ಪುತ್ತೂರ್ದ ಸುದ್ದಿ | Puttur News

ರಬ್ಬರ್ ಬೇಲೆದಕ್ಲೆನ ಬಾಕಿ ಬೋನಸ್ ಶೀಘ್ರ ಬಿಡುಗಡೆ | ಅರಣ್ಯ ಸಚಿವ ಖಂಡ್ರೆ ಭರವಸೆ

ಪುತ್ತೂರು: ರಬ್ಬರ್ ಬೇಲೆದಕ್ಲೆನ ಕೊರಿಯೆರೆ ಬಾಕಿ ಇಪ್ಪುನ ಬೋನಸ್‌ನ್ ಬೇಗಡ್‌ ಕೋರ್ಪ ಪಂದ್ ಅರಣ್ಯ ಸಚಿವೆರ್ ಈಶ್ವರ ಖಂಡ್ರೆ ಪುತ್ತೂರು ಶಾಸಕ ಅಶೋಕ್ ರೈಗ್‌ ಭರವಸೆ ಕೊರಿಯೆರ್.‌

ಬೋನಸ್ ಕೊರಿಯೆರೆ ಕೆಎಫ್‌ಡಿಸಿ ಬೊಕ್ಕ ಹಣಕಾಸು ಇಲಾಖೆದ ಒಪ್ಪಿಗೆ ತಿಕ್ಕೆರೆ ತಡ ಆಯಿನ ಕಾರಣ ಪಿರ ವಿಳಂಬ ಆತ್‌ಂಡ್. ಅ. 26 ದಾನಿ ಪಿರ ಅರಣ್ಯ ಸಚಿವೆರೆನ್‌ ಭೇಟಿಯಾದ್ ಶಾಸಕೆರ್ ಮಾತುಕತೆ ನಡಪಾದ್‌ ಬೇಗಡೆ ಬಾಕಿ ಇಪ್ಪುನ ಬೋನಸ್‌ನ್ ಕಾರ್ಮಿಕೆರೆಗ್ ಕೊರ್ಪ ಪಂದ್ ಶಾಸಕರೆಗ್‌ ತೆರಿಪಾದೆರ್. ಕರಿನ ಒಂಜಿ ವರ್ಷರ್ದ್ ಕಾರ್ಮಿಕೆರ್ ಬೋನಸ್‌ಗಾದ್ ಒತ್ತಾಯ ಮಲ್ತ್‌ ಇತ್ತೆರ್.

ಐಸ್ ಕ್ರೀಂ ಉದ್ಯಮಿ ಕಾಪಿಲ ಗಿರಿಯಪ್ಪ ಗೌಡೆರ್ನ ಮರ್ಮಲ್ ಐಶ್ವರ್ಯ ಆತ್ಮಹತ್ಯೆ…!!

 ಸುಳ್ಯ : ಡೈರಿ ರಿಚ್ ಐಸ್ ಕ್ರೀಂ ಉದ್ಯಮಿ, ಕನಕಮಜಲು ಕಾಪಿಲ ಗಿರಿಯಪ್ಪ ಗೌಡೆರ್ನ ಮರ್ಮಲ್ ಬೆಂಗಳೂರ್‌ಡ್ ಆತ್ಮಹತ್ಯೆ ಮಲ್ತೊನ್ನ ಘಟನೆ ವರದಿ ಆತ್‌ಂಡ್. ಗಿರಿಯಪ್ಪ ಗೌಡ ಮೇರ್‌ನ ಮಗೆ ರಾಜೇಶ್‌ನ ಬುಡೆದಿ ಐಶ್ವರ್ಯ(26) ಆತ್ಮಹತ್ಯೆ ಮಲ್ತೊನ್ನಾರ್. ಉಬರಡ್ಕ ಮಿತ್ತೂರು ಗ್ರಾಮದ ಮದುವೆಗದ್ದೆ ಸುಬ್ರಹ್ಮಣ್ಯ ಗೌಡ ಬೊಕ್ಕ ಉಷಾ ದಂಪತಿನ ಮಗಲ್ ಐಶ್ವರ್ಯ ನಾಲ್ ವರ್ಷದ ಪಿರ ರಾಜೇಶ್ ಮೇರೆನ್‌ ಮದಿಮೆ ಆದಿತ್ತೆರ್.

ಐಶ್ವರ್ಯ ಬೆಂಗಳೂರ್‌ದ ಕಂಪೆನಿಡ್‌ ಬೇಲೆ ಮಲ್ತೊಂದು ಇತ್ತೆರ್‌. ಕಂಡನಿ ರಾಜೇಶ್ ಸ್ವಂತ ಐಸ್ ಕ್ರೀಮ್ ಪಾರ್ಲರ್ ನಡಪಾವೊಂದು ಬೆಂಗಳೂರುಡ್‌ ವಾಸ ಆದಿತ್ತೆರ್. ಐಶ್ವರ್ಯನ ಪೊಪ್ಪ ಅಮ್ಮಲ ಬೆಂಗಳೂರ್‌ಡೆ ಇತ್ತೆರ್.‌ ಕೆಲವು ಸಮಯರ್ದ್‌ ಐಶ್ವರ್ಯ ತನ್ನ ಅಪ್ಪೆನ ಇಲ್ಲಗ್‌ ಬತ್ತಿತ್ತೆರ್.‌ ಇಲ್ಲಲ್‌ ಏರ್ಲ ಇಜ್ಜಂದಿನ ಸಮಯ ತೂದು ಆತ್ಮಹತ್ಯೆ ಮಲ್ತೊಂದೆರ್‌ ಪಂದ್‌ ತೆರಿದ್‌ ಬೈದ್‌ಂಡ್‌.

ಸ್ಲ್ಯಾಪ್ ಜರಿದ್ ತೀರ್ನ ಕಾರ್ಮಿಕೆ, ಕಾಂಟ್ರಾಕ್ಟರ್‌ಗ್ ಗಡಿ

ಇಲ್ಲದ ಸಿಟೌಟ್‌ದ ಸ್ಲ್ಯಾಪ್‌ದ ಸೆಂಟ್ರಿಂಗ್ ಬೇಲೆ ಮಲ್ತೊಂದುಪ್ಪುನಗ ಸ್ಲ್ಯಾಪ್ ಜರಿದ್ ಕಾರ್ಮಿಕೆ ಒರಿ ತೀರ್ದ್, ಕಂಟ್ರಾಕ್ಟರ್‌ಗ್ ಗಡಿ  ಆತಿನ ಘಟನೆ  ಪುತ್ತೂರು ತಾಲೂಕ್, ಅರಿಯಡ್ಕ ಗ್ರಾಮೊದ, ಪಾದಲಾಡಿ ಪನ್ಪಿನಲ್ಪ ಕೋಡೆ ಕಾಂಡೆ ನಡತ್‌ದ್ಂಡ್.

ತೀರ್ದಿನ ಕಾರ್ಮಿಕೆ ಅರಿಯಡ್ಕ ಗ್ರಾಮೊದ ಕೌಡಿಚ್ಚಾರ್ ನಿವಾಸಿ ಶೇಖರ ಕುಲಾಲ್ (45) ಅಂಚೆನೇ ಪೆಟ್ಟಾತಿನ ಕಂಟ್ರಾಕ್ಟರ್‌ ಸಂಜೀವ ಮೊಗೇರ ಪಂದ್ ತೆರಿದ್‌ಬೈದ್ಂಡ್. ಅರಿಯಡ್ಕ ಗ್ರಾಮೊದ ಪಾದಲಾಡಿ ನಿವಾಸಿ ಕಮಲ ಪನ್ಪಿನಾರೆನ ಇಲ್ಲದ ಸಿಟೌಟ್‌ದ ಸ್ಲ್ಯಾಪ್‌ದ ಸೆಂಟ್ರಿಂಗ್ ಬೇಲೆ ಮಲ್ತೊಂದುಪ್ಪುನಗ ಈ ನಡಕೆ ನಡತ್‌ದ್ಂಡ್. ಈ ನಡಕೆಡ್ ಶೇಖರ ಕುಲಾಲ್ ಬೊಕ್ಕ ಸಂಜೀವ ಮೊಗೇರೆರೆಗ್ ಗಡಿಕುಲಾದ್, ಗಾತಿದ ಪೆಟ್ಟಾದಿತ್ತಿನ ಶೇಖರ ಕುಲಾಲ್ ಆಸ್ಪತ್ರೆಗ್ ಲೆತೊಂದು ಪೋಪಿನ ಸಾದಿಡೇ ತೀರ್ದೆರ್. ಸಮ ಕ್ಯೂರಿಂಗ್ ಆವಂದಿನ ಜಾಗೆಡ್ ಬೇಲೆ ಮನ್ಪುನ ಜೂವೊಗು ಸಂಚಿಕರ ಪಂದ್ ತೆರಿದಿತ್ತ್‌ದ್‌ಲಾ ಶೇಖರ್ ಕುಲಾಲೆರೆನ್ ಬೇಲೆ ಮನ್ಪಾಯಿನ ಕಾಂಟ್ರ್ಯಾಕ್ಟರ್ ಸಂಜೀವ ಮೊಗೇರ ಬೊಕ್ಕ ಇಲ್ಲದ ದನಿ ಕಮಲ ಮೊಕ್ಲೆನ ಗೋಸ್ಮರಿಯೇ ನೆವನ ಪಂದ್ ತೀರ್ದಿನ ಶೇಖರ ಕುಲಾಲ್ ಮೆರೆನ ಪಲಯೆ ದಿನೇಶ್ ಕುಲಾಲ್ ಕೊರ್ತಿನ ಒಯಿಲ್‌ದಂಚ, ಪುತ್ತೂರು ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಕೇಸ್ ದಾಖಲ್ ಮಲ್ತೊಂದು, ಪೊಲೀಸೆರ್ ತನಿಖೆ ಮಲ್ತೊಂದುಲ್ಲೆರ್.

ಬೆಂಗಳೂರು ಕಂಬುಲ-ನಮ್ಮ ಕಂಬುಲ : ದ.ಕ.ಉಸ್ತುವಾರಿ ಸಚಿವೆರೆಗ್‌ ಲೆಪ್ಪೋಲೆ

ಬೆಂಗಳೂರು: ಬೆಂಗಳೂರು ಕಂಬುಲ ಸಮಿತಿ ಮುತಾಲಿಕೆಡ್  ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆ ಸಚಿವೆರ್, ದಕ್ಷಿಣ ಕನ್ನಡ ಜಿಲ್ಲೆದ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಮೇರೆನ್‌ ಭೇಟಿ ಮಲ್ತ್ ಕಂಬುಲ ಕಾರ್ಯಕ್ರಮದ ರೂಪುರೇಷೆದ ಬಗ್ಗೆ ಚರ್ಚೆ ಮಲ್ತ್‌ ಕಾರ್ಯಕ್ರಮಗ್‌ ಲೆಪ್ಪೋಲೆನ್‌ ಕೊರಿಯೆರ್.‌

ಬೆಂಗಳೂರು ಕಂಬುಲ-ನಮ್ಮ ಕಂಬುಲ ಕಾರ್ಯಕ್ರಮಗ್ ಸಂಪೂರ್ಣ ಸಹಕಾರ ಕೋರ್ಪ ಪಂದ್ ಸಚಿವೆರ್ ಭರವಸೆ ಕೊರಿಯೆರ್. ಈ ಪೊರ್ತುಡ್ ಪುತ್ತೂರು ಶಾಸಕೆರ್, ಬೆಂಗಳೂರು ಕಂಬುಲ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ರೈ, ಕಾರ್ಯಾಧ್ಯಕ್ಷೆರ್ ಗುರುಕಿರಣ್, ಉಪಾಧ್ಯಕ್ಷೆರ್ ಬಿ.ಗುಣರಂಜನ್ ಶೆಟ್ಟಿ, ಪದಾಧಿಕಾರಿ ಉದಯ್ ಶೆಟ್ಟಿ ಇತ್ತೆರ್.

ಡಾ. ರಾಜೇಶ್ವರಿ ಗೌತಮ್ ಕರ್ನಾಟಕ ಸಾಧಕ ರತ್ನ ಪ್ರಶಸ್ತಿಗ್ ಆಯ್ಕೆ‌

ಗೋಕಾಕದ ನಾಡಿನ ಸಮಚಾರ ಸೇವಾ ಸಂಘ ಬೊಕ್ಕ ನಾಡಿನ ಸಮಚಾರ ದಿನ ಪತ್ರಿಕೆ ನೆತ್ತ ಒಟ್ಟು ಸೇರಿಗೆಡ್ ಕರ್ನಾಟಕ ನಾಮಕರಣದ “ಸುವರ್ಣ ಮಹೋತ್ಸವ” ವರ್ಷ 68ನೇ ಕರ್ನಾಟಕ ರಾಜ್ಯೋತ್ಸವದ ಪ್ರಯುಕ್ತ ಕೊರ್ಪುನ ರಾಜ್ಯ ಮಟ್ಟದ ಕರ್ನಾಟಕ ಸಾಧಕ ರತ್ನ ರಾಜ್ಯೋತ್ಸವ ರಾಜ್ಯ ಪ್ರಶಸ್ತಿಗ್ ಡಾ. ರಾಜೇಶ್ವರಿ ಆಯ್ಕೆಯಾತೆರ್.‌

ನ. 18 ದಾನಿ ಧಾರವಾಡದ ಕರ್ನಾಟಕ ಕುಲಪುರೋಹಿತ ಆಲೂರು ವೆಂಕಟರಾವ ಸಾಂಸ್ಕೃತಿಕ ಭವನಡ್ ನಡಪುನ “ಕನ್ನಡ ನುಡಿ ಸಂಭ್ರಮ “ಸಮಾರಂಭಡ್ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮ ನಡಪೆರೆ ಉಂಡು. ರಾಜೇಶ್ವರಿ ನಿವೃತ್ತ ಶಿಕ್ಷಕೆರಾಯಿನ ಮೇರ್ಕಜೆ ಮೇದಪ್ಪ ಮಾಸ್ಟರ್ ಬೊಕ್ಕ ನಿವೃತ್ತ ಮುಖ್ಯ ಶಿಕ್ಷಕಿ ಭುವನೇಶ್ವರಿ ಮೊಕ್ಲೆನ ಮಗಲ್. ಸಂಪಾಜೆ ಕಳಗಿ ಡಾ. ಗೌತಮ್ ಮೇರೆನ ಬುಡೆದಿ.

ಸುಬ್ರಹ್ಮಣ್ಯ: ಪೊಂಜೊವ್‌ನ ಕರಿಮಣಿ ಸರ ಕಂಡಿನ ಕಲ್ವೆರ್…!!‌

ಸುಬ್ರಹ್ಮಣ್ಯ: ದೇವೆರ್ನ ದರ್ಶನದ ಪೊರ್ತುಡು ಕಲ್ವೆರ್‌ ಪೊಂಜೊವ್‌ನ 1.4 ಲಕ್ಷ ಬಿಲೆತ್ತ ಬಂಗಾರ್ದ ಕರಿಮಣಿ ಸರ ಕಂಡಿನ ಘಟನೆ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್‌ ನಡತ್‌ಂಡ್.

ಕಡಬ ತಾಲೂಕ್‌ದ ಇಚ್ಲಂಪಾಡಿ ಬರೆಮೇಲು ನಿವಾಸಿ ಭಾರತಿ ಎಮ್ ಡಿ ಅಕ್ಟೋಬರ್ 22 ಮಧ್ಯಾಹ್ನ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಗ್ ಭೇಟಿ ಕೊರ್ದ್‌ ಇತ್ತೆರ್‌. ದೇವೆರೆ ದರ್ಶನ ಮಲ್ತ್‌ ಆರತಿ ದೆತೊನಗ ಕರಿಮಣಿ ಸರ ಕಾಣೆ ಆತ್‌ಂಡ್.‌ ನೆತ್ತ ಬಗೆಟ್‌ ಸುಬ್ರಹ್ಮಣ್ಯ ದೇವಸ್ಥಾನಡ್‌ ಕೇಸ್‌ ದಾಖಲಾತ್‌ಂಡ್.

ರಾಜ್ಯ ಮಟ್ಟದ ಯೋಗ ಪಂತೊಡು ಅವನಿ ಎಂ.ಎಸ್. ಸುರುತ ಇನಾಮು

ಬೆದ್ರಡ್ ಅ.20ದಾನಿ ನಡತ್ತಿನ ರಾಜ್ಯ ಮಟ್ಟದ ಯೋಗಾಸನ ಸ್ಪರ್ಧೆಡ್ ಸುಳ್ಯದ ಅವನಿ ಎಂ‌.ಎಸ್. ಸುರುತ ಇನಾಮು ಪಡೆಯೊಂದೆರ್.

ಯೋಗೇನ ಚಿತ್ತಸ್ಯ ಯೋಗ ಕೇಂದ್ರ ಸುಳ್ಯ ಮುಲ್ಪದ ಕಲ್ಪಾರ್ಥಿಯಾಯಿನ ಅವನಿ, ಹಿರಿಯ ಪ್ರಾಥಮಿಕ ವಿಭಾಗದ 5 ನೇ ಕ್ಲಾಸ್‌ರ್ದ್ 7 ನೇ ಕ್ಲಾಸ್‌ ಮುಟ್ಟ ನಡತ್ತಿನ ಪೊಂಜೋಕ್ಲೆನ ವಿಭಾಗಡ್ ಸುರುತ ಇನಾಮು ಪಡೆಯೊಂದೆರ್. ಅವನಿ ಎಂ.ಎಸ್‌. ಶಶಿಧರ ಎಂ.ಜೆ. ಬೊಕ್ಕ ರೇಷ್ಮಾ ದಂಪತಿನ ಮಗಲ್.

ಧರ್ಮಸ್ಥಳಡ್ 1753 ನೇ ಮದ್ಯವರ್ಜನ ಶಿಬಿರದ ಲೆಪ್ಪೋಲೆ ಬುಡುಗಡೆ

ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ.ಟ್ರಸ್ಟ್, ಜನಜಾಗೃತಿ ವೇದಿಕೆದ ಮುತಾಲಿಕೆಡ್ ಅಜ್ಜಾವರಡ್‌ ನಡಪುನ 1753 ನೇ ಮದ್ಯವರ್ಜನ ಶಿಬಿರದ ಲೆಪ್ಪೋಲೆ ಬುಡುಗಡೆನ್ ಧರ್ಮಸ್ಥಳಡ್ ಡಾ.ಡಿ.ವೀರೇಂದ್ರ ಹೆಗ್ಗಡೆರ್‌ ಇನಿ ಬಿಡುಗಡೆ ಮಲ್ತೆರ್.‌
ಸುಳ್ಯಡ್‌ ನಡತ್ತಿನ ಗಾಂಧಿಸ್ಮೃತಿ ಬೊಕ್ಕ ಜನಜಾಗೃತಿ ಸಮಾವೇಶದ ಯಶಸ್ವಿಯಾದ್ ನಿರ್ವಹಣೆ ಮಲ್ತಿನ ಜನಜಾಗೃತಿ ವೇದಿಕೆದ ಅಧ್ಯಕ್ಷರೆನ್ ಬೊಕ್ಕ ಪದಾಧಿಕಾರಿಲೆಗ್ ಹೆಗ್ಗಡೆರ್‌ ಅಭಿನಂದನೆ‌ ಸಲ್ಲಿಸಾಯೆರ್.

ಈ ಪೊರ್ತುಡು ಅಖಿಲ ಕರ್ನಾಟಕ ಜನಜಾಗೃತಿ ನಿಕಟಪೂರ್ವ ಜಿಲ್ಲಾಧ್ಯಕ್ಷೆರ್ ಎನ್. ಎ. ರಾಮಚಂದ್ರ, ತಾಲೂಕು ಅಧ್ಯಕ್ಷೆರ್ ಲೋಕನಾಥ್ ಅಮೆಚೂರು, ತಾಲೂಕು ನಿಕಟಪೂರ್ವಾಧ್ಯಕ್ಷೆರ್ ಮಹೇಶ್ ಕುಮಾರ್ ಮೇನಾಲ, ಪ್ರಗತಿಬಂಧು ಸ್ವಸಹಾಯ ಸಂಘದ ತಾಲೂಕು ಅಧ್ಯಕ್ಷೆರ್ ಸುರೇಶ್ ಕಣೆಮರಡ್ಕ, ಪೂರ್ವಾಧ್ಯಕ್ಷೆರ್ ಬೂಡು ರಾಧಾಕೃಷ್ಣ ರೈ, ಮದ್ಯವರ್ಜನ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಶಿವಪ್ರಕಾಶ್ ಅಡ್ಪಂಗಾಯ, ತಾಲೂಕು ಯೋಜನಾಧಿಕಾರಿ ನಾಗೇಶ್ ಪಿ, ವಲಯ ಮೇಲ್ವಿಚಾರಕಿ ವಿಶಾಲ ಕೆ, ಮದ್ಯವರ್ಜನ ಸಮಿತಿದ ಉಪಾಧ್ಯಕ್ಷೆರ್ ಶಶ್ಮಿ ಭಟ್‌ ಇತ್ತೆರ್.

ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನ ಕ್ಷೇತ್ರಾಡಳಿತ ಸಮಿತಿ ಗೆಜ್ಜೆಗಿರಿ ಮಹಾ ಸಭೆ

ಬೆಳ್ತಂಗಡಿ: ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನ ಶ್ರೀ ಕ್ಷೇತ್ರ ಗೆಜ್ಜೆಗಿರಿ ನೆತ್ತ ಕ್ಷೇತ್ರಾಡಳಿತ ಸಮಿತಿದ ಮಹಾಸಭೆ ಗೆಜ್ಜೆಗಿರಿಟ್‌ ನಡತ್‌ಂಡ್. ಮಹಾ ಸಭೆತ ಗುರ್ಕಾರ್ಮೆನ್ ವಹಿಸ್‌ದ್‌ ಪಾತೆರ್ನ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರ್ಲು ಪೀತಾಂಬರ ಹೇರಾಜೆ ದೇಶ ವಿದೇಶಡ್ ಇಪ್ಪುನ ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನದ ಭಕ್ತಾದಿಲು ಸೇರ್ದ್ ನಿರ್ಮಾಣ ಮಲ್ತಿನ ಶ್ರೀ ಕ್ಷೇತ್ರ ಇನಿ ವಿಶ್ವಾದ್ಯಂತ ಭಕ್ತರೆನ್ ಆಕರ್ಷಣೆ ಮಲ್ಪುನ ಪುಣ್ಯ ಕ್ಷೇತ್ರ ಆತ್‌ಂಡ್.
ಶ್ರೀ ಕ್ಷೇತ್ರನ್‌ ನನಾತ್ ಅಭಿವೃದ್ಧಿ ಮಲ್ಪುನ ಬಗ್ಗೆ ಸಭೆಟ್‌ ತೆರಿಪಾಯೆರ್. ಕ್ಷೇತ್ರಾಡಳಿತ ಸಮಿತಿದ ಪ್ರಧಾನ ಕಾರ್ಯದರ್ಶಿ ಉಲ್ಲಾಸ್ ಕೋಟ್ಯಾನ್ ವಾರ್ಷಿಕ ವರದಿನ್‌ ಮಂಡನೆ ಮಲ್ತೆರ್. ಕೋಶಾಧಿಕಾರಿ ದೀಪಕ್ ಕೋಟ್ಯಾನ್ ಲೆಕ್ಕಪತ್ರ ಮಂಡನೆ ಮಲ್ತೆರ್. ಗೌರವಾಧ್ಯಕ್ಷೆರ್ ರಾಜಶೇಖರ ಕೋಟ್ಯಾನ್ ಶ್ರೀ ಕ್ಷೇತ್ರಗ್‌ ಬರ್ಪುನ ಯಾತ್ರಿಲೆಗ್ ಮೂಲಭೂತ ಸೌಕರ್ಯನ್ ಅಭಿವೃದ್ಧಿ ಮಲ್ಪುನ ಬಗ್ಗೆ ಚರ್ಚೆ ಮಲ್ತೆರ್.

ಆಡಳಿತ ಸಮಿತಿದ ಕಾರ್ಯಕಾರಿ ಸದಸ್ಯೆರ್ ಗೆಜ್ಜೆಗಿರಿ ಮೇಳದ ಸಂಚಾಲಕೆರ್ ನವೀನ್ ಸುವರ್ಣ ಸಜಿಪ ಶ್ರೀ ಕ್ಷೇತ್ರದ ಗೆಜ್ಜೆಗಿರಿ ಮೇಳ ಯಶಸ್ವಿ ದಾಖಲೆ ಪ್ರದರ್ಶನ ಆಯಿನ ಬಗ್ಗೆ ಮೇಳದ ವರದಿನ್‌ ಒಪ್ಪಿಸಾಯೆರ್.‌ ಉಪಾಧ್ಯಕ್ಷೆರ್ ರವಿಪೂಜಾರಿ ಚಿಲಿಂಬಿ ಕ್ಷೇತ್ರಾಡಳಿತ ಸಮಿತಿ ಆರ್ಯುವೇದ, ಗಿಡಮೂಲಿಕೆದ ಉತ್ಪನ್ನದ ತಯಾರಿ, ಮಾರಾಟ, ಬೊಕ್ಕ ಸ್ವಾವಲಂಬಿ ಉದ್ಯೋಗಗ್ ಪ್ರೋತ್ಸಾಹ ಕೊರ್ಪುನ ಬಗ್ಗೆ ಕಾರ್ಯ ಸೂಚಿನ್ ತೆರಿಪಾಯೆರ್.

ಈ ಸಭೆಟ್ ಚಿತ್ತರಂಜನ್ ಕಂಕನಾಡಿ, ಮುಂಬೈ ಬಿಲ್ಲವ ಅಸೋಸಿಯೇಶನ್ ಅಧ್ಯಕ್ಷೆರ್ ಹರೀಶ್ ಜಿ ಅಮೀನ್, ಕ್ಷೇತ್ರದ ಗೌರವಾಧ್ಯಕ್ಷೆರ್ ಜಯಂತ ನಡುಬೈಲ್ ಇತ್ತೆರ್. ಮುಂಬೈ ಭಾರತ್ ಬ್ಯಾಂಕ್ ನಿರ್ದೇಶಕೆರಾದ್ ಆಯ್ಕೆಯಾಯಿನ ಕ್ಷೇತ್ರಾಡಳಿತ ಸಮಿತಿದ ಉಪಾಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್, ದಯಾನಂದ ಪೂಜಾರಿ ಮೊಕ್ಲೆಗ್ ಈ ಪೊರ್ತುಡ್‌ ಮಾನಾದಿಗೆ ಮಲ್ತೆರ್.