Maahe

ಕೇರಳಡ್ ಬರ್ಸದ ಅಬ್ಬರ: 5 ಜಿಲ್ಲೆಲೆಡ್ ರೆಡ್ ಅಲರ್ಟ್

ತಿರುವನಂತಪುರ: ಕೇರಳದ ಮಸ್ತ್ ಜಿಲ್ಲೆಲೆಡ್ ಐತಾರ ಭಾರೀ ಬರ್ಸ ಬತ್ತ್ ದ್ಂಡ್. ಶನಿವಾರ ಕತ್ತಲೆಡ್ದ್ ಭಾರೀ ಬರ್ಸ ಬರೊಂದಿತ್ತ್ ದ್, ನನ 5 ದಿನತ್ತ ಕಾಲ ಬರ್ಸ ಬರ್ರೆ ಉಂಡು ಪಂದ್ ಭಾರತೀಯ ಹವಾಮಾನ ಇಲಾಖೆ ಕೇರಳಗ್ ಎಚ್ಚರಿಕೆ ಕೊರ್ತ್ಂಡ್. 5 ಜಿಲ್ಲೆಲೆಡ್ ಸೋಮಾರ ರೆಡ್ ಅಲರ್ಟ್ ನ್ ಘೋಷಣೆ ಮಲ್ತ್ ದೆರ್.

ಅರೇಬಿಯನ್ ಸಮುದ್ರರ್ದ್ ದಕ್ಷಿಣ ಭಾರತದ ಕರಾವಳಿ ಭಾಗದ ಕಡೆಕ್ಕ್ ಗಾಳಿ ಬೀಜೊಂದುಂಡು. ಕರ್ನಾಟಕದ ಕರಾವಳಿ ಭಾಗ, ಕೇರಳ, ತಮಿಳುನಾಡು ಬೊಕ್ಕ ಮಾಹೆ ಪ್ರದೇಶಲೆಡ್ ಮೇ 16 ಮುಟ್ಟ ಭಾರೀ ಪ್ರಮಾಣಡ್ ಬರ್ಸ ಬರ್ರೆ ಉಂಡು ಪಂದ್ ಐಎಂಡಿ ಎಚ್ಚರಿಕೆನ್ ಕೊರ್ತೆರ್. ಈ ಪ್ರದೇಶಲೆಡ್ 64ಮಿ.ಮೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಪಂತೆರ್. ಅವ್ವೆ ಕಾರಣಗ್ ಎರ್ನಾಕುಲಂ , ಇಡುಕ್ಕಿ, ತೃಶ್ಶೂರ್, ಕೋಯಿಕೋಡ್ ಬೊಕ್ಕ ಕಣ್ಣೂರು ಜಿಲ್ಲೆಲೆಡ್ ರೆಡ್ ಅಲರ್ಟ್ ನ್ ಘೋಷಣೆ ಮಲ್ತ್ ದೆರ್.