ರಪಕ್ಕ ಸುದ್ದಿ Flash News

ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ 5ನೇ ವರ್ಷದ ಸಂಭ್ರಮ, 5 ಜನಕ್ಕ್ ಕುಂಟು ಪೊಲ್ಲುನ ಮಿಷನ್

ಸಮಾಜಸೇವೆ ಮಲ್ಪರೆ ಎಡ್ಡೆ ಮನಸ್‌ ಬೋಡು: ಭುವನಾಭಿರಾಮ ಉಡುಪ

ಮುಲ್ಕಿ: ಸಮಾಜಮುಖಿ ಕಾರ್ಯಕ್ರಮ ಮಲ್ಪುನೆತ್ತ ಒಟ್ಟುಗು ಎಡ್ಡೆ ಮನಸ್, ಸಹೃದಯತೆಲ ಬೋಡು. ಒವ್ವೇ ಸಂಸ್ಥೆ ವ್ಯವಹಾರ ಮಲ್ಪುನು ಮಾತ್ರ ಅತ್ತಾಂದೆ ಅಶಕ್ತೆರೆಗ್ ಆರೋಗ್ಯಗ್ ಪನವುದ ಸಕಾಯ ಸಹಿತ ಮಸ್ತ್ ಸಮಾಜಮುಖಿ ಕಾರ್ಯಕ್ರಮ ಮಲ್ಪೊಡು. ಅಂಚಿನ ಅಮೂಲ್ಯ ಕೆಲಸ ಮಲ್ಪುನ ಹಳೆಯಂಗಡಿ ಪ್ರಿಯದರ್ಶಿನಿ ಕೋ-ಆಪರೇಟಿವ್‌ ಸೊಸೈಟಿದ ಬೇಲೆ ಮಸ್ತ್ ಅಭಿನಂದನೀಯ ಪಂದ್ ಕಿನ್ನಿಗೋಳಿ ಯುಗಪುರುಷ ಸಂಪಾದಕೆರ್ ಭುವನಾಭಿರಾಮ ಉಡುಪ ಪಂಡೆರ್.
ಆರ್ ಹಳೆಯಂಗಡಿದ ಹರಿ ಓಂ ಕಟ್ವಾಣದ ಜಾಲ್‌ಡ್ ಬುಧವಾರ ಪ್ರಿಯದರ್ಶಿನಿ ಕೋ-ಆಪರೇಟಿವ್‌ ಸೊಸೈಟಿದ 5ನೇ ವರ್ಷದ ಸಂಭ್ರಮಾಚರಣೆದ ಅಂಗವಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ ಟ್ರಸ್ಟ್‌ ರಿ., ಮುಲ್ಕಿ ಅರಮನೆ ವೆಲ್ಫೇರ್ ಆಂಡ್‌ ಚಾರಿಟೇಬಲ್ ಟ್ರಸ್ಟ್ (ರಿ) ಮುಲ್ಕಿ ಪ್ರೆಸ್ ಕ್ಲಬ್ , ಪೂಜಾ ಫ್ರೆಂಡ್ಸ್ ಹಳೆಯಂಗಡಿ, ಭಗವತಿ ಫ್ರೆಂಡ್ಸ್ ಸಸಿಹಿತ್ಲು , ಶ್ರೀ ಭಗವತಿ ಯುನೈಟೆಡ್ ಫ್ರೆಂಡ್ಸ್ ಕದಿಕೆ, ಹಳೆಯಂಗಡಿ, ಯಶಸ್ವಿ ಸಂಜೀವಿನಿ ಗ್ರಾಮ ಪಂಚಾಯತ್ ಮಟ್ಟದ ಒಕ್ಕೂಟ(ರಿ) ಹಳೆಯಂಗಡಿ, ಚೇಳಾಯರು ವಿವೇಕಾನಂದ ಯುವಕ ಮಂಡಲ,ತೋಕೂರು ಫೇಮಸ್ ಯೂತ್ ಕ್ಲಬ್ ಬೊಕ್ಕ ಮಹಿಳಾ ಮಂಡಲ, ಸುಬ್ರಹ್ಮಣ್ಯ ಸ್ಪೋರ್ಟ್ಸ್ ಕ್ಲಬ್, ಚೇಳಾಯಿರು ಈಶ್ವರಾನಂದ ಭಜನಾ ಮಂದಿರ, ಹಳೆಯಂಗಡಿ ಆಟೋ ರಿಕ್ಷಾ ಚಾಲಕರ ಮತ್ತು ಮಾಲಕರ ಸಂಘ. ಪಾವಂಜೆ, ಓಂ ಕ್ರಿಕೆಟರ್ಸ್‌, ಸಾಗರ ಸಾಗ್ ಕ್ರಿಕೆಟರ್ಸ್ ಸಾಗ್, ಇಂದಿರಾ ನಗರ ಸಂಗಮ ಮಹಿಳಾ ಮಂಡಲ ಮೊಕ್ಲೆನ ಒಟ್ಟುಸೇರಿಗೆಡ್
ಕಟೀಲ್‌ದ ದುರ್ಗಾ ಸಂಜೀವನಿ ಮಣಿಪಾಲ್‌ ಆಸ್ಪತ್ರೆದ ಸಹಕಾರೊಡು ಕಟೀಲು ದುರ್ಗಾ ಸಂಜೀವಿನಿ ಆಸ್ಪತ್ರೆದ ಆಡಳಿತ ನಿರ್ದೇಶಕೆರ್ ಡಾ. ಶಿವಾನಂದ ಪ್ರಭು ನೇತೃತ್ವಡ್ ನಡತಿನ ಉಚಿತ ಆರೋಗ್ಯ ವೈದ್ಯಕೀಯ ತಪಾಸಣಾ ಶಿಬಿರಡ್ 5 ಜನ ಪೊಂಜೊವುಲೆಗ್ ಉಚಿತ ಹೊಲಿಗೆ ಯಂತ್ರ ಹಸ್ತಾಂತರ ಮಲ್ತ್‌ದ್ ಪಾತೆರಿಯೆರ್.
ಶಿಬಿರನ್ ದ.ಕ.ಜಿಲ್ಲೆದ ಸಹಕಾರ ಸಂಘದ ಉಪ ನಿಬಂಧಕೆರ್ ಎಚ್. ಎನ್ ರಮೇಶ್ ಉದಿಪನ ಮಲ್ತ್‌ದ್, ಪ್ರಿಯದರ್ಶಿನಿ ಸೊಸೈಟಿ ತನ್ನ ವ್ಯವಹಾರದ ಒಟ್ಟುಗೆ ಸಮಾಜಮುಖಿ ಬೇಲೆ ಮಲ್ಪುನವು ಬೇತೆಕ್ಲೆಗ್ ಮಾದರಿ ಆದುಂಡು. ಅವು ನಿರಂತರವಾದ್ ನಡಪಡ್ ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಹೋಟೆಲ್ ವುಡ್ ಸೈಡ್ ಮಹಾಪ್ರಬಂಧಕೆರ್ ಎಚ್. ಭಾಸ್ಕರ್ ಸಾಲ್ಯಾನ್,ತಾ ಪಂ ಮಾಜೀ ಸದಸ್ಯೆರ್ ಮನ್ಸೂರ್ ಸಾಗ್ ,ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಮುಲ್ಕಿ ನ ಪಂ ಮಾಜಿ ಉಪಾಧ್ಯಕ್ಷೆ ರಾಧಿಕ ಕೋಟ್ಯಾನ್ ,ಹಳೆಯಂಗಡಿ ಪ್ರಿಯದರ್ಶಿನಿ ಕೋಆಪರೇಟಿವ್ ಸೊಸೈಟಿ ಅಧ್ಯಕ್ಷೆರ್ ವಸಂತ್ ಬೆರ್ನಾಡ್,ಉಪಾಧ್ಯಕ್ಷೆರ್ ವಿಜಯ ಕುಮಾರ್ ಸನಿಲ್ , ನಿರ್ದೇಶಕೆರಾಯಿನ ಉಮಾನಾಥ ಜೆ ಶೆಟ್ಟಿಗಾರ್,ಧನಂಜಯ ಮಟ್ಟು, ಗೌತಮ್ ಜೈನ್, ಗಣೇಶ್ ಪ್ರಸಾದ್ ದೇವಾಡಿಗ, ಜೈ ಕೃಷ್ಣ ಕೋಟ್ಯಾನ್, ಡಾ. ಶೆರಿಲ್ ಅಯೋನ, ರೇಖಾ ಶೆಟ್ಟಿ,ಹರೀಶ್ ಎನ್ ಪುತ್ರನ್, ನವೀನ್ ಸಾಲ್ಯಾನ್ ಪಂಜ, ಮೋಹನ್ ದಾಸ್, ಅನಿಲ್ ಪೂಜಾರಿ ಸಸಿಹಿತ್ಲು, ರಜಿಯಾ ಭಾನು, ಕರಿಯ ಕಾಡಿಗ ಮೊಕುಲು ಮಾತ ಇತ್ತೆರ್.
ವೇದಿಕೆಡ್ ತಜ್ಞ ವೈದ್ಯೆರಾಯಿನ
ಡಾ. ನಿತ್ಯಾನಂದ ಚೌಟ, ಡಾ. ಸುಧೀಂದ್ರ ಕಾರ್ನಾಡ್ ,ಡಾ ಕೀರ್ತನ್ ರಾವ್. ಡಾ. ಉಣ್ಣಿ ಕೃಷ್ಣನ್ ನೈನಾ‌ರ್, ಡಾ. ಸಂಗೀತ ಭಟ್ ಬೊಕ್ಕ ವಿವಿಧ ಸಂಘ ಸಂಸ್ಥೆಲೆನ ಪದಾಧಿಕಾರಿಲು ಇತ್ತೆರ್.
ಕಟೀಲು ದುರ್ಗಾ ಸಂಜೀವಿನಿ ಆಸ್ಪತ್ರೆದ ವೈದ್ಯಕೀಯ ಶಿಬಿರದ ಪ್ರಬಂಧಕೆರ್ ನಿತೇಶ್ ಶೆಟ್ಟಿ ಎಕ್ಕಾರು ಮಾಹಿತಿ ಕೊರಿಯೆರ್. ಸ್ವಸಹಾಯ ಸಂಘದ ಪ್ರೇರಕಿ ನೀತು ನಿರಂಜಲ ಪ್ರಾರ್ಥನೆ ಮಲ್ತೆರ್.
ಸೊಸೈಟಿ ಅಧ್ಯಕ್ಷೆರ್ ವಸಂತ್ ಬೆರ್ನಾಡ್ ಸ್ವಾಗತ ಮಲ್ತೆರ್. ಸೊಸೈಟಿದ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಸೊಲ್ಮೆ ಸಂದಾಯೆರ್. ಶಾಖಾ ಪ್ರಬಂಧಕೆರಾಯಿನ ಅಭೀಷ್ಟ ಜೈನ್ ಬೊಕ್ಕ ಪ್ರಜ್ಞಶ್ರೀ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.

ಸದ್ಯೊಡೇ 5 ನೇ ಶಾಖೆ
ಲೇಸ್‌ದ ಗುರ್ಕಾರ್ಮೆ ವಹಿಸ್‌ದಿತ್ತಿನ ಹಳೆಯಂಗಡಿ
ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಅಧ್ಯಕ್ಷೆರ್ ಎಚ್ ವಸಂತ್ ಬೆರ್ನಾರ್ಡ್ ಪಾತೆರ್ದ್, ಕೊರೊನಾ ಸಂಕಷ್ಟ ಕಾಲೊರ್ದು ಬೊಕ್ಕ ಮಲ್ಲ ಸವಾಲ್‌ದ ನಡುಟ್ಟು ಉದಿಪನ ಆಯಿನ ಪ್ರಿಯದರ್ಶಿನಿ ಸೊಸೈಟಿ, ಈ ಸಾರ್ಥಕ 5 ವರ್ಷಡ್ ಸಾಧನೆ ಮಲ್ತ್‌ದ್ 4 ಶಾಖೆ ಮಲ್ತ್‌ದ್,ಎಡ್ಡೆ ಲಾಭೊಡು ನೆತ್‌ದ್, ಪ್ರಸಕ್ತ ವರ್ಷೊಡು 5ನೇ ಶಾಖೆ ಉದಿಪನ ಮಲ್ಪರೆ ತಯಾರಾತ್ಂಡ್ ಪಂದ್ ಪಂಡೆರ್.
ವೈದ್ಯಕೀಯ ಶಿಬಿರ
5ನೇ ವರ್ಷದ ಸಂಭ್ರಮಾಚರಣೆದ ಉಚಿತ ವೈದ್ಯಕೀಯ ಶಿಬಿರಡ್ ಸಾಮಾನ್ಯ ತಪಾಸಣೆ, ಕಣ್ಣ್ ಪರೀಕ್ಷೆ,
ಇಸಿಜಿ, ಶುಗರ್, ಬಿ ಪಿ ಪರೀಕ್ಷೆ, ಕನ್ನಡಕ ವಿತರಣೆ, ಕೂಲಿದ ತಪಾಸಣೆ ನಡತ್ಂಡ್. ಸುಮಾರ್ 300ರ್ದ್‌ಲ ಎಚ್ಚ ಜನ ಶಿಬಿರದ ಪ್ರಯೋಜನ ಪಡೆಯೆರ್.

‘ಗಜಾನನ ಕ್ರಿಕೆಟರ್ಸ್’ ತುಳು ಸಿನಿಮಾ ಮೇ 22 ಕ್ಕ್ ಬಿಡುಗಡೆ

ಕುಡ್ಲ : ಪ್ರಜ್ವಲ್ ಫಿಲಂಸ್ ಲಾಂಛನಡ್ ತಯಾರಾಯಿನ ಪ್ರಜ್ವಲ್ ಶೆಟ್ಟಿ ನಿರ್ಮಾಣದ, ಕೀರ್ತನ್ ಭಂಡಾರಿ ನಿರ್ದೇಶನದ `ಗಜಾನನ ಕ್ರಿಕೆಟರ್ಸ್ (ಜಂತೊಟ್ಟು ಸಿನ್ಸ್ 1983)’
ತುಳು ಚಲನಚಿತ್ರ ಮೇ 22 ಕ್ಕ್ ಕರಾವಳಿ ಜಿಲ್ಲೆಡ್ ಬಿಡುಗಡೆ ಆವರೆ ಉಂಡು .
ಕುಡ್ಲ, ತೊರ್ತಾಲ್, ಪಡ್ಡೆದ್ರ, ಒಡಿಪು, ಕುಂದಾಪುರ, ಮಣಿಪಾಲ ಕಾರ್ಲ, ಪುತ್ತೂರು, ಬೆಳ್ತಂಗಡಿ, ದೇರಳಕಟ್ಟೆ ಇಂಚಿನ ಕಡೆಟ್ ಸಿನಿಮಾ ಬಿಡುಗಡೆ ಆಪುಂಡು ಪಂದ್ ನಟೆ, ನಿರ್ಮಾಪಕೆ ಪ್ರಜ್ವಲ್ ಶೆಟ್ಟಿ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.
ಉಂದು ತುಳು ಭಾಷೆದ ಮಲ್ಲ ಬಜೆಟ್ ಚಿತ್ರ ಆದ್, ಕ್ರಿಕೆಟ್ ಬೊಕ್ಕ ಆಟಗಾರೆರೆ್ನ ಬದ್‌ಕ್‌ದ ಹಿನ್ನಲೆದ ಕತೆ ಉಂಡು. ಚಿತ್ರದಲ್ಲಿ ಹಾಸ್ಯ, ಪ್ರೇಮಪೂರಿತ ಭಾವನೆಗಳು ಬೊಕ್ಕ ಸಮಾಜಮುಖಿ ಸಂದೇಶದ ಗಟ್ಟಿ ಕತೆ ಉಂಡು.
ಕೀರ್ತನ್ ಭಂಡಾರಿ ಕಥೆ, ಚಿತ್ರಕಥೆ ಬರೆದ್ ಸುರುತ್ತ ಸರ್ತಿ ನಿರ್ದೇಶನಗ್ ಜೈದೆರ್. ಮಂಗಳೂರು ಬೊಕ್ಕ ಸುತ್ತಮುತ್ತ ಪ್ರದೇಶಡ್ ಚಿತ್ರೀಕರಣ ನಡೆದ್ಂಡ್. ಈ ಸಿನಿಮಾಡ್ ನಿರ್ಮಾಪಕೆರಾಯಿನ ಪ್ರಜ್ವಲ್ ಶೆಟ್ಟಿ ಪ್ರಮುಖ ಪಾತ್ರದಲ್ಲಿ ನಟನೆ ಮಲ್ದೆರ್. ತಾರಾಗಣಡ್ ವಿನೀತ್ ಕುಮಾರ್, ನವೀನ್ ಡಿ. ಪಡೀಲ್, ಅರವಿಂದ ಬೋಳಾರ್, ಭೋಜರಾಜ್ ವಾಮಂಜೂರು, ದೀಪಕ್ ರೈ ಪಾಣಾಜೆ, ಪ್ರಕಾಶ್ ತುಮಿನಾಡು, ಉಮೇಶ್ ಮಿಜಾರು, ಅನ್ವಿತಾ ಸಾಗರ್, ಸಮತಾ ಅಮೀನ್, ಸರ್ವೋತ್ತಮ ಶೆಟ್ಟಿ ಅಬುದಾಭಿ, ವಾಲ್ಟರ್ ನಂದಳಿಕೆ, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ಪುಷ್ಪರಾಜ್ ಬೊಳ್ಳಾರು, ರೂಪ ವರ್ಕಾಡಿ, ಲಂಚುಲಾಲ್, ಸಚಿನ್ ಮಾಡ, ಜೇಮ್ಸ್ ಮೆಂಡೋನ್ಸಾ, ಕರಣ್ ಪೂಜಾರಿ ಸೇರ್ದ್ ಮಸ್ತ್ ಕಲಾವಿದೆರ್ ಅಭಿನಯ ಮಲ್ದೆರ್.ವಿನುತ್ ಕೆ. ಸುವರ್ಣ ಮೆರೆನ ಛಾಯಾಗ್ರಹಣ, ಸುಜಯ್ ಶಿವರಾಮ್ ಬೊಕ್ಕ ಕೌಶಿಕ್ ಭಂಡಾರಿ ಮೆರೆನ ಸಂಕಲನ ಉಂಡು.
ಗೀತಾ ಸಾಹಿತ್ಯನ್ ಕೀರ್ತನ್ ಭಂಡಾರಿ, ಸೃಜನ್ ಮಾನವ್, ಶ್ರೀನಿಧಿ ಶೆಟ್ಟಿ ಬರೆತೆರ್.
ಸಹ ನಿರ್ಮಾಪಕೆರಾದ್ ರೋಹನ್ ಪಿರೇರ ವಾಮಂಜೂರು ಬೊಕ್ಕ ಸಂತೋಷ್ ಲಾಡ್ ಸಹಕಾರ ಕೊರ್ತೆರ್. ಸಂಗೀತ ಸೃಜನ್ ಕುಮಾರ್ ತೋನ್ಸೆ ಕೊರ್ತೆರ್.
ಪತ್ರಿಕಾಗೋಷ್ಠಿಡ್ ನಟ ವಿನೀತ್ ಕುಮಾರ್, ಸಮತಾ ಅಮೀನ್ ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ಸಹ ನಿರ್ಮಾಪಕೆರಾಯಿನ ರೋಹನ್ ಪಿರೇರಾ ವಾಮಂಜೂರು, ಸಂತೋಷ್ ಲಾಡ್, ಸುರೇಶ್ ರಾವ್ ಕೊಕ್ಕಡ ಮೊಕುಲು ಮಾತ ಇತ್ತೆರ್.

ಕಂಡೇವುದ ಮೀನ್ ಪತ್ತುನ ಜಾತ್ರೆ ಬಂದ್, ಸಾರ್ವಜನಿಕೆರೆರ್ದ್ ಪ್ರತಿಭಟನೆ

ಸುರತ್ಕಲ್: ಇತಿಹಾಸ ಪ್ರಸಿದ್ಧ ಕ್ಷೇತ್ರ ಕಂಡೆವುದ ನಂದಿನಿ ತುದೆಕ್ಕ್ ಕುರೆ ನೀರ್ ಬುಡ್ತಿನೆರ್ದಾವರ ತುದೆಟ್ಟ್ ಮೀನ್ ಸಂತೆಸಿ ಕೊಡಿಪಂದೆ ಸಾಂಪ್ರದಾಯಿಕ ಮೀನ್ ಪತ್ತುನ ಜಾತ್ರೆ ಉಂತುದು ಪೋಯಿನ ಹಿನ್ನೆಲೆಡ್ ನಂದಿನಿ ನದಿ ಹೋರಾಟ ಸಮಿತಿ ಬೊಕ್ಕ ಸಾರ್ವಜನಿಕೆರೆರ್ದ್ ಶುಕ್ರವಾರ ಹಾಠಾತ್ ಪ್ರತಿಭಟನೆ ನಡತ್ಂಡ್.
ತುಳುನಾಡ್‌ದ ಐತಿಹಾಸಿಕ ಅಕೇರಿದ ಆಲಡೆ, ಕಂಡೇವುದ ಶ್ರೀ ಧರ್ಮರಸು ಉಳ್ಳಾಯ ಬೊಕ್ಕ ಪರಿವಾರ ಶಕ್ತಿಲೆನ ಸಾನ್ನಿದ್ಯೊಡು ಪ್ರತಿವರ್ಷ ನಡಪುನ ಜಾತ್ರೆದ ವಿಶೇಷ ಆಚರಣೆ ಆಯಿನ ಮೀನ್ ಪತ್ತುನ ಜಾತ್ರೆಗ್ ಅಡ್ಡಿ ಆಯಿನ ಹಿನ್ನೆಲೆಡ್ ಹಠಾತ್ ಪ್ರತಿಭಟನೆ ನಡತ್ಂಡ್.
ಕಂಡೇವುದ ತುದೆಕ್ಕ್ ಮುಂಚೂರು ವೆಟ್ ವೆಲ್ ಕೈತಲ್ದ ಚರಂಡಿ ನೀರ್, ಕೊಡಿಪಾಡಿದ ತ್ಯಾಜ್ಯ ಸಂಸ್ಕರಣಾ ಘಟಕದ ನೀರ್, ಚೊಕ್ಕಬೆಟ್ಟು ಪರಿಸರದ ಇಲ್ಲದಕ್ಲೆನ ಕುರೆ ನೀರ್, ಮುಕ್ಕದ ಖಾಸಗಿ ಅಸ್ಪತ್ರೆ, ಕಾಲೇಜು, ವಸತಿ ಗೃಹ ಬೊಕ್ಕ ಹೋಟೇಲ್‌ದ ವಿಷಕಾರಿ ನೀರ್‌ನ್ ಬುಡ್ಪಿನೆರ್ದಾವರ ನಂದಿನಿ ತುದೆ ಸಂಪೂರ್ಣ ಕಲುಷಿತ ಆತ್ಂಡ್.ಉಂದೆರ್ದಾವರ ಚೇಳಾಯಿರು ಕಂಡೇವು ಭಾಗದ ಕೃಷಿಕೆರೆಗ್ ಕೃಷಿ ಮಲ್ಪರೆ ಆವಂದಿನ ಪರಿಸ್ಥಿತಿ ಬೈದ್ಂಡ್.ಪರ್ಪಿನ ನೀರ್‌ಗ್‌ಲ ಸಮಸ್ಯೆ ಆದ್ ಗುವೆಲ್ ಪೂರ ಮಲಿನ ಆತ್ಂಡ್. ಅಂಚೆನೆ ಇತಿಹಾಸ ಪ್ರಸಿದ್ಧ ಕಂಡೇವುದ ಮೀನ್ ಪತ್ತುನ ಜಾತ್ರೆಗ್ ಜನ ದಾಂತೆ ಉಂತಿನೆರ್ದಾವರ ಪ್ರತಿಭಟನಾಕಾರೆರ್ ಜಿಲ್ಲಾಡಳಿತ, ಜನಪ್ರತಿನಿಧಿನಕ್ಲೆಗ್ ಧಿಕ್ಕಾರ ಪಾಡಿಯೆರ್.
ನಂದಿನಿ ಹೋರಾಟ ಸಮಿತಿ ಪ್ರಮುಖೆರಾಯಿನ ದಿವಾಕರ ಸಾಮಾನಿ, ಸುಕೇಶ್ ಶೆಟ್ಟಿ ಖಂಡಿಗೆ, ಚೇಳಾರ್ ಗ್ರಾಮ ಮಾಜಿ ಪಂಚಾಯತ್ ಅಧ್ಯಕ್ಷೆರ್ ಜಯಾನಂದ, ಮುಖಂಡೆರಾಯಿನ ಕಿರಣ್ ಶೆಟ್ಟಿ ಕೆರೆಮನೆ, ನಂದಿನಿ ನದಿ ಹೋರಾಟ ಸಮಿತಿದ ನಿತಿನ್ ಶೆಟ್ಟಿ ಖಂಡಿಗೆ ಪಾತೆರ್ದ್, ನನ ಆಜಿ ತಿಂಗೊಲ್ದ ಉಲಯಿ ಈ ಸಮಸ್ಯೆಗ್ ಪರಿಹಾರ ತಿಕಿಜಿಡ ಮತದಾನ ಬಹಿಷ್ಕಾರ ಅಂಚೆನೆ ಉಗ್ರ ಹೋರಾಟ ಮಲ್ಪುವ ಪಂದ್ ಪಂಡೆರ್. ಚೇಳಾರ್ ಗ್ರಾಮ ಪಂಚಾಯತ್ ಮಾಜಿ ಅಧ್ಯಕ್ಷೆರ್ ಪುಷ್ಪರಾಜ್ ಶೆಟ್ಟಿ,ಮಾಜಿ ಸದಸ್ಯೆರ್ ವಿನಯಕುಮಾರ್ ಶೆಟ್ಟಿ, ಗಂಗಾಧರ ಪೂಜಾರಿ ಚೇಳಾಯಿರು ಕಾಲನಿ ಮೊಕುಲು ಮಾತ ಇತ್ತೆರ್.