ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 28ನೇ ಸಂಚಿಕೆ ಅ.6 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಅ.7 ಸನಿಯಾರ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು. ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ವಿದ್ಯಾನಗರ ಸಜೀಪಮುನ್ನೂರು ಶ್ರೀ ಶಾರದಾ ಫ್ರೆಂಡ್ಸ್ ಸರ್ಕಲ್ (ರಿ.) ದ 30 ನೇ ವರ್ಷೊದ ಮಾರ್ನೆಮಿ ಉಚ್ಚಯ ಅ.20 ಸುಕ್ರಾರ ನಡಪರೆ ಉಂಡು.
ಬಯ್ಯಗ್ ಅಂಗನವಾಡಿ ಬೊಕ್ಕ ಶಾಲೆದ ಜೋಕುಲೆರ್ದ್ ನೃತ್ಯ ಸಿಂಚನ ಬೊಕ್ಕ ಭರತನಾಟ್ಯ, ರಾತ್ರೆ ಸಭಾ ಲೇಸ್, ಬಿನ್ನೆರೆನ ಸಮ್ಮುಖಡ್ ಸಾಧಕೆರೆಗ್ ಸನ್ಮಾನ, ಸಂಘಗಾದ್ ಬೆಂದಿನ ಹಿರಿಯ ನಾಗರಿಕೆರೆಗ್ ಮಾನಾದಿಗೆ, ಊರುದ ಸಮಾಜ ಸೇವಕೆರೆಗ್ ಮಾನಾದಿಗೆ, 2022-23 ನೇ ಸಾಲ್ ದ 10 ನೇ ಕ್ಲಾಸ್ ಬೊಕ್ಕ ಪಿಯುಸಿಡ್ 575 ರ್ದ್ ಎಚ್ಚ ಮಾರ್ಕ್ ಪಡೆಯಿನ ಕಲ್ಪಾರ್ಥಿಲೆಗ್ ಪ್ರೋತ್ಸಾಹ ಧನ ಪಟ್ಟುನ ಲೇಸ್ ನಡಪರೆ ಉಂಡು.
ಈ ಲೇಸ್ ಡ್ ಪದ್ಮಶ್ರೀ ಪ್ರಶಸ್ತಿ ಪಡೆಯಿನ ಅಕ್ಷರ ಸಂತ ಹರೇಕಳ ಹಾಜಬ್ಬ, ಸಮಾಜ ಸೇವೆ ಬೊಕ್ಕ ಶಿಕ್ಷಣ ಕ್ಷೇತ್ರದ ಕೆ. ನಾರಾಯಣ ನಾಯಕ್, ಉದ್ಯಮ ಕ್ಷೇತ್ರದ ಮಹಾಬಲ ಕೊಟ್ಟಾರಿ, ವೈದ್ಯಕೀಯ ಕ್ಷೇತ್ರದ ಡಾ.ಸುಜಯ್ ಭಂಡಾರಿ, ಕಲಾ ಕ್ಷೇತ್ರದ ಜನಾರ್ಧನ ಆಚಾರ್ಯ ಸನ್ಮಾನ ಸ್ವೀಕಾರ ಮಲ್ಪರೆ ಉಲ್ಲೆರ್.
ಶ್ರೀರಾಮ ಪ್ರಕಾಶನ ಮಂಡ್ಯ ಬೊಕ್ಕ ಸಾಹಿತ್ಯ ಸುಗ್ಗಿ ಬೆಂಗ್ಲೂರ್ ಪ್ರಕಟ ಮಲ್ತಿನ ಸಾಹಿತಿ ಪತ್ರಕರ್ತೆ ಶ್ರೀನಿವಾಸ ಜೋಕಟ್ಟೆ ಮೆರೆನ ರಡ್ಡ್ ಬೂಕುಲೆನ ಬುಡುಗಡೆ ಲೇಸ್ ಅ.8 ಐತಾರ ಬಯ್ಯಗ್ ಮೈಸೂರ್ ಅಸೋಸಿಯೇಷನ್ ಡ್ ನಡಪರೆ ಉಂಡು.
ಮೆರೆನ 40ನೇ ಕೃತಿ ದೇವರುಗಳ ನ್ಯಾಯಾಲಯ ಮತ್ತು ಸ್ಮಶಾನದಲ್ಲಿ ನೃತ್ಯ ಬೊಕ್ಕ 41 ನೇ ಕೃತಿ ಎಲ್ಲಿಗೋ ಪಯಣ ಯಾವುದೋ ದಾರಿ ಪನ್ಪುನ ಬೂಕು ರಡ್ಡ್ ಬುಡುಗಡೆ ಆಪುಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಬೊಂಬೈ ಬಿಎಸ್ ಕೆ ಬಿ ಅಸೋಸಿಯೇಷನ್ ದ ಗುರ್ಕಾರೆ ಡಾ.ಸುರೇಶ್ ರಾವ್ ಒಯಿಸೊನ್ವೆರ್. ಸಾಫಲ್ಯ ಸೇವಾ ಸಂಘದ ಗುರ್ಕಾರೆ ಶ್ರೀನಿವಾಸ ಸಾಫಲ್ಯ ಬೊಕ್ಕ ಹೈಕೋರ್ಟ್ ದ ಪುಗರ್ತೆದ ಅಡ್ವಕೇಟ್ ಆರ್ ಎಂ ಭಂಡಾರಿ ಮೊಕುಲು ಬೂಕು ಬುಡುಗಡೆ ಮಲ್ಪುವೆರ್.
ಮಲ್ಲ ಬಿನ್ನೆರಾದ್ ಐಐಟಿಸಿದ ಆಡಳಿತ ನಿರ್ದೇಶಕೆರ್ ವಿಕ್ರಾಂತ್ ಉರ್ವಲ್ ಪಾಲ್ ಪಡೆಯೆರೆ ಉಲ್ಲೆರ್. ಕೃತಿಲೆನ ಬಗೆಟ್ಟ್ ಕರ್ನಾಟಕ ಸಂಘದ ಗುರ್ಕಾರೆ ಡಾ.ಭರತ್ ಕುಮಾರ್ ಪೊಲಿಪು, ಯುವ ಲೇಖಕಿ ರೂಪಾ ಸಂಗೋಳಿ ಪೊಲಬು ಕೊರಿಯೆರೆ ಉಲ್ಲೆರ್. ಪುಗರ್ತೆದ ಕಲಾವಿದೆರ್ ಅವಿನಾಶ್ ಕಾಮತ್ ಬೊಕ್ಕ ಸುರೇಂದ್ರ ಮಾರ್ನಾಡ್ ಲೇಸ್ ನ್ ಸುಧಾರಿಕೆ ಮಲ್ಪುವೆರ್.
ಅಬುಧಾಬಿ ಬಿಗ್ ಟಿಕೆಟ್ ಬಂಪರ್ ಡ್ರಾಡ್ ಭಾರತೀಯ ಡ್ರೈವರ್ ಮುಜೀಬ್ 33.99 ಕೋಟಿ ರೂ (15M ದಿರ್ಹಾಮ್) ಗೆಂದ್ ದೆರ್.
ಕತಾರ್ ಡ್ ಡ್ರೈವರ್ ಕೆಲಸ ಮಲ್ತೊಂದು ಇತ್ತಿನ ಮೇರ್ 12 ದೋಸ್ತಿಲೆನೊಟ್ಟಿಗೆ ಸೇರ್ದ್ 2 ವರ್ಷೊದಿಂಚ ಪ್ರತಿ ತಿಂಗೊಲ್ 3 ಲಾಟರಿ ಟಿಕೆಟ್ ದೆತೊಂದು ಇತ್ತೆರ್. ಈ ಸರ್ತಿ ಮೆರೆಗ್ ಅದೃಷ್ಟ ಒಲಿದ್ಂಡ್.
ಬೊಂಬೈ ಮೊಗವೀರ ವ್ಯವಸ್ಥಾಪಕ ಮಂಡಳಿದ ಸಾಂಸ್ಕೃತಿಕ ಸಮಿತಿದ ಮುತಾಲಿಕೆಡ್, ಕಲಾ ಸಂಗಮ ಕುಡ್ಲ ಕಲಾವಿದೆರ್ ಅಭಿನಯ ಮಲ್ಪುನ ಶಿವದೂತೆ ಗುಳಿಗೆ ತುಳು ನಾಟಕ ಅ.10 ಸನಿಯಾರ ಬಯ್ಯಗ್ ಬೊಂಬೈದ ಅಂಧೇರಿ ಮೊಗವೀರ ಭವನಡ್ ನಡಪರೆ ಉಂಡು.
ತುಳು ರಂಗಭೂಮಿಡ್ ಇಸೇಸ ಸಂಚಲನ ಮೂಡಿಸಾಯಿನ ಅದ್ಭುತ, ಅಮೋಘ ಬೊಕ್ಕ ಅತ್ಯಾಕರ್ಷಕವಾಯಿನ ಈ ನಾಟಕನ್ ತೂಪುನ ಅವಕಾಶನ್ ಕಳೆವೊನೊರ್ಚಿ ಪಂದ್ ಬೊಂಬೈ ಮೊಗವೀರ ವ್ಯವಸ್ಥಾಪಕ ಮಂಡಳಿದ ಗುರ್ಕಾರೆ ಎಸ್ ಅರುಣ್ ಕುಮಾರ್, ಮಾನಾದಿಗೆದ ಪ್ರಧಾನ ಕಾರ್ಯದರ್ಶಿ ದಿಲೀಪ್ ಕುಮಾರ್ ಮುಲ್ಕಿ, ಮಾನಾದಿಗೆದ ಕೋಶಾಧಿಕಾರಿ ಪ್ರತಾಪ್ ಕುಮಾರ್ ಕರ್ಕೇರ ಲೆಪ್ಪೋಲೆಡ್ ತೆರಿಪಾದೆರ್.
ಪುತ್ತೂರು : ಝೀ ಕನ್ನಡ ವಾಹಿನಿ ನಡಪಾವೊಂದು ಇಪ್ಪುನ ‘ಸರಿಗಮಪ ಸೀಸನ್ – 20’ ಸಂಗೀತ ಸ್ಪರ್ಧೆದ ಮೆಗಾ ಆಡಿಷನ್‌ಡ್ ಪುತ್ತೂರ್ದ್ ಸಮನ್ವಿ ರೈ ಮದಕ ಆಯ್ಕೆಯಾತೆರ್. ಸಮನ್ವಿ ರೈ ವಿದ್ವಾನ್ ದಿ. ಕಾಂಚನ ನಾರಾಯಣ ಭಟ್ ಬೊಕ್ಕ ವಿದುಷಿ ವೀಣಾ ರಾಘವೇಂದ್ರ ಮೊಕ್ಲೆರ್ದ್ ತರಬೇತಿ ಪಡೆಯೊಂದಿತ್ತೆರ್.
ಖ್ಯಾತ ಸಂಗೀತ ಗಾಯಕೆರ್ ಪುತ್ತೂರು ಜಗದೀಶ್ ಆಚಾರ್ಯ ಮೇರ್‌ನ ಸಂಗೀತ ತಂಡದ ಕಲಾವಿದೆಯಾಯಿನ ಮೇರ್ ಬೆಟ್ಟಂಪಾಡಿ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಆಡಳಿತ ಮಂಡಳಿ ಸದಸ್ಯೆರ್ ಅರುಣ್ ಪ್ರಕಾಶ್ ರೈ ಮದಕ ಬೊಕ್ಕ ಸವಿತಾ ಎ. ರೈ ದಂಪತಿಲೆನ ಮಗಲ್.
ಏಷ್ಯನ್ ಗೇಮ್ಸ್ ಡ್ ಇನಿ ಭಾರತ ಬೊಕ್ಕ ಪಾಕಿಸ್ತಾನ ಆನ್ ಲೆನ ಕಬ್ಬಡ್ಡಿ ಕೂಟದ ನಡುಟ್ಟ್ ಸೆಮಿಫೈನಲ್ ಪಂತೊ ನಡಪುಂಡು.
ಮಧ್ಯಾಹ್ನ 12:30 ಕ್ಕ್ ಸುರು ಆಪುನ ಈ ಪಂತೊಡು ಭಾರತ ಫೇವರಿಟ್ ಆದ್ ಕಣಕ್ಕ್ ಜಪ್ಪುಂಡು. ಗ್ರೂಪ್-ಎ ಡ್ ಮಲ್ಲ ತಾನಡ್ ಇಪ್ಪುನ ಭಾರತ ಸೆಮಿಫೈನಲ್ ಡ್ ಪಾಕಿಸ್ತಾನದ ವಿರುದ್ಧ ಗೆಂದ್ ದ್ ಫೈನಲ್ ಡ್ ಪೋಪುನ ನಿರೀಕ್ಷೆಡ್ ಉಂಡು.
ಬೋಲ್ತೆರ್: ಸಾರ್ವಜನಿಕ ಶ್ರೀ ಶಾರದೋತ್ಸವ ಸಮಿತಿ ಶ್ರೀ ರಾಮನಗರ, ಮೈರಲ್ಕೆ ಓಡಿಲ್ನಾಳ ಮೂಲು ಸುರುತ ವರ್ಷದ ಸಾರ್ವಜನಿಕ ಶ್ರೀ ಶಾರದೋತ್ಸವ ಅ.20 ದಾನಿ ಶ್ರೀ ಕಿರಾತಮೂರ್ತಿ ಮಹಾಲಿಂಗೇಶ್ವರ ದೇವಸ್ಥಾನಡ್‌ ನಡಪೆರೆ ಉಂಡು.
ಅ.20 ಧಾರ್ಮಿಕ ಕಾರ್ಯಕ್ರಮಡ್‌ ಸಾಂದೀಪನಿ ಸಾಧನಾಶ್ರಮ ಶ್ರೀ ಕ್ಷೇತ್ರ ಕೇಮಾರು ಶ್ರೀಶ್ರೀಶ್ರೀ ಈಶ ವಿಠಲದಾಸ ಸ್ವಾಮೀಜಿ ಆಶೀರ್ವಚನನ್‌ ಕೊರಿಯೆರೆ ಉಲ್ಲೆರ್. ಬೋಲ್ತೆರ್ ಶಾಸಕೆರ್‌ ಹರೀಶ್‌ ಪೂಂಜ ಸಭಾಧ್ಯಕ್ಷತೆನ್‌ ವಹಿಸೊನಿಯೆರೆ ಉಲ್ಲೆರ್. ಬಿನ್ನೆರಾದ್, ಉದ್ಯಮಿಲು, ಬರೋಡ ತುಳು ಸಂಘದ ಗುರ್ಕಾರ್ಲು ಶಶಿಧರ ಶೆಟ್ಟಿ, ಉದ್ಯಮಿ ಪ್ರಶಾಂತ್‌ ಪಾರೆಂಕಿ ಪಾಲ್ ಪಡೆಯೆರೆ ಉಲ್ಲೆರ್. ಈ ಲೇಸ್‌ಡ್ ಮಾತಾ ಭಕ್ತೆರ್‌ ಪಾಲ್ ಪಡೆದ್‌ ತನು-ಮನ-ಧನದೊಟ್ಟಿಗೆ ಸಹಕಾರ ಕೊರ್ದು, ಶ್ರೀ ದೇವಿನ ಕೃಪೆಗ್‌ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಸಿರಿಯಾದ ಮಿಲಿಟರಿ ಅಕಾಡೆಮಿದ ಮಿತ್ತ್ ಡ್ರೋನ್ ದಾಳಿ ನಡಪಾದ್, 100 ರ್ದ್ ಎಚ್ಚ ಜನ ತೀರ್ ಪೋಯೆರ್.
ಅತ್ತಂದೆ ಈ ಘಟನೆಡ್ 200 ಜನಕ್ಕ್ ಪೆಟ್ಟಾತ್ಂಡ್ ಪಂದ್ ವರದಿ ಆತ್ಂಡ್. ಹೋಮ್ಸ್‌ ನಗರಡ್ ಸೇನಾ ಪದವಿ ಪ್ರದಾನ ಲೇಸ್ ದ ಪೊರ್ತುಡು ಈ ದಾಳಿ ನಡತ್ ದ್ಂಡ್. ತೀರ್ ಪೋಯಿನಕ್ಲೆನೆಟ್ಟ್ ಕೆಡೆಟ್ ಕುಟುಂಬ ಸದಸ್ಯೆರ್, ಪೊಂಜೋವ್ ನಕುಲು ಬೊಕ್ಕ ಜೋಕುಲು ಉಲ್ಲೆರ್ ಪಂದ್ ಮಾಧ್ಯಮ ಮೂಲಲು ತೆರಿಪಾದ್ಂಡ್. ಈ ದಾಳಿಗ್ ಭಯೋತ್ಪಾದಕ ಸಂಘಟನೆಲೇ ಕಾರಣ ಪಂದ್ ಸಿರಿಯಾ ಸೇನೆ ಆರೋಪ ಮಲ್ದ್ಂಡ್.
ಒಡಿಪು: ನೇತ್ರಾವತಿ ಎಕ್ಸ್‌ಪ್ರೆಸ್ ರೈಲ್ ಡ್ ಪ್ರಯಾಣ ಮಲ್ತೊಂದು ಇತ್ತಿನ ಪೊಂಜೋವ್ ನ ಬಂಗಾರ್, ಕಾರ್ಡ್‌,ದುಡ್ಡು ಇತ್ತಿನ ಬ್ಯಾಗ್ ನ್ ಕಂಡ್ ದ್ ಬಲ್ತಿನ ಆರೋಪಿನ್ ರೈಲ್ವೆ ಪೊಲೀಸೆರ್ ಕಾರ್ಯಾಚರಣೆ ನಡಪಾದ್ 4 ಗಂಟೆದುಲಯಿ ಸೊತ್ತು ಸಮೇತ ವಶಕ್ಕ್ ಪಡೆತೆರ್.
ಡೆಲ್ಲಿ ಮೂಲದ ಸನ್ನಿ ಮಲ್ಹೋತ್ರಾ (30) ಅರೆಸ್ಟ್ ಆಯಿನ ಆರೋಪಿ ಪಂದ್ ತೆರಿದ್ ಬೈದ್ಂಡ್.
ಆರೋಪಿನ ಕೈರ್ದ್ 4,67,000 ರೂ. ಬಿಲೆತ್ತ ಬಂಗಾರ್ ನ್ ಪೊಲೀಸೆರ್ ವಶಕ್ಕ್ ಪಡೆತೆರ್. ಈ ಬಗೆಟ್ಟ್ ಮಣಿಪಾಲ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
