ಸುಳ್ಯ ದ ಸುದ್ದಿ | Sullia News

ಕುಡ್ಲಡ್ ಬಾರಿ ಬರ್ಸ : ಸುಳ್ಯಡ್ ಆಲಿಕಲ್ಲು ಬರ್ಸ

ಕುಡ್ಲ, ಮೇ 01: ದಕ್ಷಿಣ ಕನ್ನಡ, ಚಿಕ್ಕಮಗಳೂರು ಪೇಂಟೆಡ್ ಕೆಲವು ಕಡೆ ಗುರುವಾರ ಬಾರಿ ಬರ್ಸ ಬೈದುಂಡು

ದಕ್ಷಿಣ ಕನ್ನಡ ಜಿಲ್ಲೆದ ಕಡಬ, ಸುಳ್ಯ ಪೇಂಟೆಡ್ ತೆಡಿಲ್ ದೊಟ್ಟುಗು ಆಲಿಕಲ್ಲು ಬರ್ಸ ಬೈದುಂಡು . ಕುಕ್ಕೆ ಸುಬ್ರಹ್ಮಣ್ಯ, ಬಿಳಿನೆಲೆ, ನೂಜಿಬಾಳ್ತಿಲ, ರೆಂಜಿಲಾಡಿ, ಇಚ್ಲಂಪಾಡಿ, ಕಡ್ಯ ಕೊಣಾಜೆ, ಬಳ್ಪ, ಯೇನೆಕಲ್ಲು, ಐನೆಕಿದು, ಸುಳ್ಯ ತಾಲೂಕಿನ ಪಂಜ, ಕೊಲ್ಲಮೊಗ್ರು, ಹರಿಹರ ಪಲ್ಲತಡ್ಕ, ಕಲ್ಮಕಾರು ವ್ಯಾಪ್ತಿಡ್ ಬರ್ಸ ಬೈದುಂಡು.

ಸಂಪಾಜೆ ಭಾಗಡ್ ಲಾ ಬರ್ಸ ಬೈದುಂಡು. ಕಲ್ಲಾಜೆ, ಕಲ್ಮಡ್ಕ, ಪಂಜ, ಈಶ್ವರಮಂಗಲ, ಕೊಯಿಲ, ಉಜಿರೆ, ಪಂಜಿಕಲ್ಲು ಪೆರಾಜೆ,ಚಿಕ್ಕಮಗಳೂರು ಜಿಲ್ಲೆದ ಕೊಟ್ಟಿಗೆಹಾರ, ಕಳಸ, ಕೊಪ್ಪಡ್ , ತೆಡಿಲ್ ದೊಟ್ಟುಗು ಭಾರಿ ಬರ್ಸ ಬೈದುಂಡು.

ವಿಮಾನ ನಿಲ್ದಾಣಡ್ ದಿಢೀರ್ ಪಾರ್ಕಿಂಗ್ ಶುಲ್ಕಡ್ ಬದಲಾವಣೆ : ಪ್ರಯಾಣಿಕೆರ್ನ ಆಕ್ರೋಶ

ಕುಡ್ಲ, ಮೇ 01:ಕುಡ್ಲ ವಿಮಾನ ನಿಲ್ದಾಣದ ನಿರ್ವಹಣೆದ ಗುತ್ತಿಗೆ ಪಡೆಯೊಂದಿನ ಖಾಸಗಿ ಕಂಪೆನಿ ವಿಮಾನ ನಿಲ್ದಾಣದ ಗಾಡಿ ಉಂತಾವುನ ಪನವುಡು ಗರಿಷ್ಠ ಪ್ರಮಾಣಡ್ ಜಾಸ್ತಿ ಮಲ್ದಿನವು ವಾಹನ ಚಾಲಕೆರ್ನ ಬೊಕ್ಕ ಗ್ರಾಹಕೆರ್ನ ಆಕ್ರೋಶಗ್ ಕಾರಣ ಆತುಂಡು. ವಿಮಾನ ನಿಲ್ದಾಣನ್ ಗುತ್ತಿಗೆ ಪಡೆಯೊಂದಿನ ಅದಾನಿ ಕಂಪೆನಿ ಮೇ 1, ರ್ದ್ ಪೊಸ ಪಾರ್ಕಿಂಗ್ ದ ಪನವು ಪಾಡ್ದುಂಡು.

ವಿಮಾನ ನಿಲ್ದಾಣಡ್ ದಿಢೀರ್ ಪಾರ್ಕಿಂಗ್ ಶುಲ್ಕ ಜಾಸ್ತಿ ಮಲ್ದಿನವು ಕೊರೋನ ಸಂಕಷ್ಟದ ಪೊರ್ತುಡು ಜನಕ್ಲೆನ ಗಾಯದ ಮಿತ್ತ್ ನನೊಂಜಿ ಬರೆ ಪಾರ್ದಿಲಕ ಆತುಂಡು ಪಂದ್ ಪ್ರಯಾಣಿಕೆರ್ ಆಕ್ರೋಶ ವ್ಯಕ್ತ ಮಲ್ದೆರ್.

ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ವತಿರ್ದ್ ಯಕ್ಷಗಾನ ಕಲಾವಿದೆರೆಗ್ ಸಹಾಯ

ಕುಡ್ಲ , ಎ.30: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಕರಿನ ವರ್ಷದಲಕ ಈ ವರ್ಷಲಾ ತೀರಾ ಬಂಗಡ್ ಉಪ್ಪುನ ಯಕ್ಷಗಾನ ಕಲಾವಿದೆರೆಗ್ ಉಚಿತವಾದ್ ದಿನಸಿ ಸಾಮಗ್ರಿಲೆನ್ ಇಲ್ಲದ ಬಾಕಿಲ್ ಗ್ ಎತ್ತಾವುನ ವ್ಯವಸ್ಥೆ ಮಲ್ದೆರ್ . ಅವಶ್ಯ ಉಪ್ಪುನ ಕಲಾವಿದೆರ್ ಮೊಬೈಲ್ 9164521588 ,ಅತ್ತುಂಡ 7411161662 ಬೊಕ್ಕ ಕೈತಲ್ ದ ಪಟ್ಲ ಫೌಂಡೇಶನ್ ಘಟಕದ ಪದಾಧಿಕಾರಿಲೆನ್ ಮೇ 10 ತಾರೀಖ್ ದ ಉಲಯಿ ಸಂಪರ್ಕ ಮಲ್ತ್ ದ್ ಅಕ್ಲೆನ ಪುದರ್ ಹೆಸರು, ವಿಳಾಸ ಅಂಚನೇ ಮೇಳದ ಪುದರ್ ನೋಂದಾವನೆ ಮಲ್ಪೋಲಿ ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ದ ಪ್ರಧಾನ ಕಾರ್ಯದರ್ಶಿ ಕೆ. ಪುರುಷೋತ್ತಮ ಭಂಡಾರಿ ಅಡ್ಯಾರ್ ಪ್ರಕಟಣೆಡ್ ತೆರಿಪಾದೆರ್ .