ಮುಲ್ಕಿ

ಅಟಿಲ್ದ ಬೇಲೆದಕ್ಲೆನ್ ತಾತ್ಸಾರ ಮಲ್ಪರೆ ಬಲ್ಲಿ: ಹರಿಕೃಷ್ಣ ಪುನರೂರು – ಪಾಕ ಪ್ರವೀಣೆ ಪಾವಂಜೆ ವೆಂಕಟೇಶ್ ಭಟ್ರೆಗ್ ಹೊಸ ಅಂಗಣದ ಮಾನಾದಿಗೆ

ಬ್ರಹ್ಮಕಲಶ, ನಾಗಮಂಡಲ ಇಂಚಿನ ಮಲ್ಲ ಮಲ್ಲ ಲೇಸ್ಡ್ ಸಾರ ಸಾರ ಜನತ್ತ ಅಟಿಲ್ ಮಲ್ತ್ ಪಾಡುನವು ಸುಲಭದ ಬೇಲೆ ಅತ್ತ್ ಅಟಿಲ್ ಮಲ್ಪುನವುಲಾ ಒಂಜಿ ವಿದ್ಯೆ. ಅಟಿಲ್ ಮಲ್ಪುನಕಲೆನ್ ಏರ್ಲ ತಾತ್ಸಾರ ಮಲ್ಪರೆ ಬಲ್ಲಿ. ಅಕಲೆನ್ ಸಮಾಜೊಡು ಗೊತ್ತು ಮಲ್ತ್‌ದ್ ಮಾನಾದಿಗೆ ಮಲ್ಪೊಡು ಪಂಡ್ ದ್ ಕನ್ನಡ ಸಾಹಿತ್ಯ ಪರಿಷತ್‌ದ ದುಂಬದು ಗುರ್ಕಾರ್ಲು ಧರ್ಮದರ್ಶಿ ಹರಿಕೃಷ್ಣ ಪುನರೂರು ಪಂಡೆರ್ .

ಹೊಸ ಅಂಗಣ ಪತ್ರಿಕೆರ್ದ್ ಮುಲ್ಕಿಡ್ ಶನಿಯಾರ ನಡತಿನ ಹೊಸ ಅಂಗಣ ಪತ್ರಿಕೆದ ಇಸೇಸ ಸಂಚಿಕೆ ಬುಡುಗಡೆ ಬೊಕ್ಕ ಕಟೀಲ್ದ ಬ್ರಹ್ಮಕಲಶೊಡು ಲಕ್ಷಗಟ್ಟಲೆ ಜನಕ್ಲೆಗ್ ಅಟಿಲ್ ಮಲ್ತ್ ಪಾರ್ದಿನ ಮಾಮಲ್ಲ ಪಾಕ ಪ್ರವೀಣೆ ಪಾವಂಜೆ ವೆಂಕಟೇಶ್ ಭಟ್ರೆನ ಮಾನಾದಿಗೆ ಲೇಸ್ಡ್ ಆರ್ ಗುರ್ಕಾರ್ಲೆನ ಕುರ್ಸುಡು ಕುಲ್ದು ಆರ್ ಪಾತೆರ್ಯೆರ್.

ಮಲ್ಲ ಬಿನ್ನೆರಾದ್ ಕೆನರಾ ಬ್ಯಾಂಕ್ದ ನಿವೃತ್ತ ಮ್ಯಾನೇಜರ್ ಸತೀಶ್ ಭಂಡಾರಿ, ಮುಲ್ಕಿ ನಗರ ಪಂಚಾಯ್ತಿದ   ಪದುಕೆರ್ ಪುತ್ತು ಬಾವ , ಬಪ್ಪನಾಡು ಯುವಕ ವೃಂದದ ಗುರ್ಕಾರ್ಲು ಕೃಷ್ಣ ಶೆಟ್ಟಿ ಕುಬೆವೂರು, ಮುಲ್ಕಿ ರೋಟರಿ ಕ್ಲಬ್ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ಟಿ, ವಾಸು ಪೂಜಾರಿ ಚಿತ್ರಾಪು ಮೊಕುಲು ಮಾತಾ ಬತ್ತಿತ್ತೆರ್.

ನೆರ್ದ್ ದುಂಬು ಹೊಸ ಅಂಗಣ ಸತ್ತಿರದ ರುದ್ರ ನರಸಿಂಹ ದೇವರ್ನ ಪ್ರತಿಷ್ಟಾ ಪುಣ್ಣಮೆದ ವಿಶೇಷ ಸಂಚಿಕೆ ಬುಡುಗಡೆ ಮಲ್ತೆರ್.

ಅಟಿಲ್ದ ಮಲ್ಪ ಕಾಂಟ್ಯಾಕ್ಟರ್, ಕ್ರೀಡಾಪಟು,ಪಿಲಿ ನಲಿಕೆದ ತೀರ್ಪುಗಾರೆರ್ ಆತೇ ಅತ್ತಂದೆ ಕಲಾವಿದೆರಾಯಿನ ಪಾವಂಜೆ ವೆಂಕಟೇಶ್ ಭಟ್ರೆನ್ ಬಿನ್ನೆರ್ ಸಾಲ್ ಪೊದೆತ್ ದ್ ಪೂತ್ತ ಮಾಲೆ ಪಾರ್ದ್ ಮಾನದಿಗೆ ಮಲ್ತೆರ್.

ಹೊಸ ಅಂಗಣದ ಸಂಪಾದಕೆರ್ ಡಾ.ಹರಿಶ್ಚಂದ್ರ ಸಾಲ್ಯಾನ್ ಮಾತರೆನ್ಲಾ ಎದ್ಕೊಂಡೆರ್. ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಮಲ್ಲ
ಕಾರ್ಯಂತೆರ್ ವಿಜಯಕುಮಾರ್ ಕುಬೆವೂರು ಮಾನದಿಗೆ ಪತ್ರ ಓದುದು ಪಂಡೆರ್.ವಾಮನ ಕೋಟ್ಯಾನ್ ನಡಿಕುದ್ರು ಸೊಲ್ಮೆ ಸಂದೈತ ಮಲ್ತೆರ್.ರವಿಚಂದ್ರ ಲೇಸ್ ನಡಪಾದ್ ಕೊರಿಯೆರ್.

ಲೋಕಮುಖಿ ಟ್ರಸ್ಟ್ ಕಟ್ಟೋಣೊಗು ಕೆಸರ್ ಕಲ್ಲ್

ಲೋಕಮುಖಿ ಟ್ರಸ್ಟ್ ದ ಪೊಸ ಕಟ್ಟೋಣಗ್ ಮುಲ್ಕಿ ಕೈತಲ್ದ ಶೀನಪ್ಪಯ್ಯ ಕೋಡಿದಲ್ಪ ಡಾ. ಕಲ್ಲಡ್ಕ ಪ್ರಭಾಕರ ಭಟ್ರ್ ಸೋಮಾರ ಕೆಸರ್ ಕಲ್ಲ್ ಪಾಡಿಯೆರ್.

ಮಂತ್ರಿಲು ಕೋಟ ಶ್ರೀನಿವಾಸ ಪೂಜಾರಿ, ಶಾಸಕೆರ್ ಉಮಾನಾಥ ಕೋಟ್ಯಾನ್, ಮುಲ್ಕಿ ಸೀಮೆ ಅರಸೆರ್ ದುಗ್ಗಣ್ಣ ಸಾವಂತೆರ್, ಸೀತಾರಾಮ ಶೆಟ್ರ್, ವೈ.ಎನ್.ಸಾಲ್ಯಾನ್, ಸೋಂದ ಭಾಸ್ಕರ ಭಟ್ರ್, ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಭುವನಾಭಿರಾಮ ಉಡುಪ, ಸುನಿಲ್ ಆಳ್ವ, ಶೋಭೇಂದ್ರ ಸಸಿಹಿತ್ಲು ಮೊಕುಲು ಮಾತಾ ಲೇಸ್ ಡ್ ಪಾಲ್ ಪಡೆಯೆರ್.

ಮುಲ್ಕಿ ಯುವವಾಹಿನಿದ ತುಡರ ಪರ್ಬ ಉದಿಪನ ಬೊಕ್ಕ ಎಚ್.ವಿ.ಕೋಟ್ಯಾನ್ ರೆಗ್ ಮಾನಾದಿಗೆ

ಮುಲ್ಕಿ ಯುವವಾಹಿನಿದಕಲೆಡ್ದ್ ಪದಿನೆಡ್ಮನೇ ವರ್ಷದ ತುಳುವೆರೆ ತುಡರ ಪರ್ಬ ಶುಕ್ರಾರ ಮುಲ್ಕಿ ದ ಬಿಲ್ಲವ ಸಂಘದ ಸಭಾಂಗಣೊಡು ಪರ್ಬದ ಕಟ್ಟ್ ಕಟ್ಟಳೆ ಪ್ರಕಾರ ನಡತ್ಂಡ್.

ಕಾಂಡೆದ ಪೊರ್ತುಗು ಯುವವಾಹಿನಿದ ಪೊಂಜೊವುಲೆನ ಕೂಟದಕುಲು ಪೆತ್ತ ಕೈಕಂಜಿಲೆಗ್ ಪೂಜೆ ಮಲ್ತ್
ತೆನಸ್ ತಿನ್ಪಾಯೆರ್.
ಬೈಯದ ಲೇಸ್‌ನ್ ಹರಿಹರ ಕ್ಷೇತ್ರದ ಶ್ರೀ ವಿಷ್ಣುಮೂರ್ತಿ ದೇವಸ್ಥಾನದ ಅರ್ಚಕೆ ರ್ ಶ್ರೀ ಹಯಗ್ರೀವ ತಂತಿಲು ಲೇಸ್‌ದ ಉದಿಪನ ಮಲ್ತೆರ್.

ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ್ ದುಂಬು ದೀವೊಂದು ನಿಕುಲು ಮಲ್ಪುನ ಪೂರಾ ಕಜ್ಜಲಾ ಎಡ್ಡೆ ಆವಡ್ ಕೊರೋನಾ ಸೀಕ್ದ ಕತ್ತಲೆ ಮಾಜಿದ್ ಜಗತ್ತೇ ಬೊಲ್ಪು ಅರ್ಲಡ್ ಪಂಡ್‌ದ್ ಹಯಗ್ರೀವ ತಂತ್ರಲು ಆಶೀರ್ವಾದ ಮಲ್ತೆರ್.

ಲಯನ್ಸ್ ಕ್ಲಬ್ ಸುರತ್ಕಲ್ ನೆತ್ತ ಮಾಜಿ ಗುರ್ಕಾರ್ಲು ಮೊಯಿದ್ದಿನ್ ಕುಂಞ, ಮೂಲ್ಕಿ ಸಿಎಸ್‌ಐ ಚರ್ಚ್‌ದ ಧರ್ಮ ಗುರುಕುಲು ರೆ.ಎಡ್ವರ್ಡ್ ಎಸ್. ಕರ್ಕಡ, ಮೂಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರ್ಲು ರಮೇಶ್ ಅಮೀನ್ ಕೊಕ್ಕರಕಲ್, ಯುವವಾಹಿನಿ ಮುಲ್ಕಿದ ಗುರ್ಕಾರ್ಲ ದಿವಾಕರ ಕೋಟ್ಯಾನ್, ಕಾರ್ಯಂತೆರ್ ವಿನಯಕುಮಾರ್ ಮಟ್ಟು ಮಿತ್ತ ಚಾವಡಿಡ್ ಓಲಗ ಆದಿತ್ತೆರ್. ಉಂದುವೇ ಪೊರ್ತುಡು ಸಮಾಜ ಸೇವಕರ್, ಮುಲ್ಕಿ ಬಿಲ್ಲವ ಸಂಘದ ಮಾಜಿ ಗುರ್ಕಾಲು ಎಚ್.ವಿ.ಕೋಟ್ಯಾನ್ ಮೆರೆಗ್ ಮಾನಾದಿಗೆ ಮಲ್ತೆರ್,

ಲೇಸ್‌ದ ಮುತಾಲಿಕೆ ವಹಿಸಿನ ಮಾಧವ ಪೂಜಾರಿ ಕಿಲ್ಪಾಡಿ, ಪಣವುದ ಪಾಲವೆರ್ ರಿತೇಶ್ ಅಂಚನ್ ಬೊಕ್ಕ ಯುವವಾಹಿನಿ ಮಾತಾ ಸದಸ್ಯೆರ್ಲ ಈ ಲೇಸ್ಡ್ ಪಾಲ್ ಪಡೆಯೆರ್.

ಉದಯ ಕುಮಾರ್ ಮಟ್ಟು ಪ್ರಸ್ತಾವನೆ ಮಲ್ತೆರ್, ವಿನಯ ಕುಮಾರ್ ಮಟ್ಟು ವಂದನೆ ಮಲ್ತೆರ್, ಮೋಹನ್ ಕುಮಾರ್ ಲೇಸ್‌ದ ನಿರೂಪಣೆ ಮಲ್ತೆರ್ .