ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಳುನಾಡ್ (ರಿ.) ಮುತಾಲಿಕೆಡ್ ತುಳು ಲಿಪಿ ಕಲ್ಪುನ ಕಜ್ಜಕೊಟ್ಯೊಗು ಎಡ್ಡೆ ಪ್ರತಿಕ್ರಿಯೆ
ತುಳು ಬಾಸೆಗ್ ತಾನಮಾನೊ ತಿಕ್ಕೊಡುಂದು ಸೊರೊ ಲಕ್ಕುನ ಪೊರ್ತುಡೇ, ತುಳು ಬಾಸೆದ ಲಿಪಿ ಬುಲೆಚ್ಚಿಲ್ಲಾ ಬೀಸೊಟು ಬುಲೆವೊಂದುಂಡು. ಆವೊ ಬುಲೆಯೊಂದುಪ್ಪುನ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಳುನಾಡ್ (ರಿ.) ಮುತಾಲಿಕೆಡ್ ತುಳು ಲಿಪಿ ಕಲ್ಪುನ ಕಜ್ಜಕೊಟ್ಯ ತುಳುನಾಡೊರ್ಮೆ ಆವೊಂದುಂಡು. ಆನ್ ಲೈನ್ ಡ್ ತುಳು ಲಿಪಿ ಕಲ್ಪುನ ಕಜ್ಜಕೊಟ್ಯೊಗು ಎಡ್ಡೆ ಪ್ರತಿಕ್ರಿಯೆ ತಿಕ್ ದ್ಂಡ್. ಅಕ್ಟೋಬರ್ 18ಗು ನಡತಿನ ರಡ್ಡನೇ ಹಂತೊದ ಆನ್ ಲೈನ್ ಪರೀಕ್ಷೆಡ್ 400 ರ್ದ್ ಜಾಸ್ತಿ ಜನ ತುಳು ಲಿಪಿ ಪರೀಕ್ಷೆ ಬರೆತೆರ್.
ಪರೀಕ್ಷೆ ಬರೆತಿನೆಟ್ ಡಾಕ್ಟರ್ಸ್, ಇಂಜಿನಿಯರ್ಸ್, ಸೈಂಟಿಸ್ಟ್, ಶಿಕ್ಷಕೆರ್, ವಿದ್ಯಾರ್ಥಿಲು, ಜೋಕುಲು, ಬೇತೆ ಬೇತೆ ದಿನಕೂಲಿ ಬೇಲೆಗ್ ಪೋಪಿನಕುಲು, ಪಿದೈದೇಶ, ಪಿದೈರಾಜ್ಯ,ಪಿದೈಜಿಲ್ಲೆಲೆಡ್ ಉಪ್ಪುನ ಊರುದಕುಲು ಇಂಚ ಮಸ್ತ್ ಜನ ತುಳು ಲಿಪಿ ಕಲ್ತ್ ಪರೀಕ್ಷೆ ಬರೆತೆರ್. ಈ ಪರೀಕ್ಷೆಡ್ 5 ಜನ 100 ಅಂಕೊಲೆನ್, 15 ಜನ 99 ಅಂಕೊಲೆನ್ ಬೊಕ್ಕ 16 ಜನ 98 ಅಂಕೊಲೆನ್ ಪಡೆಯೊಂದೆರ್.ತುಳು ಲಿಪಿ ಬುಲೆಚ್ಚಿಲ್ಗ್ ಆದ್ ಜೈ ತುಲುನಾಡ್ ಕಡೆರ್ದ್ ತುಳುನಾಡ್ದ ಒರ್ಮೆಲಾ ತುಲು ಲಿಪಿ ಕಲ್ಪಾವುನ ಕಾರ್ಯಗಾರ ನಡತ್ತೊಂದುಂಡು. ಐತ ಒಟ್ಟುಗು ಮಹಾರಾಷ್ಟ್ರ , ಗುಜರಾತ್, ದೆಹಲಿ ಅಂಚೆನೆ, ಗಲ್ಫ್, ಅಮೆರಿಕಾ, ಆಸ್ಟ್ರೇಲಿಯಾ, ಇಸ್ರೇಲ್ಡ್ ಉಪ್ಪುನ ತುಳುವೆರ್ಲಾ ತುಳು ಲಿಪಿ ಆನ್ ಲೈನ್ ಮುಕೇನ ಕಲ್ತ್ ಪರೀಕ್ಷೆ ಬರೆಯೊಂದುಲ್ಲೆರ್. ಲಿಪಿ ಕಲ್ತಿನಕುಲು ತುಳು ಲಿಪಿತ ಬುಲೆಚ್ಚಿಲ್ಗ್ ತನ್ಕುಲೆರ್ದ್ ಆಪಿನ ಪುನೆಪುಲಾ ಮಲ್ತೊಂದುಲ್ಲೆರ್. ಅಂಚಾದ್ ತುಳು ಲಿಪಿ ಊರೊರ್ಮೆ ಪಸರೊಡಾಂಡ ಲಿಪಿ ಕಲ್ಪಾವುನ ಈ ಕಾರ್ಯಗಾರ ನನಾತ್ ಕಡೆಟ್ ಆವೊಡು. ಈ ಪ್ರಯತ್ನೊನು ನಿರಂತರವಾದ್ ಮಲ್ಪುವ.
– ಶ್ರೀ ಸುದರ್ಶನ್ ಸುರತ್ಕಲ್
ಗುರ್ಕಾರ್ಲು
ಜೈ ತುಳುನಾಡ್ (ರಿ.)