ರಾಜ್ಯದ ಸುದ್ದಿ | State News

ಬಿಗ್‌ಬಾಸ್ ಸೀಸನ್ 9 ದ ವಿನ್ನರ್ ಪಟ್ಟಗ್ ಕೌಂಟ್‌ಡೌನ್ ಸುರು ತುಳುನಾಡ್‌ದ ಸ್ಟಾರ್ ರೂಪೇಶ್ ಶೆಟ್ಟಿ ಗೆಂದುನ ಸಾಧ್ಯತೆ

ಬಿಗ್‌ಬಾಸ್ ಸೀಸನ್ 9 ಮುಗಿಯರೆ ಕೆಲವು ಪೊರ್ತು ಮಾತ್ರ ಬಾಕಿ ಉಂಡು. ಬಿಗ್‌ಬಾಸ್ ವಿನ್ನರ್ ಏರ್ ಆಪೆರ್ ಪಂದ್ ಅಭಿಮಾನಿಲು ಕಾತೊಂದುಲ್ಲೆರ್.

ತುಳುನಾಡ್‌ಡ ಪುಗರ್ತೆದ ನಟೆ ಮಸ್ತ್ ತುಳು ಪಿಚ್ಚರ್‌ಡ್ ನಟನೆ ಮಲ್ತಿನ ರೂಪೇಶ್ ಶೆಟ್ಟಿ ಬಿಗ್‌ಬಾಸ್ ಸೀಸನ್ 9 ವಿನ್ನರ್ ಆಪಿನ ಸಾಧ್ಯತೆ ಉಂಡು. ತನ್ನ ಪಾತೆರ, ತೆಲಿಕೆ ನಲಿಕೆದ ಮುಕೇನ ಸುರುರ್ದ್ ಎಡ್ಡೆ ರೀತಿಡ್ ಗೊಬ್ಬೊಂದಿತ್ತಿನ ತುಳುನಾಡ್‌ದ ಸ್ಟಾರ್ ರೂಪೇಶ್ ಶೆಟ್ಟಿ ಗೆಂದೊಡು ಆವೊಡು ಪಂದ್ ತುಳು ಅಭಿಮಾನಿಲು ಪನೊಂದುಲ್ಲೆರ್.

ಇತ್ತೆ ಬಿಗ್‌ಬಾಸ್ ಸೀಸನ್ 9 ದ ಫೈನಲಿಸ್ಟ್ ಆದ್ ರೂಪೇಶ್ ಶೆಟ್ಟಿ, ರಾಕೇಶ್ ಅಡಿಗ, ರಾಜಣ್ಣ, ದೀಪಿಕಾ ದಾಸ್ ಉಲ್ಲೆರ್. ಅವೆಟ್ಟ್ ರೂಪೇಶ್ ಶೆಟ್ಟಿ ಬೊಕ್ಕ ರಾಕೇಶ್ ಅಡಿಗ ನಡುಟ್ಟ್ ಮಸ್ತ್ ಫೈಟ್ ಉಂಡು. ಡಿ. 31 ತ್ತ ಕತ್ತಲೆಗ್ ಕಲರ್ಸ್ ಕನ್ನಡಡ್ ಬಿಗ್‌ಬಾಸ್ ಸೀಸನ್-9 ದ ವಿನ್ನರ್ ಪಟ್ಟ ಏರೆಗ್ ತಿಕ್ಕರೆ ಉಂಡು ಪಂದ್ ನಮ ತೆರಿಯೊಲಿ.

ಜನವರಿರ್ದ್ ಜೂನ್ ಮುಟ್ಟ ಕೆಎಸ್ಸಾರ್ಟಿಸಿ ನೌಕರೆರ್ ಸ್ಟ್ರೈಕ್ ಮಲ್ಪರೆ ಇಜ್ಜಿ

ಬೆಂಗ್ಲೂರು: ಕೆಎಸ್‌ಆರ್‌ಟಿಸಿ ನೌಕರೆರ್ ದುಂಬುದ 6 ತಿಂಗೊಲ್ ಮುಷ್ಕರ ಮಲ್ಪಂದಿಲೆಕ ರಾಜ್ಯ ಸರ್ಕಾರ ಆದೇಶ ಮಲ್ತ್‌ದ್ಂಡ್.

ಕರ್ನಾಟಕ ಅಗತ್ಯ ಸೇವಾ ನಿರ್ವಾಹಣೆ ಕಾಯ್ದೆ 2013 ತ್ತ ಅಡಿಟ್ಟ್ ಆದೇಶ ಪಾಡ್ದಿನ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ, ಜನವರಿ1 ಜೆಡ್ದ್ ಜೂನ್ 30 ಮುಟ್ಟ ಪೊರ್ಂಬಾಟ ಮಲ್ಪಂದಿಲೆಕ ಆದೇಶ ಪಾಡ್ದ್ಂಡ್. ಬೇತೆ ಬೇತೆ ಬೇಡಿಕೆನ್ ಈಡೇರಿಸಾಯರೆ ಬೋಡಾದ್ ಸಾರಿಗೆ ನೌಕರೆರ್ ಬೆಳಗಾವಿ ಸುವರ್ಣಸೌಧದ ಎದುರು ಡಿ.19 ರ್ದ್ ಉಪವಾಸ ಸತ್ಯಾಗ್ರಹ ಮಲ್ತೊಂದು ಇತ್ತೆರ್.

ಮೆಯಿಕ್ಕ್ ಬೆಚ್ಚ ಸಾಂಬಾರ್ ಬೂರ್ದು ಶಾಲೆದ 3 ಜೋಕ್ಲೆಗ್ ಗಾಯ

ಶಾಲೆದ 3 ಜೋಕ್ಲೆನ ಮೆಯಿಕ್ಕ್ ಬೆಚ್ಚ ಸಾಂಬಾರ್ ಬೂರ್ದು ಮಸ್ತ್ ಗಾಯ ಆತಿನ ಘಟನೆ ಯಾದಗಿರಿ ಜಿಲ್ಲೆದ ಸುರಪುರ ತಾಲೂಕ್‌ದ ಎಮ್. ಬೊಮ್ಮನಹಳ್ಳಿ ಗ್ರಾಮಡ್ ನಡತ್ಂಡ್.

ಬೊಮ್ಮನ ಹಳ್ಳಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಡ್ ಮಧ್ಯಾಹ್ನ ವನಸ್ ಮಲ್ಪುನ ಪೊರ್ತುಡು ಮೂಜಿ ಜೋಕ್ಲೆನ ಮಿತ್ತ್ ಬೆಚ್ಚ ಸಾಂಬಾರ್ ಬೂರ್ದುಂಡು. ಗಾಯ ಆತಿನ ಜೋಕ್ಲೆನ್ ವಿಜಯಪುರ ಆಸ್ಪತ್ರೆಗ್ ದಾಖಲ್ ಮಲ್ತ್‌ದೆರ್.

ಹುಷಾರ್‌ದಾಂತೆ ತೀರ್ ಪೋಯೆರ್ ಹಿರಿಯ ಪತ್ರಕರ್ತೆ, ಸಾಹಿತಿ ಎಂ.ಎಸ್ ಪ್ರಭಾಕರ್

ಕೋಲಾರ: ಪೆರಿಯ ಪತ್ರಕರ್ತೆ ಅಂಚನೆ ಸಾಹಿತಿ ಎಂ.ಎಸ್ ಪ್ರಭಾಕರ್(೮೭) ಹುಷಾರ್‌ದಾಂತೆ ತೀರ್ ಪೋಯೆರ್.

ಎಂ.ಎಸ್ ಪ್ರಭಾಕರ್ ಮೇರ್ ವಯೋಸಹಜ ಸೀಕ್‌ರ್ದ್ ನರಲೊಂದು ಇತ್ತೆರ್. ಮೇರ್ ಪತ್ರಕರ್ತೆರ್, ಸಾಹಿತಿ ಆದ್ ಇತ್ತೆರ್.