ರಾಜಕೀಯ

ರಾಜಕೀಯವಾದ್ ಬುಲೆವರೆ ಜವನೆರೆಗ್ ಅವಕಾಶ ಕೊರ್ತಿನಾರ್ ಆಸ್ಕರಣ್ಣೆ : ನೆಂಪು ಮಲ್ತೆರ್ ಅಭಯಚಂದ್ರ ಜೈನ್

ಕುಡ್ಲ : ಕಾಂಗ್ರೆಸ್ ದ ಮಾಮಲ್ಲ ನಾಯಕೆರ್ ಶ್ರೀ ಮಾನ್ ಆಸ್ಕರ್ ಫರ್ನಾಂಡೀಸೆರ್. ಆರ್ ರಾಜಕೀಯವಾದ್ ಜವನೆರೆಗ್ ಎಚ್ಚ ಅವಕಾಶ ಕೊರ್ತಿನಾರ್.ವಸಂತ ಸಾಲ್ಯಾನ್, ಪ್ರತಾಪ್ ಚಂದ್ರ ಶೆಟ್ಟಿ ರಮಾನಾಥ ರೈ, ವಿನಯ ಕುಮಾರ್ ಸೊರಕೆನಂಚಿನ ಜವನೆರೆಗ್ ಅವಕಾಶ ಮಲ್ತ್ ಕೊರ್ತೆರ್. ಎಂಕ್ ನಿರೀಕ್ಷೆ ಇತ್ತಿಜಿಡಲ ಮುಲ್ಕಿ ಮೂಡುಬಿದಿರೆ ಕ್ಷೇತ್ರೊಡು ಅವಕಾಶ ಮಲ್ತ್ ಕೊರ್ದು ಮಂತ್ರಿ ಆವರೆಲ ಆರ್ ಕಾರಣ ಆತೆರ್.ಆರ್ ಒರಿ ಧೀಮಂತ ವ್ಯಕ್ತಿ ಪಂದ್ ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಪಂಡೆರ್.
ಆರ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ವತಿರ್ದ್ ದಿ.ಆಸ್ಕರ್ ಫರ್ನಾಂಡೀಸೆರೆಗ್ ಸನಿಯಾರ ಪಕ್ಷದ ಕಚೇರಿ ಡ್ ನಡತಿನ ಶ್ರದ್ಧಾಂಜಲಿ ಸಭೆಟ್ಟ್ ಪಾತೆರಿಯೆರ್.

ಆಸ್ಕರಣ್ಣೆ ಒರಿ ಸರಳ ಜೀವಿ. ಎಂಪಿ ಆದಿತ್ತ್ಂಡಲ ಬಸ್ ಟ್ ಸಂಚಾರ ಮಲ್ತೊಂದಿತ್ತೆರ್. ಏರೆಡಲ
ಬೇಧಬಾವ ದೀವಂದೆ ಸಮಾನವಾದ್ ತೂತಿನಾರ್.ಆಸ್ಕರಣ್ಣೆಲ ಅಂಚೆನೇ ಜನಾರ್ಧನ ಪೂಜಾರ್ಲು ಬಂಗ್ಲೆ, ದುಡ್ಡು ಮಲ್ಪಂದೆ ಶ್ರೀಮಂತಿಕೆ ತೋಜಾವಂದೆ ತುಳುನಾಡ್ ದ ಮಣ್ಣ್ ದ ಗುಣ ದಾದ ಪಂದ್ ತೆರಿಪಾದ್ ಕೊರ್ತೆರ್. ಆರ್ ಒರಿ ದೇವತಾ ಮನುಷ್ಯೆ ಪಂದ್ ಆರೆನ್ ನೆನೆತೊಂಡೆರ್.
ಯುವ ನಾಯಕೆ ಮಿಥುನ್ ರೈ ಪಾತೆರ್ದ್, ಕಾಂಗ್ರೆಸ್ ಪಂಡ ಆಸ್ಕರಣ್ಣೆ. ಆಸ್ಕರಣ್ಣೆ ಪಂಡ ಕಾಂಗ್ರೆಸ್ ಪನ್ಪಿಲೆಕ್ಕ ಇತ್ತೆರ್ ಆಸ್ಕರ್ ಫರ್ನಾಂಡೀಸೆರ್. ಓಲಾಂಡಲ ಕಾಂಗ್ರೆಸ್ ದ ಸಭೆ ಇತ್ತ್ಂಡ ಕಾರ್ಯಕರ್ತೆ ರೆನ್ ಮೆಟಡೋರ್ ಡ್ ಆರೇ ಡ್ರೈವ್ ಮಲ್ತ್ ಲೆತೊಂದು ಪೋವೊಂದಿತ್ತೆರ್. ಆತೊಂಜಿ ಸರಳಜೀವಿ ಆರ್ ಪಂಡೆರ್.ಕೆಪಿಸಿಸಿ ಕೋಆರ್ಡಿನೇಟರ್ ವಸಂತ ಬೆರ್ನಾಡ್, ಕೆಪಿಸಿಸಿ ಹಿಂದುಳಿದ ವರ್ಗದ ಕಾರ್ಯದರ್ಶಿ ಪ್ರವೀಣ್ ಬೊಳ್ಳೂರು, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ್, ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆರ್ ಪದ್ಮಾವತಿ ಶೆಟ್ಟಿ, ಪ್ರತಿಭಾ ಕುಳಾಯಿ, ಪ್ರಮೋದ್ ಕುಮಾರ್ , ಹಸನಬ್ಬ ಮೊಕುಲು ಮಾತ ಇತ್ತೆರ್.ಮಾತೆರ್ಲ ಒಂಜಿ ನಿಮಿಷ ಮೌನ ಪ್ರಾರ್ಥನೆ ಮಲ್ತ್ ದ್ ಆಸ್ಕರ್ ಫೆರ್ನಾಂಡಿಸೆರ್ನ ಭಾವಚಿತ್ರೊಗು ಪುಷ್ಪಾರ್ಚನೆ ಮಲ್ತೆರ್.

ರಾಜಕೀಯ ಮಲ್ಪಂದೆ ಕೋವಿಡ್ ನಿರ್ಮೂಲನೆಗ್ ಸಾಕಾರ ಕೊರ್ಲೆ : ದಿನೇಶ್

ಕಲ್ಲಡ್ಕ ಮೇ 20: ಕೋವಿಡ್ ನಿರ್ಮೂಲನೆನೇ ನಮ್ಮ ಸುರುತ್ತ ಆದ್ಯತೆಯಾದುಂಡು ರಾಜಕೀಯ ಮಲ್ಪಂದೆ ಮಾತೆರ್ಲ ಜವಬ್ದಾರಿರ್ದ್ ವರ್ತಿಸಾಲೆ ಗ್ರಾಮ ಪಂಚಾಯತ್ ದ ಒಟ್ಟುಗು ಸಾಕಾರ ಕೊರ್ಲೆ ಪಂದ್ ಗ್ರಾಮ ಪಂಚಾಯತ್ ಗುರ್ಕಾರ್ಲಾಯಿನ ದಿನೇಶ್ ಪಂಡೆರ್.

ಮೇರ್ ವೀರಕಂಭ ಗ್ರಾಮ ಪಂಚಾಯತ್ಡ್ ಬುಧವಾರ ನಡತಿನ ಕೋವಿಡ್ ಟಾಸ್ಕ್ ಫೋರ್ಸ್ ಸಮಿತಿ ಸಭೆಟ್ ಸಮಿತಿದ ಸದಸ್ಯೆರಾಯಿನ ವೀರಕಂಭ ವ್ಯಾಪ್ತಿದ ಆರೋಗ್ಯ ಸಹಾಯಕಿಯೆರ್ , ಆಶಾ ಕಾರ್ಯಕರ್ತೆರ್ , ಅಂಗನವಾಡಿ ಶಿಕ್ಷಕಿರ್ ಅಂಚನೆ ಪಂಚಾಯತ್ ದ ರಡ್ಡ್ ಸಿಬ್ಬಂದಿಲೆಗ್ ಪಂಚಾಯತ್ ವತಿರ್ದ್ ರೈನ್ ಕೋಟು ಬೊಕ್ಕ ಮಾಸ್ಕ್ ಕೊರ್ದು ಪಾತೆರಿಯೆರ್.

ಪಂಚಾಯತ್ ವ್ಯಾಪ್ತಿದ ಪ್ರತಿ ವಾರ್ಡ್ ದ ಸದಸ್ಯೆರ್ ತಮ್ಮ ವ್ಯಾಪ್ತಿಡುಪ್ಪುನ ಅಂಗಡಿಲೆನ್ ಜಿಲ್ಲಾಡಳಿತ ಕೊರಿನ ಪೊರ್ತುಡು ತಕ್ಕ ಬೇಲೆ ಮಲ್ಪರೆ ಅಂಚನೆ ಹೊರರಾಜ್ಯ ಪಿದಾಯಿದ ಜಿಲ್ಲೆರ್ದ್ ಬರ್ಪಿನ ನಾಗರಿಕೆರ್ನ ಬಗ್ಗೆ ಮಾಹಿತಿ ಕೊರ್ಪಿನೆತ್ತ ಒಟ್ಟುಗು ತಮ್ಮ ತಮ್ಮ ವಾರ್ಡ್ ವ್ಯಾಪ್ತಿಡ್ 45 ವರ್ಷ ಜಾಸ್ತಿ ಆಯಿನಕುಲು ಲಸಿಕೆ ಪಾಡೆರೆ ಬಾಕಿ ಇಪ್ಪುನ ನಾಗರಿಕೆರೆನ್ ಗುರ್ತಿಸಾದ್ ಲಸಿಕೆ ಪಾಡಾವುನ ಜವಾಬ್ದಾರಿ ಕೊರಿಯೆರ್.
ಗ್ರಾಮ ಪಂಚಾಯತ್ ಒತ್ತು ಗುರ್ಕಾರ್ದಿ ಶ್ರೀಮತಿ ಶೀಲಾ ವೇಗಸ್ ,ಪಿ‌.ಡಿ.ಒ. ಗಿರಿಜಾ ಪಿ., ಗ್ರಾಮ ಕರಣಿಕ ಕರಿಬಸಪ್ಪ, ಟಾಸ್ಕ್ ಫೋರ್ಸ್ ಸಮಿತಿ ಸದಸ್ಯೆರ್ ಪಾಲ್ ಪಡೆದಿತ್ತೆರ್ .