ದೇಶಡ್ ನಡಪಿನ ಸುದ್ದಿ | National News

ಉಮಿಲ್‌ದ ಬತ್ತಿರ್ದ್ ವಿಷತ್ತ ಪುಗೆ-ಉಸುಲ್ ಗಟ್ಟ್‌ದ್ ಒಂಜೇ ಕುಟಮದ 6 ಜನ ತೀರ್ ಪೋಯೆರ್

ದಿಲ್ಲಿದ ಶಾಸ್ತ್ರೀ ಪಾರ್ಕ್ ಜಾಗೆಡ್ ಉಮಿಲ್‌ದ ಕಾಯಿಲ್‌ರ್ದ್ ಉಸುಲ್ ಗಟ್ಟ್‌ದ್ ಒಂಜೇ ಕುಟುಮದ ಆಜಿ ಜನ ತೀರ್ ಪೋಯಿನ ಘಟನೆ ನಡತ್ಂಡ್.

ಪೊಲೀಸೆರ್‍ನ ಮಾಹಿತಿದ ಪ್ರಕಾರ, ಪ್ರಾಥಮಿಕ ತನಿಖೆಡ್ ರಾತ್ರೆದ ಪೊರ್ತುಡು ಉಮಿಲ್‌ದ ಕಾಯಿಲ್ ಪೊತ್ತಾದಿತ್ತ್‌ದ್ ಉಂದೆತ್ತ ಬೊನ್ಯ ಕೋಣೆಡ್ ಪತ್ತೆಯಾತ್ಂಡ್. ಅಂಚಾದ್ ಈ ಕಾಯಿಲ್‌ದ ಪುಗೆರ್ದ್ ಉಸುಲ್ ಗಟ್ಟ್‌ದ್ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಘಟನೆ ಆಯಿನ ಜಾಗೆಡ್ ಒಟ್ಟು 8 ಜನ ಇತ್ತ್‌ದ್ 6 ಜನ ತೀರ್ ಪೋತೆರ್. 2 ಜನ ಆಸ್ಪತ್ರೆಗ್ ದಾಖಲ್ ಆತೆರ್ ಪಂದ್ ವರದಿ ತೆರಿಪಾದ್ಂಡ್.

Karnataka Assembly poll schedule to be announced today ಇನಿ ಕರ್ನಾಟಕ ವಿಧಾನಸಭೆ ವೋಟುದ ದಿನ ಘೋಷಣೆ

ದಿಲ್ಲಿ: ಕರ್ನಾಟಕ ವಿಧಾನಸಭಾ ವೋಟುದ ದಿನ ಘೋಷಣೆ ಆಯರೆ ಉಂಡು.

ಇನಿ ದಿಲ್ಲಿದ ವಿಜ್ಞಾನ ಭವನಡ್ ಕಾಂಡೆ 11.30 ಗಂಟೆಗ್ ಕೇಂದ್ರ ಚುನಾವಣಾ ಆಯೋಗ ವೋಟುದ ದಿನನ್ ಘೋಷಣೆ ಮಲ್ಪರೆ ಉಂಡು. ಚುನಾವಣಾ ಆಯೋಗದ ಮುಖ್ಯಸ್ಥೆರ್ ರಾಜೀವ್ ಕುಮಾರ್ ಸುದ್ದಿಗೋಷ್ಠಿಡ್ ದಿನಾಂಕನ್ ಪ್ರಕಟನೆ ಮಲ್ಪರೆ ಉಲ್ಲೆರ್.

ಅಮೆರಿಕ: ಶಾಲೆದ ಮಿತ್ತ್ ದುಷ್ಕರ್ಮಿಲೆರ್ದ್ ಗುಂಡುದ ದಾಳಿ, ಮೂಜಿ ಕಲ್ಪಾರ್ಥಿಲು ಸೇರ್ದ್ 6 ಜನ ತೀರ್ ಪೋಯೆರ್

ಅಮೆರಿಕದ ನ್ಯಾಶ್ವಿಲ್ಲೆ ನಗರದ ಖಾಸಗಿ ಕ್ರಿಶ್ಚಿಯನ್ ಶಾಲೆಡ್ ದುಷ್ಕರ್ಮಿಲೆರ್ದ್ ನಡತಿನ ಗುಂಡುದ ದಾಳಿಡ್ 3 ಕಲ್ಪಾರ್ಥಿಲು ಸೇರ್ದ್ 6 ಜನ ತೀರ್ ಪೋಯೆರ್.

ಗುಂಡುದ ದಾಳಿಡ್ ಮಸ್ತ್ ಪೆಟ್ಟಾತಿನಕ್ಲೆನ್ ಕೂಡ್ಲೆ ಚಿಕಿತ್ಸೆಗಾದ್ ಮನ್ರೋ ಕ್ಯಾರೆಲ್ ಜೂನಿಯರ್ ಜೋಕ್ಲೆನ ಆಸ್ಪತ್ರೆಗ್ ಕೊನಯೆರ್. ಈ ಘಟನೆದ್ ಬೊಕ್ಕ ಶಾಲೆಡ್ ಇತ್ತಿನ ಕಲ್ಪಾರ್ಥಿಲೆನ್ ಪೊಲೀಸ್ ರಕ್ಷಣೆಡ್ ಸರಿಯಾಯಿನ ಜಾಗೆಡ್ ಕೊನಯೆರ್.

ಕೊಲೆ ಕೇಸ್ ಗ್ ಸಾಕ್ಷಿ ಪಂಡಿನ ಗಿಳಿ; 9 ವರ್ಷೊರ್ದು ಬೊಕ್ಕ ತಿಕಿಯೆ ಕೆರ್ತಿನಾಯೆ!

ಆಗ್ರಾ : 2014 ನೇ ಇಸ್ವಿ ಫೆಬ್ರವರಿ 20 ತಾರೀಕ್ ಗ್ ಆಗ್ರಾಡ್ ನಡದಿನ ಪೊಂಜೊವುನ ಕೊಲೆ ಕೇಸ್‌ಗ್ ಸಂಬಂಧ ಪಟ್ ದ್ ಕೋರ್ಟು ಆರೋಪಿಲೆಗ್ ಜೀವಾವಧಿ ಶಿಕ್ಷೆದ ತೀರ್ಪು ಕೊರ್ತ್ಂಡ್. ಈ ಕೇಸ್‌ಡ್ ಗಿಳಿ ಒಂಜಿ ಸಾಕ್ಷಿ ಆತಿನವು ಭಾರಿ ವಿಶೇಷ.

ಆಗ್ರಾದ ಒಂಜಿ ಪತ್ರಿಕೆದ ಎಡಿಟರ್ ಇನ್ ಚೀಫ್ ವಿಜಯ್ ಶರ್ಮಾ ಅರೆನ ಬೊಡೆದಿ ನೀಲಂ ಶರ್ಮಾ ಅರೆನ ಪುನ ಅರೆನನೇ ಇಲ್ಲಡ್ ಕೊಲೆ ಆತಿನ ರೀತಿಡ್ ಪತ್ತೆ ಆತ್ಂಡ್. ಏತ್ ತನಿಖೆ ಮಲ್ತ್ಂಡಲ ಕೆರ್ತಿನಿ ಏರ್ ಪಂದ್ ಗೊತ್ತಾವಂದೆ ಕೇಸ್ ಪುಸ್ಕ ಆದಿತ್ತ್ಂಡ್. ಆಂಡ 9 ವರ್ಷರ್ದ್ ಬೊಕ್ಕ ಈ ಕೇಸ್‌ಗ್ ಒಂಜಿ ಮಲ್ಲ ಸಾಕ್ಷಿ ತಿಕ್ ದ್ಂಡ್. ಕೊಲೆ ಆತಿನ ನೀಲ್ ಶರ್ಮಾ ತಾಂಕ್ ದಿನ ಗಿಳಿ ಏಪಲ ಕೊಲೆಗಾರನ ಪುದರ್ ಪನೊಂದಿತ್ತ್ಂಡ್. ಆಂಡ ಉಂದು ವಿಜಯ್ ಶರ್ಮಾಗ್ ಅರ್ಥ ಆದಿಜ್ಜಾಂಡ್.

ಆ ಗಿಳಿ ನೀಲ್ ಶರ್ಮಾನ ಸಂಬಂಧದ ಒರಿಯನ ಪುದರ್‌ನ್ ಏಪಲ ಪನೊಂದಿತ್ತಿನೆಡ್ದಾವರ ಸಂಸಯೊಡು ವಿಜಯ್ ಶರ್ಮಾ ಪೊಲೀಸೆರೆಗ್ ತೆರಿಪಾಯೆರ್. ಆ ಮಾಹಿತಿದಲೆಕ ಪೊಲೀಸೆರ್ ಅರೆನ ಸಂಬಂಧಿ ಆಶು ಪನ್ಪಿನರೆನ್ ವಿಚಾರಣೆಗ್ ದೆತೊನ್ಯೆರ್. ಈ ಪೊರ್ತುಡು ಆರೋಪಿ ಆಶು ತನ್ನ ದೋಸ್ತಿ ರೋನಿ ಮಸೇನೊಟ್ಟುಗು ಸೇರ್ದ್ ನೀಲಂ ಶರ್ಮಾನ್ ಕೆರ್ತೆ ಪಂದ್ ತಪ್ಪು ಒತ್ತೊಂದೆ. ಅಂಚಾದ್ ಕೋರ್ಟು ಡು ನ್ಯಾಯಾಧೀಶೆರ್ ಅರೋಪಿಲಾಯಿನ ಆಶು ಬೊಕ್ಕ ರೋನಿ ಇರ್ವೆರೆಗ್ಲಾ ಜೀವಾವಧಿ ಶಿಕ್ಷೆ ಅಂಚನೆ 72 ಸಾರ ರೂ. ದಂಡ ಪಾಡ್ದೆರ್.

ಪೊಂಜೋವುಲೆನ ವಿಶ್ವ ಬಾಕ್ಸಿಂಗ್‌ ಚಾಂಪಿಯನ್‌ಶಿಪ್ ಡ್ ಬಂಗಾರ್ ಗೆಂದಿನ ನಿಖತ್ ಜರೀನ್

ದಿಲ್ಲಿ: ಪೊಂಜೋವುಲೆನ ವಿಶ್ವ ಬಾಕ್ಸಿಂಗ್ ಚಾಂಪಿಯನ್ ಶಿಪ್‌ದ 50 ಕೆಜಿ ವಿಭಾಗದ ಫೈನಲ್‌ಡ್ ಬಂಗಾರ್‌ದ ಪದಕನ್ ಬಾಕ್ಸರ್ ನಿಖತ್ ಜರೀನ್ ಗೆಂದ್‌ದಿತ್ತ್‌ದ್ ಇತ್ತೆ ಅರೆನ್ ತೆಲಂಗಾಣ ಮುಖ್ಯಮಂತ್ರಿ ಕೆ.ಚಂದ್ರಶೇಖರ್ ರಾವ್ ಮಾನಾದಿಗೆ ಮಲ್ತೆರ್.

ವಿಯೆಟ್ನಾಂಡ್ ಬಾಕ್ಸರ್ ನುಯೆನ್ ಮಿತ್ತ್ 5-0 ಅಂತರಡ್ ಗೆಂದ್‌ದ್, ಜರೀನ್ ತೆಲಂಗಾಣದ ಪೆರ್ಮೆದ ಮಗಲ್ ಪಂದ್ ಕೆಸಿಆರ್ ಎಡ್ಡೆಪ್ಪುನು ಬಯಕ್‌ದೆರ್.