Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

15 ದಿನಟ್ಟ್ ಭಾರತೀಯರೆಗ್ ಪ್ರವಾಸಿ ವೀಸಾ

ಅರ್ಜಿ ಸಂದಾಯಿನ 15 ದಿನಟ್ಟ್ ಭಾರತರ್ದ್ ಬರ್ಪಿನ ಪ್ರವಾಸಿಗೆರೆಗ್ ಪ್ರವಾಸಿ ವೀಸಾನ್ ಕೊರೊಂದುಲ್ಲ ಪಂದ್ ಬ್ರಿಟಿಷ್ ಹೈ ಕಮಿಷನರ್ ಅಲೆಕ್ಸ್ ಎಲ್ಲಿಸ್ ತೆರಿಪಾದೆರ್.

ಕೆಲ ಪ್ರಕರಣಡ್ ಉಂದು ಒಂತೆ ಸಮಯ ದೆತೊನುಂಡು. ಪ್ರವಾಸಿಗೆರೆಗ್ ಅಗತ್ಯ ಇತ್ತ್ಂಡ ಆದ್ಯತೆದ ವೀಸಾ ಮಾರ್ಗನ್ ಗಲಸೊಲಿ. ಅವೆನ್ 5 ದಿನಟ್ಟ್ ಕೊರ್ಪ. ಕಲ್ಪಾರ್ಥಿಲೆನ ವೀಸನ್‌ಲ ಎಚ್ಚದ ಸಂಖ್ಯೆಡ್ ಕೊರೊಂದುಲ್ಲ ಪಂದ್ ಪಂಡೆರ್.

ಕೃಷ್ಣಾ ತುದೆಟ್ ಮುರ್ಕುದು ಐನ್ ಜನ ಕಲ್ಪಾರ್ಥಿಲು ತೀರ್ ಪೋಯೆರ್

ವಿಜಯವಾಡ: ಕೃಷ್ಣಾ ತುದೆಟ್ ಮೀಯರೆ ಪೋಯಿನ ಏಳ್ ಕಲ್ಪಾರ್ಥಿಲೆಡ್ ಐನ್ ಜನ ತೀರ್ ಪೋಯಿನ ಘಟನೆ ಆಂಧ್ರಪ್ರದೇಶದ ಕೃಷ್ಣಾ ಜಿಲ್ಲೆದ ಯನಮಲ ಕುದೂರು ನಡತ್ಂಡ್.

ತೀರ್ ಪೋಯಿನಕ್ಲೆನ ಪುನನ್ ನಡೊಂದು ಉಲ್ಲೆರ್. ನೆಟ್ ತೀರ್ ಪೋಯಿನ ಕಲ್ಪಾರ್ಥಿಲು 13ರ್ದ್ 15 ವರ್ಷದ ಉಲಯಿ ದಕುಲು. 8 ಬೊಕ್ಕ 9ನೇ ಕ್ಲಾಸ್ ಡ್ ಕಲ್ತೊಂದು ಇತ್ತೆರ್. ಮೊಕುಲು ಪೂರ ಮೂಲತಃ: ವಿಜಯವಾಡದ ಪಟಮಾತಲಂಕಾ ನಿವಾಸಿಲು ಪಂದ್ ತೆರಿದ್ ಬೈದ್ಂಡ್. ಹಿರಿಯ ಅಧಿಕಾರಿಲು ಘಟನೆದ ಜಾಗೆಗ್ ಬತ್ ದ್, ತನಿಖೆ ಮಲ್ತೊಂದು ಉಲ್ಲೆರ್.

ಇನಿ ಪ್ರೊ ಕಬಡ್ಡಿ ಫೈನಲ್

ಪ್ರೊ ಕಬಡ್ಡಿ 9 ನೇ ಸೀಸನ್ ದ ಫೈನಲ್ ಪಂತೊ ಇನಿ ರಾತ್ರೆ 8 ಗಂಟೆಗ್ ಶುರು ಆಪುಂಡು.

ಜೈಪುರ ಪಿಂಕ್ ಪ್ಯಾಂಥರ್ಸ್ ಬೊಕ್ಕ ಪುಣೇರಿ ಪಲ್ವನ್ ತಂಡಲು ಪ್ರಶಸ್ತಿಗಾದ್ ಗೊಬ್ಬೆರೆ ಉಂಡು. 3 ನೇ ಸರ್ತಿ ಫೈನಲ್ ಪ್ರವೇಶ ಮಲ್ಪೆರೆ ಇಪ್ಪುನ ಜೈಪುರ 2 ನೇ ಸರ್ತಿ ಚಾಂಪಿಯನ್ ಆಪುನ ನಿರೀಕ್ಷೆಡ್ ಉಂಡು. ಪುಣೆ ಫೈನಲ್ ಗೆಂದಿಯೆರೆ ಎದುರು ತೂವೊಂದು ಉಂಡು.

ಐರ್ಲೆಂಡ್‌ ಗ್ ಭಾರತ ಮೂಲದ ಲಿಯೋ ವರಾಡ್ಕರ್ ಪ್ರಧಾನಿ

ಭಾರತ ಮೂಲದ ಲಿಯೋ ವರಾಡ್ಕರ್ 2 ನೇ ಸರ್ತಿ ಐರ್ಲೆಂಡ್ ದ ಪ್ರಧಾನಿಯಾದ್ ಪದಗ್ರಹಣ ಮಲ್ಪುವೆರ್.

ಮೇರ್ ಉಂದುವೇ ವಾರ ಪ್ರಮಾಣ ವಚನ ಸ್ವೀಕಾರ ಮಲ್ಪುವೆರ್. ಈ ನಿರ್ಧಾರನ್ ಐರ್ಲೆಂಡ್‌ ದ ರಡ್ಡ್ ರಾಜಕೀಯ ಪಕ್ಷಲೆನ ಮೈತ್ರಿಕೂಟ ದೆತೊಂದುಂಡು. ಮೆರೆನ ಪೊಪ್ಪ ಅಶೋಕ್ ಭಾರತದಾರ್, ಅಮ್ಮ ಐರ್ಲೆಂಡ್ ದಾರ್ ಪಂದ್ ತೆರಿದ್ ಬೈದ್ಂಡ್. ಅಂಚನೆ ಮೇರ್ ಐರ್ಲೆಂಡ್ ದ ಮಸ್ತ್ ಎಲ್ಯ ಪ್ರಾಯದ ಪ್ರಧಾನಿ ಪನ್ಪುನ ಪುದರ್ ಗ್ ಪಾತ್ರರಾತೆರ್.

ಉಜಿರೆ ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯಡ್ ಶಿವಲಿಂಗ ಪತ್ತೆ

ಬೊಲ್ತೇರ್: ಉಜಿರೆದ ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯಡ್ ಶಿವಲಿಂಗ ಪತ್ತೆಯಾತ್ಂಡ್. ನವೀಕರಣಗಾದ್ ಗ್ರಾಮಸ್ಥೆರ್ ದೈವಜ್ಞರೆರ್ದ್ ಅಷ್ಟಮಂಗಲ ಪ್ರಶ್ನೆ ದೀತಿನ ಪೊರ್ತುಡು ಡಿ. 16 ಕ್ಕ್ ದೇವಲ್ಯದ ಕುರುಹು ಇತ್ತಿನ ಮಣ್ಣ್‌ದ ಅಡಿಟ್ಟ್ ಶಿವಲಿಂಗವೊಂಜಿ ಪತ್ತೆಯಾತ್ಂಡ್.

ಈ ದೇವಲ್ಯಡ್ ಡಿ.8, 9, 15, 16 ಕ್ಕ್ ದೈವಜ್ಞೆರ್ ಆಯಿನ ನೆಲ್ಯಾಡಿ ಶ್ರೀಧರ ಗೋರೆ ಮೆರೆನ ಮುತಾಲಿಕೆಡ್ ಅಷ್ಟಮಂಗಲ ಪ್ರಶ್ನೆ ನಡತ್‌ದಿತ್ತ್ಂಡ್.

ಕುರುಕುರೇ ಪ್ಯಾಕೆಟ್ ಡ್ 500ರೂ.ನೋಟು!!

ರಾಯಚೂರು: ಜೋಕುಲು ತಿನ್ಪುನ ಕುರ್​ ಕುರೇ ಪ್ಯಾಕೆಟ್ ಡ್ 500ರೂಪಾಯಿದ ನೋಟು ಪತ್ತೆ ಆಯಿನ ಘಟನೆ ರಾಯಚೂರು ಜಿಲ್ಲೆ ಲಿಂಗಸುಗೂರು ತಾಲೂಕ್ ದ ಹುನೂರು ಗ್ರಾಮಡ್ ನಡತ್ಂಡ್.

ಬೇತೆ ಬೇತೆ ಕಂಪನಿಲೆನ 5 ರೂ. 2ರೂ‌.ದ ಕುರ್ ಕುರೆ ಪ್ಯಾಕೆಟ್​ಡ್ 500 ದ ನೋಟ್ ಲು ತಿಕಿನಿನೇ ತೂದು ಜನಕುಲು ದೆತೊನಿಯೆರೆ ರಾಶಿ ಬೂರ್ದೆರ್‌ ಪಂದ್ ತೆರಿದ್ ಬೈದ್ಂಡ್. ಒಂಜೊಂಜಿ ಪ್ಯಾಕೆಟ್​ಡ್ 5-6 ನೋಟ್​ಲು ತಿಕ್ಕ್ ಡ, ಕೆಲವೊಂಜೇಟ್ 2-3 ನೋಟುಲು ತಿಕ್ಕುದುಂಡು. ಇಂಚ ಬೇತೆ ಬೇತೆ ಪ್ಯಾಕೆಟ್ ಲೆಡ್ ಸುಮಾರ್ 20 ಸಾರದಾತ್ ಕಾಸ್ ಪತ್ತೆ ಆತ್ಂಡ್ ಪಂದ್ ವರದಿ ತೆರಿಪಾದ್ಂಡ್. ಒಂಜಿ ಇಲ್ಲದಕ್ಲೆಗ್ 12,500 ರೂಪಾಯಿ ತಿಕ್ಕ್ ದ್ಂಡ್. ಆಂಡ ಇಂಚ ತಿಕಿನ ನೋಟುಲು ನಿಜನಾ? ಅತ್ತ್ ಕಲ್ವ ನೋಟುಲಾ? ಪಂದ್ ನನ ತೆರಿದ್ ಬರೊಡಾತೆ.

ಮುಟ್ಟು ಜಪ್ಪುನಗ ಜಾರ್ದ್ ಬೂರ್ದು ಶಶಿ ತರೂರ್ ಗ್ ಪೆಟ್ಟ್

ಮುಟ್ಟು ಜಪ್ಪುನಗ ಜಾರ್ದ್ ಬೂರ್ದು ಕಾಂಗ್ರೆಸ್ ಸಂಸದೆರ್ ಶಶಿ ತರೂರ್ ಗ್ ಪೆಟ್ಟಾತ್ಂಡ್.

ಎಡತ ಕಾರ್ ದಪ್ಪ ಆದ್, ಚಿಕಿತ್ಸೆ ದೆತೊನೊಂದು ಉಲ್ಲೆರ್. ಇಂಚಾದ್ ಮೆರೆಗ್ ಸಂಸತ್ ಅಧಿವೇಶನಡ್ ಪಾಲ್ ಪಡೆಯೆರೆ ಆಪುಜಿ.‌ ಬೊಕ್ಕ ತನ್ನ ಲೋಕಸಭಾ ಕ್ಷೇತ್ರಡ್ ಅಟ್ಟಣೆ ಮಲ್ತಿನ ಲೇಸ್ ಡ್ ಪಾಲ್ ಪಡೆಯೆರೆ ಆವೊಂದು ಇಜ್ಜಿ ಪಂದ್ ಶಶಿ ತರೂರ್ ಪಂಡೆರ್.

ಕಾಂಗ್ರೆಸ್ ದ ಭಾರತ್ ಜೋಡೋ ಯಾತ್ರೆಗ್ ಇನಿ 100ನೇ ದಿನತ್ತ ಕುಷಿ

ದೌಸಾ: ಸೆಪ್ಟೆಂಬರ್ 7 ಕ್ ಕನ್ಯಾಕುಮಾರಿರ್ದ್ ಸುರು ಆಯಿನ ಕಾಂಗ್ರೆಸ್ ಸಂಸದೆರ್ ರಾಹುಲ್ ಗಾಂಧಿ ಮುತಾಲಿಕೆದ ಭಾರತ್ ಜೋಡೋ ಯಾತ್ರೆಗ್ ಶುಕ್ರಾರ (ಇನಿ) 100 ದಿನ ಆಂಡ್.

ಈ ಯಾತ್ರೆನ್ ವೈನಾಡ್ ಸಂಸದೆರ್ ರಾಹುಲ್ ಗಾಂಧಿ ಮೇರ್, ಪಕ್ಷದ ಮುಖಂಡೆರ್ ಬೊಕ್ಕ ಕಾರ್ಯಕರ್ತೆರೆನೊಟ್ಟಿಗೆ ಬೊಲ್ಪುಗು 6 ಗಂಟೆಗ್ ಮೀನಾ ಹೈಕೋರ್ಟ್, ದೌಸಾರ್ದ್ ಕೂಡ ಸುರು ಮಲ್ತಿನ ಬೊಕ್ಕ ಬೊಲ್ಪುಗು 11 ಗಂಟೆಗ್ ಗಿರಿರಾಜ್ ಧರಣ್ ದೇವಲ್ಯಡ್ ರೆಸ್ಟ್ ದೆತೊಂಡೆರ್. ಈ ಬಗೆಟ್ ಟ್ವೀಟ್ ಮಲ್ತಿನ ರಾಜ್ಯಸಭಾ ಸಂಸದೆರ್ ಬೊಕ್ಕ ಪಕ್ಷದ ಪ್ರಧಾನ ಕಾರ್ಯದರ್ಶಿ ಕೆಸಿ ವೇಣುಗೋಪಾಲ್, ‘ಇನಿ ಭಾರತ್ ಜೋಡೋ ಯಾತ್ರೆಗ್ 100 ದಿನ ಆಂಡ್. ದ್ವೇಷ, ಮತಾಂಧತೆ, ವಿಭಜನೆ, ಹಿಂಸೆ, ಅನ್ಯಾಯ, ನಿರುದ್ಯೋಗದ ವಿರುದ್ಧ ದೇಶನ್ ಒಟ್ಟು ಸೇರ್ಸಾವುಂಡು. ಈ ಯಾತ್ರೆ 8 ರಾಜ್ಯಲು ಬೊಕ್ಕ 2,763 ಕಿಮೀ ಸಂಚಾರ ಮಲ್ತಿನವು ಲಕ್ಷ ಲಕ್ಷ ಜನತ ಉಡಲ್ ಗೆಂದ್ದ್ಂಡ್. ಮೋಕೆ ಬೊಕ್ಕ ಸೌಹಾರ್ದತೆಗಾದ್ ಮತೆರೆಗ್ಲಾ ಸೊಲ್ಮೆಲು ಪಂದ್ ಪಂಡೆರ್.

ಪೆಟ್ರೋಲ್ ದ ಬಿಲೆ ಭಾರತಡ್ ಕಡಿಮೆ: ಸಚಿವೆರ್ ಹರ್ದೀಪ್ ಪುರಿ

ಬೇತೆ ದೇಶೊರ್ದು ಭಾರತಡೇ ಪೆಟ್ರೋಲ್ ಬೊಕ್ಕ ಡೀಸೆಲ್‌ ದ ಬಿಲೆ ಕಮ್ಮಿ ಉಂಡು ಪಂದ್ ಪೆಟ್ರೋಲಿಯಂ ಸಚಿವೆರ್ ಹರ್ದೀಪ್ ಪುರಿ ತೆರಿಪಾದೆರ್.


ಲೋಕಸಭೆಟ್ ಪ್ರಶ್ನೆಯೊಂಜೆಕ್ ಉತ್ತರ ಕೊರ್ನ ಮೇರ್, ಕೆಲವು ರಾಜ್ಯಲು ಇಂಧನದ ವ್ಯಾಟ್ ಕಡಿಮೆ ಮಲ್ದ್ಂಡ್. ಕೆಲವು ರಾಜ್ಯಲು ಪ್ರತಿ ಲೀಟರ್ ಪೆಟ್ರೋಲ್ ಗ್ 17 ರೂ. ವ್ಯಾಟ್ ಪಾಡ್ಡ್ಂಡ, ಕೆಲವು ರಾಜ್ಯಲು 32 ರೂ. ಪಾಡ್ದ ಪಂದ್ ಪಂಡೆರ್.

ನಮ್ಮೂರ ಆಟ ಕೂಟ ಟ್ರಸ್ಟ್ ದ “ನಮ್ಮ ಸಂಭ್ರಮ 2022” ಲೇಸ್ ದ ಲೆಪ್ಪೋಲೆ ಬುಡುಗಡೆ

ನಮ್ಮೂರ ಆಟ ಕೂಟ ಟ್ರಸ್ಟ್ (ರಿ.) ಮೊಕುಲೆನ ನಮ್ಮ ಸಂಭ್ರಮ 2022 ಲೇಸ್ ಕುಡ್ಲದ ಅಂಬೇಡ್ಕರ್ ಭವನ ಡ್ ಡಿ.24 ಸನಿವಾರ ಕಾಂಡೆ 9 ಗಂಟೆರ್ದ್ ರಾತ್ರೆ 10 ಗಂಟೆ ಮುಟ್ಟ ನಡಪರೆ ಉಂಡು. ಈ ಲೇಸ್‌ದ್ ಲೆಪ್ಪೋಲೆ ಬುಡುಗಡೆ ಕಾರ್ಯಕ್ರಮ ಡಿ.16 ತಾರೀಕ್ ಸುಕ್ರಾರದಾನಿ ಹೋಟೆಲ್ ಕುಡ್ಲ ಪೆವಿಲಿಯನ್ ಚಾವಡಿಡ್ ನಡತ್ಂಡ್.

ಇಂಟರ್‌ನ್ಯಾಷನಲ್ ಬಂಟ್ಸ್ ವೆಲ್‌ಫೇರ್ ಟ್ರಸ್ಟ್ (ರಿ.) ಸ್ಥಾಪಕಾಧ್ಯಕ್ಷೆರ್ ಅತ್ತೂರು ಸದಾನಂದ ಶೆಟ್ಟಿ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್.

ಅಯಿರ್ದ್ ಬೊಕ್ಕ ಪಾತೆರಿನ ಆರ್, ನಮ್ಮೂರ ಆಟ ಕೂಟ ಟ್ರಸ್ಟ್ ಸಮಾಜಗಾದ್ ಬೋಡಾದ್ ಎಡ್ಡೆಂತಿನ ಕಾರ್ಯಕ್ರಮನ್ ಮಲ್ತೊಂದು ಬರೊಂದುಲ್ಲೆರ್. ಅಂಚನೆ ಡಿ.16 ತಾರೀಕ್‌ಗ್ ನಮ್ಮ ಸಂಭ್ರಮ 2022 ಲೇಸ್‌ಡ್ ಶ್ರೀ ಸತ್ಯನಾರಾಯಣ ವೃತ ಮಹಾತ್ಮೆ, ಬಾಲ ಯಕ್ಷ ರಂಗಪ್ರವೇಶ ಪಂತೊ, ಸಾಧಕೆರೆಗ್ ಪ್ರಶಸ್ತಿ ಪಟ್ಟುನ ಲೇಸ್ ನಡಪರೆ ಉಂಡು. ಈ ಮಾತ ಕಾರ್ಯಕ್ರಮ ಪೊರ್ಲುಡು ರೀತಿಡ್ ಆವಡ್ ಪಂದ್ ಎಡ್ಡೆಪ್ಪುನು ಬಯಕ್ಯೆರ್.

ನಮ್ಮೂರ ಆಟ ಕೂಟ ಟ್ರಸ್ಟ್‌ದ ಮಹಾ ಪೋಷಕೆರ್ ತಾರಾನಾಥ್ ಶೆಟ್ಟಿ ಪಾತೆರ್ದ್, ಒಂಜಿ ಎಡ್ಡೆ ರೀತಿದ ಸಂಸ್ಥೆ ಕಟ್ಟ್‌ದ್ ಸಮಾಜಗ್ ಬೋಡಾದ್ ದಾದಾಂಡಲ ಮಲ್ಪೊಡು ಪನ್ಪಿನ ಪರಿಕಲ್ಪನೆ ಮುಲ್ಕಿ ಕರುಣಾಕರ ಶೆಟ್ಟೆ ಮೇರೆಗ್ ಬತ್ತಿತ್ತ್ಂಡ್. ಅಂಚನೆ ಯಕ್ಷಗಾನದ ಬಗೆಟ್ ನಡಪುನಂಚಿನ ಈ ಬೇಲೆ ಪೊರ್ಲುಡು ಅವಡ್ ಪಂದ್ ಪಂಡೆರ್. ಅಂಚನೆ ಟ್ರಸ್ಟ್‌ದ ಆಜೀವ ಸದಸ್ಯೆರ್ ಪಿ.ಎ ಪೂಜಾರ್ಲು ಲೇಸ್‌ಗ್ ಎಡ್ಡೆಪ್ಪುದ ಮದಿಪುನ್ ಪಂಡೆರ್.

ನಮ್ಮೂರ ಆಟ ಕೂಟ ಟ್ರಸ್ಟ್‌ದ ಸ್ಥಾಪಕ ಅಧ್ಯಕ್ಷೆರ್ ಮುಲ್ಕಿ ಕರುಣಾಕರ ಶೆಟ್ಟಿ ಪಾತೆರ್ದ್, ಉಂದು ಒಂಜಿ ಇಲ್ಲದ ಕಾರ್ಯಕ್ರಮ ಲೆಕ್ಕ ಆಪುಂಡು ದಾಯೆ ಪಂಡ ಮಾತ ಸದಸ್ಯೆರ್ ಈ ಲೇಸ್‌ಗ್ ಸಾಕಾರ ಮಲ್ಪುವೆರ್. ಯಕ್ಷಗಾನದ ಮಿತ್ತ್ ಮಸ್ತ್ ಮೋಕೆ ಇತ್ತಿನೆಡ್ದಾವರ ಈ ಕೂಟನ್ ಕಟ್ಟರೆ ಸಾಧ್ಯ ಆಂಡ್. ಡಿ. 24 ಕ್ಕ್ ನಡಪುನ ಈ ಲೇಸ್‌ಗ್ ಮಾತೆರ್ಲಾ ಬತ್ತ್‌ದ್ ಲೇಸ್‌ನ್ ಎಡ್ಡೆ ಮಲ್ತ್ ಕೊರ್ಲೆ ಪಂದ್ ಪಂಡೆರ್.

ಈ ಪೊರ್ತುಡು ನಮ್ಮೂರ ಆಟ ಕೂಟ ಟ್ರಸ್ಟ್‌ದ ಆಜೀವ ಸದಸ್ಯೆರ್ ಆಯಿನ ತುಕಾರಾಮ ಶೆಟ್ಟಿ ತೋಡ್ಲ, ಶಿಲ್ಪಾ ಹರೀಶ್ ಶೆಟ್ಟಿ, ಗಣೇಶ್ ಮಲ್ಲಿ, ದೇವಿ ಚರಣ್ ಶೆಟ್ಟಿ, ಪ್ರದೀಪ್ ಆಳ್ವ ಕದ್ರಿ ಲೇಸ್‌ಡ್ ಇತ್ತೆರ್.

You Missed