INDIA ಮೈತ್ರಿಕೂಟದ ಸಮನ್ವಯ ಸಮಿತಿ ಸಭೆ ಇನಿ ನಡಪರೆ ಉಂಡು.
2024ತ್ತ ಲೋಕಸಭೆ ಚುನಾವಣೆಗ್ ದೆತೊನೊಡಾಯಿನ ಕಾರ್ಯತಂತ್ರಲು, ಸೀಟು ಪಟ್ಟುನ, ಪ್ರಚಾರದ ತಯಾರಿಲೆನ ಬಗೆಟ್ಟ್ ಸದಸ್ಯೆರ್ ಇನಿ ಚರ್ಚೆ ನಡಪಾಯೆರೆ ಉಲ್ಲೆರ್.
ಇಂಚಿಪ್ಪ ಬೊಂಬೈಡ್ ನಡತಿನ ಸಭೆಟ್ಟ್ ಮೈತ್ರಿ ಪಕ್ಷಲೆನ ನಡುಟ್ಟ್ ಸಮನ್ವಯತೆ ಇಪ್ಪೊಡು ಪಂದ್ ಸಮಿತಿ ರಚನೆ ಮಲ್ದೆರ್. ಈ ಸಮಿತಿಡ್ ವಿರೋಧ ಪಕ್ಷದ 13 ಸದಸ್ಯೆರ್ ಉಲ್ಲೆರ್.
ಬೋಲ್ತೆರ್ : ಲಾಯಿಲ ಗ್ರಾಮದ ಕಾಶಿಬೆಟ್ಟು ಮಲ್ಲಿಕಾ ಮೆರ್ನ ಮಗೆ ರಂಜಿತ್ ಕುಮಾರ್ ಆರ್ , ಪೂರ್ಣಪ್ರಜ್ಞ ಇನ್ಸ್ಟಿಟ್ಯೂಟ್ ಆಫ್ ಸೈಂಟಿಫಿಕ್ ರಿಸರ್ಚ್ ಬೆಂಗಳೂರು ಮೂಲು ಡಾ|ಸುಜಿತ್ ಸರ್ಕಾರ್ ಅರೆನ ಮಾರ್ಗದರ್ಶನಡ್ ಥಿಯರಿಟಿಕಲ್ ಫಿಸಿಕ್ಸ್ ಡ್ ಸಂಶೋಧನೆ ನಡಪಾದ್ ಮಂಡನೆ ಮಲ್ತಿನ ಪ್ರಬಂಧಗ್ ಮಣಿಪಾಲ್ ಅಕಾಡೆಮಿ ಆಫ್ ಹೈಯರ್ ಎಜುಕೇಶನ್ ((MAHE) ರ್ದ್ Ph.D ಪದವಿನ್ ಪಡೆಯೊಂದೆರ್.
ಮೇರ್ ಸಂತ ತೆರೇಸಾ ಪ್ರೌಢಶಾಲೆ, ವಾಣಿ ಪದವಿ ಪೂರ್ವ ಕಾಲೇಜು ಬೊಕ್ಕ ಉಜಿರೆ SDM ಕಾಲೇಜ್ ದ ಪರ ಕಲ್ಪಾರ್ಥಿ.
ಸಂಶೋಧನಾ ಅವಧಿಡ್ ಮೆರೆನ 15 ಸಂಶೋಧನಾ ಲೇಖನಲು ಅಂತರರಾಷ್ಟ್ರೀಯ ಪತ್ರಿಕೆಲೆಡ್ ಪ್ರಕಟ ಆತ್ಂಡ್. ಸಂಶೋಧನೆ ಆಧಾರಿತವಾಯಿನ ರಾಷ್ಟ್ರೀಯ ಮಟ್ಟದ ಡಾ| ಕೆ.ವಿ. ರಾವ್ ಸೈಂಟಿಫಿಕ್ ಸೊಸೈಟಿದಕುಲ್ ಪ್ರತಿ ವರ್ಷ ಕೊರ್ಪುನ “ಅತ್ಯುತ್ತಮ ಸಂಶೋಧನಾ ಪ್ರಶಸ್ತಿ ” 2023 ಟ್ಟ್ ಪಡೆಯೊಂದೆರ್. ಕೇಂದ್ರ ಸರಕಾರದ, ಡಿಪಾರ್ಟ್ಮೆಂಟ್ ಆಫ್ ಸೈನ್ಸ್ & ಟೆಕ್ನಾಲಜಿ ರ್ದ್, “ಕ್ಲಿಷ್ಟವಾದ ಸಂಶೋಧನಾ ವಿಷಯಗಳನ್ನು ಜನಸಾಮಾನ್ಯರಿಗೆ ಸುಲಭವಾಗಿ ಅರ್ಥವಾಗುವಂತೆ ಮಾಡುವುದು” ಪನ್ಪುನ ವಿಷಯದ ಬಗ್ಗೆ ಬರೆನ ಲೇಖನಗ್ “ಬೆಸ್ಟ್ ಸೈನ್ಸ್ ಸ್ಟೋರಿ ಅವಾರ್ಡ್” ಪಡೆಯೊಂದೆರ್.
ಕೊಕ್ಕಡ: ಸೌತಡ್ಕ ಶ್ರೀ ಮಹಾಗಣಪತಿ ಕ್ಷೇತ್ರಡ್ ಶ್ರೀ ಗಣಪತಿ ಚೌತಿದ ಲೆಕ್ಕಡ್ ಸೆ.19 ಅಂಗಾರೆದಾನಿ 108 ತಾರಾಯಿದ ಗಣಹೋಮ ಬೊಕ್ಕ ರಂಗಪೂಜೆ, ಮಹಾಪೂಜೆ ನಡಪೆರೆ ಉಂಡು.
ಅoಚಾದ್ ಮಾತಾ ಭಕ್ತಾಭಿಮಾನಿಲು ಬತ್ತ್ ದ್ ದೇವೆರ್ನ ತೀರ್ಥ ಪ್ರಸಾದ ಸ್ವೀಕಾರ ಮಲ್ತ್ ಗಣಪತಿ ದೇವೆರ್ನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ಬೊಂಬೈ ಮುತಾಲಿಕೆಡ್ 169ನೇ ಬ್ರಹ್ಮ ಶ್ರೀ ನಾರಾಯಣ ಗುರು ಜಯಂತಿ ಆಚರಣೆ ಬೊಕ್ಕ ಸಮುದಾಯದ ಕಲ್ಪಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಪಟ್ಟುನ ಲೇಸ್ ಸೆ.17 ಕ್ಕ್ ಕೆಂಟಿಲಾಲ್ ಮಿಥೈವಾಲಾದ ಪಿರವು, ಸರ್ವೋದಯ ನಗರಡ್ ನಡಪರೆ ಉಂಡು.
ಬೊಕ್ಕ ಉದಿಪನ ಲೇಸ್ ಆದ್ ಸ್ವಾಮಿ ನಿತ್ಯಾನಂದ ಶ್ರೀ ಕೃಷ್ಣ ಭಜನಾ ಮಂಡಳಿದಕ್ಲೆರ್ದ್ ಭಜನೆ ಪ್ರತಿಷ್ಠಿತ ಪ್ರಶಸ್ತಿ ಪಟ್ಟುನ ಲೇಸ್, ಮಂಗಳಾರತಿ, ತೀರ್ಥಪ್ರಸಾದ ಸೇವೆ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಸಮಿತಿದ ಸದಸ್ಯೆರ್, ಅರ್ಚಕೆರ್, ಶಿಕ್ಷಣ ಸಮಿತಿ, ಪೂಜಾ ಸಮಿತಿ, ಮಹಿಳಾ ವಿಭಾಗ, ಯುವ ವಿಭಾಗ, ಸದಸ್ಯತ್ವ ಸಮಿತಿ ಬೊಕ್ಕ ಕಾರ್ಯಕ್ರಮಲು, ಸಾರ್ವಜನಿಕ ಸಂಪರ್ಕ ಸಮಿತಿ ಲೆಪ್ಪೋಲೆಡ್ ತೆರಿಪಾದೆರ್.
ಸಿಬ್ಬಂದಿ ಆಯ್ಕೆ ಸಮಿತಿಡ್ ಖಾಲಿ ಇಪ್ಪುನ 7547 ಕಾನ್ಸ್‌ಟೇಬಲ್ ಬೇಲೆಗ್ ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ.
ಅರ್ಜಿ ಸಂದಾವೊನ ಅಭ್ಯರ್ಥಿಡ ಪಿಯುಸಿ, ಡ್ರೈವಿಂಗ್ ಲೈಸೆನ್ಸ್ ಕಡ್ಡಾಯವಾದ್ ಇಪ್ಪೊಡು. ಅಂಚೆನೆ ಅಭ್ಯರ್ಥಿಲೆನ್ CBT, ದೈಹಿಕ ದಕ್ಷತೆ ಪರೀಕ್ಷೆ, ವೈದ್ಯಕೀಯ ಪರೀಕ್ಷೆದ ದಾಖಲೆನ್ ಪರಿಶೀಲನೆ ಮಲ್ತ್ ದ್ ಆಯ್ಕೆ ಮಲ್ಪುವೆರ್. ಅರ್ಜಿ ಸಂದಾಯೆರೆ ಸೆ.30 ಅಕೇರಿದ ತಾರೀಕ್ ಆತ್ಂಡ್. ಎಚ್ಚದ ಪೊಲಬುನ್ ವೆಬ್ ಸೈಟ್ https://ssc.nic.in/ ಪಡೆವೊಲಿ.
ದಕ್ಷಿಣ ಕನ್ನಡ ಜಿಲ್ಲೆದ ಬೊಲ್ತೇರ್ ತಾಲೂಕ್ ದ ಕಿಲ್ಲೂರ್ ನಿವಾಸಿ ದೇವರಾವ್ ಮೇರ್ ರಾಷ್ಟ್ರಪತಿ ಮುರ್ಮು ಮೆರೆರ್ದ್ ಪ್ರಶಸ್ತಿ ಸ್ವೀಕಾರ ಮಲ್ದೆರ್.
ಭಾರತೀಯ ಕೃಷಿ ಸಂಶೋಧನಾ ಮಂಡಳಿ ಡೆಲ್ಲಿಡ್ ಅಟ್ಟಣೆ ಮಲ್ತಿನ ಲೇಸ್ ಡ್ ಈ ಪ್ರಶಸ್ತಿನ್ ಪ್ರದಾನ ಮಲ್ದೆರ್.
ದೇವರಾವ್ ಮೇರ್ ಆರೆಗ್ ಇಪ್ಪುನ 5 ಎಕ್ರೆ ಕಂಡಡ್ 175 ಬಿದೆತ್ತ (ತಳಿ) ನೇಜಿನ್ ಬುಲೆಪಾದೆರ್. ಅತ್ತಂದೆ ಕರಿನ 25 ವರ್ಷೊರ್ದಿಂಚ 50 ಕ್ವಿಂಟಲ್ ಬಾರ್ ಬುಲೆತೆರ್. ಒವ್ವೇ ಬಾರ್ ದ ಬಿದೆ ತೂಂಡಲ ಪತ್ತೆ ಮಲ್ಪುನ ಸಾಮರ್ಥ್ಯ ಮೆರೆಗ್ ಉಂಡು.
ಧರ್ಮಸ್ಥಳ: ಶ್ರೀ ರಾಮ ಕ್ಷೇತ್ರ ಮಹಾಸಂಸ್ಥಾನದ ಜಗದ್ಗುರು ಪೀಠದ ಪೀಠಾಧೀಶೆರಾಯಿನ ಸದ್ಗುರು ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿ ಸೆ.14 ರ್ದ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ನೇ ಪುಟ್ಟುದಿನ ದಿನತ ಗುರುವಂದನಾ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್.
ಈ ಲೆಕ್ಕೊಡು ಆರ್ ದುಬೈ ಬೊಕ್ಕ ಬಹರೈನ್ ಗ್ ಪ್ರವಾಸ ಪಡೊಂದೆರ್. ದುಬೈ ಬೊಕ್ಕ ಬಹರೈನ್ ಡ್ ಗುರುವಂದನಾ ಲೇಸ್ ಡ್ ಪಾಲ್ ಪಡೆದ್ ಒಂಜಿ ವಾರ ಅಲ್ಪದ ಗುರುನಾರಾಯಣ ಸ್ವಾಮಿಲೆನ ಭಕ್ತೆರೆನ್ ಭೇಟಿ ಮಲ್ಪೆರೆ ಉಲ್ಲೆರ್ ಪಂದ್ ಗುರುದೇವ ಮಠದ ಪ್ರಕಟನೆಡ್ ತೆರಿಪಾದೆರ್.
ಕುಡ್ಲ : ಹಿಂದೂ ಯುವ ಸೇನಾ ಮುತಾಲಿಕೆಡ್ ಕುಡ್ಲದ ನೆಹರೂ ಮೈದಾನಡ್ ಸಾರ್ವಜನಿಕ ಗಣೇಶೋತ್ಸವ ಸೆ.19-25 ಮುಟ್ಟ ನಡಪರೆ ಉಂಡು. ನೆತ್ತ ಅಟ್ಟಣೆದ ಸಭೆ ಬಲ್ಮಠದ ಸೇನಾ ಕಾರ್ಯಾಲಯಡ್ ನಡತ್ಂಡ್.
ಹಿಂದೂ ಯುವ ಸೇನಾದ ಮಾನಾದಿಗೆ ಗುರ್ಕಾರೆ ಭಾಸ್ಕರಚಂದ್ರ ಶೆಟ್ಟಿ, ಗುರ್ಕಾರೆ ಯಶೋಧರ ಚೌಟ, ಕುಡ್ಲ ಗಣೇಶೋತ್ಸವ ಸಮಿತಿದ ಗುರ್ಕಾರೆ ಶಶಿಕಾಂತ್ ನಾಗ್ವೇಕರ್ ಚೌತಿದ ಅಟ್ಟಣೆದ ಬಗೆಟ್ಟ್ ಪೊಲಬು ಕೊರಿಯೆರ್.
ಈ ಪೊರ್ತುಡು ಹಿಂದೂ ಯುವ ಸೇನಾ ಪ್ರಧಾನ ಕಾರ್ಯದರ್ಶಿ ಪದ್ಮನಾಭ ನಾವೂರು, ಗಣೇಶೋತ್ಸವ ಸಮಿತಿ ಪ್ರಧಾನ ಕಾರ್ಯದರ್ಶಿ ರಾಮಚಂದ್ರ ಚೌಟ, ಉಪಾಧ್ಯಕ್ಷೆರ್ ಸುಕುಮಾರ್ ಸುರತ್ಕಲ್, ಕೊರಗಪ್ಪ ಶೆಟ್ಟಿ ಆಕಾಶ ಭವನ, ಧರ್ಮೇಂದ್ರ ಎಂ.ಪಿ, ಯಾಧವ ಕುಂದರ್ ವಾಮಂಜೂರು, ಕೋಶಾಧಿಕಾರಿ ಸುರೇಶ್ ಶೆಟ್ಟಿ ಕೊಟ್ಟಾರ ಕ್ರಾಸ್, ಲೆಕ್ಕ ಪರಿಶೋಧಕೆರ್ ಕೇಶವ ಸಾಲ್ಯಾನ್, ಜಿಲ್ಲಾ ಕಾರ್ಯದರ್ಶಿ ರವಿಚಂದ್ರ ಎಕ್ಕೂರು ಬೊಕ್ಕ ಬೇತೆ ಬೇತೆ ಶಾಖೆಲೆನ ಪದಾದಿಕಾರಿಲು, ಗಣೇಶೋತ್ಸವ ಸಮಿತಿ ಪದಾದಿಕಾರಿಲು, ಮಾತೃ ಮಂಡಳಿ, ಹಿಂದೂ ಯುವ ಸೇನಾ ಸೇವಕ್ ಕೂಟದ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಕಾರ್ಯದರ್ಶಿ ಪ್ರವೀಣ್ ಎಸ್ ಕುಂಪಲ ಎದ್ಕೊನಿಯೆರ್.
ನವಚೇತನ ಸೇವಾ ಬಳಗ (ರಿ.) ತೋಡಾರು ಸಂಸ್ಥೆದ 86ನೇ ಸೇವಾ ಯೋಜನೆದ ಲೆಕ್ಕೊಡು ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ಮುಲ್ಕಿ ತಾಲೂಕ್ ಹಳೆಯಂಗಡಿ ಕೈತಲ್ದ ಚೇಳಾಯಿರು ನಿವಾಸಿ ಕುಸುಮ ಮೇರ್ ಪಿತ್ತಕೋಶದ ಕ್ಯಾನ್ಸರ್ ದ ಸಮಸ್ಯೆಡ್ ಉಲ್ಲೆರ್. ಇತ್ತೆ ಮೆರೆಗ್ ಇಂಡಿಯನ್ ಆಸ್ಪತ್ರೆಡ್ ಕಿಮೋಥೆರಪಿ ಚಿಕಿತ್ಸೆ ನಡತೊಂದು ಉಂಡು. ಮಸ್ತ್ ಬಡಪತ್ತ್ ದ ಕುಟುಂಬ ಆಯಿರ್ನೆದಾವೆರ ಒರ್ತಿ ಮಗಲೆರ್ದ್ ಇಲ್ಲದ ಮಾತ ಜಬದಾರಿನ್ ದೆತೊನಿಯೆರೆ ಆವೊಂದು ಇಜ್ಜಿ. ಅಂಚಾದ್ ನವಚೇತನ ಸೇವಾ ಬಳಗ (ರಿ.) ತೋಡಾರು ಕೂಟರ್ದ್ ಪನವುದ ಸಕಾಯಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಈ ಬಿನ್ನಾಪುಗ್ ಸ್ವಂದಿಸಾಯಿನ ಕೂಟ 15 ಸಾರ ರೂ.ದ ಪನವುದ ಸಕಾಯನ್ ಕೂಟದ ಸದಸ್ಯೆರೆನ ಸಮ್ಮುಖಡ್ ಕೊರ್ತುಂಡು.
ಏಷ್ಯಾಕಪ್ ಡ್ ಎಲ್ಲೆ ಶ್ರೀಲಂಕಾ ಬೊಕ್ಕ ಪಾಕಿಸ್ತಾನದ ನಡುಟ್ಟ್ ಮಹತ್ವದ ಪಂತೊ ನಡಪರೆ ಉಂಡು.
ಸೂಪರ್4 ಟ್ಟ್ ಭಾರತ ರಡ್ಡ್ (ಶ್ರೀಲಂಕಾ, ಪಾಕಿಸ್ತಾನ) ಪಂತೊ ಗೆಂದಿರ್ನೆದಾವೆರ ಫೈನಲ್ ಗ್ ಬೈದ್ಂಡ್. ಕುಡೊಂಜಿ ತಾನಗ್ ಪಾಕಿಸ್ತಾನ ಬೊಕ್ಕ ಶ್ರೀಲಂಕಾ ನಡುಟ್ಟ್ ಪಂತೊ ನಡಪರೆ ಉಂಡು.
ಕೊಲೊಂಬೋದ ಪ್ರೇಮದಾಸ ಮೈದಾನಡ್ ನಡಪುನ ಈ ಪಂತೊ ಸೆಮಿಫೈನಲ್ ದಾತ್ ಮಲ್ಲ ಮಹತ್ವ ಪಡೆತ್ಂಡ್. ಬರ್ಸರ್ದ್ ಉಂತಿನ ಪಂತೊ ಕ್ಯಾನ್ಸಲ್ ಆಂಡ, ನೆಟ್ ರನ್ ರೇಟ್ ಆಧಾರಡ್ ಶ್ರೀಲಂಕಾ ಫೈನಲ್ ಗ್ ಬರ್ಪುಂಡು.
