ಕರ್ನಾಟಕ ರಾಜ್ಯಡ್ ಸುದ್ದಿಲು | Karnataka News

ಮಂಗಳ ಮೂರುತಿ ಧ್ವನಿ ಸುರುಳಿ ಬುಡುಗಡೆ

ಕನ್ನಡ ಭಕ್ತಿಸುಗಿಪುದ ಧ್ವನಿ ಸುರುಳಿ ‘ಮಂಗಳ ಮೂರುತಿ’ದ ಬುಡುಗಡೆ ಲೇಸ್ ನ್ ನಮ್ಮ ಕುಡ್ಲ ಟಿ.ವಿ. ವಾಹಿನಿಡ್ ತಾರೀಕ್ 27-08-2021 ಶುಕ್ರಾರದಾನಿ ಬಯ್ಯಗ್ 6.30 ಗ್ ಸರಿಯಾದ್ ಪ್ರಸಾರ ಆಂಡ್. ಕುವೈಟ್ ದ ಲೇಖಕೆ ತಾರೇಂದ್ರ ಪಿ. ಶೆಟ್ಟಿಗಾರ್ ಇಂಬೆರ್ ಸಾಹಿತ್ಯ ಅಂಚನೆ ನಿರ್ಮಾಣದ ಈ ಧ್ವನಿಸುರುಳಿನ್ ಖ್ಯಾತ ಸಂಗೀತ ನಿರ್ದೇಶಕೆ ಗಿರಿಧರ್ ದಿವಾನ್ ಸಂಗೀತನ್ ಕೊರ್ಂಡ ಆ ಸಂಗೀತ ಸಂಯೋಜನೆನ್ ನಕುಲ್ ಅಭ್ಯಂಕರ್ ವಹಿಸಾಯೆರ್. ಖ್ಯಾತ ಚಲನಚಿತ್ರ ಗಾಯಕೆರಾಯಿನ ಅಜಯ್ ವಾರಿಯರ್, ನಕುಲ್ ಅಭ್ಯಂಕರ್, ಸಿದ್ದಾರ್ಥ ಬೆಳ್ಮಣ್, ಐರಾ ಒಡಿಪು ಅಂಚನೆ ನಿನಾದ ನಾಯಕ್ ಇಂಬೆರ್ನ ಎಡ್ಡೆ ಕಂಠಡ್ದು ಮಂಗಳ ಮೂರುತಿ ಧ್ವನಿ ಸುರುಳಿದ ಭಕ್ತಿ ಸುಗಿಪುನ್ ಪಂಡೆರ್.

ಮಂಗಳ ಮೂರುತಿ ಧ್ವನಿಸುರುಳಿಡ್ ಆದಿಪೂಜಿತ, ಶಾಂಭವಿ ಸ್ತುತಿ, ಶುಭಾಂಕರ ಧ್ಯಾನ, ರಾಮ ನಾಮ, ಪಾರ್ಥ ಸಾರಥಿ ಅಂಚನೆ ಪವನ ಸಂಜಾತ ಪನ್ಪಿನ 6 ಭಕ್ತಿಸುಗಿಪು ಉಂಡು. ಈ ಬುಡುಗಡೆ ಲೇಸ್ ಕುವೈತ್, ಸಿಂಗಾಪುರ, ಉಡುಪಿ, ಚೆನೈ, ಬೆಂಗಳೂರ್ ಡ್ ಆದಿತ್ತುಂಡು. ಶ್ರೀ ಕ್ಷೇತ್ರ ಒಡಿಪು ಕೃಷ್ಣ ಮಠಟ್ ನಡತಿನ ಉದಿಪನದ ಲೇಸ್ ಡ್ ಪರ್ಯಾಯ ಅದಮಾರು ಮಠತ್ತ ಪರಮ ಪೂಜ್ಯ ಶ್ರೀ ಶ್ರೀ ಈಶಪ್ರಿಯ ತೀರ್ಥ ಶ್ರೀಪಾದೆರ್ ಮಂಗಳ ಮೂರುತಿ ಧ್ವನಿಸುರುಳಿದ ಸುರುತ್ತ ಆದಿಪೂಜಿತ ಪದ್ಯನ್ ಬುಡುಗಡೆ ಮಲ್ತುದು ಆಶೀರ್ವಾದನ್ ಮಲ್ತೆರ್.

ಖ್ಯಾತ ಚಲನಚಿತ್ರದ ಅಭಿನೇತ್ರಿ ಆಯಿನ ಶ್ರೀಮತಿ ವಿನಯ್ ಪ್ರಸಾದ್, ಪಾರ್ಥಸಾರಥಿ ಭಕ್ತಿಸುಗಿಪುನ್ ಬುಡುಗಡೆ ಮಲ್ತೆರ್. ಶ್ರೀ ಕೃಷ್ಣ ದೇವರ್ನ ಲೀಲೆನ್ ಪುಗರುನ ಭಕ್ತಿಸುಗಿಪು ಬುಡುಗಡೆ ಲೇಸ್ ಡ್, ಒಡಿಪು ಬ್ರಹ್ಮಗಿರಿತ್ತ ‘ತೃಶಿಕ’ ದ ಶ್ರೀಮತಿ ಕಲಾವತಿ ದಯಾನಂದ್, ಶ್ರೀಮತಿ ರೇಖಾ ಶೆಟ್ಟಿಗಾರ್, ಶ್ರೀಮತಿ ಶಾಲಿನಿ ವಿಜಯ್ ಶೆಟ್ಟಿ, ಶ್ರೀಮತಿ ಉಷಾ ಕರುಣಾಕರ್, ಶ್ರೀಮತಿ ಜಯಶ್ರೀ ದೊಡ್ಡಣಗುಡ್ಡೆ, ಶ್ರೀಮತಿ ಅರ್ಪಿತ ಸಾಯಿಪ್ರಸಾದ್, ಶ್ರೀಮತಿ ನಮಿತಾ ಸುನೀಲ್ ಕುಮಾರ್ ಅಂಚನೆ ಜೋಕುಲಾಯಿನ ಕೃತಿ ಬೊಕ್ಕ ಧೃತಿ ಪಾಲ್ ಪಡೆದಿತ್ತೆರ್.