ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಫೆ.9: “ನಾನ್ ವೆಜ್’ ಪಿಕ್ಚರ್ ನಾಲ್ ಭಾಷೆಡ್ ಬುಡುಗಡೆ

ಎಕ್ಕಸಕ್ಕ ಬೊಕ್ಕ ಪಿಲಿಬೈಲ್ ಯಮುನಕ್ಕ ಪಿಕ್ಚರ್ ಲು ತುಳು ಚಿತ್ರರಂಗಡ್ ನೆಂಪುಡು ಇಪ್ಪುಲೆಕ್ಕ ಸಾಧನೆ ಮಲ್ದೆರ್ ಪಂಡ ಆಯಿಕ್ಕ್ ಕಾರಣ ಆ ಪಿಕ್ಚರ್ ದ ನಿರ್ದೇಶಕೆರ್ ಸೂರಜ್ ಶೆಟ್ಟಿ.

ತುಳು ಚಿತ್ರರಂಗಡ್ ಸುಮಾರ್ ಸಾಧನೆ ಮಲ್ತಿನ ಕುಡೊಂಜಿ ಪಿಕ್ಚರ್ ಚಾಲಿಪೋಲಿಲು ಬೊಕ್ಕ ದಬಕ್ ದಬಾ ಐಸಾ. ನೆತ್ತ ಯಶಸ್ವಿಗ್ ಮಲ್ಲ ಕೊಡುಗೆ ಕೊರ್ತುನೇ ನಿರ್ಮಾಪಕೆರ್ ಪ್ರಕಾಶ್ ಪಾಂಡೇಶ್ವರ.‌

ಇತ್ತೆ ಈ ರಡ್ಡ್ ಸಾಧಕೆರ್ ಸೇರ್ದ್ ನಾಲ್ ಭಾಷೆಡ್ “ನಾನ್ ವೆಜ್” ಪನ್ಪುನ ಪಿಕ್ಚರ್ ನ್ ಕನವೊಂದು ಉಲ್ಲೆರ್. ಈ ಪಿಕ್ಚರ್ ದುಂಬುದ ಮಾತ ದಾಖಲೆನ್ ಮಾಜಾವುನಂಚ ಎಡ್ಡೆ ಗುಣಮಟ್ಟರ್ದ್ ನಿರ್ಮಾಣ ಆವೊಂದು ಉಂಡು.

ಪಿಕ್ಚರ್ ದ ಕೆಲಸ ಆವೊಂದು ಉಂಡು. ತುಳು, ಕನ್ನಡ, ಮಲಯಾಳಂ ಬೊಕ್ಕ ತಮಿಳ್ ಭಾಷೆಡ್ ಈ ಪಿಕ್ಚರ್ ಫೆಬ್ರವರಿ 9 ಕ್ಕ್ ಬುಡುಗಡೆ ಆಯೆರೆ ಉಂಡು. ಉಂದೊಂಜಿ ಭಿನ್ನ ಕಥೆ, ಕುಟುಂಬ ಸಮೇತೆರಾದ್ ತೂಪುನ ಎಡ್ಡೆ ಸಂದೇಶ ಬೊಕ್ಕ ಹಾಸ್ಯ ಇಪ್ಪುನ ಇಪ್ಪುನ ಪಿಕ್ಚರ್ ಆತ್ಂಡ್. ಕಾಲೇಜ್ ಕಲ್ಪಾರ್ಥಿಲು ಬೊಕ್ಕ ಅಕ್ಲೆನ ಪೋಷಕೆರ್ ತೂವೊಡೇ ಆಯಿನ ಪಿಕ್ಚರ್. ಕೇವಲ ಹಾಸ್ಯ ಮಾತ್ರ ಅತ್ತಂದೆ ಇತ್ತೆದ ಯುವ ಪೀಳಿಗೆದ ಅಂತರಂಗನ್ ತೂಪಾವುನ ಕಥೆ ಈ ಪಿಕ್ಚರ್ ಡ್ ಉಂಡು.

ಈ ಪಿಕ್ಚರ್ ದ ಪ್ರಮುಖ ಪಾತ್ರಡ್ ಕಾಂತಾರ ಖ್ಯಾತಿದ ‌ಪ್ರಕಾಶ್ ತೂಮಿನಾಡ್, ದೀಪಕ್ ಪಾಣಾಜೆ, ‘ಮ್ಯಾನ್ ಆಫ್ ದ ಮ್ಯಾಚ್ ಖ್ಯಾತಿದ ಅಥರ್ವ ಪ್ರಕಾಶ್, ಪುಗರ್ತೆದ ಹಿರಿಯ ನಟೆ ನವೀನ್ ಡಿ ಪಡೀಲ್ ಅಭಿನಯ ಮಲ್ದೆರ್. ನಾಯಕಿಯಾದ್ ಸಂಜನಾ ಬುರ್ಲೆ ನಟನೆ ಮಲ್ದೆರ್. ಅಥರ್ವ ಪ್ರಕಾಶ್ ಮೇರ್ ಇತ್ತೆನೆ ಡಿ ಸತ್ಯ ಪ್ರಕಾಶ್ ನಿರ್ದೇಶನದ ಮ್ಯಾನ್ ಆಫ್ ದ ಮ್ಯಾಚ್, ಚೇತನ್ ಮುಂಡಾಡಿ ನಿರ್ದೇಶನದ ಭಾವಪೂರ್ಣ, ನಟರಾಜ್ ನಿರ್ದೇಶನದ ಆರ್ ಐಪಿ ಬೊಕ್ಕ ಚಂಡಿಕೋರಿ, ಚಾಲಿಪೋಲಿಲು, ದಬಕ್ ದಬಾ ಐಸಾ, ಬರ್ಸ, ಅಮ್ಮೆರ್ ಪೊಲೀಸ್, ಪೆಪ್ಪೆರೆ ಪರೆರೆರೆ ಇಂಚ ಸುಮಾರ್ ಪಿಕ್ಚರ್ ಡ್ ನಟನೆ ಮಲ್ತ್ ದ್ ಮಾತೆರೆರ್ದ್ ಲ ಭೇಷ್ ಪನ್ಪಾಯಿನ ಯುವ ನಾಯಕ ನಟೆ.

ಮೇರ್ ಇಡೇ ಮುಟ್ಟ ಮಲ್ತಿನ ಮಾತ ಪಿಕ್ಚರ್ ಡ್ ಎಡ್ಡೆ ನಟನೆದ ಮುಖೇನ ಬೇತೆ ಬೇತೆ ಭಾಷೆದ ನಿರ್ದೇಶಕೆರೆನ ಗಮನ ಸೆಳೆತೆರ್. ನೆತ್ತೊಟ್ಟಿಗೆ ಬೇತೆ ಪುಗರ್ತೆದ ನಾಯಕೆರ್ ಈ ಪಿಕ್ಚರ್ ಡ್ ಇಪ್ಪುನವು ಸಹಜವಾದ್ ಎಚ್ಚದ ನಿರೀಕ್ಷೆ ಮೂಡಿಸಾದ್ಂಡ್.

ನಾನ್ ವೆಜ್ ದ ಕಥೆ, ಚಿತ್ರಕಥೆ ಬೊಕ್ಕ ನಿರ್ದೇಶನದ ಸೂರಜ್ ಶೆಟ್ಟಿ ನವೇ ಆತ್ಂಡ್. ಉಂದು ಪ್ರಕಾಶ್ ಪಾಂಡೇಶ್ವರ ಮೆರೆನ ಜಯಕಿರಣ ಫಿಲಂಸ್ ದ ಮೂಜಿನೇ ಪಿಕ್ಚರ್. 2014 ಟ್ಟ್ ಚಾಲಿಪೋಲಿಲು ಪಿಕ್ಚರ್ ದ ಬೊಕ್ಕ 2016 ಟ್ಟ್ ದಬಕ್ ದಬಾ ಐಸಾ ಮಲ್ದೆರ್. ಅವು ಆದ್ 7 ವರ್ಷೊದ ಬೊಕ್ಕ ನಾನ್ ವೆಜ್ ತಯಾರ್ ಅವೊಂದು ಉಂಡು. ಇಡೇ ಮುಟ್ಟದ ಬುಲೆವಣಿಗೆದ ಪ್ರಕಾರ ನಾನ್ ವೆಜ್ ತುಳು ಪಿಕ್ಚರ್ ಡ್ ಎಡ್ಡೆ ತಾನಡ್ ಉಂತುನ ಮತ ಸಾಧ್ಯತೆ ಉಂಡು.

ಕೊಡೆತ್ತೂರು ಅರಸು ಕುಂಜರಾಯ ದೈವೊಲ್ಯದ ಜೀರ್ಣೋದ್ದಾರದ ನಿಲೆಟ್ಟ್ ಸಂಕೋಚ ಪೂಜೆ

ಕಿನ್ನಿಗೋಳಿ: ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯದ ಜೀರ್ಣೋದ್ದಾರದ ತಯಾರಿಯಾದ್ ಸಂಕೋಚ ಪೂಜೆ ದೇವಸ್ಯ ಮಠ ವೇದವ್ಯಾಸ ಉಡುಪ ಮೆರೆನ ಮುತಾಲಿಕೆಡ್ ಬುಧಾರ ನಡತ್ಂಡ್.

ಈ ಪೊರ್ತುಡು ಶಾಸಕೆರ್ ಉಮಾನಾಥ ಕೋಟ್ಯಾನ್, ಜಯರಾಮ ಮುಕ್ಕಾಲ್ದಿ ಕೊಡೆತ್ತೂರು, ನಿತಿನ್ ಶೆಟ್ಟಿ ಕೊಡೆತ್ತೂರುಗುತ್ತು, ಶ್ರೀಧರ ಅಳ್ವ ಮಾಗಂದಡಿ, ಗಣೇಶ್ ಶೆಟ್ಟಿ ಮಿತ್ತಬೈಲ್ ಗುತ್ತು, ವಿಜಯ ಶೆಟ್ಟಿ ಅಜಾರುಗುತ್ತು, ವಿಶ್ವನಾಥ ಶೆಟ್ಟಿ ಮೂಡು ದೇವಸ್ಯ, ರವಿರಾಜ ಶೆಟ್ಟಿ ಮುಚ್ಚಿರಾಳ ಬಾಳಿಕೆ, ಜಯರಾಮ ಶೆಟ್ಟಿ ಕೊಂಡೇಲಗುತ್ತು, ಜಯಂತ್ ಕರ್ಕೇರ ಅಡ್ಡಣಗುತ್ತು, ಭುವನಾಭಿರಾಮ ಉಡುಪ ಕೊಡೆತ್ತೂರು, ದೈವೊಲ್ಯದ ಗುರ್ಕಾರೆ ದೇವಿಪ್ರಸಾದ್ ಶೆಟ್ಟಿ ಕೊಡೆತ್ತೂರು, ದೊಡ್ಡಯ್ಯ ಮೂಲ್ಯ ಕಟೀಲು, ಧನಂಜಯ ಶೆಟ್ಟಿಗಾರ್ ಸಾಗರಿಕಾ, ಪುರುಷೋತ್ತಮ ಶೆಟ್ಟಿ ಕೊಡೆತ್ತೂರು, ಡಾ. ಸುಧಾಕರ ಶೆಟ್ಟಿ ಗಣಪಬೆನ್ನಿ, ಲೋಕಯ್ಯ ಸಾಲಿಯಾನ್ ಕೊಂಡೇಲ, ಗಣೇಶ್ ಶೆಟ್ಟಿ‌ ಮುಂಬೈ, ರತ್ನಾಕರ ಶೆಟ್ಟಿ ಎಕ್ಕಾರು, ಉಮೇಶ್ ಆಚಾರ್ಯ ಕೊಡೆತ್ತೂರು ಗುತ್ತಿಗೆದಾರೆರ್ ಅಭಿಲಾಷ್ ಶೆಟ್ಟಿ ಕಟೀಲ್ ಪಾಲ್ ಪಡೆದಿತ್ತೆರ್.

ಡೆಂಗ್ಯೂ ಜ್ವರ ಬರಂದಿಲೆಕ ದಾದ ಮಲ್ಪೊಡು?

ಡೆಂಗ್ಯೂ ಜ್ವರ ಬರಿಯೆರೆ ಕಾರಣ ದಾದ?

ಡೆಂಗ್ಯೂ ಜ್ವರ ಇನಿ ಭಾರತ ಸೇರಿನಂಚೆನೆ ಸುಮಾರ್ ದೇಶಗ್ ಮಲ್ಲ ಸವಾಲಾತ್ಂಡ್. ಡೆಂಗ್ಯೂ ಗಂಭೀರ ವೈರಲ್ ಜ್ವರ ಆತ್ಂಡ್. ಪ್ರಾಥಮಿಕ ಹಂತಡೇ ಸರಿ ಆಯಿನ ಚಿಕಿತ್ಸೆ ತಿಕಿಜಿಂಡ ಮಾರಣಾಂತಿಕ ಮಟ್ಟಗ್ ಪೋಪುಂಡು.

ಡೆಂಗ್ಯೂ ಲಕ್ಷಣ ಇಂಚ ಉಂಡು:

•ಉಂದು ಗಾತ್ರಡ್ ಮಸ್ತ್ ಎಲ್ಯ ಉಮಿಲ್, ನೆತ್ತ ಉದ್ದ ಕೆಲವೇ ಮಿಲಿಮೀಟರ್. ನೆತ್ತ ಬಣ್ಣ ಕಪ್ಪು ಆಂಡ, ಆಯಿತ್ತ ಜುವದ ಮಿತ್ತ್ ಬೊಲ್ದು ಕಲೆ ಇಪ್ಪುಂಡು.
ಈ ಉಮಿಲ್ ಮಸ್ತ್ ಬೀಸೊಡು ರಾಪುಂಡು ಬೊಕ್ಕ ಮಸ್ತ್ ದೂರ ಪೋಪುಂಡು. ಉಂದೆಕ್ಕ್ ತುಚ್ಚಿದ್ ನೆತ್ತೆರ್ ಒಯಿಪುನ ಸಾಮರ್ಥ್ಯ ಉಂಡು. ಈ ಉಮಿಲ್ ಪಗೆಲ್ ಡ್ ಸಕ್ರಿಯ ಆದಿಪ್ಪುಂಡು.
ಬೊಲ್ಪುಗು ಬೊಕ್ಕ ಬಯ್ಯಗ್ 7-10 ಮುಟ್ಟ, ಬೊಕ್ಕ ಬಯ್ಯ 4-6 ಮುಟ್ಟ ಎಚ್ಚ ತುಚ್ಚುಂಡು.
•ಉಂದು ಬದ್ಕುನೆ ಸಾಮಾನ್ಯವಾದ್ 2-4 ವಾರ ಮಾತ್ರ.

ಡೆಂಗ್ಯೂ ಉಮಿಲ್ ಲು ಪಗೆಲ್ ಡ್ ದಾಯೆ ಸಕ್ರಿಯ ಆದಿಪ್ಪುಂಡು..?:

ಪಗೆಲ್ ಡ್, ಉಂದು ನರಮಾನಿ ಬೊಕ್ಕ ಪ್ರಾಣಿಲ್ನ ಕೈತಲ್ ಸುಲಭವಾದ್ ಪೋಪುಂಡು.

•ಪಗೆಲ್ ಡ್ ವಾತಾವರಣಡ್ ಶಾಖ ಉಂಡು. ಉಂದು ಅಕ್ಲೆನ ಜೂವದ ಉಷ್ಣತೆನ್ ಕಾಪರೆ ಸಹಾಯ ಮಲ್ಪುಂಡು.
•ಪಗೆಲ್ ಡ್ ಎಚ್ಚ ಗಾಳಿ ಉಂಡು. ಅವು ಆಯಿಕ್ಕ್ ಅನುಕೂಲ ಆತ್ಂಡ್.
•ಪಗೆಲ್ ಡ್ ಎಚ್ಚದ ವ್ಯಾಯಾಮ ಬೊಕ್ಕ ಚಟುವಟಿಕೆರ್ದ್, ಮನುಷ್ಯೆರ್ ಚರ್ಮದ ಮಿತ್ತ್ ಎಚ್ಚ ಬೆಗರುವೆರ್, ಉಂದು ಉಮಿಲ್ ನ್ ಆಕರ್ಷಣೆ ಮಲ್ಪುಂಡು.
•ಪಗೆಲ್ ಡ್, ಉಮಿಲ್ ನ್ ತಪ್ಪಾಯೆರೆ ಮನುಷ್ಯೆರ್ ಎಚ್ಚೆರ್ಗೆ ಮಲ್ಪುಜೆರ್. ಅಂಚಾದ್ ಈ ಉಮಿಲ್ ಎಚ್ಚ ತುಚ್ಚುಂಡು. ಅಂಚಾದ್ ಜನಕುಲು ಬೊಲ್ಪುಗು ಬೊಕ್ಕ ಬಯ್ಯದ ಪೊರ್ತು ಉಮಿಲ್ ತುಚ್ಚುನೆರ್ದ್ ಪಾರಾಯೆರೆ ಮುನ್ನೆಚ್ಚರಿಕೆ ದೆತೊನುನೆ ಮಸ್ತ್ ಮುಖ್ಯ. ಅತ್ತಂದೆ ನಮ್ಮ ಇಲ್ಲದ ಸುತ್ತ ಮುತ್ತ ನೀರ್ ಉಂತಂದಿಲೆಕ್ಕ ಜಾಗೃತೆ ಒಯಿಸೊನೊಡು.

ಬೆಳುವಾಯಿ: ಯುವಶಕ್ತಿ ವಾಟ್ಸಾಪ್ ಬಳಗದ ದಶಮಾನೋತ್ಸವ

ಬೆಳುವಾಯಿ: ಸಮಾಜಡ್ ಜಾತಿ, ಮತ, ಪಂಥ, ಪ್ರಾಂತ, ಮೇಲ್, ಕೀಳ್ ಪನ್ಪಿನ ಭೇದ ಇಜ್ಜಂದೆ ಒಟ್ಟಾದ್ ಬದ್ಕೊಂದು ಜಾಗ್ರತೆದ ವ್ಯವಸ್ಥೆಗ್ ಬರೊಡು ಪಂದ್ ಇಂಚಿನ ಉಚ್ಚಯ ಮಲ್ಪುವ. ಕಷ್ಟಡ್ ಇಪ್ಪುನಕ್ಲೆನ ಒಟ್ಟಿಗೆ ನಮ ಸಹಕಾರಿ ಆವೊಡಾಂಡ ನಮ್ಮ ಮನಸ್ಸ್ ಲು ಒಂಜಾವೊಡು ಪಂದ್ ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್ ಪಂಡೆರ್.

ಮೇರ್ ಬೆಳುವಾಯಿದ ಯುವಶಕ್ತಿ ವಾಟ್ಸಾಪ್ ಬಳಗದ 10ನೇ ವಾರ್ಷಿಕ ಉಚ್ಚಯನ್ ಉದಿಪನ ಮಲ್ತ್ ದ್, ಪತ್ತ್ ಯುವ ಮನಸ್ಸುಲು ಒಂಜೇ ಮಾರ್ಗಡ್ ಸಾಗೊಡಾಂಡ ಬ್ರಹ್ಮ ರಥತ್ತ ಬಲ್ಲ್ ಗ್ ಕೈ ಕೊರ್ದು ಒಯಿತ್ತ್ಂಡ ದೇವೆರೆನ ಮಿತ್ತ್ ದ ನಂಬಿಕೆ ಭಕ್ತಿ ಎಚ್ಚಾಪುಂಡು ಪಂದ್ ಪಂಡೆರ್.

ಉಪನ್ಯಾಸಕೆರ್, ಕಲಾವಿದೆರ್ ಡಾ. ವಾದಿರಾಜ ಕಲ್ಲೂರಾಯ ಪಾತೆರ್ದ್, ಸಮಾಜಡ್ ಯುವಶಕ್ತಿದ ಪಾತ್ರದ ಬಗೆಟ್ಟ್ ಉಪನ್ಯಾಸ ಕೊರಿಯೆರ್. ಯುವಶಕ್ತಿ ಬಳಗದ ದಶಮಾನೋತ್ಸವದ ಲೆಕ್ಕೊಡು ಉದ್ಯಮಿ ನಿರಂಜನ ಮೊಗಸಾಲೆ ಮೆರೆನ ಗುರ್ಕಾರ್ಮೆಡ್ ಕಲಾವಿದೆ ಕಾಂತಾವರ ಮಹಾವೀರ ಪಾಂಡಿ ಮೆರೆಗ್ ಯುವಶಕ್ತಿ ಕಲಾ ಪ್ರಶಸ್ತಿ, ಪೂತ್ತ ವ್ಯಾಪಾರಿ ಸತೀಶ್ ಶೆಟ್ಟಿಗಾರ ಮೆರೆಗ್ ಸನ್ಮಾನ ಬೊಕ್ಕ ಮೂಜಿ ಕಲ್ಪಾರ್ಥಿಲೆಗ್ ವಿದ್ಯಾರ್ಥಿ ಪುರಸ್ಕಾರ ಮಲ್ತೆರ್.

ಕಲಾವಿದೆರ್ ಎಂ ದೇವಾನಂದ ಭಟ್ ಮೇರ್ ಸಂಸ್ಥೆ ಪತ್ತ್ ವರ್ಷಲೆಡ್ ನಡತ್ ದ್ ಬತ್ತಿನ ತಾದಿದ ಬಗೆಟ್ಟ್ ಪ್ರಾಸ್ತಾವಿಕ ಭಾಷಣ ಮಲ್ತೆರ್. ಈ ಪೊರ್ತುಡು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಸರೇಶ್ ಕೆ. ಪೂಜಾರಿ, ಉಪಾಧ್ಯಕ್ಷೆರ್ ಜಯಂತಿ, ಯುವಶಕ್ತಿ ವಾಟ್ಸಾಪ್ ಬಳಗದ ಸಂಚಾಲಕೆರ್ ಸಂದೇಶ್ ಭಂಡಾರಿ, ರವೀಂದ್ರ ಪೂಜಾರಿ, ಗಂಗಾದರ ಪೂಜಾರಿ, ಹರೀಶ್ ಬಂಗೇರ, ಚಂದ್ರಹಾಸ ಜೈನ್, ನಿತಿನ್, ವೈಶಾಕ್ ಜೈನ್, ಶ್ರೀರಾಜ್ ಕನ್ನಡ, ಸುದರ್ಶನ್ ಆಚಾರ್ಯ, ಅಣ್ಣಿ ಬಿ. ಪೂಜಾರಿ ಪಾಲ್ ಪಡೆದಿತ್ತೆರ್.

ಬೆಳುವಾಯಿ ಹರಿಪ್ರಸಾದ್ ರಾವ್ ಎದ್ಕೊನಿಯೆರ್. ಗಣೇಶ್ ಬಿ ಅಳಿಯೂರು ಲೇಸ್ ದ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್. ಬೊಕ್ಕ ತೆಂಕುತಿಟ್ಟುದ ಪುಗರ್ತೆದ ಕಲಾವಿದೆರೆರ್ದ್ ಭೃಗು ಲಾಂಛನ ಶ್ರೀನಿವಾಸ ಕಲ್ಯಾಣ ಯಕ್ಷಗಾನ ನಡತ್ಂಡ್.