್. ಕರಿನ 15 ದಿನರ್ದ್ ಜ್ವರ, ಕಕ್ಕುನೆರ್ದ್ ನರಲೊಂದು ಇತ್ತಿನ ಪೊಣ್ಣನ್ ಸುರುಕು ಸಿಂಧನೂರು ತಾಲೂಕ್ ಸರ್ಕಾರಿ ಆಸ್ಪತ್ರೆಗ್ ದಾಖಲ್ ಮಲ್ದೇರ್. ಬೊಕ್ಕ ಪೊಣ್ಣಗ್ ಡೆಂಘಿ ಜ್ವರ ಪಂದ್ ವಿಜಯನಗರದ ವಿಮ್ಸ್ ಆಸ್ಪತ್ರೆಗ್ ಶಿಫ್ಟ್ ಮಲ್ತೆರ್. ವಿಮ್ಸ್ ಆಸ್ಪತ್ರೆಡ್ ಪೊಣ್ಣನ ಸ್ಯಾಂಪಲ್ ದೆತೊಂದು ಪುಣೆದ ವೈರಾಲಜಿ ಲ್ಯಾಬ್ ಗ್ ಕಡಪಾಯೆರ್. ಇತ್ತೆ ಪುಣೆದ ಲ್ಯಾಬ್ ರ್ದ್ ವರದಿ ಬೈದ್ಂಡ್. ಪೊಣ್ಣಗ್ ಝೀಕಾ ವೈರಸ್ ಸೋಂಕು ಉಂಡು ಪಂದ್. ಈ ಬಗೆಟ್ ಜಿಲ್ಲಾಡಳಿತ ಹೈ ಅಲರ್ಟ್ ಘೋಷಣೆ ಮಲ್ದ್ಂಡ್. ಅಂಚನೆ ಪೊಣ್ಣನ ಕುಟುಂಬದಕ್ಲನ ನೆತ್ತೆರ್ ಬೊಕ್ಕ ಯೂರಿನ್ ದ ಸ್ಯಾಂಪಲ್ ನ್ ಲ್ಯಾಬ್ ಗ್ ಕಡಪಾದೆರ್.

ಪಾವಂಜೆ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಮೂಲ ಸೌಕರ್ಯಗ್ 4.5 ಕೋ.ರೂ. ಅನುದಾನ : ಉಮಾನಾಥ ಕೋಟ್ಯಾನ್

ಜ.19 ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ

ಹಳೆಯಂಗಡಿ : ಜೀರ್ಣೋದ್ಧಾರ ಆವೊಂದಿಪ್ಪುನ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ಮೂಲ ಸೌಕರ್ಯಗ್ ರಾಜ್ಯ ಸರ್ಕಾರೊರ್ದು 4.5 ಕೋಟಿ ರೂಪಾಯಿ ಅನುದಾನ ತಿಕ್ ದ್ಂಡ್ ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ತೆರಿಪಾಯೆರ್.


ಆರ್ ಮೂಲ್ಕಿ ತಾಲ್ಲೂಕುದ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನಡ್ ಜ.19ರಿಂದ ನಡಪರೆ ಉಪ್ಪುನ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ನ್ ಸೋಮಾರ ದೇವಲ್ಯದ ವಠಾರೊಡು ಬುಡುಗಡೆ ಮಲ್ತ್ ಪಾತೆರಿಯೆರ್. ರಾಜ ಮಾರ್ಗೊರ್ದು (ಹೆದ್ದಾರಿ) ನೇರವಾದ್ ದೇವಲ್ಯೊಗು ಪೊಗ್ಗುನ ಪೊಸತ್ತ್ ಸಂಪರ್ಕ ಮಾರ್ಗದ ಬೇಲೆ ಈ ಅನುದಾನೊರ್ದು ಆವೊಂದುಂಡು ಪಂಡೆರ್. ಮುಲ್ಕಿ ಬೆದ್ರ ವಿಧಾನ ಸಭಾ ಕ್ಷೇತ್ರದ ವಿವಿಧ ಧಾರ್ಮಿಕ ಕ್ಷೇತ್ರದ ಅಭಿವೃದ್ಧಿಗ್ 5 ಕೋಟಿ ರೂ.ದ ಸಕಾಯ ಕೊರ್ಪುನ ಭರವಸೆನ್ ಕುದ್ದು ಮುಖ್ಯಮಂತ್ರಿಲೇ ಕೊರ್ತೆರ್ ಪಂದ್ ಆರ್ ಪಂಡೆರ್. ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಬಿ. ಸೂರ್ಯಕುಮಾರ್ ಗುರ್ಕಾರ್ಮೆ ವಹಿಸ್ ದಿತ್ತೆರ್. ಧಾರ್ಮಿಕ ಚಿಂತಕೆರ್ ಕೃಷ್ಣ ಭಟ್ ಪಾವಂಜೆ ಅವರು ವಿವಿಧ ಧಾರ್ಮಿಕ ವಿಧಿ ವಿಧಾನ ಮುಕೇನ ಪ್ರಾರ್ತನೆ ಮಲ್ತೆರ್. ಜಿಲ್ಲಾ ಧಾರ್ಮಿಕ ಪರಿಷತ್‌ ದ ಸದಸ್ಯೆರ್ ಕೆ.ಭುವನಾಭಿರಾಮ ಉಡುಪ, ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಪ್ರಕಾಶ್ ಎನ್. ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ ನಾನಿಲ್, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾಯಿನ ಪಿ. ಗೋಪಾಲಕೃಷ್ಣ ರಾವ್, ರಘು ಕೆ. ದೇವಾಡಿಗ, ಸುಕುಮಾರ್ ಸಿ., ಜ್ಯೋತಿ ರಾಮಚಂದ್ರ, ಸುಲೋಚನ ಮಹಾಬಲ, ಹಳೆಯಂಗಡಿ ಗ್ರಾಮ ಪಂಚಾಯತ್ ದ ಅಧ್ಯಕ್ಷೆ ರ್ ಪೂರ್ಣಿಮಾ, ಸದಸ್ಯೆರಾಯಿನ ಸುಕೇಶ್ ಪಾವಂಜೆ, ಅಶ್ವಿನ್ ದೇವಾಡಿಗ, ಸವಿತಾ ಸಸಿಹಿತ್ಲು, ಪ್ರಧಾನ ಅರ್ಚಕೆರ್ ಪಿ. ವಾಸುದೇವ ಭಟ್, ಅರ್ಚಕೆರ್ ಪಿ. ಗಣೇಶ್ ಭಟ್, ಜೀರ್ಣೋದ್ಧಾರ ಸಮಿತಿದ ಪ್ರಮುಖೆರಾಯಿನ ವಿನೋದ್ ಬೊಳ್ಳೂರು, ರಾಮದಾಸ್ ಪಾವಂಜೆ, ಸುಧಾಕರ ಆರ್. ಅಮೀನ್, ಎಚ್. ಭಾಸ್ಕರ ಸಾಲ್ಯಾನ್, ಶಶೀಂದ್ರ ಅಮೀನ್, ಮೋಹನ್ ಸುವರ್ಣ, ಕಸ್ತೂರಿ ಪಂಜ, ಲೀಲಾ ಬಂಜನ್, ಜನಾರ್ದನ ಪಡುಪಣಂಬೂರು, ವಿಜಯಕುಮಾರ್ ಶೆಟ್ಟಿ ಕೊಲ್ನಾಡು, ಸೋಮನಾಥ ದೇವಾಡಿಗ, ಪ್ರಮೀಳಾ, ಹರೀಶ್ ಸಾಲ್ಯಾನ್ ಗುಡ್ಡೆಮನೆ, ಕೆಪಿಎಸ್ಕೆ ನಿರ್ದೇಶಕೆರ್ ಪಾವಂಜೆ ಮೋಹನ್ ರಾವ್ ಮೊಕುಲು ಮಾತ ಇತ್ತೆರ್.

ಅಮ್ಮೆರೆನೇ ಕೆರ್ದ್ 30 ತುಂಡು ಮಲ್ತ್ ದ್ ಬೋರ್ ವೆಲ್ ದ ಉಲಯಿ ಪಾಡಿನ ಮಗೆ..!!

ಬಾಗಲಕೋಟೆ: ಜಿಲ್ಲೆದ ಮುಧೋಳಡ್ ಮಗೆ ಒರಿ ಅಮ್ಮೆರೆನ್ ಕೆರ್ದ್ 30 ರ್ದ್ ಲ ಹೆಚ್ಚ ತುಂಡು ಮಲ್ತ್ ದ್ ಬೋರ್ ದ ಗುಂಡಿಗ್ ಪಾಡಿನ ಘಟನೆ ನಡತ್ಂಡ್.


ಪರಶುರಾಮ ಕುಳಲಿ (54) ಮೆರೆನ್ ಮಗೆ ವಿಠಲ ಕುಳಲಿ (20) ರಾಡ್ ಡ್ ಹಾಕ್ ದ್ ಕೆರ್ತೆರ್ ಪಂದ್ ತೆರಿದ್ ಬೈದ್ಂಡ್. ಅಮ್ಮೆರ್ ಮಗನ ನಡುಟ್ ಅಪಗಪಗ ಗಲಾಟೆ ಆವೊಂದು ಇತ್ತ್ಂಡ್. ಡಿಸೆಂಬರ್​ 6 ಕ್ ಪರ್ದ್ ಬತ್ತಿನ ಮಗಕ್ ಪರಶುರಾಮ ನೆರ್ದ್, ರಡ್ಡ್ ಪೆಟ್ಟ್ ಪಾಡ್ ದ್ ಬುದ್ಧಿ ಪಂತೆರ್. ನೇರ್ದ್ ಬೆಚ್ಚ ಆಯಿನ ಮಗೆ ವಿಠ್ಠಲೆ ಅಮ್ಮೆರೆಗ್ ರಾಡ್​ಡ್ ಹಾಕ್ ದ್ ಕೆರ್ತೆರ್. ಬೊಕ್ಕ ಪುನನ್ ದಕ್ಕೆರೆ ಮುಧೋಳ ಪೇಂಟೆರ್ದ್ ಪಿದಯಿದ ಮಂಟೂರ್ ಬೈಪಾಸ್ ಕೈತಲ್ ಇಪ್ಪುನ ಅಕಲ್ನನೇ ತೋಟಗ್ ಪೋತೆರ್. ತೋಟಡ್ ಇಪ್ಪುನ ಬೋರ್​ವೆಲ್​ಡ್ ಪುನ ಪಾಡಿಯರೆ ತೂದಿತ್ತೆ. ಆಂಡ ಅವು ಉಲಯಿ ಪೋಯಿಜಿ ಪಂದ್ ಕಡ್ಪತ್ತಿಡ್ 30ರ್ದ್ ಹೆಚ್ಚ ತುಂಡು ಮಲ್ತ್ ದ್, ಬೊಕ್ಕ ತುಂಡುಲೆನ್ ಬೋರ್ ದ ಉಲಯಿ ಪಾಡ್ದೆ. ಇತ್ತೆ ಕೆರ್ತಿನ ಇಚಾರ ಪೊಲೀಸೆರೆಗ್ ತೆರಿದ್, ಬೋರ್ ವೆಲ್ ಗುಂಡಿರ್ದ್ ಪುನತ್ತ ತುಂಡುಲೆನ್ ಜೆಸಿಬಿ ಬೊಕ್ಕ ಹಿಟಾಚಿರ್ದ್ ಪಿದಯಿ ದೆತೊಂದು ಉಲ್ಲೆರ್. ಈ ಬಗೆಟ್ ಮುಧೋಳ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಕೊಲೆ ಆರೋಪಿ ವಿಠಲನ್ ಅರೆಸ್ಟ್ ಮಲ್ದೆರ್.

ಪರ್ಪೆಲಗ್ ತಿಕ್ಕಿನ 10 ಲಕ್ಷ ರೂಪಾಯಿದ ನಿಜ ವಾರಸ್ದಾರೆರ್ ತಿಕಿಯೆರ್ !!

ಕುಡ್ಲ: ಕುಡ್ಲದ ಪಂಪ್‌ವೆಲ್‌ಡ್ ಕರಿನ ತಿಂಗೊಲು 10 ಲಕ್ಷ ರೂಪಾಯಿದ ನೋಟುದ ಕಟ್ಟ್ ಬೂರ್ದು ತಿಕಿನ ಕೇಸ್ ದ ಬಗೆಟ್ ಇತ್ತೆ ಕಾಸ್ ದ ವಾರಸುದಾರೆ ಒರಿ ಕಂಕನಾಡಿ ನಗರ ಪೊಲೀಸ್ ಸ್ಟೇಶನ್ ಗ್ ಬತ್ತ್ ದ್, ಯಾನ್ ಬಜ್ಜೆಯಿದ ಬೇರದಾಯೆ, ಕಾಸ್ ದೆತೊಂದು ಪೋನಗ ದಕ್ ದ್ ಪೋತುಂಡು. ಆಯಿಟ್ 10 ಲ.ರೂ ಇತ್ಂಡ್ ಪಂದ್ ಆರ್ ಪಂನ್ತೆರ್.


ನೆಕ್ ಪೊಲೀಸೆರ್ ಈ ಬಗೆಟ್ ಕೋರ್ಟುಡು ಇತ್ಯರ್ಥ ಮಲ್ಪುಲೆ ಪಂದ್ ಸೂಚನೆ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್.

ಕೆನಡಾಡ್ ಭಾರತ ಮೂಲದ ನಾಗರಿಕನ್ ಕೆರ್ನ ಬಚ್ಚಾಲಿಲು

ಟೊರೆಂಟೋ: ಕೆನಡಾಡ್ ಭಾರತ ಮೂಲದ ಸನ್ ರಾಜ್ ಸಿಂಗ್ (24) ಪನ್ಪುನ ಜವನನ್ ಬಚ್ಚಾಲಿಲು ಗುಂಡು ಪಾಡ್ದ್ ಕೆರ್ತೆರ್ ಪಂದ್ ಪೊಲೀಸೆರ್ ತೆರಿಪಾದೆರ್.

ಕೆನಡಾಡ್ ಇಂಚಿಪ್ಪದ ದಿನಟ್ ಭಾರತೀಯ ಮೂಲದಕ್ಲೆನ್ ಗುರಿ ಮಲ್ತ್ ದ್, ದಾಳಿಲು ಹೆಚ್ಚಾವೊಂದು ಉಂಡು. ಭಾರತ ವಿರೋಧದ ಚಟುವಟಿಕೆಲೆಗ್ ಕೆನಡಾ ಆಶ್ರಯ ತಾಣ ಆತ್ಂಡ್. ಪಂಜಾಬ್ ಡ್ ಭಯೋತ್ಪಾದನೆ ಚಟುವಟಿಕೆಗ್ ಮರು ಜೀವ ಕೊರಿಯೆರೆ ಕೆನಡಾಡ್ ಇಪ್ಪುನ ಕೆಲವು ಸಂಘಟನೆಲು ಪ್ರಯತ್ನ ಮಲ್ತೊಂದು ಉಲ್ಲ.

ಜ.29: ಅಬ್ಬಂಜರ ಟೀಮ್ ಎಎಫ್ ಸಿ ಮುತಾಲಿಕೆಡ್ ಮುಗೇರ ಬಂಧುಲೆನ ಅಂಡರ್ ಆರ್ಮ್ ಕ್ರಿಕೆಟ್ ಪಂತೊ

ಉಳ್ಳಾಲ: ಅಬ್ಬಂಜರ ಟೀಮ್ ಎ.ಎಫ್.ಸಿ ನೆತ್ತ ಮುತಾಲಿಕೆಡ್ ಸುರುತ ವರ್ಷದ ಮುಗೇರ ಬಂಧುಲೆನ ಅಂಡರ್ ಆರ್ಮ್ ಕ್ರಿಕೆಟ್ ಪಂತೊ, ಜನವರಿ 29 ಐತಾರ ಬೊಲ್ಪುಗು 8:30 ರ್ದ್ ಅಬ್ಬಂಜರ, ಉಳ್ಳಾಲ ಬೈಲ್ ಅನಿಲ್ ಕಂಪೌಂಡ್ ಕ್ರೀಡಾಂಗಣಡ್ ನಡಪರೆ ಉಂಡು.

ಈ ಪಂತೊಡ್ ಗೆಂದಿನಕ್ಲೆಗ್ ಸುರುತ ಇನಾಮು 15000 ರೂ. ಬೊಕ್ಕ ಎ.ಎಫ್. ಸಿ ಟ್ರೋಫಿ, ರಡ್ಡನೇ ಇನಾಮು 8000 ರೂ. ಲ ಬೊಕ್ಕ ಎ.ಎಫ್. ಸಿ ಟ್ರೋಫಿ ಬೊಕ್ಕ ಸರಣಿ ಶ್ರೇಷ್ಠ, ಪಂತೊ ಶ್ರೇಷ್ಠ, ಎಡ್ಡೆ ಬ್ಯಾಟ್ಸ್ ಮನ್, ಎಡ್ಡೆ ಬೌಲರ್ ಇಂಚ ಬೇತೆ ಬೇತೆ ಇನಾಮುಲು ಉಂಡು ಪಂದ್ ಉಳ್ಳಾಲ, ಅಬ್ಬಂಜರ ಟೀಮ್ ಎ.ಎಫ್. ಸಿ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.

ಬಿಎಂಟಿಸಿ ಬಸ್ ಗುದ್ದುದು ತೀರ್ ಪೋಯೆರ್ ಬೈಕ್ ರೈಡರ್

ಬೆಂಗ್ಲೂರ್: ರಾಜಬೂಡು ಬೆಂಗ್ಲೂರ್ ಡ್ ಬಿಎಂಟಿಸಿ ಬಸ್ ಗುದ್ದುದು ಬೈಕ್ ರೈಡರ್ ತೀರ್ ಪೋಯಿನ ಘಟನೆ ಪೀಣ್ಯಾದ 14ನೇ ಕ್ರಾಸ್ ದ ಕೈತಲ್ ನಡತ್ಂಡ್.

ತೀರ್ ಪೋಯಿನರ್ ದೀಪಕ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಬಸ್ ಡ್ರೈವರ್ ನ್ ಪೊಲೀಸೆರ್ ವಶಕ್ ಪಡೆತೆರ್.

You Missed