ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಕುಡ್ಲ: ರೈಲ್‌ಡ್‌ ಬಂಗಾರ್‌ ಕಂಡಿನ ಕಲ್ವೆರ್ ಅರೆಸ್ಟ್‌…!

ಕುಡ್ಲ: ಉತ್ತರ ಪ್ರದೇಶರ್ದ್ ವಿಮಾನಡ್‌ ಬತ್ತ್‌ದ್‌ ಕುಡ್ಲಡ್‌ ರೈಲ್‌ ಪ್ರಯಾಣಿಕೆರ್ನ ಬಂಗಾರ್‌ನ್‌ ಕಂಡೊಂದು ಇತ್ತಿನ ಕಲ್ವೆರೆನ್‌ ರೈಲ್ವೇ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್. ಉತ್ತರ ಪ್ರದೇಶದ ಮಿರ್ಜಾಪುರ ಜಿಲ್ಲೆಯ ಅಭಯರಾಜ್‌ ಸಿಂಗ್ (26) ಬೊಕ್ಕ ರಾಜ್ ಪುರದ ಹರಿಶಂಕರ್ (25) ಅರೆಸ್ಟ್‌ ಆಯಿನ ಆರೋಪಿಲು. ಅವೆಟ್‌ ಒರಿ ಪರಾರಿಯಾತೆ.
ಸೆಪ್ಟೆಂಬರ್ 28 ದಾನಿ ಕುಡ್ಲ ಬೊಕ್ಕ ಸುರತ್ಕಲ್ ನಡುಟು ಸಂಚಾರ ಮಲ್ತೊಂದು ಇತ್ತಿನ ರೈಲ್‌ಡ್‌ ಪ್ರಯಾಣಿಕೆರ್ನ ಬಂಗಾರ್‌ನ್‌ ಕಂಡಿನ ಬಗೆಟ್‌ ಕೇಸ್‌ ದಾಖಲಾದಿತ್ತ್‌ಂಡ್. ರೈಲ್‌ಡ್‌ ರಡ್ಡ್‌ ಜವನೆರ್ನ ಬಗ್ಗೆ ಸಂಶಯ ಆದ್‌ ಪೊಲೀಸೆರ್‌ ಪತ್ತೆ ಮಲ್ತ್‌ ವಿಚಾರಣೆ ಮಲ್ಪುನಗ ಕಂಡಿನ ಬಗೆಟ್‌ ಬಾಯಿ ಬುಡ್ತೆರ್. ಆರೋಪಿಲೆನ್ ಆರ್.ಪಿ.ಎಫ್ ತಂಡ ರೈಲ್ವೇ ಪೊಲೀಸೆರೆಗ್‌ ಒಪ್ಪಿಸಾದೆರ್.

ದಸರಾಗ್ ಪದವಿ ಕಲ್ಪಾರ್ಥಿಲೆಗ್ಲ ರಜೆ ಕೊರ್ಲೆ- ಶಾಸಕೆರ್ ಕಾಮತ್ ಆಗ್ರಹ

ಕುಡ್ಲ: ನನ ಕೆಲವೇ ದಿನಟ್ ಮಾರ್ನೆಮಿ ಸುರು ಆದ್, ಈ ನಿಟ್ಟ್ ಡ್ ಶಾಲೆದ ಜೋಕ್ಲೆಗ್ ಶಿಕ್ಷಣ ಇಲಾಖೆ ರಜೆ ಕೊರ್ತುನ ಎಡ್ದೆ ವಿಷಯ. ಆಂಡ ಕುಡ್ಲ ವಿಶ್ವವಿದ್ಯಾನಿಲಯ ಪದವಿ ಕಲ್ಪಾರ್ಥಿಲೆಗ್ ನನಲ ರಜೆ ಘೋಷಣೆ ಆವಂದೆ ಸಂಭ್ರಮ ಮಲ್ಪೆರೆ ಅಡ್ಡಿಯಾತ್ಂಡ್ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ತೆರಿಪಾಯೆರ್.
ಕುಡ್ಲ ದಸರಾ ಪರ್ಬಗ್ ಪೂರಕ ಆಪುನಂಚ ಪದವಿ ಕಲ್ಪಾರ್ಥಿಲೆಗ್ ರಜೆ ಕೊರ್ಪುನ ಬಗ್ಗೆ ಸಂಬಂಧಪಟ್ಟಿನಕ್ಲೆಗ್ ಒತ್ತಾಯ ಮಲ್ಪೆರೆ ಜೋಕ್ಲೆನ ಇಲ್ಲದಕುಲು ಎನಡ ಮನವಿ ಮಲ್ತ್ ದ್ ಕುಡ್ಲ ವಿಶ್ವವಿದ್ಯಾನಿಲಯ, ಜಿಲ್ಲಾಡಳಿತ, ಬೊಕ್ಕ ಸರ್ಕಾರಗ್ ಈ ಬಗ್ಗೆ ಕೂಡಲೇ ಕ್ರಮ ದೆತೊನಂಚ ಒತ್ತಾಯ ಮಲ್ಪುವೆ ಪಂದ್ ತೆರಿಪಾಯೆರ್. ದುಂಬುದ ನಮ್ಮ ಸರ್ಕಾರದ ಅವಧಿಡ್ ದಸರಾ ಪರ್ಬಗ್ ರಜೆಟ್ ಇತ್ತಿನ ವ್ಯತ್ಯಾಸನ್ ಸರ್ಕಾರದ ಮಟ್ಟಡೆ ಮಾರ್ಪಾಡು ಮಲ್ಪುನೆಟ್ಟ್ ಯಶಸ್ವಿಯಾದ್ ಇತ್ತೆ. ಆಂಡ ಪ್ರಸ್ತುತ ಕಾಂಗ್ರೆಸ್ ಸರ್ಕಾರ ಅಧಿಕಾರಡ್ ಇತ್ತ್ ದ್ ಹಿಂದೂ ಧಾರ್ಮಿಕ ಶ್ರದ್ದಾ ಭಾವನೆಲೆಗ್ ಏತ್ ಬೆಲೆ ಕೊರ್ಪೆರ್ ಪನ್ಪುನೆನ್ ಎನ್ನಿಂಡ ಬೇಜಾರ್ ಆಪುಂಡು.

ದಸರಾ ನಮ್ಮ ನಾಡ್ ದ ಗೌಜಿದ ಪರ್ಬ. ಕುಡ್ಲ ದಸರಾ, ಮೈಸೂರುರ್ದ್ ಬೊಕ್ಕ ಭಾರಿ ಜನಾಕರ್ಷಣೆ ಗಳಿಸಾವುನ ಪರ್ಬ ಆತ್ಂಡ್. ಅಂಚಾದ್ ನವರಾತ್ರಿನ್ ಕಲ್ಪಾರ್ಥಿಲು, ಶಿಕ್ಷಕೆರ್, ಪೋಷಕೆರ್, ಸೇರಿನಂಚ ಮಾತೆರ್ಲ ಸಂಭ್ರಮಡ್ ಆಚರಣೆ ಮಲ್ಪುಲಕ ರಜೆ ಕೊರೊಡ್ ಪಂದ್ ಸರ್ಕಾರನ್ ಆಗ್ರಹ ಮಲ್ತೆರ್.