ಬೆಂಗ್ಳೂರು ತುಳು ಪರ್ಬ – 2022
ಬೆಂಗ್ಳೂರುದ ಪ್ರಮುಖ ತುಳು ಸಂಘಟನೆ, ಕರಿನ ಸರ್ತಿದ “ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ” ಪ್ರತಿಷ್ಠಿತ ಸಂಘಟನಾ ಪ್ರಶಸ್ತಿ ಪಡೆಯಿನ “ತುಳುವೆರೆಂಕುಲು ಬೆಂಗಳೂರು (ರಿ.)” 30 ನೇ ವರ್ಷಾಚರಣೆದ ಒರುಟ್ಟು ರಾಜಬೂಡು ಬೆಂಗಳೂರುಡು “ಬೆಂಗ್ಳೂರು ತುಳು ಪರ್ಬ -2022” ನ್ ಅಟ್ಟಣೆ ಮಲ್ದೆರ್. ಉಂದೇ ಬರ್ಪಿನ ಮೇ 15 ಐತಾರ ಕಾಂಡೆ 9.30 ಡ್ಡ್ ರಾತ್ರೆ 8.30 ಮುಟ್ಟ ಬೆಂಗಳೂರುದ “ರವೀಂದ್ರ ಕಲಾ ಕ್ಷೇತ್ರ”ಡ್ ಈ ಲೇಸ್ ನಡಪೆರುಂಡು.
ಡಾ. ಹೇಮಾವತಿ ಹೆಗ್ಗಡೆ ಧರ್ಮಸ್ಥಳ ಲೇಸ್ ನ್ ಉದಿಪನ ಮಲ್ಪೆರುಲ್ಲೆರ್. ಕನ್ನಡ ಬೊಕ ಸಂಸ್ಕೃತಿ ಇಲಾಖೆದ ಮಂತ್ರಿಲು ಶ್ರೀ ವಿ. ಸುನೀಲ್ ಕುಮಾರ್, ಶ್ರೀ ಡಿ.ಸುರೇಂದ್ರ ಕುಮಾರ್, ಮಾಜಿ ಲೋಕಾಯುಕ್ತೆ ಜಸ್ಟಿಸ್ ಸಂತೋಷ್ ಹೆಗ್ಡೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ಶ್ರೀ ದಯಾನಂದ ಕತ್ತಲ್ ಸಾರ್, ತುಳು-ಕನ್ನಡ ಅಂತಾರಾಷ್ಟ್ರೀಯ ಸಾಂಸ್ಕೃತಿಕ ಸಂಘಟಕೆರಾಯಿನ ದುಬೈ ಕರ್ನಾಟಕ ಸಂಘದ ಗುರ್ಕಾರ್ಲು ಶ್ರೀ ಸರ್ವೋತ್ತಮ ಶೆಟ್ಟಿ, ಪ್ರೊ.ಕಬಡ್ಡಿ ಬೊಳ್ಳಿಲು ಶ್ರೀ ಪ್ರಶಾಂತ್ ರೈ ಕೈಕಾರ ಬೊಕ ಶ್ರೀ ಸಚಿನ್ ಸುವರ್ಣ ಅಂಚನೇ ಹಲವಾರ್ ಗಣ್ಯಾತಿಗಣ್ಯೆರ್ ಮುಖ್ಯ ಬಿನ್ನೆರಾದ್ ಲೇಸ್ ಡ್ ಪಾಲ್ ಪಡೆವೆರುಲ್ಲೆರ್.
ಅಂಚೆನೇ ದೇಶ ವಿದೇಶೊಡು ಇಪ್ಪುನ ಸಾಂಸ್ಕೃತಿಕ, ಕ್ರೀಡೆ, ಸಿನೆಮಾ, ರಾಜಕೀಯ, ಸಾಮಾಜಿಕ ಕ್ಷೇತ್ರದ ಸಾಧಕ ಗಣ್ಯೆರ್ ; ಬೆಂಗಳೂರುದ ವಿವಿಧ ತುಳು – ಕನ್ನಡ ಸಂಘಟನೆದಕುಲು ಈವೊಂಜಿ ತುಳು ಸಾಂಸ್ಕೃತಿಕ ಪರ್ಬೊಡು ಪಾಲ್ ಪಡೆವೆರುಲ್ಲೆರ್.
ಈ ಲೇಸ್ ಡ್ ಸಾಂಪ್ರದಾಯಿಕ ಬಿಸು ಆಚರಣೆ ನಡಪೆರುಂಡು. ತುಳು ಸಮುದಾಯೊಗು ಪೆರ್ಮೆ ದಿಂಜಾದಿನ ವಿಶೇಷ ಸಾಧಕೆರೆಗ್ ಪ್ರತಿಷ್ಠಿತ ವಾರ್ಷಿಕ “ಬಲಿಯೇಂದ್ರ ಪುರಸ್ಕಾರ” ; ಅಂಚನೇ ವಿವಿಧ ಕ್ಷೇತ್ರದ ಯುವ ಸಾಧಕೆರೆಗ್ ಲೇಸ್ ದ ಚಾವಡಿಡ್ ವಿಶೇಷ ಮಾನಾದಿಗೆ ನಡಪೆರುಂಡು.
ಪುಗಾರ್ತೆದ ಕಲಾ ತಂಡೊಲೆಡ್ದ್ ; ತಾರಾ ಕಲಾವಿದೆರೆಡ್ಡ್ ವೈವಿಧ್ಯಮಯ ತುಳು ಸಾಂಸ್ಕೃತಿಕ ಮನೋರಂಜನೆಲು ನಡಪೆರುಂಡು. ಡಾ. ಹೇಮಾವತಿ ಹೆಗ್ಗಡೆ ಧರ್ಮಸ್ಥಳ ಮೇರ್ ಬರೆದ್ ನಿರ್ದೇಶನ ಮಲ್ದಿನ ಹಾಸ್ಯಮಯ ತುಳು ನಾಟಕ “ಕೃಷ್ಣ ಸಂದಾನೋ” ನಡಪೆರುಂಡು.
ನಮ್ಮ ಭಾಷೆ, ಸಂಸ್ಕೃತಿ, ಕಲೆ, ಕ್ರೀಡೆ, ಸಾಹಿತ್ಯ, ಆಚಾರ ವಿಚಾರೊಲೆನ ಬುಳೆಚಿಲ್ಗಾದ್; ಪೊಸ ಪೀಳಿಗೆಗ್ ಪೊಲಬು ಮಲ್ಪೆರೆಗಾದ್ ತನ್ಕುಲು ಮಾತೆರ್ಲಾ ಹೆಚ್ಚಿನ ಸಂಖ್ಯೆಡ್ ಬತ್ತ್ ದ್ “ಬೆಂಗ್ಳೂರು ತುಳು ಪರ್ಬ -2022” ಡ್ ಪಾಲ್ ಪಡೇದ್ ಲೇಸ್ ದ ಪೊರ್ಲಪೊಲಿ ಎಚ್ಚಾವೊಡುಂದು ಅರ್ತಿ ಪಿರ್ತಿದ ಬಿನ್ನಯೋ.
ಮಾತೆರೆನ್ಲಾ ಮೋಕೆಡ್ ಎದುಕೊನುನಾ…
ವೈ. ಜಯಂತ್ ರಾವ್ ಗುರ್ಕಾರ್ಲು
ಪಳ್ಳಿ ವಿಶ್ವನಾಥ ಶೆಟ್ಟಿ ಮುಖ್ಯ ಕಾರ್ಯಂತೆರ್
ಪದಾಧಿಕಾರಿನಕುಲು,
ಸರ್ವ ಸದಸ್ಯೆರ್
ತುಳುವೆರೆಂಕುಲು ಬೆಂಗ್ಳೂರು (ರಿ.)
